40.3 C
Phnom Penh

មន្រ្តី​​​សា​​​លា​​​ក្រុង​​​ម្នាក់​​​បង្ហោះ​​​លិខិត​​​មេបក្ស​​​ប្រឆាំង​​​ផ្ញើ​​​ទៅ​​​​​​​​​លោក​​​ ហ៊ុន​​​ សែន​​​ ជុំ​​​វិញ​​​​​​ការ​​​ផ្ទុះ​​​​​​គ្រាប់​​​បែកឆ្នាំ​​​១៩៩៧

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​អាទិត្យ​​​ លោក ឡុង​​​ ឌីម៉ង់ អ្នក​​​នាំពាក្យ​​​សាលា​​​រាជ​​​ធានីភ្នំពេញ​​​បាន​​​ឆ្លៀត​​​យក​​​ថ្ងៃ​​​​​​​​​ខួប​​​​​​លើក​​​ទី​​​១៧​​​​​​រំព្ញក​​​ហេតុការ​​​ណ៍​​​វាយ​​​ប្រហារ​​​​​​ដោយ​​​គ្រាប់​​​បែក​​​​​​នាខែ​​​​​​មីនា ឆ្នាំ​​​១៩៩៧ មក​​​លើ​​​ពិធី​​​ជួប​​​ជុំ​​​មួយ​​​របស់​​​​​​គណបក្ស​​​ប្រឆាំង​​​ ដើម្បី​​​បង្ហោះ​​​​​​​​​​​​លិខិត​​​មួយ​​​ច្បាប់​​​​​​ដែល​​​លោក​​​ សម រង្ស៊ី​​​ ​​​បានសរសេរ​​​​​​ផ្ញើ​​​ទៅ​​​លោក​​​​​​នាយក​​​រដ្ឋ​​​មន្ត្រី​​​ ហ៊ុន​​​ សែន​​​​​​ កាល​​​ពី​​​ឆ្នាំ​​​២០០៦ ដើម្បី​​​សម្ដែង​​​ការ​​​​​​សោក​​​ស្ដាយចំពោះ​​​​​​​​​​​​ការ​​​បន្ទោស​​​​​​​​​រូប​​​លោក​​​ថា​​​  ជា​​​អ្នក​​​​​​នៅ​​​ពីក្រោយ​​​​​​ហេតុ​​​ការណ៍​​​វាយ​​​ប្រហារ​​​នោះ​​​​​​។

លោក​​​ ឡុង ឌីម៉ង់ បាន​​​បង្ហោះ​​​​​​លិខិត​​​​​​ដែល​​​មាន​​​អាយុ​​​កាល​​​​​​៨​​​ឆ្នាំនេះ​​​​​​​​​នៅ​​​លើទំព័រ​​​ហ្វេស​​​ប៊ុក​​​របស់​​​​​​ខ្លួន​​​ ពោល​​​គឺ​​​មួយ​​​ម៉ោង​​​​​​បន្ទាប់ពី​​​កា​​​រ​​​បញ្ចប់​​​​​​ពិធី​​​ជួប​​​ជុំ​​​មួយ​​​របស់​​​គណបក្ស​​​ប្រឆាំង​​​​​​កាល​​​ពី​​​ថ្ងៃ​​​អាទិត្យ​​​។ បន្ទាប់​​​ពី​​​ពិធី​​​ជួប​​​ជុំ​​​នេះ​​​ចប់​​​ក៏​​​មាន​​​ការ​​​បន្ត​​​​​​ហែ​​​ក្បួន​​​​​​មួយ​​​ដែល​​​មិន​​​បាន​​​ប្រកាស​​​​​​ឲ្យ​​​ដឹង​​​ជា​​​​​​មុន​​​​​​​​​ដែល​​​នេះ​​​គឺ​​​ជា​​​លើក​​​​​​ដំបូង​​​ហើយ​​​ចាប់​​​តាំង​​​ពី​​​​​​​​​កា​​​រ​​​បង្ក្រាបដ៏​​​​​​​​​បង្ហូរ​​​ឈាម​​​​​​​​​លើ​​​​​​ការ​​​​​​តវ៉ា​​​​​​កាល​​​ពី​​​ខែ​​​មករា​​​​​​មក​​​។​​​

ការជួប​​​ជុំ​​​គ្នា​​​នេះ​​​​​​បាន​​​​​​ចាប់​​​ផ្ដើម​​​​​​ជាមួយ​​​​​​នឹង​​​​​​ពិធី​​​​​​​​​បង្សុ​​​កូល​​​​​​ឧទ្ទិស​​​​​​ដល់​​​វិញ្ញាណក្ខន្ធ​​​​​​មនុស្ស​​​ទាំង​​​១៦​​​នាក់​​​ ដែល​​​បាន​​​បាត់​​​បង់​​​ជីវិត​​​ និង​​​ជា​​​ការ​​​រំព្ញក​​​ដល់​​​មនុស្ស​​​ជាង​​​១០០​​​នាក់​​​ទៀត​​​​​​ដែល​​​បាន​​​រង​​​របួស​​​នៅ​​​ក្នុង​​​ហេតុ​​​ការណ៍​​​វាយ​​​ប្រហារ​​​ដោយ​​​គ្រាប់​​​បែក​​​លើ​​​​​​ពិធី​​​ជួប​​​ជុំ​​​កាល​​​​​​ពី​​​ឆ្នាំ​​​១៩៩៧ ដែល​​​ដឹក​​​នាំ​​​ដោយ​​​លោក​​​ សម រង្ស៊ី។

លោក​​​ សម​​​ រង្ស៊ី បាន​​​លើក​​​ឡើ​​​ងនៅ​​​ក្នុង​​​លិខិត​​​ផ្ញើ​​​ជូន​​​លោក​​​ ហ៊ុន​​​ សែន​​​ ថា “ខ្ញុំ​​​មាន​​​ការ​​​​​​សោក​​​ស្ដាយ​​​យ៉ាង​​​ខ្លាំង​​​ដែល​​​​​​បាន​​​ប្រព្រឹត្ត​​​ខុស​​​ចំពោះ​​​​​​សម្ដេច​​​នាយក​​​រដ្ឋ​​​មន្ត្រី​​​ [ហ៊ុន សែន] ដូចជា​​​ ការ​​​ចោទ​​​ប្រកាន់​​​ថា សម្ដេច​​​នាយក​​​រដ្ឋមន្ត្រី​​​ជា​​​អ្នក​​​​​​នៅ​​​ពីក្រោយ​​​​​​ហេតុ​​​ការណ៍​​​គប់​​​គ្រាប់បែក​​​​​​លើ​​ក្រុម​​​បាតុករ​​​​​​​​​កាល​​​ពី​​​ថ្ងៃ​​​ទី​​​៣០ ខែ​​​មីនា​​​ ឆ្នាំ​​​១៩៩៧ នៅ​​​ខាង​​​មុខ​​​​​​រដ្ឋ​​​សភា​​​ជា​​​ដើម”។

មេដឹកនាំ​​​គណបក្ស​​​ប្រឆាំង​​​រូប​​​នេះ​​​បាន​​​បក​​​ស្រាយ​​​​​​​​​ថា “ចាប់​​​ពី​​​​​​ថ្ងៃ​​​នេះ​​​តទៅ​​​ ខ្ញុំ​​​​​​នឹង​​​កែ​​​ប្រែ​​អាកប្បកិរិយា​​​​​​របស់​​​ខ្ញុំ​​​​​​ដើម្បី​​​​​​បញ្ចប់​​​បញ្ហា​​​ទាំង​​​​​​អស់​​​នេះ​​​ ហើយ​​​នឹង​​​​​​ចៀស​​​វាង​​​​​​​​​មិន​​​ឲ្យ​​​មាន​​​​​​បញ្ហា​​​បែប​​​នេះ​​កើត​​​ឡើង​​​ទៀត​​ឡើ​យ។ ជាទូទៅ​​​ខ្ញុំ​​​បាន​​​​​​សម្រេច​​​ចិត្ត​​​​​​មិន​​​​​​យក​​​បញ្ហា​​​ផ្ទាល់​​​ខ្លួន​​​ជា​​​ធំ​​​ឡើយ ប៉ុន្តែ​​​នឹង​​​ផ្ដោត​​​យក​​​ចិត្ត​​​ទុក​​​ដាក់​​​លើ​​​បញ្ហា​​​ជាតិ​​​ដែល​​​ត្រូវ​​​​​​ការ​​​ស្វែង​​​រក​​​ដំណោះ​​​​​​ស្រាយ​​​ដោយ​​​​​​​​​​​​សន្ដិវិធី​​​​​​​​​ដែល​​​មាន​​​ការ​​​គោរព​​​គ្នា​​​ទៅ​​​​​​វិញ​​​ទៅ​​​មក​​​”។

លិខិត​​​នេះ​​​​​​​​​ គឺ​​​ជា​​​ផ្នែក​​​នៃ​​​កិច្ច​​​ព្រម​​​ព្រៀង​​​មួយ​​​ដែល​​​ធ្វើឲ្យ​​​​​​លោក​​​ សម រង្ស៊ី មាន​​​ឱកាស​​​​​​ធ្វើ​​​មាតុភូមិ​​​និវត្ត​​​​​​ពី​​​ការ​​​និរទេស​​​ខ្លួន​​​​​​នៅ​​​ក្នុង​​​ប្រទេស​​​បារាំង​​​វិញ​​​ បន្ទាប់ពី​​​​​​​​​លោក​​​បាន​​​ភៀស​​​ខ្លួន​​​ ដើម្បី​​​គេច​​​វេះ​​​​​​​​​​​​ការ​​​ចោទ​​​ប្រកាន់​​​​​​ពី​​​បទ​​​បរិហារ​​​កេរ្តិ៍ ព្រះអង្គម្ចាស់​​​នរោត្តម​​​ រណប្ញទ្ធិ។ លោក​​​  សម រង្ស៊ី បាន​​​ប្រាប់​​​​​​វិទ្យុ​​​សម្បុក​​​ឃ្មុំ​​​​​​ថា​​​ ព្រះ​​​អង្គ​​​ម្ចាស់​​​បាន​​​ទទួល​​​សំណូក​​​​​​៣០​​​លាន​​​ដុល្លារ​​​​​​ពី​​​លោក​​​ ហ៊ុន សែន​​​ ដើម្បី​​​គាំទ្រ​​​​​​រដ្ឋាភិ​​​បាល​​​​​​ថ្មី​​​មួយ​​​របស់​​​គណបក្ស​​​ប្រជាជន​​​កម្ពុជា​​​នៅ​​​ក្នុង​​​ឆ្នាំ​​​២០០៤។​​​

ការ​​​វិល​​​​​​ត្រឡប់​​​របស់​​​លោក​​​ សម រង្ស៊ី នៅ​​​ក្នុង​​​ខែ​​​នោះ​​​ ធ្វើ​​​​​​ឲ្យ​​​គណបក្ស​​​ប្រជាជន​​​កម្ពុជា​​​​​​​​​អាច​​​កោះ​​​​​​​​​ប្រជុំ​​​​​​រដ្ឋសភា​​​​​​ បាន​​​ជាមួយ​​​នឹង​​​​​​វត្តមាន​​​របស់​​​លោក​​​នៅ​​​ថ្ងៃ​​​ទី​​​២៨ ខែ​​​កុម្ភៈ​​​ ពោល​​​គឺ​​​ពីរ​​​ថ្ងៃ​​​ប៉ុណ្ណោះ​​​ មុន​​​កិច្ច​​​ប្រជុំ​​​ប្រចាំ​​​ឆ្នាំ​​​របស់​​​​​​ម្ចាស់​​​ជំនួយ​​​បរទេស​​​ដែល​​​ជួយ​​​ដល់​​​កម្ពុជា​​​។​​​

លោក ហ៊ុន​​​ សែន​​​ បាន​​​មាន​​​ប្រសាសន៍​​​បន្ទាប់​​​ពី​​​​​​សម័យ​​​ប្រជុំ​​​រដ្ឋសភានោះ​​​​​​ថា “ចាប់​​​តាំងពី​​​ឆ្នាំ​​​១៩៩៣​​​រហូត​​​មក​​​​​​​​​ទល់សព្វ​​​ថ្ងៃ​​​នេះ​​​ ខ្ញុំ​​​គិត​​​ថា ថ្ងៃ​​​នេះ​​​​​​​​​គឺ​​​ជា​​​​​​ថ្ងៃ​​​ល្អ​​​បំផុត​នៅក្នុង​​​​​​ប្រវត្តិ​​​សាស្ត្រ​​​​​នៃ​​​ដំណើរការ​​​​​​លទ្ធិប្រជាធិប​​​តេយ្យ​​​”។

មួយ​​​សប្ដាហ៍​​​ក្រោយ​​​មក ​​​លោក​​​ស្រី​​​ ជូឡុង​​​ សូមូរ៉ា តំណាង​​​រាស្ត្រ​​​​​​គណបក្ស​​​ប្រឆាំង​​​ និង​​​​​​ជា​​​ភរិយា​​​របស់​​​​​​លោក​​​ សម រង្ស៊ី បាន​​​ប្រាប់​​​មន្ត្រី​​​ស្ថានទូត​​​សហរដ្ឋ​​​អាេមរិក​​​នៅក្នុង​​​រាជធានី​​​ភ្នំពេញ​​​ថា លោក​​​នាយក​​​រដ្ឋ​​​មន្ត្រី​​​បាន​​​​​​ផ្ដល់​​​​​​តំណែង​​​ឧបនាយក​​​រដ្ឋ​​​មន្ត្រី​​​ដល់​​​លោក​​​ សម រង្ស៊ី នៅ​​​ក្នុង​​​ការ​​​ចរចា​​​មុន​​​កា​​​រ​​​​​​​​​ធ្វើ​​​មាតុ​​​ភូមិ​​​និវត្តរបស់​​​លោក​​​​​​ នេះ​​​បើ​​​យោង​​​តាម​​​​​​​​​សារ​​​ទូរ​​​លេខ​​​​​​​​​សម្ងាត់​​​​​​​​​​​​របស់​​​ស្ថានទូត​​​​​​សហរដ្ឋ​​​អាមេរិក​​​ ទម្លាយ​​​​​​​​​ដោយ​​​​​​វីគីលីក (WikiLeaks)​​​ ដែល​​​ជា​​​ក្រុម​​​ប្រឆាំង​​​ភាព​​​សម្ងាត់​​​។

សារទូរ​​​លេខ​​​របស់​​​​​​សហរដ្ឋ​​​អាមេរិក​​មាន​​​ខ្លឹម​​​សារ​​​ដូច្នេះ​​​​​​ថា “លោក​​​ស្រី ជូឡុង សូមូរ៉ា បាន​​​ប្រាប់​​​ពួក​​​​​​យើង​​​​​​កាល​​​ពីថ្ងៃ​​​ទី​​​៦ ខែ​​​មីនា ថា នាយក​​​រដ្ឋ​​​មន្ត្រី​​​​​​ ហ៊ុន​​​ សែន​​​ ក្នុង​​​ពេល​​​ថ្មីៗ​​​នេះ​​​​​​បាន​​​សុខ​​​ចិត្ត​​​​​​​​​​​​ទទួល​​​យក​​​លោក​​​ សម រង្ស៊ី​​​ មេដឹក​​​នាំ​​​គណ​​​បក្ស​​ប្រឆាំង​​​​​​ឲ្យ​​​ចូល​​​​​​ក្នុង​​​ជួរ​​​រដ្ឋាភិបាល​​​ក្នុង​​​ឋានៈ​​​ជា​​​ឧប​​​នាយក​​​រដ្ឋមន្ត្រី​​​ ដែល​​​ប្រហែល​​​​​​ជា​​​មាន​​​អំណាច​​​ទូលំទូលាយ​​​ គ្រប់​​​គ្រង​​​លើ​​​ក្រសួង​​​ផ្សេងៗ​​​។

តាម​​​សេចក្ដី​​​រាយការណ៍​​​ថា លោក  សម រង្ស៊ី បាន​​​បដិសេធ​​​​​​​​​ដោយ​​​ប្រាប់​​​នាយក​​​​​​រដ្ឋ​​​មន្ត្រី​​​ថា   ចំណាត់​​​ការ​​​​​​បែប​​​​​​នេះ​​​​​​ គឺ​​​ជា​​​​​​ ‘អត្ត​​​ឃាតនយោ​​​បាយ​​’សម្រាប់​​​មេដឹកនាំ​​​បក្ស​​​ប្រឆាំង”។ នៅ​​​ពេល​​​លោក​​​វិល​​​ត្រឡប់​​​មក​​​កាន់​​​ប្រទេស​​​​​​កម្ពុជា​​​​​​វិញ​​​ លោក​​​ សម​​​ រង្ស៊ី​​​ ក៏​​​បាន​​​ដកខ្លួ​​​ន​​​ចេញ​​​ដែរ​​​ពី​​​ការ​​​ស៊ើប​​​អង្កេត​​​មួយ​​​ធ្វើ​​​ឡើង​​​​​​ដោយ​​​តុលាការ​​​​​​ក្រុង​​​​​​ញូវយ៉ក​​​ដើម្បី​​​ស្វែង​​​រក​​​ការ​​​ពិត​​​ ថា តើ​​​លោក​​​ ហ៊ុន​​​ សែន​​​​​​ មាន​​​ជាប់ពាក់ព័ន្ធ​​​​​​នឹង​​​ហេតុ​​​ការណ៍វាយ​​​ប្រហារ​​​ដោយ​​​គ្រាប់​​​បែក​​​​​​នា​​​ខែ​​​មីនា ឆ្នាំ​​​១៩៩៧ មក​​​លើ​​​អ្នក​​​គាំទ្រ​​​របស់​​​​​​មេដឹក​​​នាំ​​​គណបក្ស​​​ប្រឆាំង​​​​​​​​​​​​រូប​​​នេះ​​​​​​ឬ​​​យ៉ាង​​​ណា​​​។

លោក​​​ ឡុង ឌីម៉ង់ បាន​​​លើក​​​ឡើ​​​ងថា លោក​​​​​​បង្ហោះ​​​លិខិត​​​នេះ​​​​​​ជា​​​រឿង​​​​​​ផ្ទាល់​​​ខ្លួន​​​​​​។​​​ ដោយ​​​សុំ​​​​​​​​​ឲ្យ​​​អ្នក​​​យក​​​ព័ត៌មាន​​​​​​កុំ​​​ចុះ​​​ផ្សាយ​​​អត្ថ​​​បទ​​​​​​ពាក់ព័ន្ធ​​​នឹង​​​​​​​​​លិខិត​​​នេះ​​​​​​​​​ អ្នក​​​នាំពាក្យ​​​រូប​​​នេះ​​​បាន​​​មាន​​​ប្រសាសន៍​​​ថា “ខ្ញុំ​​​គ្រាន់​​​តែ​​​បង្ហោះ​​​អ្វី​​​មួយ​​​​​​ផ្ទាល់​​​ខ្លួន​​​​​​ប៉ុណ្ណោះ​​​ពាក់ព័ន្ធ​​​នឹងព្រឹត្តិការណ៍​​​​​​​​​​​​ថ្ងៃ​​​ទី​​​៣០ ខែ​​​មីនានេះ ប៉ុន្តែ​​​​​​វា​​​ គ្មាន​​​​​​អ្វី​​​​​​ពាក់ព័ន្ធ​​​នឹង​​​​​​មុខ​​​តំណែង​​​របស់​​​​​​ខ្ញុំ​​​ជា​​​អ្នក​​​នាំពាក្យ​​​សាលា​​​រាជ​​​ធានី​​​ភ្នំពេញ​​​ទេ”។

កាល​​​ពីម្សិលមិញ​​​លោក​​​ សម រង្ស៊ី បាន​​​បដិសេធ​​​ថា នៅ​​​ក្នុង​​​លិខិត​​​របស់​​​លោក​​​ ​​​លោក​​​មិន​​​បាន​​​​​​ប្រើពាក្យ​​​ថា “ការ​​​ប្រព្រឹត្ត​​​ខុស​​​​​​” ដើម្បី​​​ពណ៌​​​នា​​​ពី​​​ការ​​​ចោទ​​​ប្រកាន់​​​របស់​​​លោក​​​ថា លោក ហ៊ុន​​​ សែន​​​ ជា​​​អ្នក​​​នៅពីក្រោយ​​​ហេតុ​​​​​​ការណ៍​​​វាយ​​​ប្រហារ​​​ដោយ​​​គ្រាប់​​​បែក​​​នេះ​​​ទេ។

លោក​​​ សម រង្ស៊ី ថ្លែង​​​​​​ថា “នៅ​​​តាម​​​កាសែត​​​​​​ឃោសនា​​​នានា​​​​​​របស់​​​​​​​​​គណ​​​បក្ស​​​ប្រជាជន​​​​​​កម្ពុជា​​​ ពួក​​​គេ​​​និយាយថា ខ្ញុំ​​​ ‘​​​សូម​​​អភ័យ​​​ទោស​​​’។ វា​​​ខុស​​​​​​គ្នា​​​យ៉ាង​​​ខ្លាំង​​​ ខ្ញុំ​​​និយាយ​​​ថា ខ្ញុំ​​​ ‘សោក​​​ស្ដាយ​​​’ ចំពោះ​​​ហេតុ​​​ការណ៍​​​នេះ​​​ វា​​​ជា​​​ភាសា​​​​​​ការ​​​ទូត។​​​ ខ្ញុំ​​​មាន​​​​​​ការ​​​​​​សោក​​​ស្ដាយ​​​ដែល​​​​​​​​​អ្នក​​​ឯង​​​ល្ងង់​​​ ដែល​​​អ្នក​​​​​​ឯង​​​​​​ជា​​​មនុស្ស​​​អាក្រក់​​​ ដែលខ្ញុំ​​​បាន​​​ជួប​​​អ្នក​​​ឯង​​​ ប៉ុន្តែ​​​លិខិត​​​នេះ​​​មិន​​​មែន​​​​​​លើក​​​ឡើង​​​ថា ខ្ញុំ​​​បាន​​​ធ្វើ​​​អ្វី​​​ខុស​​​នោះ​​​ទេ​​​។ ខ្ញុំ​​​នៅ​​​តែ​​​ជឿ​​​ថា ហ៊ុន​​​ សែន​​​​​​ ជា​​​អ្នក​​​នៅ​​​​​​​​​ពីក្រោយ​​​​​​ហេតុ​​​ការណ៍​​​វាយ​​​ប្រហារ​​​ដោយ​​​​​​​​​គ្រាប់​​​បែក​​​នេះ​។​​ ប្រសិន​​​បើ​​​ខ្ញុំ​​​សូមទោស​​​មែន​​​ ខ្ញុំ​​​​​​មិន​​​រក្សា​​​​​​ជំហរ​​​និយាយ​​​បែប​​​នេះ​​​ដដែល​​​​​​នោះ​​​ទេ​​​”។

នៅ​​​ក្នុង​​​របាយការណ៍​​​ចេញ​​​ដោយ​​​​​​ការិយា​​​ល័យ​​​សហព័ន្ធ​​​សើុប​​​អង្កេត​​​ FBI របស់​​​សហរដ្ឋ​​​អា​​​មេរិក​​​ ភ្នាក់ងារ​​​ពិសេស ​​​​​​ថូម៉ាស នី​​​កូឡេ​​​ទី​​​ (Thomas Nicoletti) បាន​​​មាន​​​ប្រសាសន៍​​​ថា លទ្ធផល​​​​​​ “ដ៏សំខាន់” នៃ​​​ការ​​​ស៊ើប​​​អង្កេត​​​​​​របស់​​​​​​លោក​​​​​​​​​លើ​​​​​​ហេតុការណ៍​​​វាយ​​​ប្រហារ​​​​​​ដោយ​​​គ្រាប់​​​បែក​​​​​​ដែល​​​ធ្វើ​​​ឲ្យ​​​ពល​​​រដ្ឋ​​​អាេមរិក​​​ម្នាក់​​​រងរបួស​​​នេះ​​​ បាន​​​​​​​​​គូស​​​បញ្ជាក់​​​​​​ថា រឿង​​​នេះ​​​មាន​​​​​​ការ​​​ពាក់ព័ន្ធ​​​​​​ដោយ​​​ផ្ទាល់​​​​​​ទៅ​​​នឹង​​​សមាជិក​​​​​​​​​អង្គភាព​​​​​​កង​​​អង្គរក្ស​​​ផ្ទាល់ខ្លួន​​​របស់​​​លោក​​​ ហ៊ុន​​​ សែន​​​ ដែល​​​ត្រូវ​​​បាន​​​ដាក់ពង្រាយ​​​នៅ​​​ជុំ​​​វិញ​​​​​​សួន​​​មុខ​​​វត្ត​​​បទុម​​​អំឡុង​​​ពិធី​​​ជួប​​​ជុំ​​​​​​គ្នា​​​នោះ​​​ ប៉ុន្តែ​​​​​​បាន​​​បដិសេធ​​​​​​​​​ថា គ្មាន​​​ការ​​​ពាក់ព័ន្ធ​​​នៅ​​​ក្នុង​​​ការ​​​វាយ​​​ប្រហារ​​​នេះ​​​ទេ​​​។​​​

ឯកសារ​​​របស់​​​ FBI លើក​​​ឡើង​​​​​​ថា សាក​​​្សី​​​​​​បាន​​​​​​រៀប​​​រាប់​​​ថា បុរស​​​បី​​​នាក់​​​​​​បាន​​​គប់​​​គ្រាប់​​​បែក​​​បួន​​​គ្រាប់​​​មក​​​លើ​​​មនុស្ស​​​ប្រហែល​​​២០០​​​នាក់​​​ដែល​​​​​​ចូល​​​រួម​​​​​​​​​នៅ​​​ក្នុង​​​ពិធី​​​​​​ជួប​​​ជុំ​​​នោះ​​​។​​​ កង​​​​​​អង្គរក្ស​​​ជាជួរ​​​ដែល​​​​​​​​​​​​រង់ចាំ​​​នៅ​​​ក្បែរៗ​​​នោះ​​​​​​បាន​​​អនុញ្ញាត​​​ឲ្យ​​​បុរស​​​ទាំង​​​នោះ​​​រត់​​​គេច​​​ខ្លួន​​​ ហើយ​​​បែប​​​ជា​​​រារាំង​​​​​​អ្នក​​​រស់​​​រាន​​​​​​ពី​​​ហេតុ​​​ការណ៍​​​គប់​​​គ្រាប់បែក​​​​​​នេះមិន​​​ឲ្យ​​​​​​ដេញ​​​តាម​​​ជនល្មើស​​​ទាំង​​​នោះ​​​ទៅ​​​វិញ​​​ ហើយ​​​ពេល​​​នោះ​​​​​​គេ​​​ឃើញ​​​​​​ពីរ​​​នាក់​​​ក្នុង​​​ចំណោម​​​​​​ជន​​​ល្មើស​​​ទាំង​​​នោះ​​​​​​រត់​​​ចូល​​​​​​​​​នាយក​​​ដ្ឋាន​​​​​​​​​អង្គរក្ស​​​​​​​​​​​​របស់​​​គណ​​​បក្ស​​​ប្រជា​​​ជន​​​កម្ពុជា​​ដែល​​​នៅ​​​ក្បែរ​​​នោះ​​​​៕ សុខុម

(រាយការណ៍​​​បន្ថែម​​​ដោយ​​​ Alex Willemyns)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស