32 C
Phnom Penh

ACUលើកឡើង​ថា បក្ខពួក​និយម​កើត​មាន​ច្រើន​នៅ​ក្នុង​ខេត្ត​ឧត្ត​រមានជ័យ

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ អង្គភាព​ប្រឆាំង​អំពើ​ពុក​​​​​រលួយ​បាន​ចេញ​សេចក្តី​ប្រកាស​ព័ត៌មាន​​មួយ​ព្រមាន​ប្រធាន​មន្ទីរ​នៅ​ក្នុង​ខេត្ត​ឧត្តរ​​មាន​ជ័យ​​​​ឲ្យ​បញ្ឈប់​ការ​ប្រើ​ប្រាស់​តួនាទីរបស់​ខ្លួន​សម្រាប់​ប្រយោជន៍​ផ្ទាល់​ខ្លួន​ បន្ទាប់​ពី​មាន​បណ្តឹង​ជា​បន្ត​បន្ទាប់​ពី​មន្ត្រី​រាជ​ការ។​

សេចក្តី​ប្រកាស​ព័ត៌មាន​​របស់​អង្គភាព​ប្រឆាំ​ង​អំពើ​ពុក​រលួយ​ដែល​មិន​លើក​ឡើង​ពី​​​ឈ្មោះ​ដើម​បណ្តឹង​និង​ចុង​ចោទ ​បាន​គូស​បញ្ជាក់​អំពី​ការ​អះអាងចំពោះ​​​បក្ខ​ពួក​និយម​​ ការ​ប្រើ​​​ប្រាស់​ធន​ធាន​រដ្ឋ​ជា​ប្រយោជន៍​ផ្ទាល់​ខ្លួន​ និងមន្ត្រី​ដែល​ប្រើ​តួនាទី​ហួស​ពី​សមត្ថកិច្ច​របស់​ខ្លួន​។

សេចក្តី​ប្រកាសព័ត៌មាន​​ដែលបង្ហោះ​នៅ​លើ​គេហទំព័រ​របស់​អង្គភាព​ប្រឆាំង​អំពើ​ពុក​រលួយ​ កាល​ពី​ម្សិល​មិញ​មាន​ខ្លឹម​សារ​ដូច្នេះ​ថា “តាម​ពាក្យ​បណ្តឹង​បាន​ដឹង​ថា មន្ទីរ​នានា​មាន​ការ​គ្រប់​គ្រង​ និង​ដឹក​នាំ​មិន​បាន​ត្រឹម​ត្រូវ​ហេតុ​ដូច្នេះ​អង្គភាព​ប្រឆាំង​អំពើ​ពុក​រលួយ​សូម​ក្រើន​រំឭក​ដល់​មន្ទីរ​មួយ​ចំនួន​នៅ​ក្នុង​ខេត្ត​​​​ឧត្តរ​មាន​ជ័យ​ គប្បី​ត្រូវ​បញ្ឈប់​​សកម្ម​ភាព​មួយ​ចំនួន​ដែល​កំពុង​កើត​ឡើង​”។

សេចក្តី​ប្រកាស​ព័ត៌មាន​​នេះ​បាន​លើក​ឡើង​​​ពី​ពាក្យ​បណ្តឹង​មួយ​ចំនួន​ដែល​រួម​មាន​ករណី​មួយ​ដែល​ប្រធាន​មន្ទីរ​ត្រូវ​បាន​គេ​ចោទ​​​ប្រកាន់​ថា បាន​យក​កូន​ប្រុស​ ឬ​កូន​ស្រី​របស់​ខ្លួន​មក​ធ្វើ​ជា​ប្រធាន​គណនេយ្យ។

​សេចក្តី​ប្រកាស​ព័ត៌មាន​​នេះ​មាន​ខ្លឹម​សារ​បន្ត​ដូច្នេះ​ថា “ករណី​ទំនាស់ផល​ប្រយោជ​ន៍​មិន​​​អាច​ធ្វើ​បាន​ទេ​ គួរ​គប្បីឪពុក​ឈប់​ធ្វើ​ជា​ប្រធាន​មន្ទីរ​ ឬ​មួយ​កូន​ឈប់​ធ្វើ​ប្រធាន​គណ​នេយ្យ​”។

សេចក្តី​ប្រកាស​ព័ត៌មាន​​នេះ ក៏​​បាន​លើក​ឡើង​ដែរ​ថា មន្ត្រី​ជាប់​កិច្ច​សន្យា​ និង​មន្ត្រី​បណ្តែតកំពុង​ចុះហត្ថលេខា​លើ​លិខិត​ស្នាម​មួយ​ចំនួន​និង​បំពេញ​តួនាទី​របស់​ខ្លួន​ហួស​ដែន​សមត្ថកិច្ច​។

សេចក្តី​ប្រកាស​ព័ត៌មាន​នេះ​ មាន​ខ្លឹម​សារ​ដូច្នេះ​ថា “មន្ត្រី​ជាប់​កិច្ច​សន្យា​ គឺ​មិន​មាន​សិទ្ធិុ​ចុះ​ហត្ថលេខា​លើ​លិខិត​ស្នាម​អ្វី​ទាំង​អស់​។​​មន្ត្រី​ជាប់​កិច្ច​សន្យា​គ្រាន​់​តែ​ជា​ជំនួយ​ការ​ឲ្យ​មន្ត្រី​រដ្ឋ​បាល​ដូច​ជា​ វាយ​អត្ថបទ​ ថត​ចម្លង​ឬ​បញ្ជូន​ឯកសារ​​ប៉ុណ្ណោះ​”។

អង្គភាព​ប្រឆាំង​អំពើ​ពុក​រលួយ​បាន​ព្រ​មាន​​​ម​ន្ត្រី​រាជ​ការ​ចំពោះ​​ការ​ប្រើ​ប្រាស់​ទ្រព្យសម្បត្តិ​​រដ្ឋ​សម្រាប់ប្រយោជន៍​ផ្ទាល់​ខ្លួន​ ប៉ុន្តែ​មិនបាន​បញ្ជាក់​លម្អិត​​​អំពី​ពាក្យ​បណ្តឹង​ដែល​ប្តឹងពី​​បញ្ហា​បែប​​នេះ​​ឡើយ​​។

ការ​​រំលោភ​​បំពាន​​​ទាំង​​នេះ ​អាច​​មាន​ទោស​​​​ជាប់​ពន្ធនាគារ​ពី​ពីរ​ឆ្នាំ​ទៅ​ប្រាំ​ឆ្នាំ​និង​អាច​ត្រូវ​​​ពិន័យ​ជាប្រាក់​រហូត​ដល់​១០.០០០.០០០​រៀល ឬក៏​ប្រហែល​២. ៥០០​ដុល្លារ​។ រីឯ​ការ​ក្លែង​បន្លំ​ឯកសារ​ផ្លូវ​ការ​ដែល​ចេញ​ដោយ​រដ្ឋបាល​សាធារណៈ​​ត្រូ​វ​ផ្តន្ទាទោស​ឲ្យ​ជាប់​ពន្ធនាគារ​​ពី​៥​ទៅ​១០​ឆ្នាំ​។

លោក​ ឆាយ​ សាវុធ​ អនុ​ប្រធាន​អង្គភាព​ប្រឆាំង​អំពើ​ពុក​រលួយ​បាន​លើក​ឡើង​ថា ដោយ​ពាក្យ​បណ្តឹង​ត្រូវ​បាន​ផ្សព្វ​ផ្សាយ​ជា​សាធារណៈ ជន​ដែល​ត្រូវ​បាន​ចោទ​ប្រកាន់់​​ថា បាន​ប្រព្រឹត្ត​បទល្មើស​ គួរ​តែ​កែ​តម្រូវ​​ទោស​​​​​កំហុស​របស់​ខ្លួន​ បើេ​​ពុំ​ដូច្នោះ​ទេ​នឹង​ត្រូវ​​​ប្រឈម​​​ចំពោះ​​មុខ​ច្បាប់​។

លោក​បានមាន​ប្រសាសន៍​ថា “ប្រសិន​បើ​បញ្ហា​ទាំង​នោះ​មិន​ត្រូវ​បាន​កែ​តម្រូវ​ទេ​ យើង​​​នឹង​ចាត់​វិធានការ​តាម​ផ្លូវ​ច្បាប់​។ ជំហាន​​​ដំបូង​​​យើង​ចេញ​សេចក្តី​ប្រកាស​ព័ត៌មាន​។ ប្រសិន​​​បើ​ក្រុម​បក្ខ​ពួក​និយម​កែ​តម្រូវ​ទោស​កំហុស​របស់​ខ្លួន​ បញ្ហា​គឺ​ត្រូវ​បញ្ចប់​”។

នៅ​ពេល​ត្រូវ​បាន​សួរ​ថា​ តើ​ហេតុ​អ្វី​បាន​ជា​សេចក្តី​​ប្រកាស​ព័ត៌មាន​នេះ​មិន​បញ្ចេញ​ឈ្មោះ​ជន​ជាប់​ចោទ​ លោក​បាន​បង្វែរ​សំណួរ​​​នេះ​ទៅ​លោក​ ឱម​ យុិនទៀង​ ប្រធាន​អង្គ​ភាព​​ប្រឆាំង​អំពើ​ពុក​រលួយ​ ដែល​មិន​អាច​ទាក់​ទង​សុំ​ការ​ធ្វើ​អត្ថាធិប្បាយ​បាន​។

លោក​ ស្រី​ ណារ៉េន អ្នក​សម្រប​សម្រួល​នៅ​​​​​អង្គការ​សិទ្ធិ​មនុស្ស​អាដហុក​ ប្រចាំ​ខេត្ត​ឧត្តរ​មានជ័យ​ បាន​លើក​ឡើង​ថា បក្ខ​ពួក​និយម​​​កើត​មាន​ច្រើន​នៅ​ក្នុង​ខេត្ត​ឧត្តរមាន​ជ័យ ពោល​គឺ​​ក្នុង​ចំណោម​មន្ទីរ​ទាំង​២៤​​មានមន្ទីរ​ចំនួន​២០​សុទ្ធ​តែ​មាន​សាច់​ញាតិ​ធ្វើ​ការ​ក្រោម​​​ដំបូល​តែ​មួយ​។ លោក​ ណារ៉េន​ បាន​មាន​ប្រសាសន៍​ថា “មាន​អំពើ​ពុក​រលួយ​ខ្លាំង​ណាស់​ ដោយសារ​បក្ខ​ពួក​និយម​​​​នៅ​ក្នុង​មន្ទីរ​នានា​ ដោយ​នៅ​ទី​នោះ​​កូន​​ បង​ប្អូន​បង្កើត​និង​សាច់ញាតិ​ធ្វើ​ការ​ជា​មួយ​គ្នា”។

ខេត្ត​ឧត្តរ​មានជ័​យ​គឺ​ជា​មូលដ្ឋាន​ចុង​ក្រោយ​​​របស់​ខ្មែរ​ក្រហម​។ ដោយ​មាន​ព្រំ​ប្រទល់​​ជាប់​​​ប្រទេស​ថៃ ​​ខេត្ត​មួយ​នេះ​ទើប​​តែ​ស្ថិត​ក្រោម​​ការ​គ្រប់​គ្រង​របស់​រដ្ឋាភិបាល​ទាំង​ស្រុង​ក្នុង​ឆ្នាំ​១៩៩៨​ ប៉ុណ្ណោះ៕ ស៊ុយឈាង

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស