អ្នកភូមិជនជាតិភាគតិចចារ៉ាយនៅក្នុងខេត្តរតនគិរីបានចោទប្រកាន់ម្ចាស់ចម្ការកៅស៊ូជនជាតិវៀតណាមម្តងទៀតពីបទកាប់ឈើដោយខុសច្បាប់នៅក្នុងព្រៃពីដូនតារបស់ខ្លួន នៅក្នុងពាក្យបណ្តឹងមួុយដែលប្តឹងទៅកាន់អង្គការសិទ្ធិមនុស្សក្នុងស្រុកអាដហុក។
តែទោះជាយ៉ាងណា មន្ត្រីថ្នាក់ស្រុកម្នាក់បានឲ្យដឹងថា ម្ចាស់ក្រុមហ៊ុនចម្ការកៅស៊ូ៧២ ត្រូវបានផ្តល់ដីសម្បទានបន្ថែមទៅលើដីសម្បទានទំហំ៦.០០០ហិកតាដែលក្រុមហ៊ុននេះមានស្រាប់ ហេតុដូច្នេះការកាប់ឈើនេះគឺកាប់តែនៅក្នុងដីសម្បទានប៉ុណ្ណោះ។
លោក រម៉ាស់ ស្វាត អ្នកភូមិម្នាក់នៅក្នុងឃុំប៉ក់ញ៉ៃ ស្រុកអូរយ៉ាដាវ បាននិយាយថា គាត់បានប្រទះឃើញកម្មករក្រុមហ៊ុនវៀតណាម កំពុងធ្វើការនៅក្នុងព្រៃកាលពីពីរបីសប្តាហ៍មុន បន្ទាប់ពីការកាប់ឈើខុសច្បាប់ត្រូវបានបញ្ឈប់អស់រយៈពេលមួយឆ្នាំមកហើយក្រោយពេលការប្រឈមមុខដាក់គ្នាមួយ។ គាត់បាននិយាយថា នៅពេលគាត់បានវិលត្រឡប់ទៅកន្លែងនោះម្តងទៀតកាលពីថ្ងៃសៅរ៍ជាមួយអ្នកភូមិចំនួន២៤ផ្សេងទៀត ពួកគាត់បានប្រទះឃើញមនុស្សចំនួន២០នាក់កំពុងកាប់ឈើនៅក្នុងព្រៃដូនតារបស់ពួកគាត់។
គាត់បាននិយាយថា “យើងបានប្រាប់ឲ្យកម្មករទាំងនោះឈប់កាប់ឈើនៅក្នុងព្រៃនេះ។ ប៉ុន្តែពួកគេមិនស្តាប់នោះទេ។យើងបានរឹបអូសរណារអារឈើពីកម្មករម្នាក់ក្នុងចំណោមកម្មករទាំងនោះ។ពួកគេបានមកសុំយករណារអារឈើនេះទៅវិញ ប៉ុន្តែយើងមិនព្រមប្រគល់ឲ្យពួកគេវិញឡើយ”។
អ្នកភូមិជនជាតិភាគតិចចារ៉ាយរូបនេះបានចោទប្រកាន់ក្រុមហ៊ុនចម្ការកៅស៊ូ៧២ពីបទសង់រោងអារឈើដ៏ធំមួយដោយមានរណារអារឈើធំៗចំនួនប្រាំនៅខាងក្នុងកាលពីដើមខែនេះ ហើយបានលើកឡើងថា កម្មករនៅទីនោះបានព្យាយាមឆក់យកកាមេរ៉ាពីអ្នកភូមិ នៅពេលពួកគាត់ចុះទៅត្រួតពិនិត្យសកម្មភាពរបស់កម្មករទាំងនេះកាលពីថ្ងៃសុក្រ។
លោកបាននិយាយថា “កម្មករបានព្យាយាមរឹបអូសយកកាមេរ៉ារបស់យើង នៅពេលយើងថតពួកគេកំពុងកាប់ឈើ ប៉ុន្តែយើងមិនអនុញ្ញាតឲ្យពួកគេយកកាមេរ៉ារបស់យើងនោះទេ”។ តំណាងក្រុមហ៊ុនមិនអាចទាក់ទងសុំការធ្វើអត្ថាធិប្បាយបានឡើយ។
តែទោះជាយ៉ាងណា លោក ដក ស អភិបាលស្រុកអូរយ៉ាដាវ បានមានប្រសាសន៍ថា ការកាប់ឈើនិងការសង់រោងអារឈើគឺសុទ្ធតែស្របច្បាប់ ដោយសារតែក្រុមហ៊ុនចម្ការកៅស៊ូនេះទទួលបានដីសម្បទានបន្ថែមទំហំ ១.០០០ហិកតា កាលពីដើមឆ្នាំនេះ។
លោកបានបន្ថែមទៀតថា “ខ្ញុំគិតថា ក្រុមហ៊ុនមិនបានធ្វើអ្វីខុសទេ ព្រោះក្រុមហ៊ុនកាប់ឈើតែនៅក្នុងដីសម្បទានដែលរដ្ឋាភិបាលបានផ្តល់ឲ្យប៉ុណ្ណោះ ប៉ុន្តែអ្នកភូមិមិនដឹង ហើយពួកគាត់ប្រឆាំងនឹងគម្រោងនេះ។ យើងគ្មានផែនការបញ្ឈប់ការកាប់ឈើនេះទេ”។
លោក ដក ស បានលើកឡើងថា គាត់មិនដឹងថា តើដីសម្បទានបន្ថែមនេះត្រូវបានផ្តល់នៅពេលណាឲ្យពិតប្រាកដនោះទេ ហើយក៏បានបដិសេធមិននិយាយថា តើស្ថាប័នណាមួយរបស់រដ្ឋាភិបាលឲ្យពិតប្រាកដដែលយល់ព្រមចុះហត្ថលេខាផ្តល់ដីសម្បទាននេះដែរ។
នៅពេលមានការរិះគន់កើនឡើងអំពីការបណ្តេញចេញដោយបង្ខំដែលបង្កឡើងដោយក្រុមហ៊ុនធំៗដែលទទួលបានដីសម្បទាន លោកនាយករដ្ឋមន្ត្រី ហ៊ុន សែន បានចេញបទបញ្ជាឲ្យផ្អាកការផ្តល់ដីសម្បទានបន្ថែមកាលពីពាក់កណ្តាលឆ្នាំ២០១២។
លោក ឆាយ ធី អ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តរតនគិរីបានមានប្រសាសន៍ថា ការផ្តល់ដីសម្បទានបន្ថែមទំហំ១.០០០ហិកតាទៅឲ្យក្រុមហ៊ុនចម្ការកៅស៊ូ៧២គួរតែត្រូវបានចាត់ទុកថា ជាការរំលោភលើបទបញ្ជារបស់លោកនាយករដ្ឋមន្ត្រី ហ៊ុន សែន។ លោកបានមានប្រសាសន៍ថា ការអនុវត្តរបស់រដ្ឋាភិបាល គឺផ្ទុយទៅនឹងគោលនយោបាយចាស់ ហេតុដូច្នេះវារំលោភច្បាប់៕ ស៊ុយឈាង