30 C
Phnom Penh

រដ្ឋាភិបាល​កម្ពុជាលើក​ឡើង​ថា ​នៅ​តែ​បន្ត​រុក​រក​យន្តហោះ​របស់​​ម៉ាឡេ​ស៊ី​ដែល​បាត់​ដំណឹង​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ មន្ត្រីរដ្ឋាភិបាល​កម្ពុជា​បាន​ឲ្យ​ដឹង​ថា ការ​រុក​រក​យន្ត​ហោះ​​នៃ​​ជើង​ហោះ​ហើរ​លេខ MH370 របស់​អាកាស​ចរណ៍ម៉ាឡេស៊ី​ដែល​បាត់​ដំណឹង​ នៅ​តែ​បន្ត​ ទោះ​បី​​ជា​អាជ្ញាធរ​ម៉ាឡេ​ស៊ី​បាន​ប្រកាស​កាល​ពី​ថ្ងៃ​អាទិត្យ​ថា យន្តហោះនេះ​​ពិត​ជា​បាន​ធ្លាក់​នៅ​​ភាគខាង​ត្បូង​មហាសមុទ្រ​ឥណ្ឌា​ពិត​មែន​ ដោយ​គ្មាន​នរណា​ម្នាក់​នៅ​រស់​រាន​មានជីវិត​នោះ​ក៏​ដោយ​។

ដោយ​មាន​សំណើ​ពី​ប្រទេស​ចិន​ដែល​មាន​អ្នក​ដំណើរ​របស់​ខ្លួន​​ចំនួន​១៥០​នាក់​​ បាន​​​ជិះ​នៅ​លើ​យន្ត​ហោះ​ដែល​បាត់​ដំណឹង​កាល​ពី​ថ្ងៃ​ទី​៨​ ខែ​មីនា​នេះ​ ក្រសួង​ការ​ពារ​ជាតិ​ជា​ចុង​ក្រោយ​បាន​សម្រេច​ចូល​រួម​នៅ​ក្នុង​ការ​រុក​រក​ដែល​មានប្រទេស​ចំនួន​២៦​ចូល​រួម​ កាល​ពី​សប្តាហ៍​មុន​។ ក្រសួង​ការ​ពារ​ជាតិ​បាន​បញ្ជូន​ឧទ្ធម្ភាគចក្រ​ប្រភេទ​ Z-9 ផលិត​នៅ​ចិន​ចំនួន​បួន​គ្រឿង​និង​នាវា​កង​ទ័ព​ជើង​ទឹក​កម្ពុជា​​​ចំនួន​ពីរ​គ្រឿង​ ទៅ​ឈូង​សមុទ្រ​ថៃ​ដើម្បី​ជួយ​រុក​រក​យន្តហោះ​ដែល​បាត់​ដំណឹង​នេះ​។

កាល​ពី​ថ្ងៃ​សៅរ៍​ លោក​នាយក​រដ្ឋ​មន្ត្រី​ ហ៊ុន​ សែន​ បាន​អញ្ជើញ​ប្រទេស​ម៉ាឡេស៊ី​និង​ប្រទេស​ចិន​​ ឲ្យ​មក​រុករក​យន្ត​ហោះ​នេះ​នៅ​ក្នុង​ប្រទេស​កម្ពុជា​។ ប៉ុន្តែ​ដោយ​សារ​តែ​ផ្កាយ​រណប​បាន​ប្រទះ​ឃើញ​បំណែក​ដ៏​គួរ​ឲ្យ​សង្ស័យ​កាល​ពី​ម្សិល​មិញ អ្នក​រុក​រក​អន្តរជាតិ​ឥឡូវ​នេះ​បាន​ផ្តោត​​ការ​រុករក​របស់​ខ្លួន​​នៅ​ដែន​ទឹក​ចម្ងាយ​២៥០០​គីឡូម៉ែត្រ​​ពី​ភាគខាង​លិច​នៃ​សមុទ្រ​អូស្ត្រាលី​។

តែ​ទោះ​ជា​យ៉ាង​ណា​ នាយឧត្តម​សេនីយ៍​ទៀ បាញ់​ រដ្ឋ​មន្ត្រី​ក្រសួង​ការ​ពារ​ជាតិ​បាន​លើក​​​ឡើង​កាល​ពី​ម្សិល​មិញ​ថា ដរាប​ណា​យន្តហោះ​នៅ​តែ​មិន​ទាន់​រក​ឃើញ​ ​ប្រទេស​កម្ពុជា​នៅ​តែ​បន្ត​ការ​រុក​រក​​នៅ​ក្នុង​ព្រំ​ដែន​ទឹក​របស់​ខ្លួន ​ទោះ​បី​ជា​វា​ត្រូវ​ចំណាយ​​ពេល​រាប់​ខែនិង​ចំណាយ​ប្រាក់​ជា​ច្រើន​ក៏​ដោយ។

នាយ​ឧត្តម​សេនីយ៍​ ទៀ​ បាញ់​ បាន​មាន​ប្រសាសន៍​ថា “ឥឡូវនេះ​យើង​នៅ​តែ​ជួយ​ក្នុង​ការ​រុក​រក​យន្ត​ហោះ​ ព្រោះ​យើង​មិន​ទាន់​ទទួល​បាន​ដំណឹង​ថា បំណែក​ដែល​អណ្តែត​នៅ​មហាសមុទ្រ​ឥណ្ឌាពិត​ជា​របស់​យន្ត​ហោះ​​​នោះ​មែន​ឬ​មិន​មែន​នៅ​ឡើយ​ទេ​។ នៅ​ពេល​​​ណា​យើង​ទទួល​បាន​ដំណឹង​ថា​ បំណែក​​​យន្ត​ហោះ​នេះ​ពិត​ជា​ត្រូវ​បាន​រក​ឃើញ​នោះ​ ​​យើង​នឹង​បញ្ឈប់​ការ​រុក​រក​។ ប៉ុន្តែ​ប្រសិនបើ​​មិន​ទាន់​មាន​ការ​បញ្ជាក់​នោះ​ទេយើង​នឹង​បន្ត​ការ​រុករក​ទៀត ទោះ​បី​ជា​ត្រូវ​ចំណាយ​ពេល​រាប់​ ខែ​ ឬ​ក៍​ត្រូវ​ចំណាយប្រាក់​ជា​ច្រើន​ក៏​ដោយ​​”។

លោក​ ឈីង ហុងប៉ (Cheng Hong Bo) ប្រធាន​​​ទទួល​បន្ទុក​ផ្នែក​នយោបាយ​នៅ​ស្ថាន​ទូត​ចិន​ប្រចាំ​រាជ​ធានី​ភ្នំពេញ​បាន​យល់​ស្រប​ថា ការ​រុករក​នៅ​តែ​បន្ត​រហូត​ លុះ​ត្រា​តែ​គេ​​រក​ឃើញ​បំណែក​ពិត​ប្រាកដ​។

លោក​បាន​មាន​ប្រសាសន៍​ថា “ការ​រុករក​យន្តហោះ​ជា​អន្តរជាតិ​នៅ​មិន​ទាន់​បញ្ឈប់​នៅ​ឡើយ​ទេ​ ហើយ​នៅ​ពេល​នេះ​យើង​មិន​ទាន់​អាច​និយាយ​អ្វី​បាន​នៅ​ឡើយ​ទេ​ ព្រោះ​យើង​នៅ​មិន​ទាន់​ដឹង​ថា យន្តហោះនេះ​នៅ​​ទីណា​នោះ​ឡើយ​”។

លោក ​ត្រាន វ៉ានថុង (Tran Van Thong) អ្នក​នាំ​ពាក្យ​ស្ថាន​ទូត​វៀតណាម​ប្រចាំ​រាជ​ធានី​​​ភ្នំពេញ​ បាន​ឲ្យ​ដឹង​ថា​ ប្រទេស​វៀត​ណាម​​ ដែល​បាន​ដឹក​នាំ​ការ​រុក​រក​នៅ​ក្នុង​ជំហាន​ដំបូង​របស់​ខ្លួន​នៅ​ឈូង​សមុទ្រ​ថៃ​ ក៏​នៅ​តែ​បន្ត​ការ​រុក​រក​របស់​ខ្លួន​ដដែល​ ទោះ​បី​ជា​យន្តហោះ​នេះ​ទំនង​ជា​ហោះ​ចេញ​ឆ្ងាយ​ពី​ដែនទឹកប្រទេស​វៀត​ណាម​ក៏ដោយ​។ លោក​មាន​ប្រសាសន៍​ថា “ខ្ញុំ​មិន​ទាន់​ទទួល​​​បាន​ដំណឹង​អ្វី​នៅ​ឡើយ​ទេ​អំពី​ការ​ខិត​ខំ​​រុក​រក​របស់​ប្រទេស​កម្ពុជា​ ប៉ុន្តែ​ប្រទេស​វៀត​ណាម​ ក៏​នៅ​តែ​រុក​រក​ដដែល​ ព្រោះ​វាគឺ​ជា​ទង្វើ​មនុស្ស​ធម៌ដោយ​សារ​តែ​មាន​ជន​ជាតិ​ជា​ច្រើន​​​នៅ​លើ​យន្ត​ហោះ​នោះ​”៕ស៊ុយឈាង​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស