ផលិតករខ្សែភាពយន្តមានស្មារតីប្តេជ្ញាខ្លាំងក្លាមកពីប្រទេសកម្ពុជា និងតំបន់អាស៊ីអាគ្នេយ៍ និងឃើញលទ្ធផលនៃការរៀបចំកម្មវិធីបញ្ចាំងខ្សែភាពយន្តរបស់ខ្លួននៅលើផ្ទាំងសំពតសនៃចុងសប្តាហ៍នេះ នៅពេលដែលមហោស្រពចតុមុខបង្ហាញខ្សែភាពយន្ត និងភាពយន្តឯកសារខ្លីៗជាច្រើននៅប្រាំទីតាំងក្នុងរាជធានីភ្នំពេញ។
មហោស្រពភាពយន្តខ្លីចតុមុខក្នុងឆ្នាំនេះត្រូវបានរៀបចំឡើងដោយក្រុមសិល្បៈភាពយន្តកុនខ្មែរកូនខ្មែរ ហើយនឹងបញ្ចាំង៣៩រឿងក្នុងនោះ២០រឿងជារឿងខ្មែរ ១០រឿងជារឿងអាស៊ីអាគ្នេយ៍ និងប្រាំបួនរឿងជារឿងអន្តរជាតិ។
នៅក្នុងឆ្នាំទី៣របស់ខ្លួន មហោស្រពនេះមានផលិតករខ្សែភាពយន្តខ្មែរ៣០នាក់បានចូលរួមបង្ហាញខ្សែភាពយន្តរបស់ខ្លួន ពោលគឺបានកើនឡើង៥០ភាគរយបើធៀបនឹងឆ្នាំមុន ដែលនេះឆ្លុះបញ្ចាំងឲ្យឃើញពីភាពរីកចម្រើននៃប្រជាប្រិយភាពនៃការផលិតខ្សែភាពយន្តក្នុងប្រទេសកម្ពុជា នេះបើយោងតាមលោក ជា សុឃី អ្នកសម្របសម្រួលមហោស្រព។ លោកបានឲ្យដឹងបន្តទៀតថា លោករំពឹងថា នឹងមានទស្សនិកជនប្រហែល៨០០នាក់ចូលរួមទស្សនាមហោស្រពរយៈពេលបីថ្ងៃនេះ។
លោកបានមានប្រសាសន៍ថា “ មហោស្រពនេះគឺជាឱកាសមួយសម្រាប់អ្នកមានទេពកោសល្យផ្នែកភាពយន្តបង្ហាញគំនិតច្នៃប្រឌិតរបស់ខ្លួនឲ្យសាធារណជនបានឃើញ។ មិនមានឱកាសផ្សេងទៀតនៅក្នុងប្រទេសកម្ពុជាសម្រាប់ធ្វើបែបនេះទេ”។
នៅថ្ងៃបញ្ចប់នៃកម្មវិធីបញ្ចាំងខ្សែភាពយន្តទាំងនេះ គណៈកម្មការ និងជ្រើសរើសអ្នកដឹកនាំរឿងបិុនប្រសប់បំផុតពីកម្មវិធីមហោស្រពនេះ។ អ្នកទទួលជ័យលាភី នឹងទទួលបានរង្វាន់ ដូចជា ឧបករណ៍ក្រោយការផលិត និងឱកាសទទួលការបណ្តុះបណ្តាលដោយមានប្រាក់កម្រៃ នៅក្រុមហ៊ុនកំសាន្តបែបឌីជីថលសប្បាយ។
មួយក្នុងចំណោមខ្សែភាពយន្តខ្មែរប្រាំមួយដែលទំនងជាទទួលបានជ័យលាភីក្នុងការប្រកួតប្រជែងនេះគឺខ្សែភាពយន្តរឿង “វិនាទីចុងក្រោយ” ដែលត្រូវបានដឹកនាំដោយនិស្សិត រិទ្ធី ឡូម៉ូពេជ្រ។
ខ្សែភាពយន្តនេះបង្ហាញអំពីក្មេងស្រីម្នាក់ដែលមានមិត្តប្រុសចេះតែចង់ចូលរួមជាមួយក្រុមសម្តែងល្ខោនកូរ៉េ ជាហេតុបណ្តាលឲ្យមិត្តប្រុសរបស់នាងមិនសូវខ្វល់ខ្វាយពីនាង និងភ្លេចថ្ងៃខួបកំណើតរបស់នាង។
កញ្ញា ឡូម៉ូពេជ្រ បានពោលថា “ខ្សែភាពយន្តនេះផ្អែកលើបទពិសោធន៍របស់ខ្ញុំនៅក្នុងជីវិត និងមនុស្សនៅជុំវិញខ្ញុំដែលឈ្លក់វង្វេងនឹងរឿងកូរ៉េ។ គំនិតនេះគឺថា ប្រជាជនមិនដឹងច្បាស់ពីអ្វីដែលពួកគេមានរហូតទាល់តែអ្វីដែលពួកគេមាននោះបាត់បង់។ វិនាទីចុងក្រោយជាឱកាសចុងក្រោយរបស់អ្នក”។
កញ្ញា ឡូម៉ូពេជ្រ បានឲ្យដឹងបន្ថែមទៀតថា កម្លាំងជំរុញទឹកចិត្តរបស់នាងគឺអ្នកដឹកនាំរឿងទីតាណិចឈ្មោះ ជេម ខេមើរ៉ុន (James Cameron) អ្នកដឹកនាំរឿងខ្មែរ លោក ឆាយ បូរ៉ា និងលោក ប៉ាន់ រិទ្ធី ដែលបានផលិតរឿង “ រូបភាពដែលបាត់បង់” ដែលត្រូវបានជ្រើសរើសយកទៅប្រកួតប្រជែងដណ្តើមពានរង្វាន់អូស្កា ក្នុងនាមជាខ្សែភាពយន្តបរទេសល្អបំផុត។
ភាពយន្តខ្លីខ្មែរមួយទៀតដែលនឹងត្រូវបញ្ចាំងផងដែរគឺរឿង “សងសឹក” ដែលជាវណ្ណកម្មបែបសិល្បៈប្រយុទ្ធបុរាណ ក្រោមការដឹកនាំរបស់លោក អួរ ដារា។ រឿងនេះបង្ហាញអំពីគ្រូបង្ហាត់ក្បាច់គុនល្បុក្កតោវ័យចំណាស់ម្នាក់ ដែលមុនពេលស្លាប់គាត់បានឲ្យសិស្សរបស់គាត់ការពារដាវចាស់មួយដើមដែលក្រោយមកត្រូវបានតួអង្គចិត្តអាក្រក់លួចយកទៅ។ ក៏ប៉ុន្តែ ក្រោយមកទៀតកូនសិស្សរបស់គាត់ក៏បានទៅវាយប្រយុទ្ធក្នុងបំណងយកដាវនោះមកវិញ។
លោក សូ ច័ន្ទដារា ជំនួយការសមាជិកគណៈកម្មការខ្សែភាពយន្តកម្ពុជាបានលើកឡើងថា កត្តាជំរុញទឹកចិត្តរបស់ផលិតករខ្សែភាពយន្តវ័យក្មេងទាំងនេះកំពុងតែជំរុញ និងឆ្លុះបញ្ចាំងឲ្យឃើញមានការប្រែប្រួលនៅក្នុងសង្គមខ្មែរ ដោយសារតែប្រជាជនកំពុងស្វែងរកទម្រង់នៃការកំសាន្តជាតិកាន់តែច្រើនឡើងៗ។ លោកបានមានប្រសាសន៍ថា “អ្វីដែលអ្នកត្រូវធ្វើគឺក្រឡេកមើលជុំវិញខ្លួន នោះអ្នកនឹងឃើញថា ចំនួនភាពយន្តក្នុងប្រទេសកម្ពុជាបានកើនឡើងយ៉ាងច្រើនតំាងពីឆ្នាំ២០១០មក”។
ក្រៅពីរោងភាពយន្តដូចជា ឡេជេន និងស៊ីណេផ្លិច ក្រុមហ៊ុនថៃមួយក៏មានផែនការបើករោងភាពយន្តមួយនៅក្នុងមជ្ឈមណ្ឌលលក់ទំនិញ អីុអន ដែលគ្រោងនឹងចំណាយទឹកប្រាក់ចំនួន២០៥លានដុល្លារសម្រាប់សាងសង់មជ្ឈមណ្ឌលលក់ទំនិញនេះឲ្យចប់សព្វគ្រប់ និងបើកដំណើរការនៅឆ្នាំក្រោយ។
ពិធីបើកមហោស្រពចតុមុខនៅថ្ងៃនេះ ចាប់ផ្តើមនៅវេលាម៉ោង៥និង៣០នាទីល្ងាច នៅរោងភាពយន្ត ឡេជេន ដែលមានទីតាំងស្ថិតនៅមជ្ឈមណ្ឌលលក់ទំនិញ និងទិញអីុវ៉ាន់ទួលគោក។
ខ្សែភាពយន្តដែលនឹងត្រូវបានយកទៅដាក់បញ្ចាំងនៅថ្ងៃសុក្រ សៅរ៍ និងថ្ងៃអាទិត្យនៅផ្ទះមេត្តា (Meta House) មជ្ឈមណ្ឌល បូផាណា (Bophana) រោងភាពយន្ត ឡេជេន រោងភាពយន្ត ផ្លាទីនឹម ស៊ីណេផ្លិច និងនៅសាលមហោស្រពកោះពេជ្រ។
ដើម្បីចូលរួមទស្សនា ក៏ដូចជាចូលរួមក្នុងកម្មវិធីមហោស្រពខ្សែភាពយន្តដែលកំពុងត្រូវបានក្រុមការងារកំពុងរៀបចំយ៉ាងសកម្មទៅតាមផ្នែកនីមួយៗរៀងៗខ្លួនសម្រាប់ឆ្នាំនេះ ទស្សនិកជនដែលមានចំណង់ចំណូលចិត្ត និងចង់គាំទ្រវិស័យខ្សែភាពយន្តនៅកម្ពុជាអាចចូលរួមដោយឥតគិតថ្លៃ៕សុធា