37 C
Phnom Penh

លោក ម៉ម សូណង់ដូ​៖ ការ​តវ៉ា​នៅធ្វើ​​ដដែល​ តែលោកមិន​ដឹក​នាំទេ​

ដោយ ឌឹ ខេមបូឌា ដេលី

បទវិភាគ

លោក​ ម៉ម សូណង់ដូ  ម្ចាស់ស្ថានីយ​វិទ្យុ​​ឯក​​រាជ្យ​បាន​លើក​ឡើង​ថា លោក​នឹង​មិន​ដឹក​នាំ​ការតវ៉ា​ដែល​លោក​បាន​គ្រោង​ធ្វើ​​នៅ​ថ្ងៃ​នេះ​នៅខាង​ក្រៅ​ទីស្នាក់​ការ​ក្រសួង​ព័ត៌មាន​នៅ​ក្នុង​រាជធានី​ភ្នំពេញ​ទេ ប៉ុន្តែ​លោក​នឹង​ចូល​រួម​ប្រសិន​បើ​អ្នក​គាំទ្រ​បន្ត​ធ្វើ​ការតវ៉ា​​ដោយ​ខ្លួន​ឯងនោះ​។

លោក​ ម៉ម សូណង់ដូ បានមាន​ប្រសា​សន៍​​​ថា “ខ្ញុំ​នឹង​មិន​ដឹក​នាំ​ [ការតវ៉ា​] នោះទេ ពីព្រោះ​ សាលា​រាជធានី​មិន​អនុ​ញ្ញាត​ឲ្យ​ខ្ញុំ​​ឡើយ​​។​ ប៉ុន្តែ​ខ្ញុំ​នឹង​ទៅ​ចូល​រួម​ជាមួយ​ប្រជា​ពល​រដ្ឋ​ ដែល​ទាមទារ​សិទ្ធិ​និង​សេរី​ភាព​របស់ខ្លួន​​​ក្នុង​ការ​ទទួល​បាន​ព័ត៌មាន”។ លោក​​បាន​បន្ថែម​ថា “មេដឹកនាំ​បច្ចុ​ប្បន្ន​​មិន​​​អាច​គាបសង្កត់​យើង​បាន​ទេ​ ហើយ​​​​​បាន​​ចោទ​ប្រកាន់​យើង​ថា បាន​ប្រព្រឹត្ត​បទ​ឧក្រិដ្ឋ​ បើទោះជាយើង​​​​គ្រាន់​តែ​​ធ្វើ​ការ​តវ៉ា​ដើម្បីសេរីភាព​និង​សិទ្ធិក្នុង​ការ​​​ទទួល​បាន​ព័ត៌មាន​ក៏ដោយ​​”។

កាល​ពី​សប្ដាហ៍​មុន​ លោក​ ម៉ម សូណង់​ដូ បាន​មាន​ប្រសាសន៍​ថា ការតវ៉ា​នឹង​​ធ្វើ​តាម​ការ​គ្រោងទុក​​នៅ​ថ្ងៃ​នេះ​ បើ​ទោះ​ណា​ជា​សំណើ​របស់​លោក​​ត្រូវ​បាន​ច្រានចោល​ដោយ​សាលា​រាជធានីដែល​​​លើក​​ឡើងពី​បម្រាម​របស់​រដ្ឋា​​​ភិបាលមិន​​ឲ្យ​ធ្វើ​បាតុកម្ម​​ក៏​ដោយ​។

លោក​ ម៉ម សូណង់ដូ បាន​អំពាវនាវ​ឲ្យ​មាន​ការ​តវ៉ា​បន្ទាប់ពី​​ក្រសួង​ព័ត៌មាន​បាន​ច្រាន​ចោល​​សំណើ​របស់​លោកជាថ្មី​ម្ត​ង​​​ទៀត​​កាល​ពី​ដើម​​​​ឆ្នាំ​នេះ​ សុំ​អាជ្ញាប័ណ្ណ​បង្កើត​ស្ថានីយ​ទូរទស្សន៍​ និង​ស្ថានីយ​ផ្សាយ​​​​បន្ត​នៃ​​​វិទ្យុ​សម្បុក​ឃ្មុំ​របស់​លោក​ទៅ​តាម​បណ្ដា​ខេត្ត​​។

ក្នុង​នាម​ជា​ម្ចាស់ស្ថានីយ​វិទ្យុ​​ឯករាជ្យ​មួយ អ្នក​រិះគន់​រដ្ឋាភិបាល​​ឥត​សំចៃ​រូប​នេះ​បាន​​​មាន​ប្រសាសន៍​ថា សេចក្ដី​សម្រេច​នេះ​​ជា​​រឿង​នយោបាយ​សុទ្ធសាធ​។

ការ​តវ៉ា​ចុង​ក្រោយ​របស់​លោក​នៅ​ខាង​​ក្រៅ​ក្រសួង​ព័ត៌មាន​កាល​ពី​ចុង​ខែ​មករា​​​នោះ​​ ត្រូវ​បានបង្ក្រាបដោយ​​កង​រាជ​អាវុធ​​​ហត្ថ​ដែល​ប្រដាប់​ដោយ​ឧបករណ៍​បង្ក្រាប​បាតុកម្ម និង​ដំបង​ឆក់​ បណ្ដាល​ឲ្យ​អ្នក​ចូល​រួម​មួយ​ចំនួនរង​​​របួស​មាន​ទាំង​​ហូរ​ឈាម និង​ស្មាម​ជាំ។

លោក​ ម៉ម សូណង់ដូ បានមាន​ប្រសា​សន៍​ថា​ លោក​មិន​ទាន់​ដឹង​ថា តើ​មាន​ប្រជា​ពល​​រដ្ឋ​​ប៉ុន្មាន​អ្នក​ចូល​រួម​​ការ​តវ៉ានៅ​ថ្ងៃ​នេះ​​ទេ​។

