37 C
Phnom Penh

យុទ្ធនាការ​របស់​មជ្ឈមណ្ឌ​ល​សិទ្ធិមនុស្ស​បង្ហាញ​ពី​កង្វះ​ភាពយុត្តិធម៌បន្ទាប់ពី​មាន​ការ​បាញ់​សម្លាប់

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ មជ្ឈមណ្ឌល​សិទ្ធិ​មនុស្ស​កម្ពុជាបាន​ធ្វើ​យុទ្ធនាការ​រយៈពេល​មួយ​ខែ​​ក្នុង​គោល​បំណង​​បង្ហាញ​ពី “ ​ភាព​អយុត្តិ​ធម៌​ពាក់ព័ន្ធ​​សិទ្ធិ​មនុស្ស​ទូទៅ” ដែលប្រព្រឹត្ត​ដោយ​កម្លាំង​សន្តិសុខ​ទៅលើ​​ជន​ស៊ីវិល​ចាប់​តាំង​ពី​ការ​បោះ​ឆ្នោត​ជាតិខែ​​កក្កដា​មក។


មជ្ឈមណ្ឌល​សិទ្ធិមនុស្ស​កម្ពុជានឹង​ប្រមូល​ហត្ថលេខា​ចំនួន​៥.០០០​ដើម្បីដាក់​ញត្តិ​ទៅ​លោក​នាយក​រដ្ឋមន្ត្រី​ ហ៊ុន សែន ទាម​ទារ​ “ឲ្យ​ធ្វើការ​ស៊ើប​អង្កេត​ឲ្យ​បាន​ឆាប់​ជា​សាធារ​ណៈ​ ឯក​រាជ្យ និង​ទូលំ​ទូលាយ​​លើ​ការ​ប្រើ​ប្រាស់​កម្លាំង​ហួស​ហេតុ​ពីសំណាក់​កម្លាំង​សន្តិ​សុខ​ក្នុងការ​បង្ក្រាប​ទៅ​​លើ​អ្នក​តវ៉ា”។ញត្តិ​នេះ​ក៏អំពាវ​នាវ​ឲ្យ​ “ ​បញ្ចប់​វប្ប​ធម៌ និទណ្ឌភាពសម្រាប់​ជន​ល្មើស​តាម​រយៈការ​​យក​ពួកគេ​​ទៅ​​ផ្តន្ទាទោស​​ហើយ​អនុវត្ត​សិទ្ធិរបស់​ជន​រងគ្រោះ​​ក្នុង​ការ​ទទួល​បាន​​យុត្តិធម៌ និងដំណោះ​ស្រាយ​រួម​ទាំង​​សំណង​ផងដែរ”។

យុទ្ធនាការ​ដែលមាន​ឈ្មោះថា “ ឯណា​ទៅ​យុត្តិធម៌របស់ខ្ញុំ?”​ត្រូវ​បាន​ធ្វើ​ឡើង​​ដំណាលគ្នា​នឹង​ទិវា​អន្តរជាតិ​របស់​អង្គការ​សហប្រជាជាតិ​សម្រាប់​សិទ្ធិ​ក្នុង​ការ​ទទួល​​​បាន​កា​រពិត​។ យុទ្ធនាការ​នេះ​រួម​មាន​សេចក្តី រាយការ​ណ៍ថ្មី​ៗ​តាមរយៈវីដេអូ​ដោយ​​បង្ហាញ ពី​ការ​សម្ភាស​ជាមួយ​ជន​រង​គ្រោះ​ដោយ​​សារ​អពើ​ហិង្សា​របស់​​កង​កម្លាំង​រដ្ឋា​ភិបាល​ចាប់​តាំង​ពី​មាន​ការ​តវ៉ា​ក្រោយ​ការ​បោះ​ឆ្នោត​​ ដែលបាន​ចាប់ផ្តើម​កាល​ពី​ខែកញ្ញា​មក​។

លោក កែវ សំណាង ដែលកូន​ប្រុស​របស់​គាត់​ឈ្មោះ ផេង សំ ត្រូវ​បាន​កង​រាជ​អាវុធ​ហត្ថ​បាញ់សម្លាប់​​នៅ​ផ្លូវ​វេងស្រេង​អំឡុង​ការ​តវ៉ា​របស់​កម្មករ​រោង​ចក្រ​កាត់​ដេរ​​ដើម្បី​ទាម​ទារ​ដំឡើង​ប្រាក់​ខែ​គោល​កាល​ពី​ថ្ងៃទី​៣ ខែ​មករានោះ​ បាន​និយាយថា “ ​ខ្ញុំនៅ​ឆ្ងាយ​​ពី​វា នៅពេល​កូនប្រុស​របស់ខ្ញុំ​បាន​ស្លាប់​ដោយ​អយុត្តិធម៌”។
បុរស​ជា​ឪពុក​រូបនេះ​បាន​សួរ​ថា “ ​ខ្ញុំ​បាន​​ចិញ្ចឹម​បីបាច់​​វា តាំង​ពី​វា​នៅ​តូចម៉្លេះ ហើយ​កូន​ខ្ញុំ​បាន​ស្លាប់នៅ​អាយុ​២៣ឆ្នាំ តើ​​ត្រូវ​គិត​យ៉ាង​ម៉េច?”។

លោក សំ រ៉ាវី ជាប្តី​របស់អ្នកស្រី ឈីវ ផានិត ត្រូវ​បាន​បាញ់សម្លាប់​អំឡុង​ការ​ប៉ះ​ទង្គិច​​ដូច​គ្នានេះដែរ។ ខ្សែអាត់វីដេអូ​បង្ហាញ​ពីរូបគាត់​មាន​ភ្នែក​ស្លឹង​ មិន​កម្រើក​ ​​មាន​ឈាម​ហូរ​ចេញ​ពី​ស្នាម​របួស​ត្រង់​ទ្រូង​ និង​​ត្រូវ​គេ​សែង​យក​ទៅ​ដាក់​​លើ​ម៉ូតូ​។
អ្នក​ស្រី ផានិត បាន​និយាយថា “ ​សូម​ចាប់​ខ្លួន​ឃាតករ​យកមក​ផ្តន្ទាទោស​តាម​ច្បាប់​”​​។

អ្នកស្រី ខាត់ សំណាង​​ បានឱបកូន​ស្រី​របស់​ខ្លួន​យ៉ាងណែន ហើយ​បាន​ស្រែក​យំ​នៅ​ពេល​រូបភាពវីដេអូ​​បង្ហាញ​ពី​​សាកសព​​ប្តីរបស់គាត់ឈ្មោះ​ ឃឹម សុភាព ដែល​មិន​​កម្រើក​និង​ប្រឡាក់​សុទ្ធ​តែ​ឈាម។ គា​ត់​ក៏ជា​កម្មករ​រោង​ចក្រ​កាត់​ដេរ​ដែរ​ ហើយ​ត្រូវ​បានគេ​សែង​ចេញ​ពី​កន្លែង​កើត​ហេតុ​នៅ​ផ្លូវ​វេង​ស្រេង​។​ ស្ត្រីមេម៉ាយ​អាយុ​២៤ឆ្នាំ​រូប​​​នេះ​និយាយ​ថា ប្តីរបស់គា​ត់​អាយុ​២៥ឆ្នាំ​ត្រូវ​គេ​ចាត់ទុក​ថា ជា​មនុស្ស​ទំនើង​។អ្នកស្រី​បាន​និយាយថា “ ​ប្តីរបស់ខ្ញុំ​ជា​មនុស្ស​ស្លូតបូត​​ ហើយ​មិន​ដែល​មាន​ជម្លោះ​ជាមួយ​នរណាទេ”។​អ្នកស្រី បន្ថែម​ថា អ្នក​ស្រី​ចង់​បាន​សំណង​ពី​រដ្ឋាភិបាល​សម្រាប់​ការ​ស្លាប់​ប្តី​របស់អ្នកស្រី។

លោក ផៃ ស៊ីផាន អ្នក​នាំពាក្យ​រដ្ឋា​ភិបាល​បាន​មាន​ប្រសាសន៍ថា ក្តីសង្ឃឹម​របស់​ក្រុម​គ្រួសារ​ទាំង​នោះ​​គឺ​ត្រូវ​ប្តឹងទៅ​​តុលាការ​ដែល​ល្បី​ខាង​​ពុក​រលួយនៅ​ក្នុង​​ប្រទេស​​នេះ​។​លោក​បាន​មានប្រសាសន៍ថា “ តុលា​ការ​គឺ​ជា​កន្លែង​​សម​ស្រប​មួយ​ដែល​ប្រជា​ពលរដ្ឋ​ខ្មែរ​ដាក់​ពាក្យ​បណ្តឹង​​ស្វែង​រក​សំណង​ពី​រដ្ឋាភិបាល​។ គេ​ចាំបាច់ត្រូវ​បង្ហាញ​ភ័ស្តុតាង​មួយ​ចំនួន​ផង”​៕សារុន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស