យោងតាមព្រះអង្គម្ចាស់ ស៊ីសុវត្ថិ ធម្មិកោ ព្រះមហាក្សត្រ នរោត្តម សីហមុនី និងសម្តេចម៉ែ នរោត្តម មុនីនាថ គ្រោងយាងត្រឡប់ពីប្រទេសចិនវិញនៅថ្ងៃនេះ បន្ទាប់ពីបានយាងទៅពិនិត្យព្រះរាជសុខភាពអស់រយៈពេលមួយខែមក។
ព្រះមហាក្សត្រ នរោត្តម សីហមុនី បានយាងទៅកាន់ទីក្រុងប៉េកាំងកាលពីថ្ងៃទី១៩ ខែកុម្ភៈ ដោយទុកឲ្យលោក ជា សីុម ប្រធានព្រឹទ្ធសភាមកពីគណបក្សប្រជាជនកម្ពុជាធ្វើជាប្រមុខរដ្ឋស្តីទីពេលព្រះអង្គមិនគង់នៅក្នុងប្រទេស។
ព្រះអង្គម្ចាស់ ធម្មិកោ ដែលជាកូនចិញ្ចឹមរបស់បិតាព្រះមហាក្សត្រ សីហមុនី គឺសម្តេចឪ នរោត្តម សីហនុ បានមានបន្ទូលបញ្ជាក់ថា ព្រះមហាក្សត្រយាងត្រឡប់មកកម្ពុជាវិញនៅថ្ងៃនេះ បន្ទាប់ពីបានពិនិត្យព្រះរាជសុខភាពរួចរាល់ហើយ។
ព្រះអង្គម្ចាស់បានមានព្រះរាជបន្ទូលប្រាប់ថា “ ព្រះមហាក្សត្រ នរោត្តម សីហមុនី របស់យើងត្រូវយាងទៅប្រទេសចិនពីរដងក្នុងមួយឆ្នាំជាមួយសម្តេចម៉ែ ដើម្បីពិនិត្យព្រះរាជសុខភាព”។
ព្រះរាជវង្សានុវង្សបានយកទីក្រុងប៉េកាំងធ្វើជាព្រះរាជដំណាក់ចាប់តាំងពីសម្តេចឪនរោត្តម សីហនុ កាលនៅជាព្រះអង្គម្ចាស់នោះបានព្រមព្រៀងដឹកនាំរដ្ឋាភិបាលបណ្តោះអាសន្នដែលគាំទ្រដោយចិននៅក្នុងទីក្រុងនេះជាមួយខ្មែរក្រហម បន្ទាប់ពីត្រូវបានបណ្តេញចេញពីតួនាទីជាអ្នកដឹកនាំប្រទេសកម្ពុជាក្នុងឆ្នាំ១៩៧០៕គឹមហឿន