28 C
Phnom Penh

តុលា​ការ​ផ្តន្ទា​ទោស​​​អតីត​មន្ត្រី​​កងរាជ​អាវុធហត្ថ​ម្នាក់​និង​​កូន​ស្រី​អាយុ​១២​ឆ្នាំ​​​​ពី​បទជួញដូរ​គ្រឿង​​ញៀន​​

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ​ សាលា​ដំបូង​រាជ​ធានី​ភ្នំពេញ​បាន​ផ្ដន្ទាទោស​អតីត​មន្ត្រី​កង​រាជ​អាវុធ​ហត្ថម្នាក់​ឲ្យ​ជាប់​ពន្ធនាគារ​រយៈ​ពេល​ប្រាំពីរ​ឆ្នាំ​ បន្ទាប់ពី​ត្រូវ​បាន​កាត់​ឲ្យ​ជាប់​ទោស​​និង​កូន​ស្រី​អាយុ​១២​ឆ្នាំ​របស់​គា​ត់​​ពី​បទ​ជួញ​ដូរ​ថ្នាំ​មេតំហ្វេតាមីន​ទម្ងន់​៣១​ក្រាម​។

លោក​​ ឆាយ​ ជឹម​ អាយុ​៥០​ឆ្នាំ​ជា​អតីត​មន្ត្រី​កង​រាជអាវុធហត្ថ​លើ​ផ្ទៃ​ប្រទេស​ត្រូវ​បាន​ផ្ដន្ទាទោស​​ដាក់​ពន្ធ​នា​គារ​រយៈ​ពេល  ​ប្រាំ​ពីរ​ឆ្នាំ​​និង​ពិន័យ​ជា​​ប្រាក់១២​លាន​​​ ​រៀល​។​​​ កូន​ស្រី​របស់​គាត់​ត្រូវ​បាន​ព្យួរ​ទោស​រយៈ​ពេល​ពីរឆ្នាំ ហើយ​​បាន​អនុញ្ញាតឲ្យ​​នាង​​វិល​ត្រឡប់​ទៅ​រស់​នៅ​ជាមួយ​ក្រុម​គ្រួសារ​វិញ​។

លោក​ស្រី​ ចាំង​ ស៊ីណាត​ ចៅក្រម​ប្រធាន ​ក្រុម​ប្រឹក្សា​ជំនុំ​ជម្រះ​បាន​មាន​ប្រសា​សន៍​ថា “ តុលាការ​​បាន​រក​ឃើញ​ថា ពួក​គាត់​​ទាំង​ពីរ​នាក់​មាន​ពិរុទ្ធភាព​ពី​បទ​ជួញ​ដូរ​គ្រឿង​ញៀន​ ហើយ​ប្រសិន​បើ​ពួក​គាត់​​​​មិន​ទទួល​យក​ការ​ផ្ដន្ទា​ទោស​នេះ​ពួកគាត់​​​​មាន​សិទ្ធិ​ប្ដឹង​ឧទ្ទរណ៍​ក្នុង​រយៈពេល​៣០​ថ្ងៃ​បន្ទាប់ពី​ការ​ប្រកាស​សាល​ក្រម​”​។យោង​តាម​វរសេនីយ៍​ត្រី ប៊ុន​ ធី អនុ​ប្រធាន​​អង្គភាព​នគរបាលប្រឆាំង​គ្រឿង​ញៀន​រាជ​ធានី​បាន​ឲ្យ​ដឹង​ថា ក្មេង​ស្រី​រូប​នេះ​ត្រូវ​បាន​ចាប់​ខ្លួន​នៅ​ក្បែរ​ផ្ទះ​របស់​នាង​​​ក្នុង​សង្កាត់​ទួល​សង្កែ​ ខណ្ឌ​ប្ញស្សីកែវ កាលពី​ថ្ងៃ​  ទី​១៣ ខែ​កញ្ញា​។

លោក​បាន​ប្រាប់​តុលាការ​ថា “ បន្ទាប់​ពី​ការ​ចាប់ខ្លួន​ក្មេង​ស្រី​រូប​នេះ​ នគរបាល​រឹប​អូស​ បាន​ថ្នាំ​មេតំហ្វេតាមីនពីនាង​​ចំនួន​មួយ​​កញ្ចប់​តូច”។ លោក​វរសេនីយ៍​ត្រី​ ប៊ុន​ ធី ​​​​បាន​​​មាន​ប្រសា​សន៍​ថា “ ផ្អែក​​តាម​ចម្លើយ​សារ​​​ភាព​អំឡុង​ពេល​សាកសួរ​ នគរបាល​បាន​ចាត់​វិធាន​ការ​ ហើយ​ឈានទៅ​ចាប់ខ្លួន​ឪពុក​របស់​ នាង​នៅ​ផ្ទះ​​គាត់​តែ​ម្ដង​ក្នុង​​ថ្ងៃ​តែ​មួយ​”។

លោក​បាន​បន្ថែម​ថា នគរបាល​រឹប​អូស​បាន​ថ្នាំ​មេតំហ្វេតាមីន​ប្រាំបី​កញ្ចប់​ទៀត​ កាំ​ភ្លើង​ខ្លី​កា​៥៩​មួយ​ដើម​ និង​គ្រាប់​ចំនួន​១០​គ្រាប់​ពី​ផ្ទះ​របស់​លោក​ ឆាយ ជឹម។ ក្មេង​ស្រី​រូប​នេះ​ដែល​បាន​ចូល​រួម​ក្នុង​សវនាការ​ជំនុំ​ជម្រះ​កាលពី​ម្សិលមិញ​ត្រូវ​បាន​​​ដោះ​លែង​​ឲ្យ​នៅ​ក្រៅ​ឃុំ​បណ្ដោះ​អាសន្ន​បន្ទាប់​ពី​ត្រូវ​បាន​ចាប់​ខ្លួន​កាល​ពី​ខែ​កញ្ញា​។ ឪពុក​របស់​នាង​ត្រូវ​បាន​ឃុំ​ខ្លួន​បណ្ដោះ​អាសន្ន​នៅ​មុន​បើក​សវនាការ​ជំនុំ​ជម្រះ​។

កាល​ពី​ម្សិលមិញ​ លោក​ ឆាយ ជឹម បាន​បដិសេធ​មិន​ធ្វើ​អត្ថា​ធិប្បាយ​នៅ​ពេល​​​អ្ន​ក​យក​ព័ត៌មាន​​ទាក់​ទង ហើយ​លោក ទូច ឆាយ​ ជា​មេធាវី​របស់​​គាត់​មិន​អាច​ទាក់ទង​បាន​ទេ​។

យោង​តាម​ក្រម​ព្រហ្មទណ្ឌ​ អាយុ​ដែល​អាច​មាន​ទោស​ព្រហ្មទណ្ឌ​បាន​គឺ​១៨​ឆ្នាំ​ ប៉ុន្តែ​តុលាការ​មាន​អំណាច​ក្នុង​ការ​ដាក់​ទោស​ព្រហ្មទណ្ឌ​លើ​អនីតិជន​​ដែល​មាន​អាយុ​១៤​ឆ្នាំ​ឬ​ច្រើន​ជាង​នេះបាន​ ប្រសិន​បើ​​មាន​ស្ថាន​​ទម្ងន់​ទោស​នៃ​បទ​ឧក្រិដ្ឋ​​នោះ​។ ទោះ​យ៉ាងណា​ ច្បាប់​ចែង​ថា “ អនីតិ​ជន​ដែល​ប្រព្រឹត្តបទ​ល្មើស​ត្រូវ​ស្ថិត​ក្រោម​ការ​​គ្រប់​ គ្រង​​ ការ​ការពារ​និង​ការ​ផ្ដល់​ជំនួយ”​ជំនួស​ឲ្យ​ការ​អនុវត្ត​ទោស​ក្នុង​ពន្ធ​នាគារ​៕សារុន

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស