លោក សម រង្ស៊ី មេដឹកនាំគណបក្សប្រឆាំង បានត្រឡប់មកពីប្រទេសអូស្ត្រាលីវិញហើយកាលពីម្សិលមិញ ហើយបានគំរាមបន្តធ្វើមហាបាតុកម្មប្រឆាំងរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ប្រសិនបើគណបក្សប្រជាជនកម្ពុជាបន្តបដិសេធការទាមទាររបស់គណបក្សប្រឆាំងឲ្យមានការកែទម្រង់គណៈកម្មាធិការជាតិរៀបចំការបោះឆ្នោតនោះ។
ខណៈពេលមកដល់ទីស្នាក់ការគណបក្ស សង្គ្រោះជាតិក្នុងសង្កាត់ចាក់អង្រែលើរាជធានីភ្នំពេញ បន្ទាប់ពីធ្វើដំណើរទៅប្រទេសអូស្ត្រាលី និងប្រទេសនូវែលសេឡង់រយៈពេលមួយសប្តាហ៍មក លោក សម រង្ស៊ី បានប្រាប់ក្រុមអ្នកគាំទ្រថា ឥឡូវនេះគណបក្សសង្គ្រោះជាតិកំពុងពិចារណាអំពីជម្រើសរបស់ខ្លួន បន្ទាប់ពីមានការខ្វែងគំនិតគ្នាក្នុងជួរគណៈកម្មការកែទម្រង់ការបោះឆ្នោតដែលជាគណៈកម្មការចម្រុះរវាងគណបក្សទាំង ពីរនេះ។
លោក សម រង្ស៊ី បានមានប្រសាសន៍ថា “ថ្ងៃស្អែក ឬថ្ងៃខានស្អែក យើងនឹងមានដំណឹង ល្អ ហើយដំណឹងនោះគឺស្របតាមឆន្ទៈរបស់ប្រជាពលរដ្ឋ”។លោកបាននិយាយទៅកាន់អ្នកគាំទ្រប្រហែល១០០នាក់ថា “យើងធ្វើតាមឆន្ទៈរបស់ប្រជាពលរដ្ឋ ហើយប្រសិនបើពួកគាត់ចង់ធ្វើបាតុកម្ម យើងនឹងធ្វើបាតុកម្មទៀត គឺឲ្យកាន់តែធំទៅៗ។ ខ្ញុំចាំស្តាប់យោបល់របស់បងប្អូន”។
កាលពីថ្ងៃច័ន្ទ តំណាងគណបក្សប្រជាជនកម្ពុជា និងគណបក្សសង្គ្រោះជាតិបានបដិសេធមិនព្រមសូម្បីតែធ្វើសន្និសីទកាសែតរួមគ្នាក្រោយជំនួបលើកទី៤របស់គណៈកម្មការចម្រុះដែលឧស្សាហ៍ មានការខ្វែងគំនិតគ្នាចាប់តាំងពីត្រូវបានបង្កើតឡើងកាលពីចុងខែមុនមកនេះ។
ក្រុមការងារគណបក្សប្រជាជនកម្ពុជាបានលើកឡើងថា ខ្លួននឹងមិនពិចារណាសំណើរបស់គណបក្សប្រឆាំងឲ្យសមាជិកសភាពីរភាគបីយល់ព្រមលើការជ្រើសតាំងសមាជិកគណៈកម្មាធិការជាតិរៀបចំការបោះឆ្នោតដែលបច្ចុប្បន្ននេះគ្រប់គ្រងដោយគណបក្សកាន់អំណាចទេ។ ជាការឆ្លើយតប គណបក្សប្រឆាំងបានស្នើឲ្យមានការពិភាក្សាពីបញ្ហានេះក្នុងជំនួបផ្ទាល់រវាងលោក សម រង្ស៊ី និងលោកនាយករដ្ឋមន្ត្រី ហ៊ុន សែន តែម្តង។ គណបក្សប្រជាជនកម្ពុជាបានលើកឡើងថា ជំនួបបែបនេះក៏មិនអាចមានដែរ។
លោក សម រង្ស៊ី បានថ្លែងតាមទូរស័ព្ទកាលពីម្សិលមិញថា ជំហានបន្ទាប់របស់គណបក្សសង្គ្រោះជាតិគឺស្នើឲ្យគណបក្សប្រជាជនកម្ពុជាផ្តល់សំណើរបស់ខ្លួនវិញពាក់ព័ន្ធនឹងការកែទម្រង់គណៈកម្មាធិការជាតិរៀបចំការបោះឆ្នោតនេះ។
លោក សម រង្ស៊ី បានថ្លែងថា “ពួកយើងសុទ្ធតែបានឯកភាពគ្នាថាត្រូវតែមានកំណែទម្រង់ការបោះឆ្នោត។ ឥឡូវនេះបាល់ស្ថិតនៅក្រោមជើងរបស់គណបក្សប្រជាជនកម្ពុជាហើយ។ពួកគេអាចលើកជាសំណើថា តើខ្លួនចង់ធានាឯករាជភាពរបស់គណៈកម្មាធិការជាតិរៀបចំការបោះឆ្នោតដោយរបៀបណា។
ប្រសិនបើពួកគេឆ្លើយតបថា ខ្លួនមិនចាប់អារម្មណ៍ក្នុងការកែទម្រង់គណៈកម្មាធិការជាតិរៀបចំការបោះឆ្នោត ឬផ្តល់ចម្លើយមិនច្បាស់លាស់នោះ យើងនឹងស្នើឲ្យពួកគេបកស្រាយ”។ លោកបានបន្ថែមថា “ប្រសិនបើគណបក្សប្រជាជនកម្ពុជាបង្ហាញជំហរថា ខ្លួនគ្មានឆន្ទៈកែទម្រង់គណៈកម្មាធិការជាតិរៀបចំការបោះឆ្នោតនោះ យើងមានជំហររឹងមាំ របស់យើងដែរ ទាំងផ្នែកសីលធម៌ និងនយោបាយ នោះគឺការធ្វើមហាបាតុកម្ម”។
មហាបាតុកម្ម និងការហែក្បួនលើកចុងក្រោយរបស់គណបក្សសង្គ្រោះជាតិត្រូវបានកម្លាំងសន្តិសុខ និងមនុស្សរបស់រដ្ឋាភិបាលក្នុងសម្លៀកបំពាក់សីុវិលបង្ក្រាបដោយហិង្សាកាលពីថ្ងៃទី៤ ខែមករា។ ការបង្ក្រាបនោះធ្វើឡើងបន្ទាប់ពីមានការព្យាយាមបំបែកកូដកម្មរយៈពេលពីរថ្ងៃពីសំណាក់រដ្ឋាភិបាលក្រោមការគ្រប់គ្រងរបស់គណបក្សប្រជាជនកម្ពុជា ដែលអំឡុងពេលនោះ កងកម្លាំងរដ្ឋាភិបាលបានបាញ់កម្មកររោងចក្រកាត់ដេរប្រាំនាក់ស្លាប់ និងបានឃុំខ្លួនអ្នកតវ៉ា២១នាក់។
លោក ឈាង វុន សមាជិកសភាគណបក្សប្រជាជនកម្ពុជា និងជាអ្នកនាំពាក្យរដ្ឋសភាបានព្រមានគណបក្សប្រឆាំងឲ្យឈប់គំរាមធ្វើការតវ៉ាទៀត។ លោក ឈាង វុន បានអំពាវនាវឲ្យគណ បក្សសង្គ្រោះជាតិវិលទៅកាន់តុចរចាអំពីកំណែទម្រង់ដោយភាពបត់បែនវិញ។ លោកបាននិយាយថា “ពួកគេតែងតែគំរាមធ្វើបាតុកម្មនៅពេលពួកគេនិយាយ។ ប្រសិនបើពួកគេធ្វើបាតុកម្មមែន ពួកគេត្រូវទទួលខុសត្រូវចំពោះការខូចខាត និងចំពោះប្រវត្តិសាស្ត្រ។ បញ្ហានេះនឹងធ្វើឲ្យប្រទេសជាតិបែកបាក់ជាពីរ”៕សារុន
(រាយការណ៍បន្ថែមដោយ ហ៊ុល រស្មី)