34 C
Phnom Penh

លោក​​​ ហ៊ុន​​​ សែន​​​ ឲ្យ​​​​​​ចិន និង​​​ម៉ាឡេស៊ី​​​ ​​​មក​​​រក​​​យន្ត​​​ហោះ​​​​​​នៅ​​​​​​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

បន្ទាប់​​​ពី​​​ការ​​​រុក​​​រក​​​​​អស់​​​រយៈពេល​​​ពីរ​​​សប្តាហ៍​​​ដោយ​​​គ្មាន​​​លទ្ធផល​​​រួច​​​មក​​​ លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន​​​ បាន​​​អញ្ជើញ​​​ប្រទេស​​​ចិន​​​និង​​​ប្រទេស​​​ម៉ាឡេស៊ី​​​ឲ្យ​​​មក​​​រុក​​​រក​​​យន្តហោះ​​​ដែល​​​បាត់​​​ដំណឹង​​​ដ៏​​​អាថ៌កំបាំង​​​នេះ​​​នៅ​​​ក្នុង​​​ប្រ​​​ទេស​​​កម្ពុជា​​​ កាល​​​ពី​​​ថ្ងៃ​​​សុក្រ​​​។

លោក​​​នាយក​​​រដ្ឋ​​​មន្ត្រី​​​ ហ៊ុន​​​ សែន​​​ បាន​​​មាន​​​​​​ប្រសាសន៍​​ បន្ទាប់​​​ពី​​​កិច្ច​​​ប្រជុំ​​​ប្រចាំ​​​ឆ្នាំ​​​នៅ​​​ក្រសួង​​​​​​​​​​​​​​​អប់រំ​​​ យុវជន​​​​​​និង​​​កីឡា​​​ថា​ “យើង​​​ស្វាគមន៍​​​មិត្ត​​​ចិន និង​​​​​​ម៉ាឡេស៊ី​​​របស់​​​យើង​​​​​​​​​ឲ្យ​​​ធ្វើ​​​ការ​​​នៅ​​​ក្នុង​​​ទឹក​​​ដី​​​របស់​​​យើង​​​ ប្រសិន​​​បើ​​​មាន​​​សញ្ញា​សង្ស័យ​​​ណាមួយ​​​នោះ​​​។ ប្រសិន​​​បើ​​​គេ​​​សង្ស័យ​​​​ថា យន្តហោះ​​​នេះ​​​ធ្លាក់​​​នៅ​​​ក្នុង​​​ប្រទេស​​​កម្ពុជា ​​​​ថា យន្តហោះ​​​នេះ​​​ធ្លាក់​​​នៅ​​​ក្នុង​​​ប្រទេស​​​កម្ពុជា ​​​​អ៊ីចឹង​​​ប្រទេស​​​កម្ពុជា​​​រីក​​​រាយ​​​នឹង​​​សហការ​​​”។

ជើង​​​​​​​​​ហោះ​​​ហើរ​​​លេខ​ MH 370 បាន​​​បាត់​​​ដំណឹង​​​កាល​​​ពី​​​ថ្ងៃ​​​ទី​​​៨​​​ ខែ​​​មីនា​​​ នៅ​​​ពេល​​​ធ្វើ​​​ដំណើរ​​​ពី​​​ទី​​​ក្រុងគូឡាឡាំពួ​​​ ទៅ​​​ទីក្រុង​​​ប៉េកាំង​​​។ កាល​​​ពី​​​ដើម​​​ខែ​​​នេះ​​​ មន្ត្រី​​​រដ្ឋាភិបាល​​​ម៉ាឡេ​​​ស៊ី​​​ បាន​​​ឲ្យ​​​ដឹង​​​ថា យន្តហោះ​​​នេះ​​​អាច​​​ធ្លាក់​​​នៅ​​​កន្លែង​​​ណា​​​មួយ​​​ដែល​​​ស្ថិតនៅ​​​ចន្លោះ​​​ភាគ​​​ខាង​​​ត្បូង​​​មហា​​​សមុទ្រ​​​ឥណ្ឌា​​​និង​​​តំបន់​​​អាស៊ី​​​កណ្តាល​​​ ជា​​​តំបន់​​​ដែល​​​មាន​​​ផ្ទៃ​​​៧,៦៨​លាន​គីឡូ​​​ម៉ែត្រក្រឡា​​​។ ការរុក​​​រក​​​បាន​​​ពង្រី​​​ក​​​ទៅ​​​​​​ភាគ​​​ខាង​​​ត្បូង​​​រហូត​​​ដល់​​​ដែន​​​ទឹក​​​នៅ​​​ភាគ​​​ខាង​​​លិច​​​នៃ​​​ប្រទេស​​​អូស្ត្រាលី​​​។

កាល​​​ពី​​​​​​ថ្ងៃ​​​អង្គារ​​​ ដប់​​​ថ្ងៃ​​​បន្ទាប់​​​ពី​​​យន្តហោះ​​​​​​បាន​​​បាត់​​​ដំណឹង​​​ ប្រទេស​​​កម្ពុជា​​​ បាន​​​ប្រកាស​​​ថា ​​​​​​ខ្លួន​​​នឹង​​​ចូល​​​រួម​​​ការ​​​រុក​​​រក​​​ជា​​​លក្ខណៈ​​​អន្តរជាតិ​​​ដែលមាន​​​២៦​​​ប្រទេស​​​បាន​​​ចូល​​​រួម​​​​​​។

ដំបូង​​​ឡើយ​​​ រដ្ឋាភិបាល​​​បាន​​​លើក​​​ឡើង​​​ថា ខ្លួន​​​ខ្វះ​​​សមត្ថភាព​​​នៅ​​​ក្នុង​​​ការ​​​ចូល​​​រួម​​​ការ​​​រុករក​​​នេះ​​​។ ប៉ុន្តែ​​​លោកនាយក​​​រដ្ឋ​​​មន្ត្រី​​​​​​ ហ៊ុន សែន​​​ បាន​​​លើក​​​ឡើង​​​​​​ថា រដ្ឋាភិបាល​​​របស់​​​លោក​​​ បាន​​​​​​​​​​​​ប្តូរ​​​ជំហ​​​របស់​​​ខ្លួន​​​បន្ទាប់​​​ពី​​​ទទួល​​​បាន​​​សំណើ​​​ពី​​​ស្ថានទូត​​​ចិន​​​ប្រចាំ​​​រាជ​​​ធានី​​​ភ្នំ​​​ពេញ​​​។

លោក​​នាយក​​​រដ្ឋមន្ត្រី​​​ ហ៊ុន សែន បាន​​ មាន​​ប្រសា​សន៍​​​ថា “ក្នុង​​​ពេល​​​ថ្មី​​​ៗ​​​នេះ​​​ ស្ថាន​​​ទូត​​​ចិន​​​ [បាន​​​ស្នើ] ឲ្យ​​​កម្ពុជា​​​ជួយ​​​នៅ​​​ក្នុង​​​ការ​​​រុក​​​រក​​​នេះ​​​ ហេតុ​​​ដូច្នេះ​​​យើង​​​បាន​​​ចេញ​​​បទ​​​បញ្ជា​​​ឲ្យ​​​កង​​​កម្លាំង​​​​ប្រដាប់​​​អាវុធ​​​ចុះ​​​ទៅ​​​រុក​​​រក​​​នៅ​​​តំបន់​​​មួយ​​​ចំនួន​​​”។ ប្រទេស​​​ចិន​​​បាន​​​ឧបត្ថម្ភ​​​ឧទ្ធម្ភាគចក្រ​​​ចំនួន​​​បួន​​​គ្រឿង​​​ដែល​​​ប្រទេស​​​កម្ពុជា​​​កំពុង​​​ប្រើ​​​ប្រាស​​​់​​​នៅ​​​ក្នុង​​​បេសកម្ម​​​​​​រុក​​​រក​​​នេះ។​​​

លោកនាយក​​​រដ្ឋ​​​មន្ត្រី​​​​​​ ហ៊ុន​​​ សែន​​​ បាន​​​លើក​​​​ឡើង​​​ថា សាធារណជន​​​មិន​​​គួរ​​​ព្រួយ​​​បារម្ភ​​​ចំពោះ​​​​​​ការ​​​ដាក់​​​ពង្រាយ​​​ឧទ្ធម្ភាគចក្រ​​​និង​​​នាវា​​​កង​​​ទ័ព​​​ជើង​​​ទឹក​​​​​​កម្ពុជា​​​នៅ​​​តាម​​​ព្រំ​​​ដែន​​​ទឹក​​​កម្ពុជា​​​-វៀត​​​ណាម​​​នេះ​​​ឡើយ​​​ ព្រោះ​​​វា​​​គ្រាន់​​​តែ​​​ជា​​​ប្រតិបត្តិការ​​​រុក​​​រក​​​យន្ត​​​ហោះ​​​ដែល​​​បាត់​​​ដំណឹង​​​​​​ប៉ុណ្ណោះ​​​។

លោក​​​នាយក​​​រដ្ឋ​​មន្ត្រី​​​ ហ៊ុន​​​ សែន​​​ បាន​​​មាន​​​ប្រសាសន៍​​​ថា “យើង​​​មិន​​​ចង់​​​ឲ្យ​​​ [សាធារ​​​ណ​​​ជន​​​] ភ្ញាក់​​​ផ្អើល​​​ចំពោះ​​​រឿង​​​ដែល​​​មន្ត្រី​​​​​​ក្រសួង​​​កា​​​រ​​​ពារ​​​ជាតិ​​​ [លោក​​​ ទៀ​​​ បាញ់​​​] បាន​​​ចេញ​​​បទ​​​បញ្ជា​​​ឲ្យ​​​កង​​​កម្លាំង​​​ប្រដាប់​​​អាវុធ​​​ទៅ​​​ធ្វើ​​​ការ​​​រុក​​​រក​​​នៅ​​​តាម​​​ព្រំ​​​ដែន​​​ទឹក​​​នេះ​​​ឡើយ​​​ ព្រោះ​​​កម្ពុជា​​​​​​​​​មិន​​​អាច​​​បោះ​​​បង់​​​ចោល​​​តួនាទី​​​និង​​​កាតព្វ​​​​​​កិច្ច​អន្តរជាតិ​​​​​របស់​​​យើង​​​បាន​​​ឡើយ​​​។

រដ្ឋាភិបាល​​​នៃ​​​ប្រទេស​​​អូស្ត្រាលី​​​ សហ​​​រដ្ឋ​​​អាមេរិក អង់គ្លេស​​​ ម៉ាឡេស៊ី​​​ និង​​​រដ្ឋាភិបាល​​​នៃ​​​ប្រទេស​​​ចិន សុទ្ធតែ​​​ផ្តោ​​ត​​​ទៅ​​​លើ​​​មហា​​​សមុទ្រ​​​​​​​​​ឥណ្ឌា​​​។ បំណែក​​​ដែល​​​អាច​​​ជា​​​របស់​​​យន្តហោះ​​​​​​​​​ដែល​​​បាត់​​​ដំណឹង​​​នេះ​​​ ត្រូវ​​​បាន​​​គេ​​​ប្រទះ​​​ឃើញ​​​​​​​​​​​​អណ្តែត​​​​​​នៅ​​​លើ​​​​​​សមុទ្រ​​​ចម្ងាយ​​​​​​២.៥០០​​​ គីឡូ​​​ម៉ែត្រ​​​ពី​​​ភាគ​​​ពាយព្យនៃ​​​​​​ទី​​​ក្រុង​​​ភើស​​​ របស់​​​ប្រទេស​​​អូស្ត្រាលី​​​កាល​​​ពី​​​ថ្ងៃ​​​ព្រហស្បតិ៍​​​៕ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស