លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានឲ្យដឹងថា ឆ្នាំនេះអង្គភាពប្រឆាំងអំពើពុករលួយនឹងចូលរួមជាមួយក្រសួងអប់រំក្នុងការទប់ស្កាត់ការលួចចម្លងអំឡុងការប្រឡងកម្រិតមធ្យមសិក្សាបឋមភូមិ និងទុតិយភូមិនៅទូទាំងប្រទេស។
ដើម្បីលុបបំបាត់ទម្លាប់ចាស់នៃការទិញក្រដាសចម្លើយ និងការសូកប៉ាន់អនុរក្ស លោក ឱម យ៉ិនទៀង បានសន្យាថា គ្រូ និងសិស្សណាដែលត្រូវចាប់បានពេលលួចចម្លងនឹងត្រូវបញ្ជូនទៅតុលាការ និងជាប់ពន្ធនាគារប្រសិនបើពួកគេត្រូវបានរកឃើញពិរុទ្ធភាពដូចការចោទប្រកាន់មែន។
លោក ឱម យ៉ិនទៀង បានមានប្រសាសន៍ កាលពីម្សិលមិញអំឡុងវគ្គបណ្តុះបណ្តាលស្តីពីការលុបបំបាត់អំពើពុករលួយនៅតាមសាលារៀនថា “ការអប់រំប្រឆាំងអំពើពុករលួយនៅកម្រិតមធ្យមសិក្សាចាប់ពីថ្នាក់ទី១០ដល់ថ្នាក់ទី១២គឺជាចំណុចចាប់ផ្តើមនៃការកែប្រែឥរិយាបថសិស្សឲ្យពួកគេចៀសវាងពីការប្រព្រឹត្តអំពើមិនគប្បី”។
លោក ឱម យ៉ិនទៀង បានប្រាប់គ្រូហាត់ការចំនួន១៥០នាក់មកពីទូទាំងប្រទេសឲ្យបំពេញការងារដោយមិនត្រឹមតែជួយមើលការខុសត្រូវការប្រឡងដែលគ្រោងធ្វើនៅខែកក្កដា និងខែសីហា ប៉ុណ្ណោះទេ គឺត្រូវកសាងសំណុំរឿងប្តឹងគ្រូបង្រៀននិងសិស្សដែលប្រព្រឹត្តអំពើពុករលួយផងដែរ។ លោក ឱម យ៉ិនទៀង បានឲ្យដឹងបន្តថា អង្គការមិនមែនរដ្ឋាភិបាល និងអង្គការសង្គមសីុវិលមួយចំនួនទៀតក៏នឹងត្រូវបានអញ្ជើញឲ្យឃ្លាំមើលការប្រឡងផងដែរ។ លោក ឱម យ៉ិនទៀង បានអញ្ជើញលោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាអ្នករិះគន់រដ្ឋាភិបាលមិនសំចៃមាត់ ឲ្យធ្វើជាអ្នកឃ្លាំមើលដែរ។
កាលពីដើមឆ្នាំនេះ លោក រ៉ុង ឈុន បានរៀបចំកូដកម្មរបស់គ្រូបង្រៀនទាមទារដំឡើងប្រាក់ខែយ៉ាងតិចឲ្យបាន២៥០ដុល្លារ ដោយលើកឡើងថា គ្រូបង្រៀននឹងមិនទទួលសំណូកទេ ប្រសិនបើពួកគាត់មានប្រាក់ខែគ្រប់គ្រាន់នោះ។ បច្ចុប្បន្ននេះគ្រូបង្រៀនទទួលបានប្រាក់ខែប្រហែល១០០ដុល្លារក្នុងមួយខែ។ លោក រ៉ុង ឈុន បានលើកឡើងកាលពីម្សិលមិញថា ការគំរាមរបស់លោក ឱម យ៉ិនទៀងពីការចាប់ខ្លួនគ្រូនិងសិស្សដែលត្រូវចាប់បានពេលលួចចម្លងនេះគឺពុំសមទេ។ លោកបានមានប្រសាសន៍ថា “ វាធ្ងន់ពេកហើយប្រសិនបើសិស្សត្រូវបានចាប់ខ្លួនពីបទសូកប៉ាន់ប្រាក់បន្តិចបន្តួចដល់អនុរក្សនោះ។អង្គភាពនេះគួរគិតពីជម្រើសផ្សេងក្នុងការចាត់វិធានការលើសិស្សដែលសូកប៉ាន់អនុរក្ស”។
វិធានការនេះជាផ្នែកមួយនៃយុទ្ធនាការរបស់ក្រសួងអប់រំក្នុងការលុបបំបាត់អំពើពុករលួយនៅតាមសាលារៀន ដែលជាផ្នែកនៃរបៀបវារៈរបស់រដ្ឋាភិបាលស្តីពីកំណែទម្រង់ក្រោយការបោះឆ្នោត។
ថ្លែងក្នុងសន្និបាតប្រចាំឆ្នាំរបស់ក្រសួងអប់រំកាលពីថ្ងៃសុក្រ លោក ហង្ស ជួនណារ៉ុន រដ្ឋមន្ត្រីក្រសួងអប់រំបានប្រកាសថា ការប្រឡងកម្រិតទុតិយភូមិនៅទូទាំងប្រទេសនឹងផ្តោតសារៈសំខាន់លើការកំណត់ថា តើសិស្សណាខ្លះត្រូវទទួលបានអាហារូបករណ៍ចូលបន្តការសិក្សាតាមសាកលវិទ្យាល័យរដ្ឋ។ ពីមុនពិន្ទុប្រឡងត្រូវបូកបញ្ចូលជាមួយពិន្ទុដំណាច់ឆមាស ដែលជារឿយៗត្រូវបានបំប៉ោងដោយគ្រូបង្រៀនជាថ្នូរនឹងសំណូកពីសិស្ស ដើម្បីទទួលបាននិទ្ទេសល្អ។ ឥឡូវនេះ សិស្សវិទ្យាល័យត្រូវឆ្លងផុតការប្រឡងប្រចាំថ្នាក់សិនទើបឈានទៅដល់ការប្រឡងថ្នាក់ជាតិបាន៕សារុន