30.1 C
Phnom Penh

មន្ត្រី​ក្រសួង​អប់រំ​ម្នាក់និយាយថា ការ​ចាប់​សិស្ស​ដែល​​លួច​ចម្លងដាក់​ពន្ធនាគារ​ជា​រឿង​មិន​ត្រឹមត្រូវ​

ដោយ ឌឹ ខេមបូឌា ដេលី

បទវិភាគ

កាល​ពីម្សិលមិញ មន្ត្រី​ក្រសួង​អប់​រំ​ជាន់​ខ្ពស់មួយ​រូ​​ប​បាន​លើក​ឡើង​ថា ការ​ចាប់​សិស្ស​លួច​ចម្លង​ដាក់​ព​ន្ធនា​គារ​ដូច​ដែល​អង្គភាព​ប្រឆាំង​អំពើ​ពុក​រលួយ​បាន​គំរាម​កាលពី​ថ្ងៃ​អង្គារ​ គឺ​ជា​រឿង​​មិន​ត្រឹម​ត្រូវ​ឡើយ​ក្នុង​ការ​លុប​​បំបាត់​​អំពើ​ពុក​រលួយ​នៅ​ពេល​ប្រឡង​សញ្ញា​បត្រ​ទុតិយភូមិ​ថ្នាក់​ជាតិ​។ ផ្ទុយ​ទៅ​វិញ លោក​បាន​អំពាវ​នាវ​ឲ្យ​បង្កើន​ថវិកា​​សម្រាប់​​គ្រូបង្រៀន​ ​ប្រសិន​បើ​​ឲ្យ​ពួក​គាត់​​ឈប់​​​ទទួល​​សំណូក​។

លោក រស់ សាលីន ប្រធាន​ខុទ្ទកា​ល័យ​​​ក្រសួង​អប់​រំបាន​មាន​ប្រសា​សន៍​ថា សិស្ស​ភាគ​ច្រើន​អាយុ​ក្រោម​១៨​ឆ្នាំ ដូច្នេះ វា​ជា​រឿង​មិន​ត្រឹម​ត្រូវ​ទេក្នុង​ការ​ចាប់​ពួកគេ​ដាក់​ពន្ធនាគារ​នោះ ប៉ុន្តែ​សារ​​នេះ​ [របស់​​អង្គភាព​ប្រឆាំង​អំពើ​ពុក​រលួ​យ​] ប្រហែល​ជា​ធ្វើ​ឲ្យ​សិស្ស​មួយ​ចំនួន​ឈប់​លួច​ចម្លង​​។

នៅ​សប្ដាហ៍នេះ លោក ឱម យ៉ិន​ទៀង ប្រធាន​អង្គភាព​ប្រឆាំង​អំពើ​ពុក​រលួយ​​​បា​ន​ថ្លែង​ទៅ​កាន់​គ្រូ​​បង្រៀន​១៥០​នាក់​ ដែល​បាន​ចូលរួម​ក្នុង​វគ្គបណ្តុះ​បណ្តាល​​ស្តីពី​ការ​ប្រឆាំង​អំពើពុក​រលួយ​ថា តុលា​ការ​នឹង​​ចាត់​ការ​លើ​បញ្ហា​លួច​ចម្លង​នៅ​ពេលប្រឡងថ្នាក់​ជាតិ​។ លោក សាលីន បាន​មាន​ប្រសាសន៍​ថា គួរមាន​វិធាន​​ការ​​ស្រាលជាងនេះ​។

លោក​បាន​មាន​ប្រសាសន៍​ថា “យើង​មាន​​ប្រព័ន្ធ​ឃ្លាំ​មើ​ល​ថ្មី​ផ្ទាល់​ខ្លួន​ ដោយ​មាន​មនុស្ស​​​បីក្រុម​ផ្សេង​គ្នា​មក​ពី​ក្រសួង​ដើម្បី​ឃ្លាំមើល​​ឲ្យ​បាន​​ដិត​ដល់​នៅ​ពេល​ប្រឡង​ ពេល​​កែ​ និង​​ពេល​ចេញ​លទ្ធ​ផល​”។

​បន្ទាប់​ពី​​បញ្ចប់​វគ្គ​បណ្ដុះ​បណ្ដាល​រយៈ​ពេល​បី​ថ្ងៃ​​​កាល​ពី​ម្សិល​មិញ​ដល់​គ្រូបង្រៀន​ស្តី​ពី​ការ​ទប់​ស្កាត់​​​​​​អំពើ​ពុក​រលួយ ដែល​​កើត​មាន​ច្រើន​​នៅ​តា​ម​វិទ្យាល័យ​ ជា​ពិសេស​អំឡុង​ពេល​ប្រឡ​ង​​​នោះ ​លោក សាលីន ​បាន​​​មាន​ប្រសា​សន៍​ថា វិធី​ដ៏ល្អ​បំផុត​ដើម្បីធានា​ឲ្យការ​ប្រឡង​ថ្នាក់​ជាតិ​​​ត្រឹម​ត្រូវ​នោះ​ គឺ​ធ្វើ​យ៉ាង​ណា​កុំ​ឲ្យ​គ្រូ​​បង្រៀន​ទទួល​សំណូក​។

លោក សាលីន បាន​មាន​ប្រសាសន៍​ថា “នេះ​​​ជា​ឧបសគ្គ​ដែល​យើង​ប្រឈម។ យើង​ចំណាយ​ថវិកា​​ចំនួន​៣៣៣​លាន​ដុល្លារ​ក្នុង​មួយ​​ឆ្នាំ​​​ ហើយ​​៧៥​ភាគ​រយនៃ​ថវិកា​នេះ​បាន​​​ចំណាយ​ទៅ​លើ​ប្រាក់​ខែ​​​រួច​ហើយ​”។ លោក បន្តថា “យើង​​​ត្រូវ​ការ​ថវិកា​បន្ថែម​ដើម្បី​លើក​កម្ពស់​បទ​ដ្ឋា​ន​នៃ​ការ​អប់​រំ​”។

នៅ​ឆ្នាំ​នេះប្រធាន​សមាគម​គ្រូ​បង្រៀន​​​កម្ពុជា​ឯក​រាជ្យ​​បាន​ជំរុញ​ឲ្យ​គ្រូ​បង្រៀន​ទូទាំង​ប្រទេស​ធ្វើ​កូដកម្ម​ទាម​ទារ​ដំឡើង​ប្រាក់​ខែ​គោល​២៥០​ដុល្លារ​។

កាលពីដើម​សប្ដាហ៍​នេះ លោក រ៉ុង ឈុន ប្រធាន​​សមាគម​គ្រូបង្រៀន​កម្ពុជា​ឯក​រាជ្យ​បាន​មា​ន​ប្រសាសន៍​ថា​ ការ​ចាប់​អនុរក្ស​ ឬ​សិស្ស​ដែល​ជាប់​ពាក់​ព័ន្ធ​នឹង​សំណូក​​ដាក់​ពន្ធនាគារ​គឺ​​ធ្ងន់​ធ្ងរ​ពេក ហើយ​លោក​បាន​អំពាវ​នាវ​ឲ្យ​អង្គ​ភាព​ប្រឆាំង​អំពើ​ពុក​រលួយ​ដាក់​ទណ្ឌ​កម្ម​ផ្សេង​វិញ​។

នៅ​ពិធីបិទ​វគ្គ​​បណ្ដុះ​បណ្ដាល​នៅ​អង្គ​ភាព​ប្រឆាំង​អំពើ​ពុក​រលួយ​កាលពី​ម្សិល​មិញ គ្រូ​បង្រៀន​អាយុ​៣១​ឆ្នាំ​ម្នាក់មកពី​ខេត្ត​រតនគិរីដែល​ប្រាប់​ថា  ឈ្មោះ​ ធា បាន​មាន​ប្រសាសន៍​ថា ​ទោះ​ជា​លោក​មិន​មាន​ប្រាក់​​ខែ​គ្រប់​គ្រាន់​ក៏ដោយ​​ ក៏​ការ​ភ័យ​ខ្លាច​​ចំពោះ​ការ​ចាប់​ដាក់​ពន្ធនាគារ​អាច​រារាំង​លោក​មិន​ឲ្យ​លោក​ទទួល​យក​សំណូក​​។

លោក​បាន​មាន​ប្រសាសន៍​ថា “សព្វ​ថ្ងៃ​នេះ​​ ប្រាក់​ខែ​គ្រូបង្រៀន​តិច​ណាស់​។ ខ្ញុំ​នឹង​ប្រឹង​ប្រែងឲ្យ​អស់​ពីលទ្ធភាព​ដើម្បី​អនុវត្ត​តាម​អង្គភាព​ប្រឆាំង​អំពើ​ពុក​រលួយ​ ហើយ​គ្រូមួយ​ចំនួន​ដែល​ភ័យ​ខ្លាច​​​ចំពោះ​ការ​​ចាប់​ដាក់​ពន្ធនាគារ​ដែរនោះក៏​នឹង​ធ្វើ​ដូច្នេះ​ដែរ​ ប៉ុន្តែ​ខ្ញុំ​ដឹង​ថា គ្រូភាគ​ច្រើន​នឹង​នៅ​តែ​ទទួល​​យក​សំណូក​”។

គ្រូបង្រៀន​ម្នាក់ទៀត​មកពី​ខេត្ត​កំពង់​ធំដែល​មិន​ចង់​ប្រាប់​ឈ្មោះដោយ​ខ្លាច​ប៉ះ​ពាល់​ដល់​ការ​ងារ​នោះ​បាន​មាន​ប្រសា​សន៍​ថា គ្រូបង្រៀន​ដែល​តាម​ទាន់​ពេល​ទទួល​យក​សំណូក​សម​តែ​ត្រូវ​តុលាការ​ដាក់​ទោស​អ៊ីចឹង​ហើយ។ លោក​លើកឡើង​​​ថា “គ្រូ​មួយ​​​​ចំនួន​​ទទួ​ល​សំណូក​​ពីសិស្ស​ ហើយ​ប្រើ​​​ប្រាស់​ប្រាក់នោះ​ដើម្បី​ប្រយោជន៍​ផ្ទាល់​ខ្លួន​។ មនុស្ស​ ប្រភេទ​នេះ​សម​តែ​ជាប់​ពន្ធនាគារ​។ វា​ជា​មធ្យោបាយ​តែ​មួយ​គត់​ដើម្បី​លុប​​បំបាត់​អំពើ​ពុក​រលួយ​”៕ សារុន​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស