លោក ស ខេង រដ្ឋមន្ត្រីក្រសួងមហាផ្ទៃ និងលោក សម រង្ស៊ី ប្រធានគណបក្សប្រឆាំងបាននិយា យកាលពីម្សិ លមិញថា កំពុងមានការត្រៀមសម្រាប់កិច្ចប្រជុំរវាងលោក សម រង្ស៊ី និងលោកនាយករដ្ឋមន្ត្រី ហ៊ុន សែន ដើម្បីពិភាក្សាអំពីភាពទាល់ច្រកផ្នែកនយោបាយនៅក្នុងប្រទេសកម្ពុជា។
ក្រោយពីសម័យប្រជុំសភាលើកទី២ ចាប់តាំងពីរដ្ឋាភិបាលរបស់គណបក្សប្រជាជនកម្ពុជាត្រូវបានបង្កើតឡើងនៅក្នុងខែកញ្ញាមក លោក ស ខេង បានឆ្លើយតបយ៉ាងច្បាស់នៅពេលសួរអំពីសេចក្ដីរាយការណ៍អំពីលទ្ធភាពនៃកិច្ចប្រជុំបែបនេះ។ លោក ស ខេង មានប្រសាសន៍ដោយមិន បញ្ជាក់លម្អិតថា “យើងកំពុងត្រៀម យើងកំពុងត្រៀម”។
នៅពេលសួរតាមទូរស័ព្ទអំពីការលើកឡើងរបស់លោក ស ខេង លោក សម រង្ស៊ី បានមានប្រសាសន៍ថា តំណាងគណបក្សទាំងពីរកំពុងពិភាក្សាគ្នាដើម្បីបង្កើតរបៀបវារៈសម្រាប់កិច្ចប្រជុំរវាងមេដឹកនាំជាន់ខ្ពស់របស់គណបក្សទាំងពីរ។
លោក សម រង្ស៊ី មានប្រសាសន៍ថា “ឥឡូវនេះ មានទំនាក់ទំនងគ្នានៅថ្នាក់ក្រោម។ ពួកគេកំពុងត្រៀមសម្រាប់កិច្ចប្រជុំរវាងមេដឹកនាំជាន់ខ្ពស់”។ លោកបន្ថែមថា “ពួកគេកំពុងផ្លាស់ប្ដូរព័ត៌មាន និងកំពុងសម្របសម្រួលរកដំណោះស្រាយរួម។ ខ្ញុំមិនអាចនិយាយច្រើនជាងនេះបានទេ ប៉ុន្តែខាងភាគីយើងមានលោក សុន ឆ័យ ដែលកំពុងចរចាជាមួយមន្ត្រីរដ្ឋាភិបាលម្នាក់”។
លោក សុន ឆ័យ ដែលជាប្រធានក្រុមតំណាងរាស្ត្រគណបក្សសង្គ្រោះជាតិ បានមានប្រសាសន៍ថា ការពិភាក្សាអំពីកិច្ចប្រជុំថ្នាក់លើបែបនេះកំពុងស្ថិតនៅក្នុងដំណាក់កាលដំបូងនៅឡើយ។ លោក សុន ឆ័យ បានមានប្រសាសន៍ថា “មានការទាក់ទងគ្នារវាងរូបខ្ញុំ និងលោក ព្រំុ សុខា រដ្ឋលេខាធិការក្រសួងមហាផ្ទៃ មកពីគណបក្សប្រជាជនកម្ពុជា”។
តំណាងរាស្ត្រជាប់ឆ្នោតគណបក្សប្រឆាំងរូបនេះបានមានប្រសាសន៍ថា “ឥឡូវនេះយើងត្រូវបានតែងតាំងឲ្យរកដំណោះស្រាយចំពោះវិបត្តិនេះ។ ប៉ុន្តែយើងមិនទាន់មានព័ត៌មានលម្អិតទៀតទេ។ យើងមិនទាន់បានជួបពិភាក្សាគ្នាអំពីអ្វីដែលយើងអាចនាំយកទៅដាក់ជូនថ្នាក់ដឹកនាំគណបក្សវិញទេ”។
លោក សុន ឆ័យ បដិសេធមិនមានប្រសាសន៍បន្ថែមទៀតទេ ព្រោះលោកកំពុងចូលរួមពិធីមង្គលការ។ លោក ព្រំុ សុខា ដែលបានមានប្រសាសន៍ថា លោកកំពុងចូលរួមមង្គលការដែរនោះបានបដិសេធមិនធ្វើអត្ថាធិប្បាយអំពីបញ្ហានេះទេ។
លោក ព្រុំ សុខា និងលោក សុន ឆ័យ បាន ដឹកនាំមន្ត្រីគណបក្សរៀងខ្លួននៅក្នុងការពិភាក្សាកាលពីចុងខែកុម្ភៈ ដែលបាននាំឲ្យមានការបង្កើតគណៈកម្មការកំណែទម្រង់ការបោះឆ្នោត។ កាលពីសប្ដាហ៍មុន គណបក្សសង្គ្រោះជាតិបានផ្អាកគណៈកម្មការនេះបន្ទាប់ពីគណបក្សប្រជាជនមិនព្រមពិចារណា សំណើសុំផ្ដល់សិទ្ធិឲ្យគណបក្សប្រឆាំងចូលរួមក្នុងការតែងតាំងសមាជិកគណៈកម្មាធិការជាតិរៀបចំការបោះឆ្នោត។
ក្រោយមក លោក សម រង្ស៊ី បានទាមទារឲ្យមានកិច្ចប្រជុំជាមួយលោក ហ៊ុន សែន។ នៅខាងក្រៅសម័យប្រជុំសភាកាលពីម្សិលមិញ លោក ហ៊ុន សែន បានជំទាស់នៅពេលសួរពីលទ្ធភាពនៃជំនួបថ្នាក់កំពូលនេះ។
លោកនាយករដ្ឋមន្ត្រីមានប្រសាសន៍ថា “យើងបានប្ដេជ្ញាថា យើងនឹងនៅតែដើរទៅ មុខ ប៉ុន្តែភាគីម្ខាងទៀតម្ដងដើរទៅមុខម្ដង ដើរថយក្រោយ។ ដូច្នេះ អ្នកដែលអស់លោកត្រូវសួរគឺមនុស្សផ្សេង មិនមែនខ្ញុំទេ”៕គឹមហឿន