32.1 C
Phnom Penh

 ​​កម្ពុជា​ប្រឈម​នឹងការ​រង​ផល​ប៉ះ​ពាល់​ខ្លាំង​ពី​បញ្ហា​ប្រែ​ប្រួល​អាកាស​ធាតុ​

ដោយ ឌឹ ខេមបូឌា ដេលី

បទវិភាគ

យោង​តាម​របាយ​ការណ៍​ថ្មី​ដែល​អង្គ​ការ​សហ​ប្រជា​ជាតិ​ (UN) បាន​ចេញ​ផ្សាយ​កាល​ពី​ម្សិលមិញ​បាន​បង្ហាញ​ថា ប្រទេស​កំពុង​អភិ​វឌ្ឍន៍​ដែល​មាន​កម្រិត​ប្រាក់​ចំណូល​ទាប​ ដូច​ជា ប្រទេស​កម្ពុជា​ ជា​ដើម​ នឹង​រង​ផល​ប៉ះ​ពាល់​​ដោយ​សារ​​​តែបញ្ហា​ប្រែ​ប្រួល​អាកាស​ធាតុ​នៅ​ទូទាំងសា​កល​លោក​ បូក​រួម​ទាំង​អសន្តិ​សុខ​ស្បៀង​ និង​ទិន្នផល​កសិកម្ម​ទាប​ផង​ដែរ​។

របាយការណ៍​របស់​គណៈ​កម្មការ​អន្តរ​រដ្ឋា​ភិបាល​ទទួល​បន្ទុក​ក្រុម​ការងារ​ផ្នែក​ប្រែ​ប្រួល​​អាកាស​ធាតុ​ នៃ​អង្គការ​សហ​ប្រជា​ជាតិ​ បាន​បូក​សរុប​លទ្ធផល​សិក្សា​ស្រាវ​ជ្រាវ​របស់​អ្នក​វិទ្យាសាស្ត្រ​ជាង​៣០០នាក់​មក​ពី​៧០​ប្រទេស​។ ពួកគេ​បាន​ព្យាករផល​ប៉ះ​ពាល់​ធ្ងន់​ធ្ងរ​នៅ​ទូ​ទាំង​​សាកល​លោក​​ ដោយ​សារ​តែ​សីតុណ្ហ​ភាព​​ និង​កម្ពស់​ទឹក​មហា​សមុទ្រ​កើន​ឡើង​។

របាយការណ៍​នេះ​បាន​បង្ហាញ​បទ​វិភាគ​កម្រិត​តំបន់​យ៉ាង​ស៊ី​ជម្រៅ​អំពី​តំបន់​អាស៊ី​អាគ្នេយ៍​ និង​ជា​ពិសេស​ប្រទេស​កម្ពុជា​ ដែល​ងា​យ​រង​ផល​ប៉ះ​ពាល់​ខ្លាំង​ដោយ​សារ​ការ​ប្រែ​ប្រួល​អាកាស​ធាតុ​ ពី​ព្រោះប្រជា​ជន​ពឹង​ផ្អែក​ខ្លាំង​ពេក​លើ​ការ​នេសាទ​ត្រី​ និង​ការ​ធ្វើ​ស្រែ​ ដើម្បី​ផ្គត់​ផ្គង់​ជីវភាព​រស់​នៅ​។

របាយការណ៍​ដដែល​នេះមាន​ខ្លឹម​សារ​ថា “លទ្ធផល​​វាយ​តម្លៃ​ផលប៉ះ​ពាល់​ឥទ្ធិពល​នៃ​ការ​​ប្រែ​ប្រួល​អាកាស​ធាតុ​រួម​ទាំង​ចំណែក​ដ៏​ធំ​នៃ​វិស័យ​ជល​ផល​ដែលជា​ប្រភព​ប្រាក់​ចំណូល​​មួយ​ បង្ហាញ​ថា សេដ្ឋកិច្ច​​កម្ពុជា​ស្ថិត​ក្នុង​ចំណោម​​​ ​សេដ្ឋកិច្ច​ដែល​ងាយ​រង​ផល​ប៉ះពាល់​ខ្លាំង​បំផុត​ ដោយ​សារ​ការ​ប្រែ​ប្រួល​អាកាស​ធាតុ​”។

ក្នុង​រយៈពេល​៣០​ទៅ​៥០ឆ្នាំ​កន្លង​មក​នេះ ការ​​ប្រែ​ប្រួល​អាកាស​ធាតុ​បាន​បណ្តាល​ឲ្យ​សី​តុណ្ហភាព​កើនឡើង​ ជា​ហេតុ​បណ្តាល​ឲ្យ​​ទឹក​ជំនន់​ក្នុង​រដូវ​វស្សា​កើន​ឡើង​ ហើយ​រដូវ​ប្រាំ​ងកាន​តែរាំង​ស្ងួត​នៅ​តំបន់​មេគង្គ​ក្រោម​។

របាយការណ៍​របស់​អង្គការ​សហ​ប្រជា​ជាតិ​​មាន​ខ្លឹម​សារ​បន្ត​ទៀត​ថា “ទិន្ន​ផល​កសិកម្ម​បាន​នាំ​ផល​ប៉ះ​ពាល់​គួរ​ឲ្យកត់​សម្គាល់​ដោយ​សារ​បញ្ហា​ទឹក​ជំនន់ និង​ភាព​រាំង​ស្ងួត​ ​ជា​ហេតុ​​នាំ​ឲ្យ​​ប្រទេស​កម្ពុជា​បាត់​បង់​បរិមាណ​ស្រូវ​អស់​ជិត​៩០ភាគ​រយ​ អំឡុង​រយៈពេល​ពី​ឆ្នាំ​១៩៩៦​ដល់ឆ្នាំ​២០០០។ ប្រទេស​វៀតណាម និង​ប្រទេស​កម្ពុជា​គឺ​ជា​ប្រទេស​ពីរ​ដែល​ងាយ​រង​ផល​ប៉ះ​ពាល់​ខ្លាំង​បំផុត​ដោយ​សារ​បញ្ហា​ប្រែ​ប្រួល​អាកាស​ធាតុ​ទៅ​លើ​វិស័យ​ជល​ផល​”។

