35 C
Phnom Penh

​​​ម្ចាស់​ស៊ីម​​ទូរស័ព្ទចល័ត​​ឡើង​ដល់​២០លាន​នាក់​ ខណៈ​អ្នក​ប្រើ​ប្រាស់​អីុន​ធើណិត​​​ឡើង​៤២​ភាគ​រយ

ដោយ ឌឹ ខេមបូឌា ដេលី

បទវិភាគ

យោង​តាម​​របាយការណ៍​មួយ​ដែល​ក្រសួង​​ប្រៃសណី​យ៍​ និង​ទូរគមនាគមន៍​ បាន​ចេញ​ផ្សាយ​កាលពី​ម្សិលមិញ​ បាន​បង្ហាញ​ថា ចំនួន​អ្នក​ប្រើ​ប្រាស់​ស៊ីម​ទូរស័ព្ទ​ចល័ត​នៅ​​ប្រទេស​កម្ពុជា​ បាន​កើន​ឡើង​ដល់​២០លាន​នាក់​កាល​​ពី​ឆ្នាំ​មុន ​ដែល​នេះ​ជា​ចំនួន​កើន​ឡើង​លើស​ពី​ចំនួន​ប្រជាជន​សរុប​ប្រហែល​ប្រាំលាន​នាក់​ ខណៈ​ដែល​ចំនួន​អ្នក​ប្រើ​ប្រាស់​អីុន​ធើ​ណិត​ក៏​កើន​ឡើង​ផង​ដែរ។

របាយការណ៍​នេះ​មិន​មាន​សេចក្តី​បញ្ជាក់​ថា តើ​ប្រជាជន​ខ្មែរ​ប៉ុន្មាន​នាក់​មាន​ស៊ីមកាត​ច្រើន​ជា​ង​មួយ​ទេ។ របាយការណ៍​ដែល​ត្រូវ​បាន​បង្ហាញ​កាល​ពី​ម្សិលមិញ​នៅ​ក្នុង​កិច្ច​ប្រជុំ​មួយ​នៅ​ទីស្តី​ការ​ក្រសួង​ប្រៃសណីយ៍ និង​ទូរគមនាគមន៍​បា​ន​បញ្ជាក់​ថា ចំនួន​អ្នក​ប្រើ​ប្រាស់​ស៊ីម​ទូរស័ព្ទ​ចល័ត​​បាន​កើន​ឡើង​ពី​១៩​,១លាន​នាក់​ដល់​២០,២​លាន​នាក់​ក្នុង​រយៈពេល​មួយ​ឆ្នាំ​។

លោក ខាន់ សារៈ រដ្ឋលេខា​ធិការ​ក្រសួង​ប្រៃ​សណីយ៍ និង​ទូរគមនាគមន៍​បា​ន​ថ្លែង​ទៅ​កាន់​មន្ត្រី​ជាង​២០នាក់​នៅ​ក្នុង​កិច្ច​ប្រជុំ​នោះ​កាលពី​ម្សិលមិញ​ថា “ចំនួនប្រជាជន​ដែល​ប្រើ​ប្រាស់​ទូរស័ព្ទ​ចល័ត​បាន​កើន​ឡើង​ ដោយ​សារ​តែ​ទូរស័ព្ទ​ចល័ត​មាន​មុខ​ងារ​ជាច្រើន​ និង​មាន​ផល​ប្រយោជន៍​ច្រើន​ណាស់​ ហើយ​ត្រូវ​បាន​លក់​ក្នុង​តម្លៃ​ទាប​នៅ​លើ​ទីផ្សារ​ប្រទេស​កម្ពុជា​”។

បច្ចុប្បន្ន​នៅ​លើ​ទីផ្សារ​ប្រទេស​កម្ពុជា​មាន​ក្រុម​ហ៊ុន​ប្រតិបត្តិករ​ទូរស័ព្ទ​ចល័ត​ចំនួន​ប្រាំ​ពីរ​ ហើយ​ប្រជាជន​ខ្មែរ​ជាច្រើននាក់​បានទិញ​ស៊ីម​កាត​​ច្រើន​ជាងមួយ​​ ដើម្បី​យក​ប្រយោជន៍​ដែល​ត្រូវ​បាន​ផ្តល់​ឲ្យ​ដោយ​ក្រុម​ហ៊ុន​ប្រតិបត្តិករ​ដែល​កំពុង​តែ​ប្រជែង​គ្នា​យ៉ាង​ខ្លាំង​ក្លា​ ដើម្បី​ទាម​ទារ​ចំណែក​ទីផ្សារ​កាន់​តែ​ធំ​។

លោក ធូម៉ាស់ ហាន់ (Thomas Hundt) ប្រធាន​នាយក​ប្រតិបត្តិ​ក្រុម​ហ៊ុនស្មាត​ម៉ូបាល (Smart Mobile) ដែល​ជា​ក្រុម​ហ៊ុន​ប្រតិបត្តិករ​ទូរស័ព្ទ​ចល័ត​ធំ​បំផុត​លំដាប់​ទី​២​នៅ​លើ​ទីផ្សារ​កម្ពុជា​ បើ​គិតអំ​ពី​ចំនួន​អ្នក​ប្រើ​ប្រាស់​ស៊ីមកាត​ បាន​លើក​ឡើង​កាលពី​ម្សិលមិញ​ថា លោក​មិន​អាច​និយាយ​បាន​ថា ចំនួន​អ្នក​ប្រើ​ប្រាស់​ស៊ីម​កាត​ដែល​មាន​២០លាន​នាក់​នេះ​គឺ​ជា​តួលេខ​ប៉ាន់​ស្មាន​សុក្រឹត​ទេ។

លោក​បាន​មាន​ប្រសាសន៍​ថា “ខ្ញុំ​មិន​ដឹង​ទេ​។ ក៏​ប៉ុន្តែ​ រយៈពេល​បី​ខែ​ដែល​មាន​និន្នា​ការ​​កើន​ឡើង​​នៃ​ប្រាក់​ចំណូល​ យើង​មាន​អ្នក​ប្រើ​ប្រាស់​ស៊ីមកាត​ប្រាំមួយ​លាន​នាក់​”។

ក្រុម​ហ៊ុន​ស្មាត​គឺ​ជា​ក្រុម​ហ៊ុន​ប្រតិបត្តិករ​ទូរ​ស័ព្ទ​ចល័ត​ធំ​បំផុត​លំដាប់​ទី​២​បើ​គិត​អំពី​ចំនួន​អ្នក​ប្រើ​ប្រាស់​ស៊ីម​កាត​ ពោល​គឺ​ឈរ​ពី​ក្រោយ​ក្រុម​ហ៊ុន​មិតហ្វូន (Metfone) ដែលជា​កម្មសិទ្ធិ​របស់​មន្ត្រី​យោធា​វៀតណាម​។ ចំនួន​អ្នក​ប្រើ​ប្រាស់​ស៊ីមកាត​ទូរស័ព្ទ​ចល័ត​​នៅ​លើ​ទីផ្សារ​កម្ពុជា​បាន​កើន​ឡើង​ជា​លំដាប់​​តាំង​ពី​ឆ្នាំ​២០០៤​មក​។

របាយការណ៍​របស់​ក្រសួងប្រៃសណីយ៍ និង​ទូរគមនាគមន៍​ក៏​បាន​បង្ហាញ​ផង​ដែរ​ថា ចំនួន​អ្នក​ប្រើ​ប្រាស់​អីុន​ធើណិត​នៅ​​ប្រទេស​នេះ​ទាំង​ប្រព័ន្ធ​ខ្សែ​ និង​ប្រព័ន្ធ​ទូរស័ព្ទ​កើន​ឡើង​ពី​២,៧លាន​នាក់​ ដល់​៣,៨លាន​នាក់​ ពោល​គឺ​កើន​ឡើង​៤២,៧ភាគ​រយ​។

ក៏​ប៉ុន្តែ របាយការណ៍​​ថ្មី​ទើប​តែ​បាន​ចេញ​ផ្សាយ​កាលពីពេលថ្មីៗ​នេះ​បាន​បង្ហាញ​បន្ថែម​ទៀត​ថា  កំណើន​នៃចំនួន​នេះ​មិន​មែន​ជា​កំណើន​ច្រើន​ដូច​កំណើនពី​ឆ្នាំ​២០១០​ ទៅ​ឆ្នាំ​២០១១ ដែល​បាន​កើនឡើង​​ពី​៣២០.​១៩០​នាក់​ក្នុង​ឆ្នាំ​២០១០​ដល់​១,៦៨​លាន​នាក់ក្នុង​ឆ្នាំ​២០១១ទេ។

របាយការណ៍​ដដែល​បាន​កត់​សម្គាល់​ថា មិន​មែនផ្នែក​​ទាំង​អស់​សុទ្ធ​តែ​មាន​កំណើន​នោះ​ទេ​។ ​ចំនួន​អ្នក​ប្រើ​ប្រាស់​ទូរស័ព្ទ​លើ​តុ​​បាន​ធ្លាក់​ចុះ​២៨​ភាគ​រយ​ពី​៥៨៤.៤៧៥នាក់​​មក​៤២០.៩៤២​នាក់​៕ សុធា​

(រាយការណ៍​បន្ថែម​ដោយ​ Josh Wilwohl)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស