លោក ត្រឿង សុភ័ណ្ឌ មន្ត្រីនគរបាលចរាចរណ៍ ត្រូវទៅប្រចាំការពីរដងក្នុងមួយថ្ងៃ នៅកាច់ជ្រុងផ្លូវប៉ាស្ទ័រ និងផ្លូវ៣០៦ដើម្បីជួយសម្រួលដល់ការកកស្ទះចរាចរណ៍នៅពេលដែលឪពុកម្តាយទៅទទួលកូនរបស់ពួកគាត់ពីសាលាអង់គ្លេសអន្តរជាតិភ្នំពេញ។
លោក សុភ័ណ្ឌ ជាមន្ត្រីនគរបាលសង្កាត់បឹងកេងកង១ ជាតំបន់ដែលជនបរទេសចូលចិត្តរស់នៅនោះ មានប្រសាសន៍ថា “ សាលាខ្លះទៀតក៏មានការកកស្ទះចរាចរណ៍ដែរ ប៉ុន្តែ មិនដូចសាលានេះទេ”។
ការកកស្ទះចរាចរណ៍កើតឡើងពីរដងជារៀងរាល់ថ្ងៃគឺលើកទី១នៅម៉ោង១១ និង ៣០នាទីព្រឹក នៅពេលដែលសាលាឈប់សម្រាកសម្រាប់អាហារថ្ងៃត្រង់ និងម្តងទៀតនៅម៉ោង៤ល្ងាច នៅពេលដែលកុមារក្រោមអាយុ១០ឆ្នាំចេញពីរៀន និងនៅម៉ោង៥ល្ងាច នៅពេលដែលសិស្សធំៗចេញ។
លោក គល់ សុផាត នាយប៉ុស្តិ៍នគរបាលសង្កាត់បឹងកេងកង១ បានមានប្រសាសន៍ថា នៅទូទាំងទីក្រុងមានការកកស្ទះស្រដៀងគ្នានេះនៅតាមសាលារៀនឯកជន នៅពេលដែលឪពុកម្តាយរបស់សិស្សបើករថយន្តទៅទទួលកូនៗរបស់គាត់។
អ្នកគ្រប់គ្រងនៅសាលាបារាំង Lycee Francais Rene Descartes នៅសង្កាត់វត្តភ្នំ ខណ្ឌដូនពេញ បានឲ្យដឹងថា នៅសាលានេះមានមន្ត្រីនគរបាលខណ្ឌបីនាក់ជួយសម្រួលចរាចរណ៍នៅជិតសាលានេះ។ សាលាប្រាប់ឪពុកម្តាយឲ្យចតរថយន្តនៅឆ្ងាយបន្តិច ហើយចាំដើរមកយកកូនរបស់ខ្លួន។
គ្រីសស្ទៀន ម៉ាឡូរី នាយកផ្នែកបឋមសិក្សានៅសាលានេះបានមានប្រសាសន៍ថា “ ពិបាករក្សាសណ្តាប់ធ្នាប់ណាស់។ យើងព្យាយាមអស់ពីសមត្ថភាពហើយ”។
លោកស្រី លីង ពៅ ប្រធានរដ្ឋបាលនៅសាលាអង់គ្លេសអន្តរជាតិភ្នំពេញ បានមានប្រសាសន៍ថា លោកស្រីមិនគិតថា សាលារបស់លោកស្រីពិបាកជាងសាលាផ្សេងទេ។
លោកស្រីបានមានប្រសាសន៍ថា “ ប្រសិនបើយើងសម្លឹងមើលទូទាំងទីក្រុង យើងអាចមើលឃើញការកកស្ទះចរាចរណ៍គ្រប់កន្លែង។ យើងធ្វើអ្វីដែលយើងត្រូវធ្វើ ដូចកន្លែងផ្សេងៗទៀតដែរ”។
លោក សុផាត បានមានប្រសាសន៍ថា ប៉ុន្តែ មានផ្លូវធំៗដែលមានខណ្ឌចែកគន្លងផ្លូវច្បាស់លាស់នៅជាប់សាលា Lycee Francais Rene Descartes និងនៅជិតសាលាអង់គ្លេស អន្តរជាតិភ្នំពេញ។ សាលាអង់គ្លេសអន្តរជាតិភ្នំពេញស្ថិតនៅតាមផ្លូវតូចចង្អៀត។ នៅពេលផ្លូវបា៉ស្ទ័រស្ទះ ការកកស្ទះរាលដាលដល់ផ្លូវជាប់គ្នានោះបណ្តាលឲ្យមានការកកស្ទះកាន់តែខ្លាំងនៅក្នុងទីក្រុង។
កន្លះម៉ោងមុនពេលកណ្តឹងសាលារៀនរោទិ៍ពេលដល់ម៉ោងឈប់សម្រាក ផ្លូវបា៉ស្ទ័រ និងផ្លូវជាប់គ្នានោះ មានរថយន្តជាច្រើនតម្រង់ជួររួចទៅហើយ។ រថយន្តខ្លះជារថយន្តរបស់ភ្ញៀវនៅហាងកាហ្វេ Brown Coffee ឬ ហាង Burger King ។ រថយន្តខ្លះទៀតជារថយន្តរបស់ឪពុកម្តាយដូចជា លោក យ៉ុង សុវឌ្ឍនា ដែលព្យាយាមតស៊ូនឹងការកកស្ទះនេះ។
នៅទល់មុខសាលានេះ លោក សុវឌ្ឍនា រង់ចាំនៅក្នុងរថយន្តជាមួយប្រពន្ធរបស់គាត់ ចាំកូនប្រុសអាយុប្រាំបួនឆ្នាំឈ្មោះ ហារី។ ជារៀងរាល់ថ្ងៃពួកគាត់មកដល់នៅម៉ោង៣និង៣០នាទីដើម្បីរកកន្លែងចតរថយន្តនៅក្បែរចិញ្ចើមផ្លូវ។ ទោះបីជា ពួកគាត់មកមុនម៉ោងក៏ដោយ ក៏ពួកគាត់ត្រូវចតរថយន្តនៅឆ្ងាយដែរ។
លោក សុវឌ្ឍនា អាចទៅដល់ទីនោះនៅម៉ោង៤ល្ងាច និងចំណាយពេល១៥នាទីដោយសារស្ទះចរាចរណ៍ ដូច្នេះ ធ្វើឲ្យគាត់ទៅទទួលកូនរបស់គាត់យឺតពេល។ គាត់បាននិយាយថា “ខ្ញុំមិនចង់ឲ្យកូនខ្ញុំរង់ចាំខ្ញុំទេ។ ខ្ញុំមកទទួលគាត់មុនម៉ោងជារៀងរាល់ថ្ងៃ”។
ឪពុកម្តាយផ្សេងៗទៀតនិយាយថា ពួកគាត់ចំណាយពេលពី១៥ទៅ២០នាទីដោយសារស្ទះចរាចរណ៍មុនពេលបានទទួលកូន។ លោក សុវឌ្ឍនា បានបញ្ជាក់ថា គាត់ឃើញឪពុកម្តាយចតរថយន្តពីរជួរនៅជិតរថយន្តដែលចតរួចហើយ។ ការចតរថយន្តពីរជួរនេះធ្វើឲ្យកាន់តែចង្អៀតពិបាកចេញចូលតាមផ្លូវនេះ។
លោក សុផាត បានមានប្រសាសន៍ថា “ខ្ញុំតែងតែស្នើសុំឲ្យបុគ្គលិកសាលានេះប្រាប់ឪពុកម្តាយទាំងអស់ថា នៅពេលមកទទួលកូនពួកគាត់គួរតែចតរថយន្តកុំឲ្យស្ទះចរាចរណ៍។ ប៉ុន្តែ មនុស្សមួយចំនួនមិនស្តាប់ទេ”។
ជាក់ស្តែងនៅម៉ោង៤ល្ងាច រថយន្តពណ៌ខៀវមួយគ្រឿងបើកមកសាលានេះ ហើយឈប់នៅក្បែរថយន្តមួយគ្រឿងដែលបានចតនៅចិញ្ចើមផ្លូវនោះរួចហើយ។ មិនយូរប៉ុន្មាន រថយន្តប្រាំគ្រឿងទៀត និងអ្នកជិះម៉ូតូបានបើកមក និងធ្វើឲ្យស្ទះតែម្តង។
លោក ឈុំ ឈន អ្នកបើកបររឺុម៉កម៉ូតូកង់បីដែលបានរង់ចាំនៅកាច់ជ្រុងជិតសាលារៀននេះ ដោយសារមានអាជីវកម្មនៅទល់មុខនោះ។ នៅពេលស្ទះចរាចរណ៍ គាត់មិនទទួលទូរស័ព្ទពីភ្ញៀវទេ ពីព្រោះគាត់មិនអាចរំកិលទៅមុខបានឡើយ។
ការហៅទូរស័ព្ទទៅមន្ទីរសាធារណការ និងដឹកជញ្ជូនមិនមានការឆ្លើយតបទេកាលពីថ្ងៃសុក្រ ហើយលោក ឡុង ឌីម៉ង់ អ្នកនាំពាក្យសាលារាជធានីមិនអាចទាក់ទងបានទេ។
នៅតាមផ្លូវនេះលោក សុភ័ណ្ឌ បានមានប្រសាសន៍ថា ទោះបីជាគាត់ស្រែក និងផ្លុំកញ្ចែក៏ដោយ ក៏អ្នកបើកបរមិនស្តាប់គាត់ដែរ។ អ្នកជិះម៉ូតូជួនកាលជិះបញ្ច្រាសធ្វើឲ្យរថយន្តមិនអាចបើកទៅមុខបាន។
ផ្លូវដ៏តូចចង្អៀត និងមានឪពុកម្តាយច្រើនមកទទួលកូននេះធ្វើឲ្យកកស្ទះចរាចរណ៍យ៉ាងហោចណាស់ម្តងក្នុងមួយថ្ងៃ។ លោកបានមានប្រសាសន៍ថា “ ផ្លូវនេះមិនធំទេ វាតូចណាស់។ ខ្ញុំព្យាយាមជួយសម្រួលឲ្យប្រជាជនអាចធ្វើដំណើរទៅមុខបានបន្តិចបន្តួច៕គឹមហឿន