31 C
Phnom Penh

បុរស​​​​នៅ​​​អង្គ​​​រ​​​បុរី​​​ពីរនាក់​​​​កាប់​​​សម្លាប់​ស្ត្រី​ម្ចាស់ហាង​ជន​ជាតិ​វៀត​​ណាម​ដោយ​​សារ​ទារលុយ​ថ្លៃស្រា

ដោយ ឌឹ ខេមបូឌា ដេលី

បទវិភាគ

នគរ​បាល​បាន​និយាយ​កាល​ពីម្សិល​មិញ​​ថា បុរស​​ពីរនាក់​ត្រូវ​បាន​ចាប់​ខ្លួន​កាល​​ពីថ្ងៃ​អា​ទិត្យ​ ពី​​​បទ​​​​សម្លាប់​ស្ត្រី​ម្ចាស់​ហាង​​​ជន​ជាតិ​​វៀត​ណាម​ម្នាក់​នៅ​ក្នុង​​ទី​ប្រជុំ​ជន​​​​ស្រុក​អង្គរបុរី ខេត្ត​​តា​កែវ​ បន្ទាប់ ពី​ពួក​គេ​បាន​ទិញ​​​​​​ស្រា​មួយ​​​ដប​ហើយ​មិន​ព្រ​ម​ឲ្យលុយ​។


យោ​ងតាម​លោក ​ហូ៊ ហឿន មេ​បុ៉ស្តិ៍​ឃុំ​គោក​ធ្លក​ បាន​​ឲ្យ​ដឹង​ថា ជន​សង្ស័យ​ទាំង​ពីរ​នាក់​ឈ្មោះ ស្រ៊ុន​​​ វុធ អាយុ​២៤​ឆ្នាំ និង ស្រាន សារុន អាយុ​២៦​ឆ្នាំ​បាន​ទៅ​​ហាង​របស់​ស្ត្រី​រង​គ្រោះ​ ដែល​នគរ​បាល​​ប្រាប់​អត្ត​​សញ្ញា​ណ​ថា ឈ្មោះ ង្វៀន ភីបេបា អាយុ​៥៩​ឆ្នាំ កាល​ពី​សៀល​ថ្ងៃ​អាទិត្យ​ ទិញ​​ស្រា​ស​មួយ​ដប​តម្លៃ​ប្រហែល​៥​ដុល្លារ ហើយ​បាន​ជិះ​ចេញ​ទៅ​បាត់​ដោយ​​និយាយ​ថា ពួក​គេ​នឹង​យក​ប្រាក់​មក​ឲ្យ​ថ្លៃ​ស្រា​​នៅ​ថ្ងៃ​ក្រោយ​។

នៅល្ងាច​ថ្ងៃ​ដដែល​នោះ​ ពួកគេ​បាន​ត្រឡប់មក​ហាង​នេះ​វិញ​ ហើយ​បាន​សុំ​ទិញ​ស្រា​​​មួយ​ដប​ទៀត​ ក៏មិន​បាន​ឲ្យ​ប្រាក់​ដដែល​​​។ លោក ​ហ៊ូ ហឿន មាន​ប្រសា​សន៍​​ថា “ ជន​រង​​​គ្រោះ​​​ខឹង​​​​ ហើយ​បាន​ទារ​លុយ​​ ដោយ​មិន​ព្រម​​​​លក់​ស្រា​ឲ្យ​ពួក​គេ​ទៀត​ទេ​។ដូច្នេះ​ពួក​​​គេ​បាន​កាប់​ស្ត្រី​​រូប​​នេះ​ចំ​ក្បាល​​រហូត​ដល់​ស្លាប់​”។
លោក​ ហ៊ូ ហឿន​ បាន​មាន​ប្រសាសន៍ថា ស្ត្រី​រង​គ្រោះ​ត្រូវ​បាន​កាប់​នឹង​កាំបិតប័ុងតោ​​ចំក្បាល​​ ហើយ​​​វាយ​នឹង​ដែក​បំពង់​ទីប ដែល​ក្រោយមក​​​គេ​ប្រទះ​ឃើញ​ទុក​ចោ​ល​នៅ​​​ក្បែរ​​​​កន្លែង​កើត​ហេតុ​។

លោក​ ម៉ក់ វី នាយ​នគរបាល​បច្ចេ​ក​ទេស​ស្រុក​អង្គរ​បុរី បាន​មាន​ប្រសាសន៍ថា​​​​​​ ជន​រង​គ្រោះ​រស់​នៅក្នុង​ខេត្ត​អាង​យ៉ាង​​​ ប្រទេស​វៀតណាម​​​​ ហើយ​​បាន​ឆ្លង​ដែន​មក​​បើក​ហាង​រកស៊ីនៅក្នុង​ខេត្ត​តាកែវ​។ លោក​ ម៉ក់ វី បាន​មាន​​ប្រសាសន៍​ថា មន្ត្រី​មូល​ដ្ឋាន​​មក​ពី​ប្រទេស​វៀត​ណាម​បាន​មក​យក​សាក​សព​ស្ត្រី​រង​គ្រោះ​ប្រគល់​ឲ្យ​សាច់​​​ញាតិ​របស់​គា​ត់​​​​ ហើយ​កំពុងសាក​សួរ​ជន​សង្ស័យ​ទាំង​ពីរ​នាក់នៅឡើយ​​​ដែល​នឹង​ត្រូវ​បញ្ជូនទៅ​ស្នង​ការ​ដ្ឋាន​​នគរ​បាល​ខេត្ត​នៅ​ថ្ងៃ​ស្អែក៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស