29 C
Phnom Penh

សាលាដំបូង​ខេត្ត​ចោទ​ប្រកាន់​អ្ន​ក​ភូមិ​​ខេត្ត​ប៉ៃលិន​បួន​នាក់​​​ដែល​មាន​វិវាទ​ដី​ធ្លី​ ពីបទ​រំលោភ​យក​ដី​រដ្ឋ​

ដោយ ឌឹ ខេមបូឌា ដេលី

បទវិភាគ

បុគ្គលិក​អង្គការ​សិទ្ធិមនុស្ស​ម្នាក់​និយាយ​ថា កាលពីម្សិលមិញ​សាលា​ដំបូង​ខេត្ត​ប៉ៃលិន​ បាន​ចោទ​ប្រកាន់​អ្នកភូមិ​បួន​នាក់ពីបទ​រំលោភ​​​យក​ដី​រដ្ឋ​ពីព្រោះពួកគាត់​បាន​ធ្វើ​ស្រែ​ចម្ការ​លើ​ដី​ទំហំ​៦៨៤​ហិកតាដែល​តុលាការ​ខេត្ត​​​នេះ​​​លើក​ឡើង​ថា ជា​កម្ម​សិទ្ធិ​របស់​​រដ្ឋ ប៉ុន្តែ​ក្រុម​អ្នក​ភូមិ​អះអាង​ថា ពួក​គាត់​​បាន​ធ្វើ​ស្រែ​ចម្ការ​ដោយ​ស្រប​ច្បាប់​ចាប់​តាំងពី​ឆ្នាំ​១៩៩៩​​​​មក​ម្លេះ​។

​អ្នក​ភូមិ​​ទាំង​នេះត្រូវ​​បាន​ចាប់​ខ្លួន​កាលពី​ថ្ងៃ​ច័ន្ទនិង​ថ្ងៃ​អង្គារ​ ពីព្រោះ​ពួក​គាត់​មិន​គោរព​ដីកា​កោះហៅ​​របស់​តុលាការ​ឲ្យ​មក​បង្ហាញ​ខ្លួន​ដើម្បី​ធ្វើការ​សាក​សួរ​។ ពួក​គាត់​លើក​ឡើង​ថា  តុលាការ​​យក​​ពួក​​​គាត់​​ជា​គោល​ដៅ​ ពីព្រោះ​​លោក​ អុី ឈាន អភិបាល​ខេត្ត​ប៉ៃលិន​​​​ក៏​ទាម​ទារ​កាន់​កាប់​ដី​នេះ​​ដែរ​។

លោកស្រី ប្រាក់​ សុភិមា  ជាអ្នក​សម្រប​សម្រួល​​​​អង្គការសិទ្ធិមនុស្ស​អាដ​ហុក​ បាន​មាន​ប្រសាសន៍​កាលពី​ម្សិលមិញ​ថា “តុលា​​​ការ​បាន​ចោទ​​ប្រកាន់​អ្នកភូមិ​ទាំង​បួន​នាក់​នេះពីបទ​រំលោភយក​ដី​រដ្ឋ​ ហើយ​ឥឡូវ​នេះ​កំពុង​ត្រូវ​ឃុំ​ខ្លួន​បណ្ដោះ​អាសន្ន​នៅ​ពន្ធនា​​​គារ​ខេត្ត​”។

លោកស្រីបាន​មាន​ប្រសាសន៍​បន្ថែម​ថា អង្គការ​អាដ​ហុក​នឹង​ផ្ដល់​មេធាវីដល់​ក្រុម​អ្នក​ភូមិ​។ លោកស្រី​ សុភិមា បាន​មាន​ប្រសា​សន៍​ថា អ្នកភូមិ​ទាំង​បួន​នាក់​នេះ​​ត្រូវ​បាន​ចាប់​ខ្លួន​បន្ទាប់ពីមាន​ដីកា​ចុះ​ថ្ងៃទី២៥ ខែ​មីនា និង​ចុះ​ហត្ថលេខា​ដោយ​លោក ជុំ សែនសទ្ធា ព្រះ​​​រាជ​អាជ្ញា​អម​សាលា​ដំបូង​ខេត្ត​។

អ្នក​ភូមិ​ឈ្មោះ ពេជ្រ សុធា អាយុ​៤៧​ឆ្នាំ ឱម សំអុល អាយុ​៣១ និង​ ឱម សំអាត អាយុ​៤៤​ឆ្នាំ​ត្រូវ​បាន​ចាប់​ខ្លួន​កាលពីថ្ងៃ​ច័ន្ទ ចំណែក​ ទួត ម៉ក់ អាយុ​៤៨​ឆ្នាំ​ត្រូវ​បាន​ចាប់​ខ្លួន​កាលពី​ថ្ងៃ​អង្គារ​ ពេល​កំពុង​តវ៉ា​ទាម​ទារ​ឲ្យ​ដោះ​លែង​​​​អ្នកភូមិ​បីនាក់​ទៀត​។

តាម​ច្បាប​់​ភូមិ​បាល​​ ការ​ផ្ដន្ទាទោស​ពី​បទ​រំលោភយក​ដី​រដ្ឋ​ត្រូវ​ពិន័យ​ជា​​ប្រាក់​ពី​១.២៥០​​​​ដុល្លារ​ដល់​១២.៥០០​ដុល្លារ​ និង​ត្រូវ​ជាប់​ពន្ធនាគារ​ពី​មួយ​ឆ្នាំ​ដល់​ប្រាំ​ឆ្នាំ​។ គេ​មិន​​អាច​ទាក់​ទង​លោក​ព្រះ​រាជ​អាជ្ញា​ សែនសទ្ធា ដើម្បី​សុំអត្ថាធិប្បាយ​បាន​​ទេ។

លោក ចាន់ឌីន ​មាន​ប្រសាសន៍​ថា “ យើង​​​បាន​បញ្ជូនអ្នកភូមិ​ទាំង​បួន​នាក់​ទៅ​តុលាការ​​​ហើយ​​នៅ​ព្រឹក​នេះ​”។ ក្រុម​អ្នកភូមិ​ដែល​បាន​រស់​នៅ​លើ​ដីនេះ​លើក​ឡើង​ថា ពួកគាត់​បាន​ធ្វើ​ស្រែ​ចម្ការ​លើ​ដីនេះ​ចាប់​តាំងពី​ឆ្នាំ​១៩៩៩​មក ដោយ​មាន​ការ​អនុញ្ញាត​ពី​អាជ្ញា​ធរ​មូល​ដ្ឋាន​។

កាលពីខែមុនលោកអភិបាល​​​ខេត្ត​​​ អុី ឈាន បាន​ចាត់​ទុក​ដីដែល​មាន​វិវាទ​ទំហំ​​​៦៨៤​​​​ ហិកតា​ នេះ​ថា ជា​ “ដីរបស់​ខ្ញុំ​​​” ប៉ុន្តែ​ក្រោយ​មក​លោក​បាន​​​និយាយ​កែតម្រូវ​ថា ដីមួយ​ផ្នែក​ជា​ដី​របស់​ក្រុម​ហ៊ុនឯកជន​ និង​មួយ​ផ្នែក​ទៀត​ជា​ដី​របស់​រដ្ឋ​៕សារុន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស