កាលពីម្សិលមិញ ព្រះអង្គម្ចាស់ នរោត្តម រណឫទ្ធិ បានដាក់សំណើផ្លូវការទៅក្រសួងមហាផ្ទៃសុំបង្កើតគណបក្ស សង្គម រាស្ត្រ រាជាធិបតេយ្យ (CRPP) ដោយត្រួសត្រាយផ្លូវ សម្រាប់ការយាងចូលប្រឡូកនៅក្នុងឆាកនយោបាយលើកទី៣របស់ព្រះអង្គឡើងវិញចាប់តាំងពីព្រះអង្គត្រូវបានបណេ្តញចេញពីតួនាទីជាព្រះប្រធានគណបក្សហ្វុ៊នស៊ិនប៉ិចកាលពីឆ្នាំ២០០៦។
ព្រះអង្គម្ចាស់ នរោត្តម រណឫទ្ធិ ដែលធ្លាប់ ធ្វើជានាយករដ្ឋមន្ត្រីទី១ចាប់ពីឆ្នាំ១៩៩៣រហូតដល់ព្រះអង្គត្រូវបានផ្តួលរំលំដោយកម្លាំងដែលស្មោះត្រង់នឹងលោកនាយករដ្ឋមន្ត្រី ហ៊ុន សែន ដែលពេលនោះជានាយករដ្ឋមន្ត្រីទី២ក្នុងឆ្នាំ១៩៩៧ ហើយព្រះអង្គជាព្រះប្រធានរដ្ឋសភាចាប់ពីឆ្នាំ១៩៩៨ ដល់ឆ្នាំ២០០៦ដែរនោះ បានបង្កើតគណបក្សថ្មីកាលពីថ្ងៃអាទិត្យដោយអះអាងថា ការកើនឡើងនៃការគាំទ្រគណបក្សសង្គ្រោះជាតិគំរាមកំហែងដល់រាជាធិបតេយ្យ។
លោក នរាណាឫទ្ធិ អានន្ទដាយ៉ាត ប្រធាន ខុទ្ទកាល័យព្រះអង្គម្ចាស់ នរោត្តម រណឫទ្ធិ បានមានប្រសាសន៍ថា លោកបានដាក់សំណើ ផ្លូវការសុំបង្កើតគណបក្ស សង្គម រាស្ត្រ រាជាធិបតេយ្យកាលពីម្សិលមិញ។
លោក អានន្ទដាយ៉ាត បានបន្ថែមថា “ ខ្ញុំបានដាក់លិខិតទៅក្រសួងមហាផ្ទៃនៅម៉ោងប្រហែល២ និង៣០នាទីរសៀលដើម្បីស្នើ សុំបង្កើតគណបក្សថ្មីនេះ។
លោក អានន្ទដាយ៉ាត បានមានប្រសាសន៍ថា គណបក្ស សង្គម រាស្ត្រ រាជាធិបតេយ្យនឹងចូលរួមប្រកួតប្រជែងក្នុងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧ និងការបោះឆ្នោតជាតិនៅឆ្នាំ២០១៨ ប៉ុន្តែលោកបានបដិសេធមិនធ្វើអត្ថាធិប្បាយបន្ថែមអំពីរចនាសម្ព័ន្ធឬកម្មវិធីនយោបាយរបស់គណបក្សឡើយ។ លោកបានមានប្រសាសន៍ថា “ យើងមិនអាចធ្វើអ្វីនៅដំណាក់កាលនេះទេ ពីព្រោះយើងទើបតែស្ថិតក្នុងដំណាក់កាលបង្កើតគណបក្សប៉ុណ្ណោះ។ យើងនឹងដាក់ចេញនូវកម្មវិធីនយោបាយដើម្បីផ្តល់សេវាសាធារណៈដែលឆ្លើយតបតាមតម្រូវការរបស់ប្រជាពលរដ្ឋ”។
អ្នករិះគន់គណបក្សសង្គម រាស្ត្រ រាជាធិបតេយ្យលើកឡើងថា គណបក្សនេះបង្កើត ឡើងគ្រាន់តែដើម្បីបំបែកសំឡេងឆ្នោតពីគណបក្សប្រឆាំងតែប៉ុណ្ណោះនៅពេលអ្នកគាំទ្រគណបក្សប្រជាជនកម្ពុជាបានថយចុះយ៉ាងច្រើន៕សារុន