ការបើកសវនាការជាលើកទី៤ទាក់ទិននឹងការដោះលែងឲ្យនៅក្រៅឃុំត្រូវបានធ្វើឡើងសម្រាប់លោក វន់ ពៅ មេដឹកនាំសហជីពកំពុងជាប់ឃុំ មុនការបើកសវនាការជំនុំជម្រះរឿងក្តីរបស់លោកនៅក្នុងខែនេះជាមួយអ្នកផ្សេងចំនួន២២នាក់ទៀតដែលជាប់ទាក់ទិននៅក្នុងការធ្វើកូដកម្មរបស់កម្មកររោងចក្រកាត់ដេរ កាលពីខែមករា ក្នុងរាជធានីភ្នំពេញ។
ដោយធ្លាប់ត្រូវបានបដិសេធមិនដោះលែងឲ្យនៅក្រៅឃុំដោយសាលារាជធានីភ្នំពេញ កាលពីថ្ងៃទី២១ ខែមករា និងដោយសាលាឧទ្ធរណ៍កាលពីថ្ងៃទី១១ ខែកុម្ភៈ និងថ្ងៃទី ២៥ ខែមីនា ប្រធានសមាគមប្រជាធិបេតយ្យឯករាជ្យនៃសេដ្ឋកិច្ចក្រៅប្រព័ន្ធ ដែលកំពុងមានជំងឺរូបនេះ នឹងត្រូវសាលាដំបូងបើកសវនាការម្តងទៀតនៅក្នុងថ្ងៃសុក្រនេះទាក់ទិននឹងសំណើរបស់លោកដែលស្នើសុំឲ្យមានការដោះលែងនៅក្រៅឃុំ មុនពេលត្រូវបើកសវនាការជំនុំជម្រះក្តីរបស់លោកនឹងត្រូវធ្វើឡើងនៅថ្ងៃទី៨ ខែមេសា។
ចៅក្រម កែវ មុន្នី បានថ្លែងថា “យើងនឹងបើកសវនាការទាក់ទិននឹងការសុំឲ្យមានការដោះលែងនៅក្រៅឃុំសម្រាប់វន់ ពៅ និង សុគន្ធ សម្បត្តិពិសិដ្ឋ នៅថ្ងៃទី៤ ខែមេសា ហើយយើងបានផ្តល់ព័ត៌មានដល់មណ្ឌលអប់រំកែប្រែទី៣នៅក្នុងខេត្តកំពង់ចាមរួចហើយ”។ លោក សម្បត្តិពិសិដ្ឋ គឺជាសមាជិកនៅមជ្ឈមណ្ឌលសម្រាប់សិទ្ធិការងារកម្ពុជា។
លោក វា៉ សក្តា ព្រះរាជអាជ្ញារងអមសាលាដំបូងរាជធានីភ្នំពេញបានបញ្ជាក់ថា ការបើកសវនាការជំនុំជម្រះរឿងក្តីនឹងត្រូវធ្វើ្ឡើងនៅថ្ងៃទី១៨ ខែមេសា។
បុរសទាំងពីរត្រូវបានចាប់ខ្លួននិងវាយដំអំឡុងការបង្ក្រាបដ៏ហិង្សារបស់រដ្ឋាភិបាលលើកូដកម្មរោងចក្រកាត់ដេរ។ ពួកគេទាំងពីរកំពុងតែមានបញ្ហាសុខភាព ជាហេតុដែលមេធាវីរបស់ពួកគេបានលើកឡើងថា តុលាការគួរតែដោះលែងពួកគេ ព្រោះលោក វន់ ពៅ មានបញ្ហាតម្រងនោម រីឯលោក សម្បតិ្តពិសិដ្ឋ វិញបានបាក់ដៃម្ខាង។
លោក មុត ពិសិដ្ឋ មេធាវីរបស់លោក សម្បតិ្តពិសិដ្ឋ បានមានប្រសាសន៍ថា “យើងស្នើសុំឲ្យមានការដោះលែងនៅក្រៅឃុំសម្រាប់លោក ពិសិដ្ឋ ព្រោះគាត់បានបាក់ដៃម្ខាង ហើយចាំបាច់ត្រូវតែទៅព្យាបាល។ ប្រសិនបើគាត់មិនត្រូវបានព្យាបាលក្នុងរយៈពេលប្រាំខែទេនោះ គាត់នឹងមិនអាចជាសះស្បើយបានឡើយ”។
លោក គឹម សុជាតិ មេធាវីរបស់លោក វន់ ពៅ បានលើកឡើងថា គ្មានភ័ស្តុតាងគ្រប់គ្រាន់ដែលអាចជួយឲ្យមានការដោះលែងសម្រាប់កូនក្តីរបស់លោក ព្រោះបទចោទដែលដាក់បន្ទុកមកលើគាត់ត្រូវបានបន្ធូរបន្ថយពីបទ “ប្រើអំពើហិង្សានិងបង្កការខូចខាត” ទៅជាបទ “រំខានដល់ចរាចរណ៍សាធារណៈ” និងពីបទញុះញង់ ទៅជាបទប្រព្រឹត្តបទល្មើស” វិញ។
លោកបានមានប្រសាសន៍ថា “ចាប់តាំងពីតុលាការបានកែប្រែបទចោទរបស់ខ្លួនមក យើងមានសង្ឃឹមថា វានឹងមានភាពងាយស្រួលក្នុងការសុំឲ្យមានការដោះលែងគាត់នៅក្រៅឃុំ ព្រោះគាត់លែងជាប់ពាក់ព័ន្ធនៅក្នុងបទល្មើសធ្ងន់ធ្ងរទៀតហើយ”។
ការបើកសវនាការជំនុំជម្រះរឿងក្តីរបស់ជនសង្ស័យចំនួន២៣នាក់ដាច់ដោយឡែកចំនួនបី នឹងត្រូវធ្វើឡើងនៅថ្ងៃទី១៨ ខែមេសា។ ក្នុងចំណោមជនសង្ស័យទាំង២៣នាក់នេះ មានតែពីរនាក់ប៉ុណ្ណោះត្រូវបានដោះលែងឲ្យនៅក្រៅឃុំ លោក វន់ ពៅ មិនត្រូវបានដឹកទៅកាន់កន្លែងបើកសវនាការចុងក្រោយ ទាក់ទិននឹងការដោះលែងឲ្យនៅក្រៅឃុំនោះទេ ព្រោះប្រធានពន្ធនាគារបានលើកឡើងថា “រថយន្តរបស់គាត់មានបញ្ហា” ៕ស៊ុយឈាង