នគរបាលនិងបុគ្គលិកសិទ្ធិមនុស្សកំពុងតែស៊ើបអង្កេតការអះអាងថា ក្រុមហ៊ុនចម្ការអំពៅរបស់ចិននៅក្នុងខេត្តព្រះវិហារបាននិងកំពុងជួលកម្មករជាកុមារ ចាប់តាំងពីខែធ្នួមក។
ឈ្មោះ អឿ ប៊ុនថានី បានឲ្យដឹងថា ក្រុមហ៊ុន អ៊ី ហេង (Y Heng Company) បានបណ្តេញនាងកាលពីថ្ងៃសៅរ៍ បន្ទាប់ពីនាងបានប្តឹងទៅនគរបាលមូលដ្ឋានថា កុមារចំនួន២០នាក់អាយុរវាងពី១០ឆ្នាំទៅ១៥ឆ្នាំ កំពុងតែធ្វើការនៅទីនោះ តាំងពីខែធ្នូមក។ ក្រុមហ៊ុន អ៊ី ហេង បានគ្រប់គ្រងចម្ការនេះសម្រាប់ក្រុមហ៊ុនចិនមួយ ឈ្មោះ ឡាន ហ្វេង ( Lan Feng)។ ប៊ុនថានី បានធ្វើពាក្យបណ្តឹងដូចគ្នាដែរកាលពីម្សិលមិញទៅអង្គការសិទ្ធិមនុស្សអាដហុក។ ប៊ុនថានី បានឲ្យដឹងថា “ ខ្ញុំបានឃើញកុមារធ្វើការនៅក្នុងចម្ការអំពៅរាល់ថ្ងៃ។ បន្ទាប់ពីខ្ញុំផ្តល់ដំណឹងទៅនគរបាលស្រុក ក្រុមហ៊ុន អ៊ី ហេង បានបណ្តេញខ្ញុំចេញ និងបានព្រមានខ្ញុំឲ្យឈប់និយាយអំពីរឿងនេះ។ ដូច្នេះព្រឹកមិញនេះ ខ្ញុំបានធ្វើពាក្យបណ្តឹងនៅឯការិយាល័យអង្គការសិទ្ធិមនុស្សអាដហុកនៅខេត្តព្រះវិហារ”។
លោក ឡោ ច័ន្ទ អ្នកសម្របសម្រួលរបស់អង្គការសិទ្ធិមនុស្សអាដហុកប្រចាំនៅក្នុងខេត្តនេះបានមានប្រសាសន៍ថា លោកទទួលបានបណ្តឹងនេះហើយ ហើយនឹងធ្វើការស៊ើបអង្កេត។ លោកបានលើកឡើងថា យោងតាមពាក្យបណ្តឹងបានឲ្យដឹងថា “ កុមារទាំងនោះត្រូវបានបញ្ជាឲ្យកាប់អំពៅ និងប្រមូលអុសនៅក្នុងចម្ការ។ អង្គការសង្គមស៊ីវិលនានាគិតថា នេះជាការកេងប្រវ័ញ្ចពលកម្មកុមារ និងផ្ទុយនឹងអនុសញ្ញាអន្តរជាតិ ច្បាប់ប្រឆាំងការជួញដូរ និងច្បាប់ការងារផងដែរ”។
ច្បាប់ការងារកំណត់ថា មនុស្សត្រូវមានអាយុយ៉ាងតិច១៥ឆ្នាំ ទើបអាចធ្វើការបានក៏ប៉ុន្តែអនុញ្ញាតឲ្យកុមារអាយុ១២ឆ្នាំធ្វើការងារស្រាលៗ ដែលគេចាត់ទុកថា មានសុវត្ថិភាព ដរាបណាវាមិនពាក់ព័ន្ធជាមួយវត្តមានក្នុងថ្នាក់របស់ពួកគេ។
អ្នកស្រី ប្រាំង ធីតា ប្រធានផ្នែកប្រឆាំងការជួញដូរមនុស្ស និងការពារអនីតិជនសម្រាប់នគរបាលខេត្ត បានឲ្យដឹងថា មន្ត្រីរបស់អ្នកស្រីបានចុះទៅចម្ការនោះកាលពីព្រឹកម្សិលមិញ និងបានរកឃើញកុមារប្រាំមួយនាក់ដែលមានអាយុពី១២ឆ្នាំទៅ១៣ឆ្នាំកំពុងធ្វើការនៅទីនោះ។
អ្នកស្រីបានមានប្រសាសន៍ថា “ ខ្ញុំគិតថា នេះជាអំពើខុសច្បាប់ ពីព្រោះកុមារទាំងនេះទទួលបានប្រាក់ឈ្នួលដូចមនុស្សធំដែរ។ យើងមិនដឹងព័ត៌មានលម្អិតទេ ដូច្នេះយើងនឹងស៊ើបអង្កេតបន្ថែមទៀត។ ប្រសិនបើមានសកម្មភាពខុសច្បាប់ យើងនឹងចាត់វិធានការតាមផ្លូវច្បាប់”។
លោក ឈាង លាងហួ មេក្រុមកម្មករនៅចម្ការនោះបានសារភាពថា កុមារបួនប្រាំនាក់កំពុងធ្វើការនៅចម្ការទាំងនេះ ប៉ុន្តែ និយាយការពារថា ចម្ការទទួលកុមារទាំងនោះឲ្យធ្វើការតែការងារស្រាលៗប៉ុណ្ណោះ ដូចជាលើកកង់អំពៅ ជាដើម និងដោយសារតែគ្រួសាររបស់ពួកគេត្រូវការប្រាក់បន្ថែម។
លោកបាននិយាយថា “ ខ្ញុំគិតថា នេះមិនមែនជាបញ្ហាទេ ពីព្រោះយើងអាណិតក្មេងៗទាំងនេះ ហើយពួកគេរស់នៅជាមួយឪពុកម្តាយ ឬម្តាយមីង និងដោយសារតែការងារសម្រាប់ពួកគេមិនមែនជាការងារធ្ងន់ៗទេ។ យើងគិតថា យើងជាខ្មែរទាំងអស់គ្នា ហើយយើងមិនគិតថា យើងកំពុងកេងប្រវ័ញ្ចកម្លាំងពលកម្មកុមារទេ”។លោកបានបដិសេធមិនធ្វើអត្ថាធិប្បាយថា តើមូលហេតុអ្វីបានជានាង ប៊ុនថានី លាឈប់ពីការងារនៅចម្ការនេះទេ។
ឡាន ហ្វេង ជាចម្ការមួយស្ថិតក្នុងចំណោមចម្ការប្រាំដែលនៅក្បែរៗរបស់ក្រុមហ៊ុនចិនតែមួយ។ កសិករមូលដ្ឋានបានចោទប្រកាន់ក្រុមហ៊ុននេះថា បានទន្ទ្រានយកដីរបស់ពួកគាត់កាលពីឆ្នាំមុន។ក្រុមហ៊ុន ចម្ការអំពៅនៅទូទាំងប្រទេសកម្ពុជាតែងតែរងការចោទប្រកាន់ថា បានទន្ទ្រានយកដីបែបនេះជាហេតុបណ្តាលឲ្យប្រជាជនដែលរងផលប៉ះពាល់ធ្លាក់ខ្លួនកាន់តែក្រទៅៗ៕ ប៊ុននី