41.3 C
Phnom Penh

ប្រទេស​កម្ពុជា​ទទួល​បាន​ចំណាត់​ថ្នាក់​ល្អ​ជាង​មុន​ផ្នែក​ភ័ស្តុភារ​នៅ​ក្នុង​បញ្ជី​របស់​ធនាគារ​ពិភព​លោក​

ដោយ ឌឹ ខេមបូឌា ដេលី

បទវិភាគ

យោងតាម​សន្ទស្សន៍ប្រសិទ្ធ​ភាព​​ផ្នែក​ភស្តុ​ភា​រ ដែលធនាគារ​ពិភពលោក​ (World Bank) ហៅកាត់​ថា WB បាន​បង្ហាញ​ថា ប្រទេស​​​កម្ពុជា​​បាន​ធ្វើ​ឲ្យ​មាន​ភាព​ល្អ​ប្រសើរ​ឡើង​ផ្នែក​នាំចូល​ នាំចេញ និង​ដឹកជញ្ជូន​ ដោយ​អនុ​វត្ត​តា​ម​នីតិវិធីគយ​ក្នុង​​កម្រិត​ស្តង់​ដារ​អន្តរ​ជាតិ​ ជាហេតុ​នាំឲ្យ​ពិន្ទុ​ផ្នែក​ភស្តុភារ​របស់​ប្រទេស​នេះ​កើន​ឡើង​ខ្លាំង ​បើ​ធៀប​នឹង​ឆ្នាំ​២០១០​។

ក្នុង​ឆ្នាំ​នេះ ប្រទេស​កម្ពុជា​ឈរ​នៅ​ចំណាត់​​ថ្នាក់​ទី​៨៣​​ក្នុង​ចំណោម​១៦០​ប្រទេស​ ដែល​នេះ​ជា​ភាព​​ល្អ​ប្រសើរ​ឡើង​មួយ ​​បើ​ធៀប​នឹង​​​ចំណាត​់​ថ្នាក់​​ទី​១១១​ក្នុង​ឆ្នាំ​២០១២​ និង​ទី​១២៩​​​ក្នុង​ឆ្នាំ​២០១០​​ នេះ​បើ​យោង​តាម​តារាង​សន្ទស្សន៍​ប្រសិទ្ធភាព​ផ្នែក​ភស្តុភារ​ដែល​ត្រូវ​បាន​បោះ​ពុម្ព​ផ្សាយ​រៀង​រាល់​ពីរ​ឆ្នាំ​ម្ដង​នេះ​។

សន្ទស្សន៍​នេះ​បាន​បង្ហាញ​ថា “ក្នុង​រយៈ​ពេល​ប៉ុន្មាន​ឆ្នាំចុង​ក្រោយ​នេះ ប្រទេស​កម្ពុជា​​​សម្រេច​បាន​វឌ្ឍនភាព​ពិត​ប្រាកដ​​ក្នុង​ការ​កែ​ទម្រង់​ និង​ធ្វើ​ទំនើប​កម្ម​លើ​​ប្រតិបត្តិការ​នាំ​ចូល​ នាំចេញ និង​ដឹកជញ្ជូន​របស់​ខ្លួនដូច​ជា បាន​បង្កើន​កម្រិ​ត​អនុវត្ត​​តាម​ស្តង់​ដារ​អន្តរ​ជាតិ​ និ​ង​បាន​ធ្វើ​សុខដុមនីយ​កម្ម​លើ​នីតិវិធី​គយ​​ស្រប​តាម​ស្តង់​ដារ​អន្តរជាតិ​”។

ក្នុង​ចំណោម​ចំណុច​រីក​ចម្រើន​ជាង​មុន​ ដែ​ល​ប្រទេស​កម្ពុជា​សម្រេច​បាន ធនាគារ​ពិភព​លោក​ក៏​បាន​បង្ហាញពី​នីតិវិធីគយ​ស្វ័យ​ប្រវត្តិ​របស់ប្រទេស​នេះ​ផ​ង​ដែរ​។

របាយការណ៍​សន្ទស្សន៍​ដដែ​ល​មាន​ខ្លឹម​សារ​បន្ត​ទៀត​ថា “ដោយ​​បាន​ដាក់​ចេញ​នូវ​នីតិវិធីគយ​ស្វ័យ​ប្រវត្តិ​ និង​​ហេដ្ឋារចនាសម្ព័ន្ធ​រូបវ័ន្ត​ភាគ​ច្រើន​​ ដែល​បច្ចុប្បន្ន​​​មាន​នៅកំពង់​ផែ​ក្រុង​ព្រះសីហនុ និង​នៅ​ប៉ុស្តិ៍​ត្រួត​ពិនិត្យ​តាម​តំបន់​ព្រំដែន​ជុំវិញ​ប្រទេ​សកម្ពុជា​​ ​រយៈ​ពេល​នៃ​ការ​ពិនិត្យ​ឯកសារ​ទំនិញ​បាន​ធ្លាក់​ចុះ​ពី​៥,៩​ថ្ងៃ​​កាលពីឆ្នាំ​២០១០​មក​១,៤​ថ្ងៃ​ក្នុង​ឆ្នាំ​២០១៤​”។

របាយការណ៍នេះ​បាន​បង្ហាញ​បន្ថែម​ទៀត​​​ថា “ដូច​គ្នា​ដែរ​​ អត្រាផ្ញើទុកទំនិញ​ដែល​ត្រូវ​បាន​ជ្រើស​រើស​សម្រាប់​ពិនិត្យ​​​ជាក់​ស្ដែង​បាន​ធ្លាក់​ចុះ​ពី​២៩​ភាគរយ​ក្នុង​ឆ្នាំ​២០១០​មក​១៧​ភាគ​រយ​ក្នុង​ឆ្នាំ​២០១៤​​។ នេះ​ឆ្លុះ​បញ្ចាំ​ង​ឲ្យ​ឃើញ​ថា មន្ត្រី​គយ​​មាន​សមត្ថ​ភាព​​គ្រប់​គ្រង​ហានិភ័យ​​ខ្ពស់​ជាង​មុន​”។

ប៉ុន្តែ​របាយការណ៍​សន្ទស្សន៍​ប្រសិទ្ធ​ភា​ព​ផ្នែក​ភ​ស្តុ​ភា​រនេះ​បាន​បង្ហាញ​ទៀត​ថា លទ្ធ​ផល​​សម្រេច​បាន​​បន្ថែម​ទៀត​នៅ​ក្នុង​ការ​សម្រប​សម្រួល​ពាណិជ្ជកម្ម​ “និង​ទាមទារ​ឲ្យ​មាន​កម្ម​វិធីកែទម្រង់​បន្ថែម​នៅ​ក្នុង​អគ្គ​នាយក​ដ្ឋាន​គយ និង​រដ្ឋាករ​ ឲ្យ​មាន​វិសាល​ភាព​រហូត​ដល់​ទីភ្នាក់​​​ងារ​គ្រប់គ្រង​ព្រំដែន​ ពីព្រោះ​ភាព​រីក​ចម្រើន​នានា​ ដែល​​គយ​សម្រេច​បាន​​មិន​មាន​នៅ​តំបន់​​​ផ្សេង​ៗ​ទៀត​ទេ​”។

ធនាគារ​ពិភព​លោក​ក៏​បាន​ឲ្យ​ដឹង​ទៀត​ថា ខ្លួន​កំពុង​ធ្វើការ​ជាមួយ​រដ្ឋាភិបាល “ក្នុង​ការ​ពង្រឹង​តម្លាភាព​​តាម​រយៈ​គេហ​ទំព័រ​ព័ត៌មាន​ពាណិជ្ជកម្ម​ដែល​មាន​កា​រ​បង្ហាញ​វិធាន​ បទ​បញ្ញត្តិ​ ថ្លៃ​សេវា និង​នីតិវិធីទាំង​អស់​”។

សន្ទស្សន៍​ប្រសិទ្ធភាព​ផ្នែក​ភស្តុភារ​របស់​ធនាគា​រ​ពិភព​លោក​ វាស​់​វែង​កម្រិត​រីក​ចម្រើន​​នៅ​ក្នុង​ប្រាំមួយ​ផ្នែក​ រួម​មាន​ ប្រសិទ្ធភាព​នៃ​ការ​ពិនិត្យ​ឯក​សារ​គ្រប់​គ្រង​គយ និង​ព្រំដែន​ គុណភាព​ពាណិជ្ជកម្ម និង​ហេដ្ឋារចនាសម្ព័ន្ធ​ដឹក​ជញ្ជូន​ ភាព​ងាយ​ស្រួល​នៃ​ការ​រៀប​ចំ​ទំនិញ​​​ដែល​មាន​តម្លៃ​​ប្រកួត​ប្រជែង​ សមត្ថភាព​ និង​គុណភាព​ផ្នែ​ក​សេវា​ភស្តុភារ សមត្ថភាព​​នៃ​ការ​​​តាម​ដាន​ និង​​ត្រួត​ពិនិត្យ​ដំណើរ​ការ​ប្រគល់​ទំនិញ​ ភាព​ទៀង​ទាត់​នៃ​ការ​​ប្រគល់​ទំនិញ​ដល់​ដៃ​អ្នក​ទទួល​ទៅ​តាម​ពេល​វេលា​កំណត់​ ឬក៏​ពេល​វេលា​នៃការ​ប្រគល់​ទំនិញ​ ដែល​ត្រូវ​បាន​រំពឹង​ទុក​ជាមុន​។

ក្នុង​ផ្នែកគយ​​ប្រទេស​​កម្ពុជា​ជាប់​ចំណាត់​ថ្នាក់​លេខ​៧១​ក្នុង​ចំណោម​១៦០​ប្រទេស​ ជាប់​​ចំណាត់​ថ្នាក់​ទី៧៩​ផ្នែក​ហេដ្ឋា​រចនា​សម្ព័ន្ធ​​ ជាប់​ចំណាត់​ថ្នាក់​ទី​៧៨​ផ្នែក​ដឹកជញ្ជូន​ទំនិញ​ឆ្លង​ប្រទេស​​ ជាប់​ចំណាត់​ថ្នាក់​ទី​៨៩​ផ្នែក​គុណ​​ភាព​ និង​សមត្ថភាព​ភស្តុភារ​ ជាប់​ចំណាត់​ថ្នាក់​ទី​៧១​ផ្នែក​តាមដាន​ និ​ង​​ត្រួត​ពិនិត្យ​ និង​ជាប់​ចំណាត់​ថ្នាក់ទី​១២៩​ផ្នែក​​ភាព​ទៀង​ទាត់​​។

លោក ស៊ុន ចាន់ថុល រដ្ឋមន្ត្រី​ក្រសួង​ពាណិជ្ជ​កម្ម​ បាន​លើក​ឡើង​ថា តាំ​ង​ពី​លោក​បាន​ចូល​កាន់​តំណែង​នេះ​កាលពី​ខែ​កញ្ញា​មក លោក​មាន​ផែន​ការ​កែទម្រង់​សេដ្ឋកិច្ច​របស់​ប្រទេស​​​កម្ពុជា​​តាម​រយៈ​ការ​ធ្វើ​សុខដុម​នីយកម្ម​លើ​នីតិវិធី​ច្បាស់​លាស់​ទាំ​ង​ឡាយ មុនពេល​ប្រទេ​ស​​​នេះ​​ចូល​សហគមន៍​សេដ្ឋកិច្ច​អាស៊ាន​ក្នុង​ឆ្នាំ​២០១៥​។

កាលពីខែ​វិច្ឆិកា ​លោក ស៊ុន ចាន់ថុល បាន​​​ប្រកាស​ថា ​រដ្ឋាភិបាល​នឹង​លែង​តម្រូវ​ឲ្យ​ក្រុម​​​ហ៊ុន​នានា​ដាក់ពាក្យ​សុំ​វិញ្ញាបនបត្រ​បញ្ជាក់​ប្រភព​ទំនិញ​​ ប្រសិន​បើ​ក្រុម​ហុ៊ន​ទាំង​នោះ​នាំ​ទំនិញ​ចេញ​ទៅ​ទីផ្សារ​ក្នុង​​ប្រទេ​ស​​ដែ​ល​មិន​ត្រូវ​ការ​ឯក​សារ​បែប​នេះ ហើយ​ថា មា​ន​ផែន​ការ​ដាក់​ចេញ​នូវ​ប្រព័ន្ធ​អេឡិច​ត្រូនិក​​សម្រាប់​ប្រើ​ប្រាស់​ផង​ដែរ​៕ សុធា

(រាយការណ៍បន្ថែម​ដោយ ហ៊ុល រស្មី)

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស