សកម្មជនសិទ្ធិដីធ្លីជាង៥០នាក់មកពីសហគមន៍ចំនួនពីរក្នុងរាជធានីភ្នំពេញបានដាក់ពាក្យបណ្តឹងទៅនគរបាលកាលពីម្សិលមិញអំពីហេតុការណ៍ដែលបុរសមិនស្គាល់អត្តសញ្ញាណម្នាក់បានបាញ់កាំភ្លើងសំដៅរថយន្តក្រុងមួយគ្រឿងដែលដឹកពួកគាត់ត្រឡប់មកពីចូលរួមការតវ៉ាប្រឆាំងការបណ្តេញចេញនៅក្នុងខេត្តសៀមរាបមកកាន់រាជធានីភ្នំពេញវិញ។
លោកឧត្តមសេនីយ៍ត្រី ជួន ណារិន ស្នងការរងនគរបាលរាជធានីបានមានប្រសាសន៍ថា ការសើុបអង្កេតអំពីហេតុការណ៍ដែលបានកើតឡើងកាលពីថ្ងៃសៅរ៍បានធ្វើរួចហើយ ប៉ុន្តែ លោកបានបដិសេធការអះអាងរបស់សកម្មជនទាំងនោះដែលថា មានគេបាញ់កាំភ្លើងសំដៅពួកគាត់នោះ។
កាលពីថ្ងៃច័ន្ទ អធិការនគរបាលខណ្ឌដូនពេញបានមានប្រសាសន៍ថា នគរបាលជឿថា គ្រាប់កាំភ្លើងត្រូវគេបាញ់សំដៅរថយន្តក្រុងដោយសារមានជម្លោះពាក់ព័ន្ធនឹងចរាចរណ៍ ប៉ុន្តែ លោកឧត្តមសេនីយ៍ត្រី ជួន ណារិន បានបដិសេធរឿងនេះកាលពីម្សិលមិញ ហើយបានមានប្រសាសន៍ថា តាមពិតកញ្ចក់រថយន្តនោះបែកដោយសារការគប់ដំុថ្មទេ។
លោក ជួន ណារិន បានមានប្រសាសន៍ ថា “យើងបានរកឃើញថា បុរសមិនស្គាល់អត្តសញ្ញាណម្នាក់ជិះម៉ូតូមួយគ្រឿងជាមួយស្ត្រីម្នាក់ខឹងអ្នកបើកបររថយន្តក្រុងនៅពេលបើកបរតាមផ្លូវចង្អៀត ហើយបានគប់ដំុថ្មត្រូវកញ្ចក់រថយន្តផ្នែកខាងមុខ និងបានគេចខ្លួនបាត់ទៅ”។
លោកបានមានប្រសាសន៍ថា “ យើងបានធ្វើការសន្និដ្ឋានជំហានដំបូងថា កញ្ចក់រថយន្តនោះបានបែកដោយសារត្រូវដុំថ្ម មិនមែនដោយសារគ្រាប់កាំភ្លើងឡើយ ហើយឥឡូវនេះយើងកំពុងសើុបអង្កេតដើម្បីស្វែងរកជននោះយកមកសាកសួរ”។
សកម្មជនដែលជិះនៅលើរថយន្តក្រុងនោះនៅតែប្រកាន់ជំហរថា មានគេបាញ់កាំភ្លើង ដោយលើកឡើងថា ពួកគាត់បានឮស្នូរកាំភ្លើង ហើយពួកគាត់មួយចំនួនបានឃើញបុរសម្នាក់ជិះម៉ូតូមួយគ្រឿងដកកាំភ្លើងនៅចំពោះមុខគាត់ដោយជ្រុះស្រោមកាំភ្លើង ហើយបានបាញ់មួយគ្រាប់សំដៅរថយន្តក្រុងមុនពេលជិះចេញយ៉ាងលឿន ។ នគរបាលក៏បានរកឃើញស្រោមកាំភ្លើងនៅកន្លែងកើតហេតុផងដែរ។
លោក ពេជ្រ លឹមឃួន ជាដើមបណ្តឹងម្នាក់បាននិយាយថា ក្រុមសកម្មជនចង់ធ្វើឲ្យប្រាកដថា អាជ្ញាធរត្រូវស្វែងរកខ្មាន់កាំភ្លើង។ លោក លឹមឃួន មានប្រសាសន៍ថា “យើង មកទីនេះដើម្បីដាក់ពាក្យបណ្តឹង ហើយសុំឲ្យអាជ្ញាធរស្វែងរកយុត្តិធម៌ជូនពួកយើងទាំងអស់គ្នា បន្ទាប់ពីជនមិនស្គាល់អត្តសញ្ញាណម្នាក់បានបាញ់សំដៅពួកយើង ហើយគេចខ្លួន តាមម៉ូតូ ដូច្នេះយើងចង់ឲ្យអាជ្ញាធរស្វែងរកជនដៃដល់យកមកផ្តន្ទាទោស”។
នៅពេលដែលអ្នកភូមិសហគមន៍បុរីកីឡា និងថ្មគោលបានដាក់ពាក្យបណ្តឹងទៅអធិការដ្ឋាននគរបាលសង្កាត់ស្រះចក ប្រជាពលរដ្ឋប្រហែល៥០នាក់ដែលឈរក្បែរនោះបានបង្ហាញការគាំទ្រ។ ពេលឈរនៅកែងមហាវិថីព្រះមុនីវង្ស និងមហាវិថីសហព័ន្ធរុស្សី ពួកគាត់បានលើកបដាបង្ហាញរូបកាំភ្លើងខ្លី។
អ្នកស្រី ទេព វន្នី អ្នកភូមិសហគមន៍បឹងកក់ដ៏ឆ្នើមមួយរូបដែលជិះនៅលើរថយន្តក្រុងនោះដែរបាននិយាយថា សហគមន៍របស់ គាត់បានដាក់ពាក្យបណ្តឹងទៅនគរបាលដាច់ដោយឡែកពីគ្នាកាលពីថ្ងៃទី២២ខែមីនា គឺនៅថ្ងៃកើតហេតុការណ៍នេះ៕សារុន