កាលពីម្សិលមិញ នគរបាលបានបដិសេធការអះអាងរបស់សកម្មជនប្រឆាំងការបណ្តេញចេញដែលបានលើកឡើងថា ការបាញ់ប្រហារពួកគាត់ពីសំណាក់អ្នកជិះម៉ូតូម្នាក់ ខណៈពួកគាត់កំពុងជិះរត់យន្តក្រុងមួយគ្រឿងត្រឡប់មករាជធានីភ្នំពេញវិញកាលពីថ្ងៃសៅរ៍ គឺជារឿងនយោបាយនោះ។
លោក អ៊ូច សុខុន អធិការនគរបាលខណ្ឌដូនពេញ បានមានប្រសាសន៍ថា “ វាមិនមែនជាការប៉ុនប៉ងធ្វើឃាតនោះទេ។ អ្នកបើកបររថយន្តក្រុងបានបើកជែងអ្នកជិះម៉ូតូ ហើយអ្នកជិះម៉ូតូបានខឹងនឹងអ្នកបើកជែងរូបនេះ ហើយក៏ផ្ទុះអាវុធតែម្តងទៅ”។គ្រាប់កាំភ្លើងបានហោះទៅត្រូវកញ្ចក់មុខរថយន្តក្រុងមួយគ្រឿងនេះ ដែលដឹកអ្នកដំណើរចំនួន៥០នាក់ត្រឡប់ពីការចូលរួមពិធីមួយនៅក្នុងខេត្តសៀមរាបដើម្បីរំឭកខួបប្រាំឆ្នាំនៃការបណ្តេញចេញដោយហិង្សា។អ្នកដំណើរនៅលើរថយន្តក្រុងមួយគ្រឿងនេះ បានរាយការណ៍ថា បានឃើញបុរសម្នាក់ដកកាំភ្លើងនៅខាងមុខរថយន្តក្រុងចេញពីចង្កេះរបស់ខ្លួន ហើយបាញ់មួយគ្រាប់សំដៅមកលើរថយន្តក្រុងតែម្តង។
រីឯនគរបាលវិញ បានរាយការណ៍ថា បានរកឃើញស្រោមកាំភ្លើងមួយនៅក្បែរកន្លែងកើតហេតុ ប៉ុន្តែមិនបានរកឃើញគ្រាប់កាំភ្លើងដែលបុរសរូបនោះបានបាញ់នោះឡើយ។
អ្នកស្រី សុង ស្រីលាភ អ្នកភូមិម្នាក់មកពីអតីតសហគមន៍បឹងកក់ដែលជិះលើរថយន្តក្រុងមួយគ្រឿងនេះដែរនោះ បាននិយាយកាលពីថ្ងៃអាទិត្យថា គាត់ជឿជាក់ថា ខ្មាន់កាំភ្លើងរូបនេះពិតជាបាញ់សំដៅទៅលើសកម្មជនដែលជិះនៅលើរថយន្តក្រុងនោះមែន។អ្នកស្រីបាននិយាយថា “ យើងដឹងថា វាគឺជាការប៉ុនប៉ងធ្វើឃាតព្រោះរថយន្តក្រុងមួយគ្រឿងនេះដឹកសុទ្ធតែសកម្មជនមកពីសហគមន៍បឹងកក់ សហគមន៍បុរីកីឡានិងសហគមន៍ថ្មគោលព្រមទាំងឪពុករបស់កម្មកររោងចក្រកាត់ដេរដែលត្រូវបានគេសម្លាប់កាលពីថ្ងៃទី៣ ខែមករា ផងដែរ”។
រីឯនគរបាលវិញ បានលើកឡើងថា ខ្លួនកំពុងតែស៊ើបអង្កេតហេតុការណ៍បាញ់ប្រហារនេះ៕ ស៊ុយឈាង