កាលពីថ្ងៃសុក្រ មន្ត្រីតុលាការនិងមន្ត្រីពន្ធនាគារបានឲ្យដឹងថា សាលាដំបូងខេត្តកំពត បានចោទប្រកាន់មន្ត្រីនគរបាលស្រុកចំនួនពីរនាក់ពីបទប្រព្រឹត្តអំពើពុករលួយចំនួនប្រាំពីរករណី ហើយបានឃុំខ្លួនពួកគេជាបណ្តោះអាសន្ន។
អង្គភាពប្រឆាំងអំពើពុករលួយបានចាប់ខ្លួនលោក ស៊្រុន ឡាំ អធិការនគរបាលស្រុកបន្ទាយមាស និងលោក ម៉ក់ ហួត អធិការរងនគរបាលស្រុក កាលពីថ្ងៃព្រហស្បតិ៍ ដោយសង្ស័យថា មន្ត្រីនគរបាលទាំងពីរនេះ បានកឹបកេងប្រាក់ខែនិងប្រាក់លើកទឹកចិត្តរបស់មន្ត្រីក្រោមឱវាទអស់រយៈពេលប្រាំឆ្នាំមកហើយ។ ពួកគេត្រូវបានចោទប្រកាន់និងបញ្ជូនទៅពន្ធនាគារ។
លោក ឯម បូ ប្រធានពន្ធនាគារខេត្តកំពតបានមានប្រសាសន៍ កាលពីថ្ងៃសុក្រថា “សាលាដំបូងខេត្តបានចោទប្រកាន់លោក ឡាំ ពីបទប្រព្រឹត្តបទល្មើសចំនួនប្រាំពីរករណី ដូចជា ទទួលប្រាក់សំណូក កេងប្រវ័ញ្ច លាក់បាំងភស្តុតាងនិងបំផ្លាញឯកសារ ក៏ដូចជា ការប្រើអាវុធខុសច្បាប់ផងដែរ”។
លោក ឯម បូ បានឲ្យដឹងទៀតថា សាលាដំបូងខេត្តកំពត ក៏បានចោទប្រកាន់លោក ហួត ពីបទទទួលសំណូក លាក់បាំងភស្តុតាង បំផ្លាញឯកសារ ប្រើអាវុធខុសច្បាប់ និងពីបទព្យាយាមជ្រៀតជ្រែកចូលក្នុងកិច្ចការរបស់អង្គភាពប្រឆាំងអំពើពុករលួយដែរ។
លោក ឯម បូ បានមានប្រសាសន៍ថា “ ពួកគេទាំងពីរត្រូវបានឃុំខ្លួននៅពន្ធនាគារចាប់តាំងពីល្ងាចថ្ងៃព្រហស្បតិ៍មកម្លេ៉ះ បន្ទាប់ពីត្រូវបានចោទប្រកាន់ពីបទប្រព្រឹត្តបទល្មើសចំនួនប្រាំពីរករណីដូចដែលមានចែងនៅក្នុងក្រមព្រហ្មទណ្ឌ”។ លោកមានប្រសាសន៍បន្ថែមថា ឯកសារតុលាការមិនបានប្រាប់ឲ្យដឹងថា ប្រាក់ចំនួនប៉ុន្មានដែលគេសង្ស័យថា ជនជាប់ចោទទាំងពីរបានកឹបកេងក្នុងរយៈពេលជាងប្រាំឆ្នាំនោះទេ ហើយក៏មិនបានប្រាប់ថា តើពួកគេបានប្រព្រឹត្តរឿងនេះតាមរបៀបណាទេ។
ប្រសិនបើជនសង្ស័យទាំងពីរត្រូវបានរកឃើញថា មានទោសកំហុសមែននោះ ពួកគេនឹងប្រឈមការជាប់ពន្ធនាគារយ៉ាងតិចរយៈពេលប្រាំបួនឆ្នាំ និងត្រូវពិន័យក្នុងម្នាក់ៗយ៉ាងតិច១.០០០ដុល្លារ។
លោក រស់ បូផាន់ណា ចៅក្រមសើុបសួរបានបដិសេធមិននិយាយជាមួយអ្នកយកព័ត៌មានឡើយ។ ប៉ុន្តែលោក កឹម សុខន អធិការរងនគរបាលស្រុកបន្ទាយមាស បានបញ្ជាក់ពីការចោទប្រកាន់ទាំងនេះនិងការចាប់ខ្លួន។
ចាប់តាំងពីខែវិច្ឆិកាមក មានមន្ត្រីសង្គមកិច្ច មន្ត្រីពន្ធដារ មន្ត្រីរបស់អគ្គិសនីកម្ពុជា នគរបាល និងមន្ត្រីក្រសួងការងារ យ៉ាងតិចចំនួនប្រាំពីររូបត្រូវបានចាប់ខ្លួន ហើយបញ្ជូនចូលពន្ធនាគារដោយអង្គភាពប្រឆាំងអំពើពុករលួយ។
ប៉ុន្តែអង្គភាពប្រឆាំងអំពើពុករលួយនៅតែបិទបាំងអំពីព័ត៌មានលម្អិតនៃការចាប់ខ្លួន រួមមានថា តើប្រាក់ចំនួនប៉ុន្មានដែលត្រូវបានសង្ស័យថា ពួកគេបានកឹបកេងជាដើម។
លោក ពេជ្រ ពិសី ប្រធានកម្មវិធីនៅអង្គការតម្លាភាពកម្ពុជា បានកោតសរសើរចំពោះការចាប់ខ្លួនលើកចុងក្រោយនេះ ប៉ុន្តែបានជំរុញឲ្យអង្គភាពប្រឆាំងអំពើពុករលួយមានតម្លាភាពបន្ថែមទៀតនៅក្នុងការបំពេញការងាររបស់ខ្លួន។
លោក ពិសី បានមានប្រសាសន៍ថា “ អង្គភាពប្រឆាំងអំពើពុករលួយកម្រផ្សព្វផ្សាយព័ត៌មានពាក់ព័ន្ធនឹងចំនួននៃការចាប់ខ្លួនដែលត្រូវបានធ្វើឡើងដោយអង្គភាពប្រឆាំងអំពើពុករលួយនេះណាស់។ យើងចង់ឲ្យរដ្ឋាភិបាល អាជ្ញាធរ និងអង្គភាពប្រឆាំងអំពើពុករលួយផ្សព្វផ្សាយជាសាធារណៈអំពីការចាប់ខ្លួនទាក់ទិននឹងការប្រព្រឹត្តអំពើពុករលួយ ព្រោះពលរដ្ឋមានសិទ្ធិទទួលបានព័ត៌មានទាំងនេះ”៕ស៊ុយឈាង