30 C
Phnom Penh

មានការ​ព្រួ​យ​បារម្ភ​​កាន់​តែ​ខ្លាំង​អំពី​សិទ្ធិ​ខ្មែរ​ក្រោម​នៅក្នុង​សវនាការ​ជំនុំជម្រះ​ពី​ទោស​ក្បត់ជាតិ

ដោយ ឌឹ ខេមបូឌា ដេលី

បទវិភាគ

អង្គការ​តស៊ូមតិ​មួយ​បាន​ព្រមាន​កាល​ពី​ម្សិល​មិញ​ថា ​ការ​ភ័យ​ខ្លាច​​មាន​កាន់​តែ​​ខ្លាំង​​ឡើងៗដោយសារ​ថា ការ​បើក​សវនាការ​ជំនុំ​ជម្រះ​ពី​ទោស​ក្បត់ជាតិ​នៅថ្ងៃសុក្រ​លើ​​បុរ​ស​​ជន​ជាតិ​ភាគតិចខ្មែរ និង​ខ្មែរ​ក្រោម​​ប្រាំពីរ នាក់​ដែល​ត្រូវ​បាន​ចាប់ខ្លួន​ក្នុង​​ប្រទេស​ថៃ ហើយ​បាន​បញ្ជូន​​មក​ប្រទេស​កម្ពុជា​កាល​ពី​ឆ្នាំមុន​នោះ ​គឺ​ជា​រឿង​​មិន​ត្រឹម​ត្រូវ​ ដោយ​សារ​​​ខ្វះ​ភ័ស្តុ​តាង​​សម្រាប់​​ភ្ជាប់បុរស​ទាំង​នេះ។

បុរស​ទាំង​ប្រាំពីរ​នាក់​នេះ​ត្រូវ​បាន​ឃុំ​ខ្លួន​កាល​ពី​ឆ្នាំ​មុន​ក្នុង​ពន្ធនាគារ​ព្រៃស​ រាជ​ធានី​ភ្នំពេញ​​ដោយ​ចោទ​ប្រកាន់ពី​បទ​មាន​គម្រោង ​ផ្ត​ល់​មធ្យោបាយ​ដល់​បរទេស​ក្នុង​ការ​ធ្វើ​សកម្ម​ភាព​ប្រឆាំង​ប្រទេស​​កម្ពុជា​ ជា​ការ​ចោទ​ប្រកាន់​ដែល​មាន​ទោស​ជាប់​ពន្ធ​នាគារ​រហូត​ដល់​១០ឆ្នាំ។

បុរស​បួន​នាក់​ក្នុង​ចំណោម​បុរស​ទាំង​នោះ​ក៏​ត្រូវ​បាន​ចោទ​ប្រកាន់​ពី​បទ​ឆ្លង​ដែន​ខុស​​ច្បាប់​​ពី​​ប្រទេស​កម្ពុជា​​ទៅ​​ប្រទេស​ថៃ​ផង​ដែរ។ ការ​ព្រួយ​បារម្ភ​អំពី​សវនាការ​ជំនុំ​ជម្រះ​នេះ​ត្រូវ​បាន​លើកឡើង​ដោយ​​អង្គ​ការ​សិទ្ធិ​ជន​ជាត​ិ​ភាគតិច​ ជា​អង្គការ​ការ​ពារ​ខ្មែរ​ក្រោម​ ដែល​មក​ពី​តំបន់ដី​សណ្ត​​ទន្លេ​​មេគង្គ​នៃ​ប្រទេស​វៀត​​ណាម។

អង្គការ​នេះ​បាន​លើ​កឡើ​ងនៅក្នុង​សេចក្តី​ថ្លែងការ​ណ៍ថា “អង្គការ​សិទ្ធិ​ជន​ជាតិ​ភាគតិចអះ​អាង​ថា​ ការ​ចាប់ខ្លួន​បុរ​ស​ទាំង​​ប្រាំពីរ​នាក់​នេះ​​គឺខុស​ច្បាប់។គេ​មិន​បាន​រក​ឃើញ​អាវុធ​បន្ទាប់ពី​ឃុំ​ខ្លួន​ពួកគេ​ក្នុង​ពន្ធនា​គារ។ជាង​នេះ​ទៅ​ទៀត​នោះ ពួក​គេ​មិន​បាន​ជូន​ដំណឹង​អំពី​មូលហេតុ​នៃ​ការ​​ចាប់ខ្លួន​ ឬ​បង្ហាញ​ដីការ​ចាប់ខ្លួន​ពួកគេ​ឡើយ”។

អង្គការ​សិទ្ធិ​ជន​ជាតិ​ភាគតិចបាន​ឲ្យ​ដឹង​ថា ខ្លួន​ជឿថា “កា​រកែ​ប្រែ​បទ​ចោទ​ប្រកាន់​ជា​ច្រើន​លើក​ច្រើន​សា” ពី​ការ​បង្កើត​ក្រុម​ភេរវ​កម្ម​ប្រដាប់​អាវុធ​ទៅ​ជា​​ការ​ផ្ត​ល់​សម្ភា​រ​ការ​ពារ​ជា​តិ​ទៅ​ឲ្យបរទេស​ ​មក​ជាបទ​ចោទ​ប្រកាន់​នាពេល​បច្ចុប្បន្ន​នេះ​ “បង្ហាញ​ឲ្យ​ឃើញ​ពី​កង្វះ​ភ័ស្តុតាង​​គួរ​ឲ្យ​ជឿជាក់​បាន​សម្រាប់​បទ​ល្មើស​ដែល​មាន​​ស្រាប់”​។

អង្គការ​នេះ​ក៏បាន​ឲ្យ​ដឹង​ដែរ​ថា បុរស​ពីរ​នាក់​ក្នុង​ចំណោម​ពួកគេ​បាន​អះ​អាង​ថា ពួកគេ​​ត្រូវ​បាន​វាយ​ដំ និង​ធ្វើ​ទារុណកម្ម​​ពេល​ស្ថិ​តក្រោម​ការ​ឃុំ​ខ្លួន​របស់នគរបាល ហើយ​បារម្ភថា​ខ្លាច​គេ​ប្រើ​​ “ព័ត៌មាន​​ដែល​​ត្រូវ​បាន​លាត​ត្រដាង​​ដោ​យ​មិន​ត្រឹម​ត្រូវ​នោះ ​​ជា​ភ័ស្តុតាង​ប្រឆាំង​ពួកគេ​”។

បុរស​ខ្មែរក្រោម​ពីរនាក់​ឈ្មោះ សួន ផល អាយុ​៥៣ឆ្នាំ និង​​ យិន យ៉ាវ អាយុ​៥៦ឆ្នាំ ​ត្រូវ​ បាន​ចាប់ខ្លួន​កាលពី​ថ្ងៃទី​៨ ខែ​មីនា ឆ្នាំ​២០១៣​ នៅក្នុង​ខេត្ត​ប៉ះធុម ថានី ប្រទេស​ថៃ​។ ​យ៉ន គឹមស្រ៊ុន​ អាយុ​២៨ឆ្នាំ យ៉ន យឿប អាយុ​២៦ឆ្នាំ ថាច់ គង់ភួង អាយុ​៣៨ឆ្នាំ និង​ ខឹម ម៉ា អាយុ​២៩ឆ្នាំ ត្រូវ​បាន​ចាប់ខ្លួន​មួយ​សប្តាហ៍​ក្រោយ​មក​នៅក្នុង​ខេត្ត​ដដែលនេះ។

បន្ទាប់ពី​ការ​ចាប់ខ្លួន​បុរស​ទាំង​នេះ​មួយ​ឆ្នាំ​កន្លង​​មក ឧត្តម​សេនីយ៍ឯក គៀត ច័ន្ទ​ថារិទ្ធ​ អ្នក​នាំពាក្យ​នគរបាល​ជា​តិ​​បាន​មាន​ប្រសាសន៍ ថា នគរបាល​មាន​ភ័ស្តុតាង​ពាក់​ព័ន្ធ​បទ​ឧក្រិដ្ឋ​​ដែល​គេ​ចោទ​ឡើង​នេះក្នុង​ទម្រង់​ជា “ឯក​សារ​​ទាក់ទង​នឹង​រណ​សិរ្ស​សង្គ្រោះ​ជា​តិ​ខ្មែរ​ដែល​រួមមាន​អនុស្ស​រណៈរបស់​រណសិរ្ស​  និង​ឯកសារ​ផ្សេង​ៗទៀត​របស់​រណសិរ្ស​ក្នុង​ការ​ធ្វើ​សកម្មភាព​ប្រឆាំង​នឹង​រាជ​រដ្ឋាភិបាល​កម្ពុជា” ។ លោក​បាន​មាន​ប្រសាសន៍ថា នគរ​បាល​ដឹង​ថា ក្រុម​នេះ​ជា​ចលនា​ប្រឆាំង​រដ្ឋា​ភិបាល​ដែលមាន​មូលដ្ឋាន​នៅ​ប្រទេស​ថៃ​។

តាម​ប្រវត្តិសាស្ត្រ ខ្មែរ​ក្រោម​គឺ​ជា​ជន​រង​គ្រោះ​ដោយ​ការ​រំលោភ​សិទ្ធិមនុស្ស​​ពី​សំណាក់​​រដ្ឋាភិបាល​វៀត​​ណាម​ហើយ​ជា​​​រឿយ​ៗ​បាន​​ស្វែងរក​សិទ្ធិ​ជ្រក​កោន​នៅ​ក្នុង​ប្រទេស​ជិត​ខាង៕សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស