29 C
Phnom Penh

​​បុរស​ម្នាក់​ស្លាប់​ក្នុង​ពេលឆ្លង​ចូល​ព្រំ​ដែន​ថៃ​ដើម្បី​ដើរ​ចាប់​មាន់​​សង្ស័យ​នគរបាល​ថៃ​ជា​អ្នក​បាញ់

ដោយ ឌឹ ខេមបូឌា ដេលី

បទវិភាគ

កាលពី​ម្សិលមិញ​នគរបាល​កម្ពុជា​បាន​យក​សាកសព​បុរស​ម្នាក់​អាយុ​២៧​ឆ្នាំ​ដែល​​គេ​​ជឿ​ថា ត្រូវ​បាន​អាជ្ញាធរ​ថៃ​បាញ់​សម្លាប់​ បន្ទាប់​ពី​ឆ្លង​ចូល​ព្រំ​ដែន​ថៃ​ពី​ខេត្ត​បៃលិន ក្នុង​គោល​បំណង​ដើរ​រក​ចាប់​មាន់​។

លោក យ៉ាន យ៉ុង នាយ​ប៉ុស្តិ៍​ស្ទឹង​កាច់ក្នុង​ស្រុក​សាលាក្រៅ​ បាន​ឲ្យ​ដឹង​ថា សាក​សព​ជន​រង​គ្រោះ​ឈ្មោះ ផុង សុខឡា ត្រូវ​បាន​ប្រទះ​ឃើញ​នៅ​ចម្ងាយ​ប្រហែល​៣០០ម៉ែត្រ​ពី​ខេត្តចាន់​បុរី​​របស់​ប្រទេស​ថៃ។

លោក​បាន​មាន​ប្រសាសន៍​ថា “ជន​រង​គ្រោះ​ត្រូវ​បាញ់ចំ​ដង​ខ្លួន​ និង​បាន​ស្លាប់​ភ្លាម​ៗ​នៅ​កន្លែង​កើត​ហេតុ​ក្នុង​ពេល​កំពុង​ព្យាយាម​ដាក់​អន្ទាក់ចាប់​មាន់​ព្រៃ​”។

សាច់​ញាតិ​របស់​ជន​រង​គ្រោះ​បាន​ប្រាប់​នគរបាល​ថា ជា​រៀង​រាល់​ថ្ងៃ​ ជន​រង​គ្រោះ​ ផុង សុខឡា និង​ពូ​របស់​ខ្លួន​តែង​តែ​ទៅ​ចាប់​មាន់​ព្រៃ​ និង​ប្រហែល​ជា​បាន​ឆ្លង​ចូល​ព្រំ​ដែន​ថៃ​ដោយ​មិន​ដឹង​ខ្លួន​។ នៅ​ពេល​ជន​រង​គ្រោះ​មិន​ត្រឡប់​មក​ផ្ទះ​វិញ​ គ្រួសារ​ក៏​បាន​ជូន​ដំណឹង​ទៅ​នគរបាល​។

លោក​ ខន វុទ្ធីគុណ អធិការ​នគរបាល​ស្រុក​សាលា​ក្រៅ​បាន​ឲ្យ​ដឹង​ថា ប្រតិបត្តិការ​ស៊ើប​អង្កេត​មួយ​កំពុងតែ​ដំណើរការ​ ដើម្បី​កំណត់​ថា តើ​ជន​រង​គ្រោះ​ឈ្មោះ​ ផុង សុខឡា “ត្រូវ​បាន​បាញ់​សម្លាប់​ដោយ​នគរបាល​ថៃ​ ឬក៏​ប្រជាជន​ថៃ​”។

លោក ប៉ាក់​ឌី ទូចាយុធ (Pakdi Touchayoot) ឯកអគ្គរាជទូត​ប្រចាំ​ប្រទេសកម្ពុជា​ បាន​បដិ​សេធ​មិន​ធ្វើ​អត្ថាធិប្បាយ​ទាក់​ទង​នឹង​ករណី​នេះ ឬ​ក៏​គោល​នយោបាយ​ល្បាត​តាម​ព្រំ​ដែន​របស់​ប្រទេ​សថៃ​ឡើយ។

លោក ទូចាយយុធ ត្រូវ​បាន​ក្រសួង​ការ​បរទេស​ និង​សហប្រតិបត្តិការ​អន្តរជាតិ​ នៃ​ព្រះ​រាជាណាចក្រ​កម្ពុជា​ កោះ​ហៅ​ប្រជុំ​កាល​ពីសប្តាហ៍​មុន​ ទាក់​ទង​នឹង​ករណី​ឃាតកម្ម​កើត​ឡើង​ជា​បន្ត​បន្ទាប់​មិន​ព្រម​ឈប់​លើ​ប្រជាជន​ខ្មែរ​ ដែល​បាន​ឆ្លង​ដែនចូល​ប្រទេស​ថៃ​ ជា​ញឹក​ញាប់​ដើម្បី​កាប់​ឈើ​​មាន​តម្លៃ​ខុស​​ច្បាប់​​នៅ​ទី​នោះ​៕ សុធា

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស