28 C
Phnom Penh

កងរាជ​អា​​​វុធ​ហត្ថ​​​​​​រឹប​អូស​បា​ន​ភ្លុក​ដំ​​រី​​ខុស​​ច្បាប់​លើក​​ទី​ពីរ​ក្នុង​រយៈ​ពេល​​មួ​យខែ​​​នៅ​ក្នុ​ង​​​ខេត្ត​​ស្វាយ​រៀ​ង

ដោយ ឌឹ ខេមបូឌា ដេលី

បទវិភាគ

ក្រុម​​មន្ត្រី​​​​បា​​នឲ្យដឹង​ថា កា​ល​​ពី​ថ្ងៃ​សុក្រកង​​រាជ​អា​​​វុធ​ហត្ថ​​​ខេត្ត​ស្វាយ​​រៀ​ង​​​​រឹប​​អូសបា​ន​​​​ភ្លុក​ដំ​រី​​​​ទម្ងន់​​​ជា​ង​​២៥០​គី​ឡូ​ក្រាម​​​ ដែល​​ត្រូវ​បាន​លា​ក់​​ទុក​ក្នុ​ង​​​វ៉ាលិស​​ចំ​​នូន​១០​​​នៅ​ក្នុ​ង​​​រថ​​យន្តដឹក​ទំ​និញ​មួ​យ​​គ្រឿ​ង​បើក​​ឆ្ពោះ​​​ទៅ​ព្រំ​​​ដែនវៀត​ណា​ម​។

មន្ត្រី​ិពិនិត្យ​វ៉ាលិសដាក់​ភ្លុក​ដំរី​រត់​ពន្ធខុស​ច្បាប់​​ ដែល​ដាក់​នៅលើ​ក្រណាត់​។ កង​រាជអាវុធ​ហត្ថ​រឹប​អូស​បាន​ភ្លុក​ដំរីរត់ពន្ធ​ខុស​ច្បាប​់ដាក់​នៅក្នុង​វ៉ាលិស១០​ដឹក​តាម​រថយន្ត​ ជា​​លើក​ទី​២​ក្នុង​រយៈពេល​មួយខែ​ នៅខេត្ត​ស្វាយ​រៀង​។ Kim Seng
មន្ត្រី​ិពិនិត្យ​វ៉ាលិសដាក់​ភ្លុក​ដំរី​រត់​ពន្ធខុស​ច្បាប់​​ ដែល​ដាក់​នៅលើ​ក្រណាត់​។ កង​រាជអាវុធ​ហត្ថ​រឹប​អូស​បាន​ភ្លុក​ដំរីរត់ពន្ធ​ខុស​ច្បាប​់ដាក់​នៅក្នុង​វ៉ាលិស១០​ដឹក​តាម​រថយន្ត​ ជា​​លើក​ទី​២​ក្នុង​រយៈពេល​មួយខែ​ នៅខេត្ត​ស្វាយ​រៀង​។ Kim Seng

​​នេះ​​​​​​គឺ​ជា​ប្រតិបត្តិការ​រឹបអូស​ភ្លុក​ដំរី​ខុស​ច្បាប់​លើកទី២​​​​ក្នុ​ង​រយៈ​ពេល​មួយ​ខែ​​ ជា​ហេតុ​​​នាំ​​​ឲ្យ​មាន​ការព្រួយ​បារម្ភ​ថា ប្រទេស​កម្ពុជា​​កំពុង​ក្លាយ​ជា​គោលដៅ​ឆ្លង​កាត់​ដ៏​​សំខាន់​មួយ​​សម្រាប់​សកម្មភាព​ជួញ​ដូរ​ភ្លុក​ដំរី​ខុស​ច្បាប់​​។

នគរបាល​បាន​បញ្ឈប់​រថយន្ត​ដឹក​ទំនិញ​នេះ​​ ពីព្រោះខ្លួន​​សង្ស័យ​ថា រថយ​ន្ត​ដែល​​ស្ថិត​ក្នុង​ស្ថានភាព​លំបាក​ដោយ​សារ​​​ដឹក​ទំនិញ​ដ៏​ធ្ងន់​ ខណៈ​ដែលកំពុងតែ​​​ឆ្លង​កាត់​​ផ្លូវ​ហុយ​រលាក់​ស្ថិត​នៅ​ចម្ងាយ​​បួន​គីឡូ​ម៉ែត្រ​ពី​ព្រំដែន​​វៀតណាម ស្ថិត​ក្នុង​ឃុំ​ព្រះ​ពន្លា ស្រុក​ ​កំពង់​រោ​ទិ៍នេះ អាច​បាន​និង​កំពុង​តែរត់​ពន្ធ​ឈើ​ប្រណីត​​ខុស​ច្បាប់​។

លោក​ ឈៀង​ មួង​ហុង​ ប្រធាន​​ខណ្ឌ​រដ្ឋ​បាល​​ព្រៃ​ឈើ​ខេត្ត​នៃក្រសួង​​កសិកម្ម​ រុក្ខា​ប្រមាញ់​ និង​នេសាទ​ ដែល​បាន​ចុះ​ជួយ​ឆែក​ឆេរ​​ដែរ​នោះ​ បាន​មាន​ប្រសាសន៍​ថា “ប៉ុន្តែ​នៅ​ពេល​ដែល​យើង​​​ឆែក​ឆេរ​រថយន្ត​ដឹក​ទំនិញ​នោះ​​ យើង​​បាន​រក​ឃើញ​​វ៉ាលិស​​១០​​ពេញ​ដោយ​ភ្លុកដំរី​ចំនួន​៧៧កង់​”។

លោក​ សាន ប៊ុន​ថន​ មេបញ្ជាការ​កង​រាជ​អាវុធហត្ថខេត្ត​ បាន​ឲ្យដឹង​ផង​ដែរ​ថា ករណី​រក​ឃើញ​នេះ​​បានកើតឡើង​ដោយ​ចៃដន្យ​ ដោយ​សារ​តែ​​​កម្លាំង​របស់​លោក​​គ្រាន់​តែ​មាន​ប្រថ្នូល​ថា រថយន្ត​ដឹក​ទំនិញ​នេះមើល​ទៅ​មិនសូវ​​ទំនង បន្ទាប់ពី​មន្ត្រីទាំងនោះ​បាន​អនុញ្ញាតឲ្យ​អ្នកបើកបរ​រថយន្តនោះ​បើក​រថ​យន្ត​ចេញកាលពីដំបូង។​

លោក​បាន​មានប្រសាសន៍ថា “យើង​​រឹប​អូស​​បាន​ភ្លុក​ដំរី​ទាំងនេះ​​ដោយ​ចៃដន្យ​ទេ​​ នៅ​ពេល​ដែល​យើង​​​ដំបូង​បាន​​ឆែក​ឆេរ​​រថយន្តនេះ​ យើង​មិន​បាន​រក​ឃើញ​អ្វី​ទេ​ ហើយ​ក៏អនុញ្ញាត​ឲ្យ​ជន​សង្ស័យ​ទៅ​ ក៏ប៉ុន្តែ​​យើង​បាន​សម្រេច​​បញ្ឈប់​រថយន្ត​នេះ​​ម្ដង​ទៀត​​ ពីព្រោះ​​​​មើល​ទៅ​​វា​ដឹ​ក​ធ្ងន់​ពេក​”។ លោក​បាន​បន្ថែមទៀត​ថា អ្នក​បើក​ប​រ​បុរស​ជនជាតិ​វៀតណាម​​បាន​បោះបង់​​​រថយន្តនេះ​ ចោល ហើយ​ក៏​រត់​គេច​ខ្លួន​។

ប្រតិបត្តិ​ការ​ស៊ើបអង្កេត​មួយ​កំពុង​តែ​ដំណើ​រការ​ ក្នុង​គោល​បំណង​កំណត់​ប្រភព​​ភ្លុក​ដំរី​នេះ​​ ក៏ប៉ុន្តែ​​ចំនួន​ដំរី​​អាស៊ី​ដែល​កំពុង​ធ្លាក់​ចុះ​​ ទំនងជា​អាច​បង្ហាញ​ថា ភ្លុក​ដំរី​នេះ​ត្រូវ​បាន​នាំ​មក​ពី​​​ទ្វីប​អាហ្វ្រិក ដែលមាន​​​ដំរី​​ចំនួន​៣០០.០០០​ក្បាល​​ត្រូវ​បាន​សម្លាប់​​កាល​ពីឆ្នាំ​មុន​ប៉ុណ្ណោះ​ ដើម្បី​យក​ភ្លុក​​ទៅ​​លក់​បាន​​ប្រាក់​ច្រើន​។

កាល​ពី​ក្នុង​ខែ​កុម្ភៈ​ បុរស​ជនជាតិ​វៀត​ណាម​ពី​រ​នាក់​ត្រូវ​បាន​ចាប់​ខ្លួន​នៅ​អាកាស​យានដ្ឋាន​អន្តរជាតិ​សៀមរាប​ ដោយ​សារ​​តែ​បាន​នាំ​​ភ្លុក​ដំរី​អាហ្វ្រិក​​ទម្ងន់​៧៩​គីឡូក្រាម​ដោយ​ដាក់ក្នុង​វ៉ាលិស​​៣​ បន្ទាប់​ពី​​ធ្វើ​ដំណើរ​​ពី​ប្រទេស​អាហ្វ្រិក​ខាង​ត្បូង​​កាត់​តាម​ប្រទេស​​ កូរ៉េខាង​ត្បូង​។

មន្ត្រី​គយ​​បាន​ឲ្យ​ដឹង​​ថា ក្រុម​អ្នករត់​ពន្ធ​ទំនង​ជា​​កំពុង​តែ​​ស្វែង​រក​​ទីកន្លែង​​ងាយ​ឆ្លង​កាត់​ថ្មី​នៅ​ក្នុង​តំបន់​ ដើម្បី​​នាំ​ទំនិញ​​ចូល​ផ្សារ​ងងឹត​​ ដែលអាច​​​រក​ប្រាក់​ចំណេញ​បាន​ច្រើន​​នៅ​ក្នុង​ប្រទេស​វៀតណាម​​ និង​ប្រទេស​ចិន​​ ហើយនៅប្រទេស​នេះ​ ភ្លុក​ដំរី​​អាច​​លក់​បាន​ក្នុង​តម្លៃ​២.២០០​ដុល្លារ​ក្នុង​មួយគីឡូក្រាម​​ បន្ទាប់ពី​​​នាយ​ក​រដ្ឋ​មន្ត្រី​ថៃ​ យីងឡាក់​ ស៊ីណា​វ៉ាត្រា (Yingluck Shinawatra) កាល​ពីឆ្នាំមុន​ បាន​បង្កើន​យុទ្ធនា​ការ​ប្រយុទ្ធ​ប្រឆាំង​​​​ការ​ជួញ​​ដូរ​​នេះ​​នៅ​ក្នុង​ប្រទេស​ថៃ​​។​

លោ​ក ខឹម វង្ស ប្រធាន​គម្រោង​ក្នុង​ក្រុម​សង្គ្រោះ​សត្វព្រៃ​បន្ទា​ន់ នៃអង្គការ​សម័្ពន្ធ​សត្វ​ព្រៃ​Wildlife Aliance បាន​លើក​ឡើង​ថា ករណី​រក​ឃើញ​ដោយ​ចៃដន្យ​កាល​ពី​ថ្ងៃ​សុក្រ​ គឺ​ជា​សញ្ញា​គួរ​ឲ្យ​ព្រួយ​បារម្ភ​ថា ​​ក្រុម​អ្នក​រត់​ពន្ធ​ភ្លុក​ដំរី​​​ដឹង​ថា កម្ពុជា​គឺ​ជា​ទីកន្លែង​​ងាយ​ស្រួល​ឆ្លង​កាត់ថ្មី​មួយ​​។​ លោក​បាន​មានប្រសាសន៍​ថា “មិន​ទាន់​ដឹង​ស្អីផង​​ មាន​​​ការ​រឹប​អូស​បាន​​ភ្លុក​ដំរី​​នៅ​ខេត្ត​​​សៀម​រាប​ និង​ខេត្ត​ស្វាយរៀងបាត់ទៅ​​ហើយ យើង​មើល​ឃើញ​ថា ប្រទេស​កម្ពុជា​​​អាច​​ក្លាយ​ជា​ចំណុច​ឆ្លង​កាត់​មួយ​​”៕​ប៊ុននី​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស