នគរបាលមូលដ្ឋានបានឲ្យដឹងថា កាលពីថ្ងៃសុក្រ សាលាដំបូងខេត្តស្វាយរៀងបានចោទប្រកាន់បុរសពីរនាក់ពីបទក្លែងខ្លួនជាអង្គរក្សមន្ត្រីនគរបាលជាន់ខ្ពស់ម្នាក់ដើម្បីបោកប្រាស់មន្ត្រីនគរបាលមូលដ្ឋានម្នាក់តាមរយៈការសន្យាឲ្យឡើងតួនាទីជាថ្នូរនឹងប្រាក់។
លោកវរសេនីយ៍ត្រី កែវ សុថា នាយនគរបាលព្រហ្មទណ្ឌកម្រិតស្រាលខេត្តបានមានប្រសាសន៍ថា លោក អេន វុទ្ធី អាយុ៤២ឆ្នាំ និង វេង សាវី អាយុ៥០ឆ្នាំត្រូវបានចាប់ខ្លួនកាលពីថ្ងៃព្រហស្បតិ៍បន្ទាប់ពីពួកគេបានព្យាយាមបោកប្រាស់លោក សៅ សូនី ជាមន្ត្រីនគរបាលម្នាក់ក្នុងឃុំគោកព្រីង ស្រុកស្វាយជ្រំឲ្យប្រគល់ប្រាក់ចំនួន១.១៥០ដុល្លារសម្រាប់តួនាទីជាពលបាលឯក។
ដំបូងជនសង្ស័យទាំងពីរនាក់បានយកប្រាក់ចំនួន១៥០ដុល្លារពីលោក សូនី ដើម្បីបំពេញសំណុំបែបបទ ហើយក្រោយមកបានព្យាយាមយកប្រាក់ពីគាត់ចំនួន១.០០០ដុល្លារបន្ថែមទៀត។
លោក សុថា បានមានប្រសាសន៍ថា ជនរងគ្រោះមិនអាចរកប្រាក់ឲ្យតាមការស្នើសុំបាន ដូច្នេះអ្នកទាំងបីបានព្រមព្រៀងក្នុងចំនួនទឹកប្រាក់៥០០ដុល្លារ។ លោក សុថា បានថ្លែងថា “[លោក សូនី] សង្ស័យចំពោះលិខិតដំឡើងតួនាទីនោះ ដែលសរសេរដោយជនសង្ស័យ ពីព្រោះលិខិតនេះមិនធ្វើតាមបទដ្ឋានផ្លូវការ”។
ជនរងគ្រោះបានដាក់ពាក្យបណ្តឹងទៅនគរបាលខេត្តឲ្យស៊ើបអង្កេតករណីនេះ ហើយបន្ទាប់មកធ្វើការណាត់ជួបជាមួយជនសង្ស័យកាលពីថ្ងៃព្រហស្បតិ៍នៅហាងកាហ្វេមួយក្នុងក្រុងស្វាយរៀងកន្លែងដែលនគរបាលបានចាប់ខ្លួនពួកគេនៅទីនោះតែម្តង។
លោក សុថា បានមានប្រសាសន៍បន្ថែមថា ជនសង្ស័យទាំងពីរនាក់នេះ “ជាមនុស្សគ្មានការងារធ្វើ ហើយបានស្គាល់គ្នាតាមរយៈការភ្នាល់ទឹកភ្លៀង”។ បុរសទាំងពីរនាក់កំពុងស្ថិតក្នុងការឃុំខ្លួនបណ្តោះអាសន្ននៅក្នុងពន្ធនាគារខេត្តស្វាយរៀង៕សារុន