28 C
Phnom Penh

ក្រសួង​​​ការងារ​​​​​​នឹង​​​​​​ចាប់​​​ផ្ដើម​​​ពិនិត្យតាមដាន​​​​​​ទីភ្នាក់ងារ​​​​​​ជ្រើសរើស​​​​​​ពលករ​​​ទេ​​​សន្តរប្រវេសន៍​​​

ដោយ ឌឹ ខេមបូឌា ដេលី

បទវិភាគ

លោក​​​ អិុត​​​​​​ សំហេង​​​ រដ្ឋ​​​មន្ត្រី​​​ក្រសួង​​​ការ​​​ងារ​​​​​​និង​​​បណ្ដុះបណ្ដាល​​​វិជ្ជាជីវៈ​​​បាន​​​​​​​​​មាន​​​ប្រសាសន៍​​​កាល​​​ពី​​​ម្សិលមិញ​​​ថា ថ្ងៃ​​​នេះ​​​រដ្ឋាភិ​​​បាល​​​នឹង​​​ចាប់​​​ផ្ដើម​​​ធ្វើ​​​ការ​​​ត្រួត​​​ពិនិត្យ​​​តឹង​​​រឹុង​​​​​​លើ​​​ទីភ្នាក់ងារ​​​នានា​​​ ដែល​​​ជ្រើសរើស​​​ពល​​​ករ​​​​​​​​​បញ្ជូន​​​ទៅ​​​ធ្វើ​​​ការ​​​នៅ​​​បរទេស​​​។ រដ្ឋមន្ត្រី​​​រូ​​​ប​​​នេះ​​​​​​ធ្លាប់​​​បាន​​​ព្រមាន​​​រួច​​​មក​​​ហើយ​​​​​​ថា នឹង​​​ព្យួរ​​​​​​ ឬ​​​ដក​​​អាជ្ញាប័ណ្ណ​​​​​​ពី​​​ទីភ្នាក់​​​ងារ​​​ណា​​​ ដែល​​​​​​មិន​​​​​​គោរព​​​​​​ច្បាប់​​​ការងារ​​​។

ថ្លែង​​​ក្នុង​​​សិក្ខាសាលា​​​មួយ​​​​​​​​​រៀប​​​ចំឡើង​​​ដើម្បី​​​​​​​​​ណែនាំ​​​​​​អប់រំ​​​ទីភ្នាក់ងារ​​​ជ្រើស​​​រើស​​​ពល​​​ករ​​​ ដែល​​​បាន​​​ចុះ​​​បញ្ជី​​​​​​ចំនួន​​​៤៣​​​​​​​​​នៅ​​​ក្នុង​​​​​​ប្រទេស​​​​​​កម្ពុជា​​​ ​​​​​​ លោក​​​ អិុត សំហេង​​​ បាន​​​​​​ក្រើន​​​រំឭក​​​​​​ទីភ្នាក់ងារ​​​ទាំង​​​នេះ​​​ឲ្យ​​​អនុវត្ត​​​ខ្ជាប់​​​ខ្ជួន​​​​​​​​​តាម​​​ប្រកាស​​​ថ្មី​​​ចំនួន​​​ប្រាំបី​​​ ឬ​​​សារា​​​ចរ​​​របស់​​​ក្រសួង​​​ដែល​​​បាន​​​ចូល​​​ជា​​​ធរមាន​​​កាល​​​​​​ពី​​​ចុង​​​ឆ្នាំ​​​មុន​​​​​​។

លោក​​​ អិុត​​​ សំហេង​​​​​​ បាន​​​មាន​​​ប្រសាសន៍​​​ថា “ខ្ញុំ​​​សូម​​​​​​ផ្ដល់​​​អនុសាសន៍​​​ដល់​​​​​​ទីភ្នាក់ងារ​​​នីមួយ​​​ៗ​​​ អស់​​​លោក​​​ត្រូវ​​​តែ​​​ត្រៀម​​​ខ្លួន​​​ឲ្យ​​​បាន​​​ល្អ​​​ អស់​​​លោក​​​ត្រូវ​​​តែ​​​ធ្វើ​​​​​​ឲ្យ​​​​​​ក្រុមហ៊ុន​​​​​​របស់​​​អស់​​​លោក​​​មាន​​​ស្ថិរភាព​​​ អស់​​​លោក​​​​​​ត្រូវ​​​តែ​​​ធ្វើ​​​​​​ជា​​​ទីភ្នាក់ងារ​​​ពិត​​​ប្រាកដ​​​ ជា​​​អង្គភាព​​​ពិត​​​ប្រាកដ​​​​​​។​​​ វា​​​មិន​​​មែន​​​ជា​​​ការ​​​លេង​​​សើច​​​ទេ​​​ រដ្ឋាភិបាល​​​និង​​​ក្រសួង​​​​​​នឹង​​​ចាប់​​​អស់​​​លោក​​​​​​ឲ្យ​​​ទទួលខុសត្រូវ​​​ប្រសិន​​​បើ​​​អស់​​​លោក​​​បោក​​​ប្រាស​​​ពលករ​​​”។​​​ លោកមាន​​​ប្រសាសន៍​​​ថា បន្ទាប់ពី​​​​​​​​​ការ​​​ព្រមាន​​​ពីរ​​​ដង​​​​​​ “ប្រសិន​​​បើ​​​​​​បញ្ហា​​​​​​​​​មិនត្រូវ​​​បាន​​​ដោះស្រាយ​​​​​​​​​ទេ​​​នោះ​​​ យើង​​​​​​​​​​​​នឹង​​​​​​​​​ឈាន​​​ទៅ​​​ដល់​​​​​​ការ​​​លុប​​​ចោល​​​អាជ្ញាប័ណ្ណ”។

លិខិត​​​បទ​​​ដ្ឋាន​​​ដែល​​​មាន​​​ឈ្មោះ​​​ថា ការ​​​បញ្ជូន​​​​​​ពល​​​ករ​​​ទៅ​​​បរទេស​​​​​​តាម​​​រយៈ​​​ទី​​​ភ្នាក់ងារ​​​ជ្រើស​​​រើស​​​ពល​​​ករ​​​​​​ឯកជន​​​​​​នេះ​​​ ត្រូវ​​​បាន​​​​​​​​រៀប​​​ចំ​​​ឡើង​​​ដើម្បី​​​​​​ចាប់​​​​​​​​​ទីភ្នាក់ងារ​​​​​ជ្រើសរើ​​​ស​​​ពល​​​ករ​​​​​​នានា​​​ទទួល​​​ខុស​​​ត្រូវ​​​ចំពោះ​​​ការ​​​បណ្ដុះ​​​បណ្ដាល​​​​​​​​​និង​​​ទង្វើ​​​ប្រព្រឹត្តិ​​​ទៅ​​​លើ​​​​​​ពល​​​ករ​​​ទេសន្ដរ​​​ប្រវេ​​​សន៍​​​ និង​​​ដើម្បី​​​ដាក់​​​ចេញ​​​នូវ​​​​​​យន្ត​​​ការ​​​​​​បណ្ដឹង​​​​​​តវ៉ា​​​​​​មួយ​​​សម្រាប់​​​ពល​​​ករ​​​​​​ប្រើប្រាស់​​​ ខណៈ​​​ពេល​​​កំពុង​​​រស់​​​នៅ​​​បរទេស​​​។

ក្នុង​​​ពេល​​​​​​កន្លង​​​មក​​​​​​ពល​​​ករ​​​ទេសន្តរ​​​ប្រវេ​​​សន៍​​​​​​បាន​​​ចាញ់​​​ការ​​​បោក​​​បញ្ឆោត​​​លួង​​​លោម​​​ពី​​​សំណាក់​​​មេ​​​ខ្យល់​​​ទុច្ចរិត​​​ ដែល​សន្យា​​​​​​មិន​​​ពិត​​​ជាមួយ​​​ពួក​​​គេ​​​ ហើយ​​​​​​​​​បន្ទាប់​​​មក​​​​​​ត្រូវ​​​ទទួល​​​រង​​​ការ​​​ធ្វើ​​​បាប​​​ពី​​​សំណាក់​​​​​​ថៅកែ​​​ នៅ​​​ពេល​​​ពួក​​​គេ​​​​​​​​ទៅ​​​ដល់​​​គោលដៅ​​​របស់​​​​​​ខ្លួន​​​នៅ​​​បរទេស​​​។ នៅ​​​ក្នុង​​​​​ឆ្នាំ​​​២០១១ ក្រោយ​​​ពី​​​មាន​​​សេចក្ដី​​​រាយ​​​ការណ៍​​​ជា​​​ច្រើន​​​អំពី​​​ការ​​​រំលោភ​​​បំពាន​​​​​​ធ្ងន់​​​ធ្ងរ​​​ពី​​​សំណាក់​​​​​​ថៅ​​​កែ​​​នៅក្នុង​​​ប្រទេស​​​ម៉ា​​​ឡេសីុ​​​លោក​​​ នាយក​​​រដ្ឋ​​​មន្ត្រី​​​ ហ៊ុន​​​ សែន​​​ បាន​​​​​​ដាក់​​​បម្រាម​​​​​​​​​មិន​​​ឲ្យ​​​​​​បញ្ជូន​​​​​​ស្ត្រី​​​ជំនួយ​​​ការ​​​មេ​​​ផ្ទះ​​​ទៅ​​​​​​កាន់​​​ទីនោះ​​​​​​ទៀត​​​។

លោក​​​ អិុត​​​ សំហេង​​​ បាន​​​មាន​​​ប្រសាសន៍​​​ថា “ពីមុន​​​ទីភ្នាក់ងារ​​​មួយ​​​ចំនួន​​​​​​​​​គ្រាន់តែ​​​ជួល​​​​​​​​​ផ្ទះ​​​ពី​​​រ​​​ល្វែង​​​​​ប៉ុណ្ណោះ​​​​ ហើយ​​​​​​​​​ដាក់​​​ពល​​​ករ​​​នៅ​​​ក្នុង​​​នោះ​​​ពី​​​​​​៦០ ទៅ​​​៧០​​​នាក់​​​ វា​​​មិន​​​មែន​​​​​​ជា​​​​​​មជ្ឈមណ្ឌល​​​បណ្ដុះបណ្ដាល​​​ទេ​​​ ប៉ុន្តែ​​​វា​​​ជា​​​មណ្ឌល​​​ឃុំ​​​ឃាំង​​​​​​។​​​ យើង​​​​​​​​​នឹង​​​មិន​​​បណ្ដោយ​​​​​​ឲ្យ​​​រឿង​​​នេះ​​​​​​​​​កើត​​​ឡើង​​​ទៀត​​​ទេ​​​”។

លោក​​​ ឃ្លាំង​​​ រីន អ្នកសម្រប​​​សម្រួល​​​គម្រោង​​​នៅ​​​អង្គការ​​​ពល​​​កម្ម​​​អន្តរជាតិ​​​​​​​​​ ILO ​ដែល​​​បាន​​​ជួយ​​​​​​ធ្វើ​​​សេចក្ដី​​​ព្រាង​​​​​​សារាចរ​​​ណែនាំ​​​​​​ថ្មី​​​ទាំង​​​នេះ​​​ បាន​​​មាន​​​ប្រសាសន៍​​​កាល​​​ពី​​​ម្សិល​​​មិញ​​​ថា អង្គការ​​​ ILO គ្មាន​​​តួនាទ​​ី​​​នៅ​​​ក្នុង​​​ការ​​​ពិនិត្យ​​​តាម​​​ដាន​​​ទេ​​​។ លោក​​​បាន​​​មាន​​​​​​ប្រសាសន៍​​​ទៀត​​​ថា “​ពួក​​​យើង​​​មិន​​​ដឹង​​​ច្បាស់​​​ពី​​​តារាង​​​សម្រាប់​​​ការ​​​ពិនិត្យ​​​តាម​​​ដាន​​​នេះ​​​ទេ​​​ ប៉ុន្តែ​​​ខ្ញុំ​​​យល់​​​ថា វា​​​នឹង​​​​ដូច​​​គ្នា​​​បេះ​​​បិទ​​​​​​ទៅ​​​នឹង​​​​​​អ្វី​​​នៅ​​​ក្នុង​​​​​​ប្រកាស​​​នេះ​​​”។​​​ លោក​​​បាន​​​​​​បង្វែ​​រ​សំណួរ​​បន្ថែម​​​ទៀត​​​​​​ទៅ​​​លោក​​​​​​ ម៉ាក ធូណុន​​​ (Max Tunon) អ្នក​​​សម្រប​​​សម្រួល​​​ជាន់​​​ខ្ពស់​​​នៅ​​​អង្គការ​​​ ILO ដែល​​​មិន​​​អាច​​​ទាក់ទង​​​បាន​​​។

ក្រសួង​​​ការងារ​​​ក៏​​​​​​បដិសេធ​​​​​​មិន​​ផ្ដល់​​​​​​ ទស្សន​​​វិស័យ​​​បន្ថែម​ទៀត​​​​​​លើ​​​ស្ថានភាព​​​​​​ជាក់​​​លាក​​​់​​​​​​ដែល​​​ទីភ្នាក់ងារ​​​​​​ជ្រើសរើស​​​ពល​​​ករ​​​នានា​អាច​​​​​​​​នឹង​​​ត្រូវ​​​​​​ឆ្លង​​​កាត់​​​ការ​​​ពិនិត្យ​​​ពិច័យ​​​​​​យ៉ាង​​​ហ្មត់​​​​​​ចត់​​​យ៉ាង​​​ណា​​​នោះ​​​ទេ អំឡុង​​​ពេល​​​​​​​​​ពិនិត្យ​​​តាម​​​ដាន​​​​​​​​​របស់​​​រដ្ឋាភិបាល​​​។​​​

លោក​​​ រ៉ាវី ចាន់​​​ដ្រាន​​​​​​ (Ravi Chandran) នាយក​​​គ្រប់គ្រង​​​​​​​​​នៅ​​​ Unicorn ដែល​​​​​​ជា​​​ទីភ្នាក់​​​ងារ​​​ជ្រើសរើស​​​ពល​​​ករ​​​មួយ​​​របស់​​​ម៉ាឡេ​​​ស៊ី បាន​​​មាន​​​ប្រសាសន៍​​​ថា លោក​​​សង្ឃឹម​​​ថា ​​​បម្រាម​​​បច្ចុប្បន្ន​​​លើ​​​ការ​​​បញ្ជូន​​​ស្ត្រី​​​ជំនួយ​​​ការ​​​មេផ្ទះ​​​កម្ពុជា​​​ទៅ​​​កាន់​​​ប្រទេស​​​ម៉ាឡេសីុ​​​ នឹង​​​ត្រូវ​​​ដក​​​ចេញ​​​វិញ​​​។​​​ លោក​​​បាន​​​​​​បង្ហាញ​​​មន្ទិល​​​ថា សារាចរ​​​ណែនាំ​​​នេះ​​​នឹង​​​​​​​​​មិន​​​ធានា​​​ការពារ​​​សិទ្ធិ​​​​​​របស់​​​ពលករ​​​​​​ឲ្យ​​​បាន​​​ត្រឹម​​​ត្រូវ​​​នោះទេ​​​។

លោក​​​ថ្លែង​​​​​​ថា “យើង​​​ជា​​​ក្រុម​​​ហ៊ុន​​​​​​ស្រប​​​ច្បាប់​​​​​​ ដែល​​​គោរព​​​សិទ្ធិ​​​ពល​​​ករ​​​​​​ប៉ុន្តែ​​​យើង​​​​​​​​​តែង​​​តែ​​​​​​ក្លាយ​​​ជា​​​​​​អ្នក​​​ខាត​​​បង់​​​​​​។​ ដូច​​​យើង​​​ដឹង​​​ស្រាប់​​​​​​ហើយ​​​ថា នៅក្នុង​​​ប្រទេស​​​​​​កម្ពុជា​​​​​​អ្វី​​​ក៏​​​អាច​​​ទិញ​​​បាន​​​ដែរ។​​​គ្មាន​​​ទីភ្នាក់​​​ងារ​​​ក្នុង​​​ស្រុក​​​ណាមួយ​​​​​​ដែល​​​នឹ​​​ង​​​​​​ឆ្លង​​​​​​មិន​​​ផុត​​​​​​ដំណាក់​​​កាល​​​ពិនិត្យ​​​តាមដាន​នេះ​​​ឡើយ​​​ ពួក​​​គេ​​​ដឹង​​​​​​ថា​​​គួរ​​​ធ្វើ​​​យ៉ាង​​​ណា​​​ហើយ​​​​​​”៕ សុខុម​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស