27 C
Phnom Penh

​ផ្ដន្ទាទោស​បង​ប្អូន​​ពីរ​នាក់​ពីបទ​បោក​ប្រាស់​វិនិយោគិន​អូស្ត្រាលី

ដោយ ឌឹ ខេមបូឌា ដេលី

បទវិភាគ

កាលពីម្សិលមិញ សាលាដំបូង​រាជ​ធានី​ភ្នំ​ពេញ បាន​ផ្ដន្ទាទោស​បង​ប្អូន​ប្រុស​ពីរ​នាក់​​ពីបទ​បោក​ប្រាស់​លួច​បន្លំ​យក​ប្រាក់​ចំនួន​៩៤.០០០​ដុល្លារ​ពី​វិនិយោគិន​ដីធ្លី​ជន​ជាតិ​អូស្ត្រាលី​ម្នាក់​ កាលពីឆ្នាំ​២០១២​។

ចៅក្រម​ យ៉េត ម៉ូលីន បាន​ផ្ដន្ទា​ទោស​ជន​ជាប់​ចោទ​ដែលត្រូវ​ជា​បង​ប្អូន​ប្រុស​គ្នា​ម្នាក់​ឈ្មោះ​ ហួត ចាន់វីរៈ និង​ម្នាក់​ទៀត​ឈ្មោះ​ ហួត សុខវឌ្ឍនៈ ឲ្យ​ជាប់​ពន្ធនាគារ​រយៈ​ពេល​១៨​ខែ​ និ​ង​បង្គាប់​ឲ្យ​ជន​ជាប់​ចោទ​ទាំង​ពីរ​សង​ប្រាក់​៩៤.០០០​ដុល្លារ​បូក​បន្ថែម​ប្រាក់​​សំណង​ជំងឺចិត្ត​ចំនួន​៥.០០០​ដុល្លារ​ឲ្យ​ទៅ​ជន​រង​គ្រោះ​ឈ្មោះ មីឆែល ជេម សាមូអែ៊ល (Michael James Samuel) អាយុ​៧៣​ឆ្នាំ​។

ជន​ជាប់​ចោទ​ទាំង​ពីរ​គឺ​ជា​អ្នក​រត់​គេច​ពី​បទ​ចោទ​ប្រកាន់​នេះ​។ នៅ​ក្នុង​សំណុំរឿង​​ លោក សាមូអ៊ែល បាន​លើក​ឡើង​ថា កាល​ពី​​​ខែ​កក្កដា​ ឆ្នាំ​២០១​១ ​លោក​បាន​​សហ​ការ​​ជាមួយ​ជន​ជាប់​ចោទ​បងប្អូន​ប្រុស​ទាំង​ពីរ​នាក់​​នេះ​​​ដែល​បាន​ធ្វើ​ការ​​នៅ​ក្រុម​ហ៊ុន​ជី​មួយ​។ លោក​បាន​​ផ្ដល់​ប្រាក់​​​១២១.០០០​ដុល្លារ​ឲ្យ​ជន​ជាប់​ចោទ​ទាំងពីរ​​ដើម្បី​ស្វែង​រក​ដីទំហំ​១០០​​​ហិកតា​​នៅ​ខេត្ត​កំពង់​ចាម។លោក សាមូ​​​ អ៊ែល ឲ្យ​ដឹង​ថា លោកចង់​អភិវឌ្ឍ​ដីនោះ​ ដោយ​ដាំ​សណ្ដែក​សៀង​ និង​ដាំ​ដើម​កៅស៊ូ​។

ទោះជា​យ៉ាង​ណា លោក​​បាន​លើក​ឡើង​ថា បង​ប្អូន​ត្រកូល​ ហួត ទាំ​ងពីរ​នាក់​នេះ​មិន​ដែល​បាន​ផ្ដល់​ប័ណ្ណ​កម្ម​សិទ្ធិ​ដីធ្លី​ឲ្យ​លោក​ទេ ហើយ​ថែមទាំង​រត់​គេច​ខ្លួន​​​បាត់​ ដោយ​យ​ក​ប្រាក់​ទៅជាមួយ​​​​ផង​។

លោកចៅក្រម យ៉េត ម៉ូលីន បា​ន​សម្រេ​ច​​ផ្ដន្ទាទោស​​ជន​ជាប់​ចោទ​ត្រកូល ហួត ទាំង​ពីរ​នាក់​នេះ​ពីបទ​រំលោភ​សេចក្ដី​ទុក​ចិត្ត​​ និង​បាន​ចេញ​សាលដីកា​ឲ្យ​ចាប់​ខ្លួន​ជន​ជាប់​ចោទ​ទាំង​ពីរ​នាក់​នេះ​។ នៅ​ក្នុង​ញត្តិមួយ​ផ្ញើ​ទៅ​សាលា​ដំបូង​រាជ​ធានីភ្នំពេញ កាលពីឆ្នាំមុន​ លោក សាមូអ៊ែល បាន​ស្នើ​សុំ​សំណង​ជា​ប្រាក់​ចំនួន​៩៤​.០០០​ដុល្លារ​របស់​លោក​ និង​សំណង​​ជំងឺ​ចិត្ត​ចំនួន​២០.០០០​ដុល្លារ​។

នៅ​ខាង​​ក្រៅ​សាលា​ដំបូង​រាជ​ធានីភ្នំ​ពេញ​​លោក សាមូអ៊ែល បាន​មាន​ប្រសាសន៍​ថា“ខ្ញុំ​ព្រម​ទទួ​ល​សាល​ក្រមនេះ​ ហើយ​នឹង​មាន​យុត្តិធម៌​ប្រសិន​បើ​ពួកគេ​ចាប់​ខ្លួនជន​ទាំង​ពីរ​នាក់​នោះ​ ហើយ​សង​ប្រាក់​ខ្ញុំវិញ​”៕ សុធា

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស