មន្ត្រីតំណាងគណបក្សប្រជាជនកម្ពុជា និងគណបក្សសង្គ្រោះជាតិមិនព្រមជួបគ្នាទេកាលពីម្សិលមិញ បន្ទាប់ពីកិច្ចប្រជុំលើកទី៤របស់គណៈកម្មការកំណែទម្រង់ការបោះឆ្នោតទ្វេភាគី ដោយថ្នាក់ដឹកនាំមន្ត្រីរបស់គណបក្សកាន់អំណាចលើកឡើងថា រដ្ឋាភិបាលកំពុងត្រៀមលក្ខណៈធ្វើការកែទម្រង់ម្នាក់ឯង។
គណៈកម្មការនេះត្រូវបានបង្កើតឡើងដោយគណបក្សទាំងពីរកាលពីចុងខែមុន ហើយចាប់តាំងពីពេលនោះមកបានបើកកិច្ចពិភាក្សាដ៏តានតឹងជាច្រើនលើក។ គណបក្សសង្គ្រោះជាតិបានចោទគណបក្សប្រជាជនកម្ពុជាថា បានប្រើគណៈកម្មការនេះដើម្បីបង្ហាញប្រាប់អ្នកការទូត និងអ្នកផ្តល់ជំនួយថា ខ្លួនបើកចំហឲ្យមានការកែទម្រង់ ប៉ុន្តែ តាមពិត មានបំណងធ្វើមិនឲ្យមានកិច្ចព្រមព្រៀងពិតប្រាកដអំពីកំណែទម្រង់ជាក់លាក់ឡើយ។
លោក សុន ឆ័យ ដែលបានដឹកនាំមន្ត្រីគណបក្សប្រឆាំងនៅក្នុងគណៈកម្មការនេះបានមានប្រសាសន៍នៅពេលបញ្ចប់កិច្ចប្រជុំកាលពីម្សិលមិញថា “ យើងធ្វើសន្និសីទដាច់ដោយឡែកពីគ្នា” ។ លោក សុន ឆ័យ ដែលជាប្រធានក្រុមតំណាងរាស្ត្រគណបក្សសង្គ្រោះជាតិបានពន្យល់ប្រាប់ថា គណៈប្រតិភូនៃគណបក្សទាំងពីរបានរៀបចំគម្រោងពិភាក្សាបញ្ហាចំនួនបី ប៉ុន្តែ មិនអាចចេញរួចពីបញ្ហាទី១ឡើយ គឺការទាមទាររបស់គណបក្សសង្គ្រោះជាតិឲ្យមានការកែទម្រង់គណៈកម្មាធិការជាតិរៀបចំការបោះឆ្នោត។
លោក សុន ឆ័យ បានមានប្រសាសន៍នៅឯសន្និសីទកាសែតរបស់គណបក្សសង្គ្រោះជាតិថា “ បញ្ហាដែលជាប់គាំងគឺអំពីការយក គ.ជ.ប.ធ្វើជាអាទិភាព។ នេះជាបញ្ហាធំ និងជាបញ្ហាចាំបាច់ ហើយយើងមិនអាចដោះស្រាយបានទ ដូច្នេះយើងនឹងទុកបញ្ហានេះសម្រាប់កិច្ចប្រជុំរបស់មេដឹកនាំជាន់ខ្ពស់របស់គណបក្សទាំងពីរ”។
គណបក្សប្រឆាំងកំពុងទាមទារឲ្យមានការផ្លាស់ប្តូរ គ.ជ.ប. គឺត្រូវជ្រើសរើសសមាជិក គ.ជ.ប. ថ្មីដោយសំឡេងពីរភាគបីនៅក្នុងរដ្ឋសភា។
យោងតាមលទ្ធផលបោះឆ្នោតផ្លូវការ គណបក្សប្រជាជនកម្ពុជាទទួលបាន៦៨អាសនៈចំណែកឯគណបក្សសង្គ្រោះជាតិទទួលបាន៥៥អាសនៈនៅក្នុងការបោះឆ្នោត ជាតិកាលពីខែកក្កដា។ សំឡេងភាគច្រើនពីរភាគបីរបស់រដ្ឋសភាដែលមាន១២៣អាសនៈនេះតម្រូវឲ្យមានការគាំទ្រពីសមាជិកសភាចំនួន៨២រូប។
លោក ប៊ិន ឈិន ឧបនាយករដ្ឋមន្ត្រីដែលបានដឹកនាំមន្ត្រីគណបក្សប្រជាជនកម្ពុជានៅក្នុងគណៈកម្មការនេះបានមានប្រសាសន៍ថា ទំនងជាមិនមានកិច្ចប្រជុំរវាងមេដឹកនាំជាន់ខ្ពស់អំពីការកែទម្រង់ គ.ជ.ប. ទេ។លោក ប៊ិន ឈិន បានមានប្រសាសន៍នៅឯសន្និសីទកាសែតរបស់គណបក្សប្រជាជនកម្ពុជានៅប្រហែល១០ម៉ែត្រពីសន្និសីទកាសែតរបស់គណបក្សសង្គ្រោះជាតិថា “ព្រឹកនេះយើងបានជួបគ្នាប្រហែលកន្លះម៉ោង ហើយយើងបានដឹងថា យើងមានបញ្ហានេះ។ គណបក្សសង្គ្រោះជាតិជាអ្នកស្នើសុំពន្យារ ពេលការចរចានេះមិនមែនយើងទេ”។
លោក ប៊ិន ឈិន បានមានប្រសាសន៍ថា គណបក្សប្រឆាំងមិនព្រមពិភាក្សាអំពីចំណុចណាមួយក្នុងចំណោមសំណើទាំង១៤ចំណុចដែលត្រូវបានលើកឡើងនៅក្នុងកិច្ចប្រជុំលើកមុនៗនោះទេ ហើយបានផ្តោតតែលើកគ.ជ.ប. មួយប៉ុណ្ណោះ។ លោកបានពន្យល់ប្រាប់ថា ពេលនេះគណបក្សប្រជាជនកម្ពុជាកំពុងពិចារណាធ្វើការនៅក្នុងគណៈកម្មការនេះម្នាក់ឯង។លោក ប៊ិន ឈិន បានមានប្រសាសន៍ថា “ យើងមានគោលនយោបាយកែទម្រង់ស្ថាប័នបោះឆ្នោត។ យើងបានអញ្ជើញពួកគាត់ ហើយប្រសិនបើពួកគាត់មិនទៅចូលរួមកិច្ចប្រជុំ ឬវេទិកាសាធារណៈនៅពេលខាងមុខទេ យើងមិនអាចរង់ចាំបានឡើយ។ យើងត្រូវធ្វើការងារនេះ ពីព្រោះយើងបានប្រកាសពីរឿងនេះរួចហើយ”។
លោកបានបញ្ជាក់ថា គណបក្សប្រជាជនកម្ពុជាមិនពិចារណាអំពីការតម្រូវឲ្យមានសំឡេងពីរភាគបី ដើម្បីជ្រើសរើសសមាជិកគ.ជ.ប.ទេ ពីព្រោះវាអាចនាំឲ្យមានការជាប់គាំងនៅក្នុងការបង្កើតគណៈកម្មាធិការជាតិរៀបចំការបោះឆ្នោត។
អ្នកឃ្លាំមើលការបោះឆ្នោតបានស្នើឲ្យគណបក្សទាំងពីរជួបគ្នាឲ្យបានលើសពីមួយដងក្នុងមួយសប្តាហ៍ដើម្បីពីភាក្សាអំពីកំណែទម្រង់។ ពួកគេក៏បានគាំទ្រការទាមទាររបស់គណបក្សសង្គ្រោះជាតិឲ្យមានការផ្តោតលើការកែទម្រង់ គ.ជ.ប. ដែលរងការរិះគន់ច្រើន និងមានសមាជិកបច្ចុប្បន្នសុទ្ធតែជាសមាជិករបស់គណបក្សប្រជាជនកម្ពុជានេះដែរ។ ផ្ទុយទៅវិញ គណបក្សប្រជាជនកម្ពុជាបានស្នើឲ្យគណៈកម្មការនេះពិភាក្សាអំពីកំណែទម្រង់អង្គការឃ្លាំមើលការបោះឆ្នោតបែបនេះដែលពួកគេចោទថា លម្អៀងទៅខាងគណបក្សប្រឆាំង។
នៅក្នុងកិច្ចប្រជុំលើកដំបូងរបស់គណបក្សទាំងពីរកាលពីថ្ងៃទី៣ ខែមីនា គណបក្សទាំងពីរបានព្រមព្រៀងជាគោលការណ៍កែទម្រង់ការចុះឈ្នោះអ្នកបោះឆ្នោត និងច្បាប់ស្តីពីហិរញ្ញវត្ថុរបស់គណបក្សនយោបាយ។ប៉ុន្មានថ្ងៃក្រោយមក គណៈប្រតិភូរបស់គណបក្សប្រឆាំងបានលើកឡើងថា ចំណុចទាំងពីរនេះមិនសូវសំខាន់ដូចប្រាំពីរចំណុចដែលពួកគាត់បានបង្ហាញទៅមន្ត្រីគណបក្សកាន់អំណាចនោះទេ។
បន្ទាប់ពីកិច្ចប្រជុំលើកទី២កាលពីថ្ងៃទី១០ខែមីនា គណបក្សទាំងពីរមិនបានឈានដល់កិច្ចព្រមព្រៀងមួយណាឡើយ និងមិនបានសូម្បីតែចេញសេចក្តីថ្លែងការណ៍រួម អំពីខ្លឹមសារនៃកិច្ចប្រជុំនោះ។ ក្រោយមកលោក សម រង្ស៊ី មេដឹកនាំរបស់គណបក្សប្រឆាំងបានគំរាមឈប់ចរចា និងចាប់ផ្តើមធ្វើមហាបាតុកម្មជាថ្មី។
កាលពីថ្ងៃទី១៧ ខែមីនា គណបក្សប្រជាជនកម្ពុជាបានចងក្រងសំណើប្រាំពីរចំណុចសម្រាប់ចរចា បន្ថែមពីលើសំណើប្រាំពីរចំណុចដំបូងរបស់គណបក្សសង្គ្រោះជាតិ និងបានបន្ថែមច្បាប់សម្រាប់រឹតបន្តឹងការបោះពុម្ពផ្សាយអំពីការស្ទង់មតិការបោះឆ្នោត និងការកែប្រែកាលបរិច្ឆេទសម្រាប់ការបោះឆ្នោត ទៅក្នុងរបៀបវារៈសម្រាប់កិច្ចពិភាក្សា។ ការតវ៉ាចុងក្រោយរបស់គណបក្សប្រឆាំងមានអ្នកចូលរួមច្រើនកាលពីថ្ងៃទី២៩ ខែធ្នូដោយមានមនុស្សជាង៥០.០០០នាក់ហែក្បួនកាត់ទីក្រុងដើម្បីទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង ឬបោះឆ្នោតសាជាថ្មី។
ការតវ៉ានោះត្រូវបានបង្ក្រាបដោយហិង្សាកាលពីថ្ងៃទី ៤ខែមករា ហើយបន្ទាប់មករដ្ឋាភិបាលរបស់គណបក្សប្រជាជនកម្ពុជាបានដាក់បម្រាមជាបណ្តោះអាសន្នមិនឲ្យជួបជុំគ្នាជាសាធារណៈ និងបានអំពាវនាវឲ្យគណ បក្សសង្គ្រោះជាតិចូលតុចរចា៕គឹមហឿន