គណៈកម្មការមួយដែលបានបង្កើតឡើងដើម្បីដោះស្រាយវិវាទដីធ្លីជាយូរមកហើយរវាងអ្នកភូមិនៅក្នុងស្រុកកំពង់ត្រឡាច ខេត្តកំពង់ឆ្នាំង ជាមួយអ្នកស្រី ជា ខេង ភរិយារបស់លោក ស៊ុយ សែម រដ្ឋមន្ត្រីក្រសួងរ៉ែនិងថាមពលបានកោះហៅអ្នកភូមិ៣២គ្រួសារមកសាកសួរកាលពីម្សិលមិញ។
ប៉ុន្តែអ្នកភូមិភាគច្រើនបានដើរចេញពីកិច្ចប្រជុំនោះបន្ទាប់ពីអ្នកស្រី ជា ខេង ដែលក្រុមហ៊ុន KDC International ជាក្រុមហ៊ុនកសិឧស្សាហកម្មរបស់គាត់ បានចាប់យកដីទំហំ១៤៥ហិកតារបស់អ្នកភូមិ៥២គ្រួសារកាលពីឆ្នាំ២០០៧នោះ បាននិយាយថា ក្រុមអ្នកភូមិមិនមានភ័ស្តុតាងគ្រប់គ្រាន់ដើម្បីបញ្ជាក់ថាដីនោះជាដីរបស់ពួកគាត់ឡើយ។
លោក សួស ស៊ីផៃ នាយប៉ុស្តិ៍ឃុំតាជេស ជាសមាជិកម្នាក់ក្នុងចំណោមសមាជិកគណៈកម្មការ១៥នាក់ដែលត្រូវបានបង្កើតឡើងតាមសំណើរបស់ក្រុមហ៊ុន KDC បានមានប្រសាសន៍ថា “យើងមានគម្រោងសាកសួរអ្នកភូមិ៣២គ្រួសារនៅថ្ងៃនេះដើម្បីធ្វើរបាយការណ៍ដោះស្រាយបញ្ហានេះ ហើយយើងនឹងបន្តសាកសួរអ្នកភូមិ២០គ្រួសារទៀតនៅថ្ងៃស្អែក”។ គណៈកម្មការនេះមិនមានតំណាងអ្នកភូមិទេ។
លោកបានមានប្រសាសន៍ថា “យើងសាកសួរអ្នកភូមិបានតែ១១គ្រួសារប៉ុណ្ណោះក្នុងចំណោម៣២គ្រួសារនៅព្រឹកនេះ ប៉ុន្តែអ្នកដែលបានដើរចេញពីសាលាឃុំ ហើយត្រឡប់ទៅផ្ទះវិញ បន្ទាប់ពីអ្នកស្រី ជា ខេង និយាយថា អ្នកស្រីនឹងមិនទទួលស្គាល់ការឆ្លើយតបរបស់ពួកគាត់ ពីព្រោះពួកគាត់មិនមានភ័ស្តុតាងដើម្បីបញ្ជាក់ថា ដីនោះជាដីស្របច្បាប់របស់ពួកគាត់ឡើយ”។
លោក សួស ស៊ីផៃ បានមានប្រសាសន៍ថា អ្នកភូមិ១១គ្រួសារបានទាមទារសំណងចាប់ពី១៥.០០០ដុល្លារទៅ២០.០០០ដុល្លារក្នុងមួយហិកតា ប៉ុន្តែអ្នកស្រី ជា ខេង មិនព្រមឲ្យទេ បើគ្មានភ័ស្តុតាងបញ្ជាក់ពីកម្មសិទ្ធិ។
គ្រួសារមួយចំនួនអះអាងថា ពួកគាត់បានរស់នៅលើដីនេះចាប់តាំងពីឆ្នាំ១៩៨៨មកម៉្លេះ ដោយមានប័ណ្ណកម្មសិទ្ធិដីស្របច្បាប់ទៀតផង។
លោក សល់ សុង អាយុ៥៦ឆ្នាំ ដែលជាប់ពាក់ព័ន្ធក្នុងវិវាទដីធ្លីនេះនិយាយថា គាត់បានធ្វើជាម្ចាស់ដីស្រែ និងដីចម្ការទំហំ២ហិកតានេះក្នុងឆ្នាំ១៩៩០។គាត់ទាមទារតម្លៃ២០.០០០ដុល្លារក្នុងមួយហិកតាពីអ្នកស្រី ជា ខេង ។
គាត់បាននិយាយថា “ខ្ញុំមិនមានប័ណ្ណកម្មសិទ្ធិដីទេ ប៉ុន្តែខ្ញុំមានលិខិតមួយច្បាប់ដែល ទទួលស្គាល់ដោយអតីតប្រធានភូមិ និងមេឃុំ”។ លោក សល់ សុង បាននិយាយថា “ខ្ញុំបានដើរចេញបីសាលាឃុំ ពីព្រោះអ្នកស្រី ជា ខេង មិនទទួលស្គាល់លិខិតរបស់ខ្ញុំ ហើយនិយាយថា លិខិតនេះគ្មានសុពលភាព”។ គេមិនអាចទាក់ទងអ្នកស្រី ជា ខេង ដើម្បីសុំអត្ថាធិប្បាយបានទេ៕ សារុន