អ្នកស្រី មុំ​ វណ្ណា បាន​និយាយ​ថា អ្នក​ស្រី​ ​និង​អ្នកជិត​ខាង​២០​នាក់ទៀត​បាន​ធ្វើ​ដំណើរ​ចេញ​ពី​ភូមិ​របស់​ខ្លួន​ស្ថិត​នៅ​ក្នុង​ខេត្ត​កំពង់​ចាម​ មក​កាន់​រាជធានីភ្នំពេញ​កាល​ពី​​ថ្ងៃ​ម្សិល​​​មិញ ដើម្បី​មក​​ចូលរួម​ក្នុង​ការ​​តវ៉ា​នេះ​​។

កសិករ​អាយុ​៥៤​ឆ្នាំ​រូប​នេះ​បាន​និយា​យ​ថា “ខ្ញុំ​មិន​បារម្ភអំពី​ការ​ចូល​រួម​ក្នុង​​ការ​​​តវ៉ាទេ​ ពីព្រោះ​ខ្ញុំ​មិន​បាន​ធ្វើ​អ្វី​ខុស​ឡើយ​។ បើ​ទោះ​ជា​យើង​មិន​ត្រូវ​បាន​អនុញ្ញាត​ក៏​ដោយ​ ក៏​យើង​នៅ​តែ​ធ្វើ​ដដែល​”។

អ្នក​ស្រី​បាន​និយាយ​​​បន្ថែម​ទៀត​​​ថា “ខ្ញុំ​​​សង្ឃឹម​ថា យើង​នឹង​ទទួល​បាន​ព័ត៌មាន​ឯក​​​រាជ្យ​និង​ត្រឹម​ត្រូវ​។ យើង​ចង់​ឲ្យ​ប្រជាពលរដ្ឋ​ខ្មែរ​ភ្ញាក់ខ្លួនឡើង​ ហើយ​កុំ​នៅ​ល្ងិតល្ងង់​តទៅ​ទៀត​​។​ ជីវិត​​របស់​​​ប្រជាពលរដ្ឋ​​នឹង​ជួប​បញ្ហា​​​ស្មុគស្មាញ ​ប្រសិន​បើមិន​អាច​ទទួល​បាន​​​ព័ត៌​​​មា​ន​ពិត​នោះ”។

អ្នកស្រី​ វណ្ណា បាន​និយាយ​ថា គាត់​មិន​ដឹង​ថា​ តើ​ការ​តវ៉ា​នឹង​ចាប់​ផ្ដើម​នៅ​ម៉ោង​ប៉ុន្មាន​​នោះ​ទេ​។ ហើយ​បើ​ទោះ​ជា​ លោក​ ម៉ម សូ​​​ណង់​​​ដូ បញ្ជាក់​ថា លោក​មិន​ដឹក​នាំ​ ឬ​រៀប​ចំ​​ព្រឹត្តិការណ៍​នេះ​ក៏​ដោយ ក៏​អ្នកស្រី​ វណ្ណា និយាយ​ថា  អ្នកស្រី​រង់​​ចាំ​ស្តាប់​ការ​​ណែ​នាំ​របស់​លោក​ដែរ​។

លោក​​ឧត្តម​សេនីយ៍​ត្រី​ ខេង ទីតូ អ្នក​នាំ​ពាក្យ​​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​​មាន​ប្រសាសន៍​ថា កម្លាំង​សន្ដិសុខ​នឹង​​ត្រៀម​​​ខ្លួន​​បំបែក​​ការ​តវ៉ាណាមួយ​​​តាមបទ​​បញ្ជា​របស់​សាលា​រាជធានី​។ លោក​បាន​មាន​ប្រសា​សន៍​ថា “ប្រសិន​បើ​យើង​ទទួល​បាន​បទបញ្ជា​ យើង​នឹង​បំបែក​ភ្លាម​។​ យើង​នឹង​អនុវត្តតាម​បទ​បញ្ជា​​​។ កម្លាំង​របស់​យើង​ត្រៀម​ជា​ស្រេច​”។

លោក​ ឡុង​ ឌីម៉ង់ អ្នក​នាំ​ពាក្យ​សាលា​រាជ​ធានី​​បាន​មាន​ប្រសា​សន៍​ថា លោក​ជាប់​រវល់​​មិន​អាច​ធ្វើ​អត្ថាធិប្បាយ​បាន​ទេ​។

ក្រសួង​​មហា​ផ្ទៃ​បាន​ច្រាន​ចោល​សំណើ​​​របស់​​លោក​ ម៉ម សូណង់ដូ សុំ​បង្កើត​​ស្ថានីយ​​​ផ្សាយ​បន្ត​​ចាប់​តាំង​ពី​ឆ្នាំ​២០០៥​​ និង​អាជ្ញា​​​ប័ណ្ណ​បង្កើត​ស្ថានីយ​ទូរ​ទស្សន៍​ចាប់​តាំង​ពី​ឆ្នាំ​២០១០មក​ ដោយ​អះអាង​ថា មិន​មាន​ហ្វ្រេ​​​កង់​គ្រប់​គ្រាន់​​។ យោងតាម​របាយការ​ណ៍​ផ្ទាល់​របស់​រដ្ឋា​ភិ​បាល​បាន​​​ឲ្យ​ដឹង​ថា ទោះជា​​​​យ៉ាងណា​ក្រសួង​​​​​នេះ​បាន​​ផ្ដល់​អាជ្ញាប័ណ្ណ​មួយ​ចំនួន​នៅ​​ក្នុង​​​រយៈ​​​​ពេល​បី​ឆ្នាំ​កន្លង​មក​​៕ សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស