មន្ត្រីសហជីពមា្នក់បានឲ្យដឹងថា កម្មករប្រហែល៧.០០០នាក់បានធ្វើការតវ៉ានៅខាងក្រៅរោងចក្រផលិតស្បែកជើង វីងស្តារ នៅក្នុងខេត្តកំពង់ស្ពឺកាលពីម្សិលមិញ ដោយទាមទារឲ្យក្រុមហ៊ុននេះដំឡើងប្រាក់បន្ថែម៥ដុល្លារ និងអនុវត្តច្បាប់ការងារឲ្យបានត្រឹមត្រូវ។
កូដកម្មនេះបានធ្វើឡើងរយៈពេល១០ខែ បន្ទាប់ពីពិដានរោងចក្របាក់ស្រុត និងបានធ្វើឲ្យកម្មករចំនួនពីរនាក់ស្លាប់។លោក ផន ផល អគ្គលេខាធិការរងរបស់សហជីពសេរីកម្មករបានមានប្រសាសន៍ថា កម្មករកំពុងតែទាមទារឲ្យក្រុមហ៊ុន វីងស្តារ ដំឡើងប្រាក់បន្ថែម ដែលរាប់ទាំងអាហារថ្ងៃត្រង់ ការដឹកជញ្ជូន ចាប់ពី១០ដុល្លារទៅ១៥ដុល្លារក្នុងមួយខែ។ លោកបានឲ្យដឹងថា កម្មករក៏កំពុងទាមទារឲ្យក្រុមហ៊ុនឈប់បង្ខំនិយោជិតធ្វើការហួសម៉ោង ឈប់កាត់ប្រាក់ខែអំឡុងការធ្វើកូដកម្ម ដកសន្តិសុខបុរស ចេញពីក្រៅបន្ទប់ទឹកស្រីនៅក្នុងរោងចក្រ។
លោក ផល បានឲ្យដឹងថា “ កូដកម្មនេះបានចាប់ផ្តើមកាលពីព្រឹកថ្ងៃនេះ និងឈប់នៅម៉ោង១១ព្រឹក បន្ទាប់ពីអាជ្ញាធរខេត្តបានរៀបចំជំនួបមួយសម្រាប់កម្មករ និងតំណាងក្រុមហ៊ុនដើម្បីស្វែងរកដំណោះស្រាយ”។លោកបានមានប្រសាសន៍បន្ថែមទៀតថា “ យើងនឹងទៅចូលរួមកិច្ចប្រជុំនៅថ្ងៃស្អែក ក៏ប៉ុន្តែ ប្រសិនបើមិនមានដំណោះស្រាយទេ កូដកម្មនៅតែបន្ត រហូតទាល់តែយើងទទួលដំណោះស្រាយសមស្របមួយ”។
លោក សឹុម រតនៈ ប្រធានមន្ទីរការងារខេត្តបានបញ្ជាក់ថា លោកបានអញ្ជើញកម្មករ និងតំណាងក្រុមហ៊ុនឲ្យមកជួបគ្នាក្នុងកិច្ចប្រជុំនៅថ្ងៃនេះ។
លោកស៊ឹម រតនៈ បានមានប្រសាសន៍ថា“ យើងបានទៅទីនោះក្នុងថ្ងៃនេះ ក្នុងគោលបំណងបញ្ឈប់កូដកម្ម ហើយយើងបានរៀបចំកិច្ចប្រជុំមួយសម្រាប់ភាគីទាំងពីរនៅ [មន្ទីរការងារខេត្ត] របស់យើងនៅថ្ងៃស្អែកសម្រាប់ចរចាគ្នា”។
លោក ម៉ៅ ឈីងសុង (Mao Chhing Song) អ្នកគ្រប់គ្រងនៅក្រុមហ៊ុន វីងស្តារ ស៊ូ ខូអិលធីឌី (Wing Star Shoes Co., Ltd.) បានឲ្យដឹងកាលពីម្សិលមិញថា ក្រុមហ៊ុននេះបានអនុវត្តតាមច្បាប់ការងាររួចហើយ។ លោកបានចោទប្រកាន់សហជីពសេរីកម្មករថា បានញុះញង់កម្មករឲ្យធ្វើកូដកម្ម ពីព្រោះក្រុមហ៊ុននេះបានស្នើសុំឲ្យកម្មករមួយចំនួនស្នាក់់នៅផ្ទះមួយរយៈដោយសារតែខ្វះការងារធ្វើ។លោកបានមានប្រសាសន៍ថា “ សហជីពសេរីកម្មករបានយកថ្ងៃនេះធ្វើកូដកម្មតវ៉ា និងវាយប្រហារក្រុមហ៊ុន បន្ទាប់ពីពួកយើងបានអនុញ្ញាតឲ្យកម្មករសម្រាកនៅផ្ទះពីរបីថ្ងៃ។ យើងនឹងបើកប្រាក់ខែឲ្យពួកគេ៥០ភាគរយ សម្រាប់អំឡុងពេលពួកគេនៅផ្ទះ ពីព្រោះរោងចក្ររបស់ពួកយើងមិនមានការងារឲ្យពួកគេធ្វើគ្រប់គ្រាន់ទេ”។
ក៏ប៉ុន្តែ ទាក់ទងទៅនឹងបុគ្គលិកសន្តិសុខ ភេទប្រុសដែលបានលួចមើលស្រីៗនៅក្នុងបន្ទប់ទឹកនោះ លោក ឈីងសុង បានសារភាពថា ក្រុមហ៊ុននេះមិនមានបុគ្គលិកភេទស្រីគ្រប់គ្រាន់សម្រាប់បំពេញការងារនេះទេ។ លោកថ្លែងថា “ យើងបានផ្សព្វផ្សាយជ្រើសរើសបុគ្គលិកសន្តិសុខភេទស្រីដែរ កាលពីមុន ក៏ប៉ុន្តែ មិនមានគ្រប់គ្រាន់ទេ ដូច្នេះបានជាយើងជួលបុគ្គលិកសន្តិសុខភេទប្រុសឲ្យតាមដានកម្មករដែលខ្ជិល និងសម្រាកនៅក្នុងបន្ទប់ទឹក”។
កាលពីខែឧសភាឆ្នាំមុន បុគ្គលិកពីរនាក់នៅរោងចក្រ វីងស្តារបានស្លាប់ ហើយ១១នាក់ផ្សេងទៀតបានរងរបួស នៅពេលពិដានដែលទើបនឹងសាងសង់រួចដោយគ្មានគុណភាព៕ សុធា