33 C
Phnom Penh

សហ​ជីព​កម្ម​ករ​​និង​រោងចក្រ​មាន​ការ​ខ្វែង​គំនិត​គ្នា​ជុំ​វិញ​ការ​​ធ្វើ​កូដ​កម្ម​នៅ​ថ្ងៃបុណ្យ​ចូល​ឆ្នាំ​ខ្មែរ

ដោយ ឌឹ ខេមបូឌា ដេលី

បទវិភាគ

សហ​ជីព​កម្មករ​រោង​ចក្រ​កាត់​ដេរ​បាន​ខ្វែង​គំនិត​​គ្នា​ជាមួយ​ថៅកែ​រោង​ចក្រ​អំពី​​​គម្រោង​របស់​សហជីព​ក្នុង​ការ​ប្រើ​ប្រាស់​​​ថ្ងៃ​ឈប់​សម្រាក​បុណ្យ​ចូល​ឆ្នាំ​ខែ្មរ​នៅ​​ពេល​ខាងមុខ​ដើម្បី​ធ្វើ​កូដកម្ម​ទូ​ទាំង​ប្រទេស​។

នៅ​ថ្ងៃនេះ​សម្ព័ន្ធ​សហ​ជីព​ចំនួន​ប្រាំបី​នឹង​ផ្ញើ​លិខិតទៅ​សមាគម​រោង​ចក្រ​កាត់​ដេរ​នៅ​កម្ពុជា​ដោយ​លើក​ឡើង​ថា កម្មករ​នឹ​ងប្រើ​ប្រាស់​ថ្ងៃ​ឈប់​សម្រាក​ប្រចាំ​ឆ្នាំ​របស់ខ្លួន​ដើម្បី​បន្ត​ឈប់​ហួស​ពី​ថ្ងៃឈប់​សម្រាក​រយៈ​​​ពេល​បីថ្ងៃ​ដែល​ចាប់ផ្តើម​នៅ​ថ្ងៃ​ទី​១៤ខែ​មេសា​រហូត​ដល់​ថ្ងៃទី​២២ ខែ​មេសា។

លិខិត​នេះ​មាន​ខ្លឹម​សារ​ថា “ដោយ​សារ​មាន​សំណើពី​សហជីព​និង​សមាជិក​សហ​ជីព​​​នៅ​តាម​រោង​ចក្រ​នានា​​នោះ​​​ពួកគេ​នឹង​ប្រើ​ប្រាស់​សិទ្ធិរបស់ខ្លួន​ក្នុង​ការ​បន្ត​​​ឈប់​សម្រាក​​ក្រោយ​បុណ្យ​ចូលឆ្នាំ​ខ្មែរ​​ចាប់ពី​ថ្ងៃទី​១៧ ដល់ថ្ងៃទី​២២ ខែមេសា​តាម​មាត្រា​​១៧០នៃ​ច្បាប់ការ​ងារ​”។

លិខិត​នេះ​បន្ត​ថា “ជាមួយ​​ថ្ងៃ​ឈប់​សម្រាក​​​ នេះ​​ យើង​ស្នើ​ឲ្យ​ [​សមាគម] ជួយ​ដោះ​ស្រាយ​​​ ​បញ្ហា​មួយ​ចំនួន​ឲ្យបាន​ឆាប់​​តាម​ដែល​អាចធ្វើ​ទៅបាន​ដើម្បី​ធានា​ថាអ្នក​បញ្ជា​ទិញ​មាន​ទំនុក​ចិត្ត​បន្ត​ការ​ងារ​​ជាមួយ​រោង​ចក្រ​កាត់​ដេរ​ និង​រោងចក្រ​ស្បែក​ជើង​នៅ​ប្រទេសកម្ពុជា​ទៀត​​​​ និង​ធ្វើ​ឲ្យ​​វិស័យ​នេះ​មាន​និរន្តរភាព”។

មាត្រា​១៧០នៃច្បាប់ការ​ងារ​ចែង​ថា និយោ​​​​ ជិត​ទាំង​អស់​មាន​សិទ្ធ​ិ​ឈប់​សម្រាក​ប្រចាំឆ្នាំ​ចំនួន​១៨ថ្ងៃ​ដោយ​មាន​ប្រាក់​ឈ្នួល​ ប៉ុន្តែ បន្ទាប់ពី​ធ្វើ​ការ​បាន​រយៈពេល​មួយ​ឆ្នាំ​ ហើយ​ត្រូវ​ជូន​ដំណឹង​​ត្រឹម​ត្រូវ​ដល់​និយោ​​​ជក​ដែល​ក៏​ត្រូវ​អនុម័ត​យល់​ព្រម​ផ្ត​ល់​ថ្ងៃ​ឈប់​សម្រាក​ផង​ដែរ​។

លោក កែន លូ អគ្គលេខាធិការ​សមា​គម​រោង​ចក្រកាត់​ដេរនៅកម្ពុជា​ដែល​តំណាង​ឲ្យ​រោងចក្រ​កាត់​ដេរ​ និង​រោង​ចក្រ​ស្បែក​ជើង​​​​ប្រហែល​៤៥០​រោង​ចក្រ​ដែល​មាន​កម្មករ​បម្រើ​ការ​ងារ​ប្រហែល​៥០០.០០០​​​នាក់​នោះ​បានមាន​ប្រសាសន៍​ថា សហជីព​ទាំង​នេះ​ធ្វើការ​​ហួស​ដែន​សមត្ថ​កិច្ច​របស់​ខ្លួន​​ក្នុងការ​ផ្ញើ​លិខិត​​ជូន​ដំណឹង​ដល់​សមាជិក​សមាគម​អំពីការ​បន្ត​​ថ្ងៃ​ឈប់​សម្រាក​​នោះ​។

លោក កែន លូ បា​ន​មាន​ប្រសាសន៍​ថា “​​​សំណើ​​សំុឈប់​សម្រាក​ដែលធ្វើ​ឲ្យរាំង​ស្ទះ​​គឺជា​រឿង​ខុស​ច្បាប់​។ សហ​ជីព​គ្មាន​សិទ្ធិ​ស្នើ​សុំ​ឈប់​សម្រាក​ជំនួស​កម្ម​ករ​ឡើយ​ ហើយ​ក្នុង​ករណី​ចាំបាច់​ ការ​ស្នើសុំ​ណាមួយ​ត្រូវ​មាន​ការ​យល់​ព្រម​ពីអ្នក​គ្រប់​គ្រង​”។

អ្នក​ស្រី យ៉ាង សុភ័ណ្ឌ ប្រធាន​សម្ព័ន្ធ​សហ​ជីព​កម្ពុជា​បានមាន​ប្រសាសន៍​ថា សមា​ជិក​របស់​អ្នក​ស្រី​នឹងស្នើ​សុំ​បន្ត​​ថ្ងៃ​ឈប់​សម្រាក​របស់ខ្លួន​ដដែល​ដោយ​មិន​គិត​​ពី​​ច្បាប់​ឡើយ​។

អ្នកស្រី​​​​ សុភ័ណ្ឌ​ បានមាន​ប្រសាសន៍​ថា  “យើង​គ្មាន​ជម្រើស​ទេ​។ យើងត្រូវ​តែ​​ធ្វើ​ដូច​​​​នេះ​​ពីព្រោះ​រដ្ឋាភិបាល​រារាំង​​យើង​​មិន​ឲ្យធ្វើ​បាតុកម្ម និង​កូដកម្ម​។ យើង​​នឹង​គាំ​ទ្រ​កម្មករ​ ហើយ​ដោយ​មានការ​គាំទ្រ​ពី​អន្តរ​ជាតិ​ យើង​ជឿថា ការ​ដាក់​សម្ពាធ​នេះ​នឹង​ជំរុញ​ឲ្យរដ្ឋាភិបាល​ស្វែង​រក​ដំណោះ​ស្រាយ​ចំពោះ​​​​ការ​ទាម​ទារ​របស់​យើង”។

នៅក្នុង​លិខិត​ដដែល​នេះ​ សហជីព​ស្នើ​ឲ្យ​សមាគម​រោង​ចក្រកាត់​ដេរ​នៅ​កម្ពុជា​​ដោះស្រាយ​ការ​ទាមទារ​ចំនួន​ប្រាំ​ពីរ​ចំណុច​រួម​ទាំង​ការ​ដោះលែង​អ្នក​ជាប់​ឃុំ​២១​នាក់​ដែល​ត្រូវ​បាន​ឃុំ​ខ្លួន​នៅ​មជ្ឃ​មណ្ឌល​អប់​រំ​កែប្រែ​ទី​៣​ក្នុង​ខេត្ត​កំពង់​ចាម​ចាប់​តាំង​ពីត្រូវ​បាន​ចាប់​ខ្លួន​នៅ​​​កន្លែង​តវ៉ា​របស់​កម្មករ​រោ​ង​ចក្រកាត់ដេរ​ដែល​បាន​ប្រែ​ក្លាយ​​ជា​ហិង្សា​កាល​ពីខែ​មករា​។

សហជីព​ក៏​បាន​ស្វះស្វែងឲ្យមានការ​ដំឡើង​ប្រាក់​ខែ​គោល​ដល់​១៦០​ដុល្លារ​ផង​ដែរ​។​​​ការ​​​​សិក្សា​របស់​រដ្ឋាភិបាល​កាល​ពី​ឆ្នាំ​មុន​បាន​រក​ឃើញ​ថា​​​ ប្រាក់​ខែគោល​​​១៥៧​ដុល្លារ​គឺ​ជា​ប្រាក់​​​ខែ​ល្មម​អាច​រស់​បាន​​ក្នុង​ប្រទេស​កម្ពុជា​។

លោក​​​ កែន លូ បាន​​​ថ្លែង​ថា សមាគម​រោង​​​​ចក្រ​កាត់ដេរនៅកម្ពុជា​មិន​​​មាន​​​​អំណា​ច​ផ្តល់​​​ឲ្យ​​តាម​ការ​ទាម​ទារ​របស់​សហជីព​បាន​ឡើយ។

ដោ​យ​សំដៅ​ដល់​អ្នក​ជាប់​ឃុំទាំង​នោះ លោក កែន លូ បាន​​​ថ្លែង​ថា “វា​​​មិន​​​​ស្ថិត​នៅក្នុង​សមត្ថកិច្ច​របស់​យើង​ទេពាក់​​​ព័ន្ធបញ្ហានេះ​​ មាន​​នីតិវិធី​ផ្លូវ​ច្បាប់ដែលត្រូវ​អនុវត្ត​តាម ហើយ​​យើង​មិន​អាច​ជ្រៀត​ជ្រែក​បាន​ទេ​”។ លោក​បាន​​​​មាន​​​ប្រសាសន៍​​​បន្ថែម​ថា “យើង​មានការ​ព្រួ​យ​​​​បារម្ភ ហើយ​មិនមាន​ការ​ចរចា​សុំ​​ដំឡើង​ប្រាក់​​​ខែ​គោល​ទៀត​ទេ​នៅក្នុង​ឆ្នាំ​២០១៤​នេះ​”៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស