26 C
Phnom Penh

អាជ្ញាធរ​​បន្ទោស​​ពលរដ្ឋ​ខ្មែរ​រស់នៅ​ក្រៅ​ប្រទេស​ចំពោះ​កា​រចែក​ចាយ​ខិត្តប័ណ្ណ​ប្រឆាំង​​រដ្ឋាភិបាល

ដោយ ឌឹ ខេមបូឌា ដេលី

បទវិភាគ

នគរ​បាល​ខេត្ត​បន្ទាយមាន​ជ័យ​​កំពុងតែ​​​ស្វែង​រក​អ្នក​ដែល​នៅ​ពី​ក្រោយ​​ការ​បោះ​ពុម្ព​ខិ​ត្តប័ណ្ណ​អនាមិក​ជាច្រើនសន្លឹក​​ទាម​ទារ​ឲ្យ​​មានការ​ផ្តួលរំលំ​រដ្ឋាភិបាល​របស់​លោក​​នាយក​រដ្ឋ​មន្ត្រី​ ហ៊ុន សែន ។

លោក គោ  ស៊ុំសារឿត អភិ​បាល​ខេត្ត​បន្ទាយ​មាន​ជ័យ​បានមាន​ប្រសា​សន៍​ថា ខិត្ត​ប័ណ្ណ​ជាង​១២០​សន្លឹក​ត្រូវ​បាន​គេ​ប្រទះ​ឃើញ​កាល​ពី​ព្រឹក​ថ្ងៃ​អាទិត្យ​នៅ​ក្បែរ​វត្ត​មួយ​ និង​នៅ​ក្បែរ​សាលា​វិក្រឹតការ​ក្នុង​ក្រុង​សិរី​សោភ័ណ ខេត្ត​បន្ទាយ​មាន​​ជ័យ​។អាជ្ញាធរ​ខេត្ត​បាន​ឲ្យ​ដឹង​កាល​ពីម្សិល​មិញ​ថា ខិត្ត​ប័ណ្ណ​ទាំង​នោះ​ក៏​បាន​អំពាវ​នាវ​ឲ្យ​ដោះ​លែង​អ្នក​ជាប់​ឃុំ​ទាំង​២១នាក់​ និង​ព្រះ​សង្ឃ​ដែលជាប់​ពន្ធនាគារផង​ដែរ​។

លោក ស៊ុំសារឿត​ បានមាន​ប្រសា​សន៍​ថា “ ទី១​ ខិត្ត​ប័ណ្ណ​អនាមិក​ទាំង​នេះ​ទាម​ទារ​ឲ្យ​ដោះលែង​ព្រះ​សង្ឃ​​កម្ពុជា​ក្រោម​​បី​អង្គ​ ទី​២​ទាម​ទារ​ឲ្យ​ដោះ​លែង​លោក វ៉ន ពៅ ប្រធាន​សមា​គម​ប្រជាធិ​ប​តេយ្យ​​ឯករាជ​្យនៃ​សេដ្ឋ​កិច្ច​ក្រៅ​ប្រព័ន្ធ និង​កម្មករ​ជា​ច្រើន​នាក់​ទៀត​”។ ខិត្ត​ប័ណ្ណ​ទាំង​នេះ​មិន​បាន​លើកឡើង​​លម្អិត​​អំពី​អត្ត​សញ្ញាណ ឬ​កន្លែង​​ឃុំ​ខ្លួន​ព្រះ​សង្ឃ​ទាំង​បី​អង្គ​នោះ​ឡើយ​។លោ​កបានមាន​ប្រសាសន៍​ថា “ បញ្ហា​សំខាន់​មួយ​ទៀត​គឺថា ខិត្ត​ប័ណ្ណ​អនាមិក​ទាំង​នេ​ះ​អំពាវនាវ​ឲ្យរួម​កម្លាំង​គ្នា​ផ្តួល​រំលំ​នាយក​រដ្ឋ​មន្ត្រី​បច្ចុប្បន្ន​”។ លោក ស៊ុំសារឿត បានមាន​ប្រសា​សន៍​ថា លោក​បាន​ណែនាំ​នគរ​បាល​ខេត្ត​ និង​អាជ្ញាធរ​ ពាក់​ព័ន្ធ​ដទៃ​ទៀត​ឲ្យ​ធ្វើ​ការ​សើុប​អង្កេត និង​ស្វែង​រក​អ្នក​ដែល​ទទួល​ខុស​ត្រូវ​ក្នុងការ​បោះ​​​ពុម្ពខិត្ត​ប័ណ្ណ​​ទាំង​នេះ​។ លោក​បានមាន​ប្រសាសន៍​ថា លោក​ជឿ​ថា ប្រជា​ពល​រដ្ឋ​ខ្មែរ​ដែល​រស់​នៅ​ក្រៅ​ប្រទេស​​ជា​អ្នក​ទទួល​ខុស​ត្រូវ​ចំពោះ​ខិត្ត​ប័ណ្ណ​ទាំង​នេះ ពីព្រោះ​ខិត្ត​ប័ណ្ណ​​នេះ​មាន​រូប​សញ្ញា​​របស់​រណសិរ្ស​រំដោះ​ជាតិ​ខ្មែរ​ ជា​ក្រុម​សកម្ម​ជន​ដែល​មាន​មូល​ដ្ឋាន​នៅ​ប្រទេស​ដាណឺម៉ាក។

កាល​ពីឆ្នាំ​មុន បុរស​ប្រាំពីរនាក់​​​ដែល​តាម​​ចោទ​ថា បាន​ជាប់​ពាក់​ព័ន្ធ​នឹង​រណ​សិរ្ស​រំដោះ​ជាតិ​ខ្មែរ​នេះ​រួម​ទាំង​​ព្រះ​សង្ឃ​ខ្មែរ​ក្រោម​បី​អង្គផង​នោះ ​​​ត្រូវ​បាន​ឃុំខ្លួន​​​តាម​ការ​​ចោទ​ប្រកាន់​ពីបទ​បង្កើត “​ អង្គ​ការ​ភេរ​វ​កម្ម​ប្រដាប់​​​អាវុធ​” បន្ទាប់​ពី​​មាន​ការ​ចោទ​ថា ​បាន​ចែក​ចាយ​ខិត្ត​ប័ណ្ណ​​ប្រឆាំង​រដ្ឋាភិបាល​។
ករណីនេះ​ដូច​​ករណី​ជា​ច្រើនទៀតដែរ ​ភ័ស្តុ​តាង​មិនគ្រប់គ្រាន់​​ត្រូវ​បាន​បង្ហាញ​នៅ ក្នុង​តុលាការ​ដើម្បី​គាំទ្រ​ការ​អះអាង​របស់​រដ្ឋាភិបាល​ប្រឆាំង​នឹង​ចុង​ចោទ​។
លោក ស៊ុម ចាន់​គា អ្នក​សម្រប​សម្រួល​អង្គការ​សិទ្ធិ​មនុស្ស​អាដ​ហុក​ប្រចាំ​ខេត្ត​នេះ​បានមាន​ប្រសាសន៍ថា លោក​បាន​ឃើញ​ខិត្ត​ប័ណ្ណ​​នេះ​​បន្តិច​ដែរកាល​ពីថ្ងៃ​អាទិត្យ ប៉ុន្តែ មិន​អាច​បញ្ជាក់ថា ខិត្ត​ប័ណ្ណ​​ទាំង​នេះ​អំពាវ​នាវ​ឲ្យផ្តួល​រំលំរដ្ឋាភិបាល​នោះឡើយ​។

លោក​ ស៊ុម ចាន់​គា បាន​មាន​ប្រសា​សន៍​ថា ” ខ្ញុំ​គិតថា វា​គ្រាន់​តែ​ជា​សេរី​ភាព​នៃការ​បញ្ចេញ​មតិ​ប៉ុណ្ណោះ​”។ លោក​បាន​បន្ថែមថា “ខិត្ត​ប័ណ្ណ​​ទាំង​នេះ​គ្រាន់​តែ​អំពាវ​នាវ​ឲ្យ ដោះ​លែង​កម្មករ​ដែល​ធ្វើ​កូដ​កម្ម​​ និង​ព្រះ​សង្ឃ​ខ្មែរ​ក្រោម​ដែល​​ជាប់​ឃុំ​ គឺគ្មាន​បំណង​អាក្រក់​បង្ក​បញ្ហា​ដល់​ប្រទេស​ជាតិ​ឡើយ​”។
​​ ដោយ​ផ្អែក​លើ​ការ​បក​ស្រាយ​ចោះ​ៗ​​និង​បែប​នយោបាយ​របស់​ក្រសួង​​មហា​ផ្ទៃ​​ទៅ​លើ​ការ​​លើកឡើង​របស់លោក​ កឹម​ សុខា​អំឡុង​ពេល​លោក​ធ្វើ​ដំណើរ​ទៅក្រៅ​ប្រទេស​​នោះ ​កាល​ពីថ្ងៃ​សុក្រ ក្រសួង​​នេះ​បាន​​ចុះ​ផ្សាយ​អត្ថ​បទ​មួយ​នៅលើ​គេ​ហ​ទំព័រ​​របស់​ខ្លួន​ចោទ​ប្រកាន់​លោក កឹម សុខា អនុ​ប្រធាន​គណបក្ស​សង្គ្រោះ​ជាតិ​ថា បាន​ព្យាយាម​ផ្តួល រំលំ​រដ្ឋាភិបាល៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស