29 C
Phnom Penh

សហភាព​​​អឺរ៉ុប​​​​​​កំពុង​​​​​​​​​ធ្វើ​​​ការ​​​ងារ​​​​​​​​​លើ​​​​​​យុទ្ធសាស្ត្រ​​​​​​ជំនួយ​​​រួម​​​ដើម្បី​​​បង្កើន​​​ប្រសិទ្ធភាព​​​ជំនួយ​​​ដល់​​​កម្ពុជា​​​

ដោយ ឌឹ ខេមបូឌា ដេលី

បទវិភាគ

ម្ចាស់​​​ជំនួយ​​​អឺរ៉ុប​​​​​​​​​របស់​​​កម្ពុជា​​​បាន​​​លើក​​​ឡើ​​​ងកាល​​​ពី​​​ម្សិលមិញ​​​ថា ពួក​​​គេ​​​កំពុង​​​តែ​​​​​​ធ្វើ​​​​​​​​​កិច្ច​​​ការ​​​ពាក់ព័ន្ធ​​​នឹង​​​ “យុទ្ធសាស្ត្រ​​​​​​សហ​​​ប្រតិបត្តិ​​​ការ​​” ថ្មី​​​មួយ​​​ដែល​​​មាន​​​រយៈ​​​ពេល​​​ប្រាំ​​​​​​ឆ្នាំ​​​ និង​​​ដែល​​​ត្រូវ​​​បាន​​​រៀប​​​ចំ​​​ឡើង​​​ដើម្បី​​​បង្កើន​​​ប្រសិទ្ធ​​​ភាព​​​នៃ​​​ឥណទាន​​​និង​​​ជំនួយ​​​ឥត​​​សំណង​​​​​​ជា​​​ច្រើន​​​លាន​​​ដុល្លារ​​​ដែល​​​ពួក​​​គេ​​​​​​ជួយ​​​ដល់​​​ប្រទេស​​​កម្ពុជា​​​ក្នុង​​​មួយ​​​ឆ្នាំ​​​។

ជាមួយ​​​នឹង​​​​​​ជំនួយ​​​សរុប​​​​​​​​​២០៩​​​លាន​​​​​​ដុល្លារ​​​​​​​​​ជួយ​​​ដល់​​​កម្ពុជា​​​កាល​​​ពី​​​ឆ្នាំ​​​២០១២​​​ សហ​​​ភាព​​​អឺរ៉ុប​​​​​​​​​និង​​​​​​​​​បណ្ដា​​​ប្រទេស​​​​​​​​​ជា​​​សមាជិក​​​របស់​​​​​​ខ្លួន​​​​​​​​​​​​បាន​​​​​​ក្លាយ​​​ជាប្រភព​​​ជំនួយ​​​ធំ​​​បំផុត​​​​​​​​​តែ​​​​​​មួយ​​​គត់​​​របស់​​​ប្រទេស​​​នេះ​​​​​​។​​​​​​

ពួក​​​គេ​​​បាន​​​លើក​​​ឡើង​​​នៅ​​​ក្នុង​​​សេចក្ដី​​​រាយការណ៍​​​រួម​​​មួយ​​​​​​ដែល​​​ខ្វះ​​​ព័ត៌មាន​​​លម្អិត​​​ថា “ដៃ​​​គូ​​​អភិវឌ្ឍន៍​​​អឺរ៉ុប​​​ក្លាយ​​​ជា​​​អ្នក​​​ផ្ដល់​​​ជំនួយ​​​ឥត​​​សំណង​​​ធំ​​​បំផុត​​​រួច​​​ទៅ​​​ហើយ​​​នៅ​​​ក្នុង​​​ប្រទេស​​​កម្ពុជា​​​ ហើយ​​​យើង​​​ជឿ​​​ថា ដំណើរ​​​​​​ការ​​​ធ្វើ​​​កម្មវិធី​​​រួម​​​គ្នា​​​នេះ​​​ នឹ​​​ង​​​អាច​​​ជួយ​​​បង្កើន​​​សកម្មភាព​​​និង​​​គុណភាព​​​អភិវឌ្ឍ​​​ន៍​​​របស់​​​យើង​​​​​​ ដើម្បី​​​ផល​​​ប្រយោជន៍​​​របស់​​​ប្រជាពល​​​រដ្ឋ​​​កម្ពុជា​​​បន្ថែម​​​ទៀត​​​​​​”។

យុទ្ធសាស្ត្រ​​​​​​សហប្រតិបត្តិការ​​​អភិវឌ្ឍន៍​​​អឺរ៉ុប​​​សម្រាប់​​​កម្ពុជា​​​​​​ឆ្នាំ​​​២០១៤-២០១៨​​​កំពុង​​​ទទួល​​​បាន​​​ការ​​​គាំទ្រ​​​​​​ពី​​​​​​គណៈប្រតិភូ​​​សហ​​​ភាព​​​អឺរ៉ុប​​​​​​ប្រចាំ​​​​​​កម្ពុជា​​​​​​​​​​​​​​​​​​ ដែល​​​មាន​​​ដូចជា​​​សាធា​​​រណរដ្ឋ​​​​​​ឆែក​​​ ប្រទេស​​​ហ្វាំង​​​ឡង់​​​ បារំាង​​​​​​ អៀរ​​​ឡង់​​​ អេស្ប៉ាញ​​​ ស៊ុយអែត ស្វ៊ីស និង​​​​​​ចក្រ​​​ភព​​​អង់គ្លេស​​​។​​​

សេចក្ដី​​​ថ្លែង​​​ការណ៍​​​នេះ​​​​​​មិនបាន​​​​​​​​​​​​ពន្យល់​​​​​​​​​​​​ច្បាស់​​​​​​​​​លាស់​​​​​​ថា តើ​​​​​​ប្រទេស​​​ទាំង​​​នេះ​​​នឹង​​​ធ្វើ​​​ការ​​​​​​ជាមួយ​​​គ្នា​​​​​​កាន់​​​តែ​​​ជិតស្និទ្ធ​​​​​​​​​​​​​​ ឬ​​​ថា តើវា​​​​​​នឹង​​​ជួយ​​​​​​​​​បាន​​​ដោយ​​​របៀប​​​ណា​​​​​​នោះ​​​ទេ​​​។​​​ ប៉ុន្តែ​​​​​​វា​​​គូស​​​បញ្ជាក់​​​ថា គោលការណ៍​​​អាទិភាព​​​រួម​​​​​​របស់​​​ពួក​​​​​​គេ​​​ គឺ​​​ត្រូវ​​​​​​ឆ្លុះ​​​បញ្ចាំង​​​​​​ឲ្យ​​​គៀក​​​នូវ​​​​​​ការ​​​​​​ខំ​​​ប្រឹង​​​ប្រែង​​​របស់​​​រដ្ឋាភិបាល​​​ “ក្រៅ​​​ពី​​​​​​កំណែ​​​ទម្រង់​​​​​​​​​កង​​​កម្លាំង​​​ប្រដាប់​​​អាវុធ​​​”។

ដៃ​​​គូ​​​អភិវឌ្ឍ​​​ន៍ទាំង​​​នេះ​​​បាន​​​និយាយ​​​ថា ពួក​​​គេ​​​បាន​​​ជួប​​​ជាមួយ​​​​​​តំណាង​​​​​​​​​ពាណិជ្ជកម្ម​​​និង​​​​​​អង្គ​​​ការ​​​ក្រៅ​​​រដ្ឋាភិបាល​​​នានាដើម្បី​​​​​​​​​ពិភាក្សា​​​អំពី​​​ផែន​​​​​​ការ​​​នេះ​​​នៅ​​​ក្នុងខែ​​​មីនា​​​ និង​​​ជាមួយ​​​មន្ត្រី​​​សុខា​​​ភិ​​​បាលកម្ពុជា​​​​​​កាល​​​ពី​​​ម្សិលមិញ​​​។ ពួក​​​គេ​​​បាន​​​លើកឡើង​​​ថា ពួក​​​គេ​​​នឹង​​​​​​ពិគ្រោះ​​​យោបល់គ្នា​​​ក្នុង​​​ពេល​​​ឆាប់​​​ៗ​​​ជាមួយ​​​ម្ចាស់​​​ជំនួយ​​​បរទេស​​​ផ្សេងៗរបស់កម្ពុជា​​​​​​ស្ដីពី​​​ផែន​​​ការ​​​នេះ​​​ ហើយ​​​នឹង​​​រៀប​​​ចំ​​​បញ្ចប់​​​​​​យុទ្ធសាស្ត្រ​​​នេះ​​​​​​នៅ​​​​​​ដំណាច់​​​ខែ​​​មេសា​​។​​​

ដំណឹង​​​នេះ​​កើតមាន​​​​​​ចំ​​​ថ្ងៃ​​​ដែល​​​​​​គណៈ​​​ប្រតិភូ​​​សមាជិក​​​សភា​​​អឺរ៉ុប​​​​​​ប្រាំពីរ​​​រូប​​​​​​​​​បាន​​​​​​មក​​​ដល់​​​រាជធានីភ្នំពេញ​​​សម្រាប់​​​ដំណើរ​​​ទស្សន​​​កិច្ច​​​រយៈ​​​ពេល​​​បួ​​​នថ្ងៃ​​​ ដើម្បី​​​ដោះ​​​ស្រាយ​​​បញ្ហា​​​ផ្សេង​​​ៗ​​​ដូចជា  ការ​​​អភិវឌ្ឍ​​​សិទ្ធិ​​​មនុស្ស​​​​​​ បញ្ហា​​​​​​ការងារ​​​ និង​​​ស្ថានភាព​​​ជាប់​​​គាំង​​​ផ្នែក​​​​​​នយោ​​​បាយ​​​​​​នា​​​ពេល​​​បច្ចុប្បន្ន​​​​​​។

សេចក្ដី​​​ថ្លែង​​​ការណ៍​​​មួយ​​​របស់​​​​​​រដ្ឋសភា​​​​​​កម្ពុជា​​​​​​ស្ដី​​​ពី​​​ដំណើរ​​​ទស្សនកិច្ច​​​នេះ​​​លើ​​​ក​​​ឡើង​​​ថា គណៈប្រតិភូ​​​មួយ​​​ក្រុម​​​នេះ​​​នឹង​​​​​​ចូល​​​ជួប​​​សវនាការ​​​ជាមួយ​​​លោក​​​ សុខ អាន​​​ រដ្ឋ​​​មន្ត្រី​​​ទទួល​​​បន្ទុក​​​ទីស្ដីការ​​​គណៈរដ្ឋមន្ត្រី លោក​​​ ស ខេង​​​ រដ្ឋ​​​មន្ត្រី​​​ក្រសួង​​​មហាផ្ទៃ​​​ លោក​​​ស្រី ឃួន​​​ សុដារី អនុប្រធាន​​​ទី២ នៃ​​​រដ្ឋ​​​សភា និង​​​លោក​​​ ឈាង វុន ប្រធាន​​​គណៈកម្មាធិការ​​​ទទួល​​​បន្ទុក​​​​​​កិច្ច​​​ការ​​​បរទេស​​​នៃ​​​​​​រដ្ឋ​​​សភា​​​។

ដំណើរ​ទស្សនកិច្ច​​​នេះ​​​ធ្វើ​​​ឡើង​​​ចំ​​​ពេល​​​​​​​​​​​​កំពុង​​​មាន​​​​​​វិវាទ​​​នយោបាយ​​​រវាង​​​គណបក្ស​​​ប្រជាជន​​​កម្ពុជា​​​កំពុង​​​កាន់​​​អំណាច​​​ និង​​​គណ​​​បក្ស​​​សង្គ្រោះ​​​ជាតិ​​​។ គណបក្ស​​​ប្រឆាំង​​​ចោទ​​​ប្រកាន់​​​រដ្ឋាភិបាល​​​ថា បាន​​​លួច​​​បន្លំ​​​​​​នៅ​​​​​​ក្នុង​​​ការ​​​បោះឆ្នោត​​​ជាតិ​​​កាល​​​ពី​​​ឆ្នាំ​​​មុន​​​។​​​ ជា​​​ការ​​​តវ៉ា​​​​​​ គណបក្ស​​​ប្រឆាំង​​​​​​​​​មិន​​​ព្រម​​​ទទួល​​​យក​​​អាសនៈ​​​​​​សភា ដែល​​​​​​ខ្លួន​​​​​​ទទួល​​​បាន​​​ជា​​​ផ្លូវ​​​ការ​​​នៅ​​​ក្នុង​​​ការ​​​បោះឆ្នោត​​​នោះ​​​ទេ​​​។

គណបក្ស​​​សង្គ្រោះ​​​បាន​​​ជំរុញ​​​ឲ្យ​​​ម្ចាស់​​​ជំនួយ​​​នានា​​​របស់​​​កម្ពុជា​​​​​​កុំ​​​​​​ចុះ​​​កិច្ច​​​ព្រម​​​ព្រៀង​​​​​​ផ្ដល់​​​ជំនួយ​​​ថ្មី​​​ណាមួយ​​​ជាមួយ​​​រដ្ឋាភិបាល​​​បច្ចុ​​​ប្បន្ន​​​ រហូត​​​ទាល់​​​តែ​​​​​​វិវាទ​​​របស់​​​ខ្លួន​​​ជាមួយ​​​គណ​​​បក្ស​​​ប្រជាជន​​​កម្ពុជា​​​ត្រូវ​​​បាន​​​ដោះ​​​ស្រាយ​​​ចប់​​​សិន​​៕ សុខុម

(រាយការណ៍បន្ថែម​​​ដោយ​​​ ហ៊ុល​​​ រស្មី)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស