កាលពីថ្ងៃសុក្រ លោក ស ខេង រដ្ឋមន្ត្រីក្រសួងមហាផ្ទៃបានចេញបម្រាមហាមមិនឲ្យមានការជួបជុំដែលគណបក្សសង្គ្រោះជាតិគ្រោងនឹងធ្វើ ឡើងនៅទីលានប្រជាធិបតេយ្យក្នុងរាជធានីភ្នំពេញនៅថ្ងៃអាទិត្យ។
បម្រាមនេះត្រូវបានធ្វើឡើងមួយថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានព្រមានគណបក្សប្រឆាំងឲ្យលុបចោលគម្រោងធ្វើមហាបាតុកម្មមួយផ្សេងទៀតរបស់ខ្លួន។លោកបានលើកឡើងថា លោកខ្លាចក្រែងមហាបាតុកម្មនេះធ្វើហួសព្រំដែនច្បាប់ ដោយរំលោភបម្រាមរបស់សាលារាជធានី ដែលហាមមិនឲ្យមានការរៀបចំព្រឹត្តិការណ៍ជួបជុំនៅទីលានប្រជាធិបតេយ្យ។
បម្រាមនេះមានខ្លឹមសារដោយសំដៅលើការតវ៉ាធំៗលើកចុងក្រោយកាលពីខែមករា នៅក្នុងរាជធានីភ្នំពេញដូច្នេះថា “ ទាក់ទិននឹងការជួបជុំគ្នានៅទីលានប្រជាធិបតេយ្យដែលរៀបចំឡើងដោយគណបក្សសង្គ្រោះជាតិ ក្រសួងមហាផ្ទៃបានសម្រេចថា អាជ្ញាធរមានសមត្ថកិច្ចដែលកំពុងស៊ើបអង្កេតលើអំពើហិង្សាដែលបង្កឲ្យមានការខូចខាត[ទ្រព្យសម្បត្តិសាធារណៈ]នៅមិនទាន់បញ្ចប់ការស៊ើបអង្កេតរបស់ខ្លួននៅឡើយទេ”។
បម្រាមនេះដែលចុះហត្ថលេខាដោយលោក ស ខេង និងត្រូវបានបង្ហោះនៅលើគេហទំព័ររបស់ក្រសួងមហាផ្ទៃកាលពីថ្ងៃសុក្រ មានខ្លឹមសារបន្តដូច្នេះថា “ ដើម្បីចៀសវាងភាពចលាចលដែលអាចកើតចេញពីពួកឆ្លៀតឱកាសមួយចំនួន ក្រសួងមហាផ្ទៃនឹងមិនអនុញ្ញាតឲ្យគណបក្សសង្គ្រោះជាតិរៀបចំការជួបជុំនៅទីលានប្រជាធិបតេយ្យ ឬទីសាធារណៈណាមួយឡើយ”។
បម្រាមនេះមានខ្លឹមសារបន្តដូច្នេះទៀតថា “គណបក្សសង្គ្រោះជាតិអាចរៀបចំការជួបជុំបាននៅការិយាល័យរបស់ខ្លួន ឬទីកន្លែងឯកជន ហើយត្រូវសហការជាមួយអាជ្ញាធររាជធានីភ្នំពេញ ដើម្បីការពារសន្តិសុខ និងសណ្តាប់សាធារណៈ”។
គណៈកម្មការមួយក្នុងចំណោមគណៈកម្មការទាំងបីដែលត្រូវបានបង្កើតឡើងដើម្បីវាយតម្លៃលើការខូចខាតដែលបង្កឡើងដោយការធ្វើកូដកម្មរបស់កម្មកររោងចក្រកាត់ដេរ បានស្តីបន្ទោសគណបក្សសង្គ្រោះជាតិ និងមេដឹកនាំសហជីពចំនួនបីចំពោះការខូចខាតគិតជាទឹកប្រាក់ចំនួន២៧៥.៦៨៨ដុល្លារ។
នៅក្នុងសេចក្តីជូនដំណឹងដាច់ដោយឡែកមួយផ្សេងទៀតដែលចេញកាលពីថ្ងៃសុក្រ ក្រសួងមហាផ្ទៃបានយល់ព្រមឲ្យគណបក្សសង្គ្រោះជាតិធ្វើពិធីរំឭកវិញ្ញាណក្ខន្ធអ្នកដែលបានស្លាប់នៅក្នុងការវាយប្រហារដោយគ្រាប់បែកមួយលើការតវ៉ារបស់គណបក្សប្រឆាំងកាលពីថ្ងៃទី៣០ខែមីនា ឆ្នាំ១៩៩៧។
សេចក្តីជូនដំណឹងនេះមានខ្លឹមសារដូច្នេះថា “អ្នកចូលរួមមិនអាចលើសពី៧០០នាក់បានឡើយ។ ហើយបន្ទាប់ពីពិធីនេះត្រូវបានបញ្ចប់ ពួកគេចាំបាច់ត្រូវតែបំបែកគ្នា មិនត្រូវប្រមូលផ្តុំ ឬហែក្បួនទៅកន្លែងផ្សេងណាមួយឡើយ”។
នៅក្នុងសេចក្តីថ្លែងការណ៍មួយដែលចេញកាលពីថ្ងៃសុក្រ គណបក្សសង្គ្រោះជាតិបានលើកឡើងថា ខ្លួនរំពឹងថា នឹងមានអ្នកគាំទ្រប្រមាណ៥.០០០នាក់ចូលរួមនៅក្នុងព្រឹត្តិការណ៍ជួបជុំគ្នានៅទីលានប្រជាធិបតេយ្យ។
លោកស្រី មូរ សុខហួរ ប្រធានទទួលន្ទុកកិច្ចការសាធារណៈរបស់គណបក្សសង្គ្រោះជាតិបានមានប្រសាសន៍កាលពីថ្ងៃសុក្រ ថា “សូមបញ្ជាក់ឲ្យបានច្បាស់ថា យើងនឹងបន្តដំណើរទៅមុខ ហើយរៀបចំពិធីជួបជុំនេះ”។ លោកស្រីបានមានប្រសាសន៍បន្តដោយសំដៅទៅលើសកម្មភាពរបស់នគរបាលប្រឆាំងអ្នកតវ៉ាថា “ វាគឺជាការព្រួយបារម្ភ ប៉ុន្តែវាមិនអាចរារាំងយើងពីការអនុវត្តសិទ្ធិសេរីភាពស្របតាមរដ្ឋធម្មនុញ្ញរបស់យើងបានឡើយ”៕ ស៊ុយឈាង
(រាយការណ៍បន្ថែមដោយLauren Crothers)