មន្ត្រីខណ្ឌមួយរូបបានឲ្យដឹងថា កម្មករជាង២០នាក់នៅខណ្ឌពោធិ៍សែនជ័យ រាជធានីភ្នំពេញ កំពុងតែរឹបអូសម៉ាស៊ីនដេររបស់រោងចក្រតូចមួយដើម្បីប៉ះប៉ូវជាមួយប្រាក់ឈ្នួលដែលរោងចក្រនេះមិនបានបើកឲ្យខ្លួន។
លោក ខឹម ស៊ុនសូដា អភិបាលរងខណ្ឌពោធិ៍សែនជ័យបានឲ្យដឹងថា កម្មករបានសម្រេចផ្អាកសកម្មភាពកាត់ដេរនៅរោងចក្រ S-One របស់ជនជាតិកូរ៉េក្នុងសង្កាត់ចោមចៅ កាលពីថ្ងៃអាទិត្យ បន្ទាប់ពីរោងចក្រនេះមិនបានបើកប្រាក់ឈ្នួលទាន់ពេលវេលា។
ក្នុងកិច្ចប្រឹងប្រែងដើម្បីដោះស្រាយសា្ថនភាពនេះ ម្ចាស់រោងចក្រឈ្មោះ យ្យុន យ៉ុងជីក (Byun Yong Jig) បានយល់ព្រមបើកប្រាក់ឈ្នួលពាក់ កណ្តាលសម្រាប់ខែមុននៅថ្ងៃទី១០ខែមេសា និងពាក់កណ្តាលទៀតនៅខែក្រោយ។
ក៏ប៉ុន្តែកម្មករជាច្រើនបានចេញពីរោងចក្រនេះទៅស្វែង រកការធ្វើនៅកន្លែងផ្សេងដោយមិនរង់ចាំបើកប្រាក់ឈ្នួលពីលោក យ៉ុង ជីក ឡើយ។ គួរបញ្ជាក់ថា លោក សូដា បានមានប្រសាសន៍បន្ថែមទៀតថា ថៅកែរោងចក្រជនជាតិកូរ៉េរូបនេះល្បីថា ចូលចិត្តលេងល្បែង។
លោក ស៊ុនសូដា បានមានប្រសាសន៍ថា “ពេលនេះ កម្មករភាគច្រើនក្នុងចំណោមកម្មករទាំងអស់ចំនួន៧៥នាក់បានផ្លាស់ទៅធ្វើការនៅរោងចក្រផ្សេង ពីព្រោះពួកគេមិនអាចចាំទទួលប្រាក់ខែឡើយ។ យើងមិនច្បាស់ទេថា លោក ជីក នឹងបើកប្រាក់ខែឲ្យពួកគេ និងធ្វើតាមការសន្យានោះទេ ពីព្រោះគាត់គ្មានសូម្បីតែលិខិតឆ្លងដែន”៕ ប៊ុននី