កាល​ពី​ខែ​វិច្ឆិកាឆ្នាំ​មុន ​រដ្ឋាភិបាល​បាន​ដាក់​ចេញ​នូវ​ផែនការយុទ្ធសាស្ត្រ​កាត់់​បន្ថយ​ការ​ប្រែប្រួល​អាកាស​ធាតុ​នៅក្នុង​កម្ពុជា​រយៈ​ពេល​១០​ឆ្នាំ ដែល​ជា​ផែនការ​លម្អិត​សម្រាប់​ដោះ​ស្រាយ​គ្រោះ​មហន្តរាយ​ធម្ម​ជាតិ​បង្ក​ឡើង​ដោយ​អាកាស​ធាតុ​។

យោង​តាម​ក្រសួង​បរិស្ថាន​បាន​ឲ្យ​ដឹង​ថា មូល​និធិ​ប្រហែល​២៥០​លាន​ដុល្លារ​ ភាគ​ច្រើន​ទទួល​បាន​ពី​ម្ចាស់​ជំនួយ​ក្រៅ​ប្រទេស​ ក្នុង​រយៈពេល​បី​ទៅ​បួន​ឆ្នាំ​កន្លង​មក​នេះ​ សម្រាប់​គាំទ្រ​គម្រោង​នានា​ដែល​ត្រូវ​បាន​បង្កើត​ឡើង​ដោយ​អង្គការ​ជា​ច្រើន​ដែល​ធ្វើ​ការ​លើ​ផ្នែក​កាត់​បន្ថយ​ផល​ប៉ះ​ពាល់​ដោយ​សារ​បញ្ហា​ប្រែ​ប្រួល​អាកាស​ធាតុ​។

​លោក​ យ៉ែត សុជាតិស៊ូ លេខា​បណ្តាញ​ប្រែ​ប្រួល​អាកាស​ធាតុ​កម្ពុជា​ (Cambodia Climate Change Network) ដែល​ជា​សម្ព័ន្ធ​​អង្គការ​អភិរក្ស​ បាន​សម្តែង​ការ​ព្រួយ​បារម្ភ​ថា មិន​មាន​ការ​ងារ​ធ្វើ​គ្រប់​គ្រាន់​នា​ពេល​បច្ចុប្បន្ន​ ក្នុង​គោល​បំណង​រៀប​ចំ​សហ​គមន៍​កសិដ្ឋាន​ និង​សហគមន៍ នេសាទ​។

លោកថ្លែង​​​​ថា “ មាន​តែ​ យុទ្ធសាស្ត្រ​មិន​អាច​ជួយ​បាន​ច្រើន​ឡើយ​។ ប្រសិន​បើ​មាន​អន្តរា​គមន៍​ផ្នែក​គោល​នយោ​បាយ​ នឹង​ត្រូវ​មានការ​យក​ចិត្ត​ទុក​ដាក់​ទៅ​លើ​អាទិភាព​សហ​គមន៍​ ដែល​ដឹង​ច្បាស់​អំពី​ស្ថាន​ភាព​ជាក់​ស្តែង​នៅ​តាម​មូល​ដ្ឋាន​ដែល​មាន​កម្រិត​ប្រែ​ប្រួល​អាកាស​ធាតុ​ខុសៗគ្នា​ ទៅ​តាម​​​តំបន់​ ហើយ​ចាំ​បាច់​ត្រូវ​មាន​អន្ត​រាគមន៍​ដើម្បី​ទទួល​បាន​ជោគ​ជ័យ​ច្រើន​ជាង​មុន​ ដូច​ជា​នៅ​​​តំបន់​ទន្លេ​សាប​ជា​ដើម​”។

លោក ទិន ពន្លក​ ប្រធាន​ការិយាល័យ​ប្រែ​ប្រួល​អាកាស​ធាតុ​នៃ​ក្រសួង​បរិស្ថាន​បាន​ឲ្យ​ដឹង​ថា ប្រទេស​កម្ពុជា​បាន​ត្រៀម​ខ្លួន​យ៉ាង​ច្រើន​សម្រាប់​ដោះ​ស្រាយ​បញ្ហា​នេះ​។ លោក​បាន​មាន​ប្រសាសន៍​ថា “ទាក់​ទង​ទៅ​នឹង​ការ​សម្រប​សម្រួល​ជាមួយ​អង្គការ​នានា​ដែល​ធ្វើការ​ងារ​ផ្នែក​ប្រែ​ប្រួល​អាកាស​ធាតុ​ និង​ការ​សហ​ការ​ជាមួយ​គម្រោង​សិក្សា​​ស្រាវ​ជ្រាវ​ផ្សេង​ៗ​ យើង​បាន​គាំទ្រ​ឲ្យ​មាន​ការ​​ដាក់​បញ្ចូល​បញ្ហា​ប្រែ​ប្រួល​អាកាស​ធាតុ​ទៅ​ក្នុង​គោល​នយោបាយ​របស់​រដ្ឋាភិបាល​ ក៏​ប៉ុន្តែ នៅ​តែ​មាន​ចំណុច​ត្រូវ​កែ​លម្អ​”៕ សុធា​

(រាយការណ៍​បន្ថែម​ដោយ ហ៊ុល រស្មី​)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស