អាជ្ញាធរមូលដ្ឋានបានឲ្យដឹងថា កាលពីម្សិលមិញ កម្មករចំនួន៩១នាក់នៅក្នុងរោងចក្រកាត់ដេរចំនួនពីរនៅខណ្ឌពោធិ៍សែនជ័យរាជធានីភ្នំពេញ បានដួលសន្លប់ពេលធ្វើការ។
ហេតុការណ៍ដួលសន្លប់ទី១បានកើតឡើងនៅក្នុងរោងចក្រកាត់ដេរ យូវី (Yu Wi) ជាទីដែលកម្មករចំនួន២០នាក់ក៏បានដួលសន្លប់ដែរ កាលពីរសៀលថ្ងៃអង្គារ។
យោងតាមលោក ហែម ដារិទ្ធ អភិបាលខណ្ឌពោធិ៍សែនជ័យ បានឲ្យដឹងថា កម្មករបានដួលសន្លប់ចំនួន៣១នាក់បន្ថែមទៀតនៅក្នុងរោងចក្រនេះកាលពីម្សិលមិញ។ លោកបានសន្និដ្ឋានថា ការដួលសន្លប់នេះគឺដោយសារក្លិនចេញពីជញ្ជាំងអគារដែលទើបតែលាបថ្នាំហើយថ្មីៗ។
លោក ហែម ដារិទ្ធ បានមានប្រសាសន៍ថា “កម្មករនៅក្នុងរោងចក្រកាត់ដេរ យូវី នឹងមិនត្រូវបានអនុញ្ញាតឲ្យចូលធ្វើការវិញឡើយរហូតទាល់តែជញ្ជាំងដែលទើបលាបថ្នាំហើយថ្មីៗបាត់ក្លិនសិន”។
លោក ហែម ដារិទ្ធ បានឲ្យដឹងបន្តទៀតថា ចំណែកឯហេតុការណ៍ដួលសន្លប់ទី២គឺកើតនៅរោងចក្រកាត់ដេរ សាន ចូវ (San Chov) ដោយកម្មករចំនួន៦១បានដួលសន្លប់កាលពីព្រឹកម្សិលមិញ ហើយពួកគេត្រូវបានបញ្ជូនទៅមន្ទីរពេទ្យឯកជនមួយដើម្បីព្យាបាល។ លោក ហែម ដារិទ្ធ បានសន្និដ្ឋានថា ការដួលសន្លប់នេះ ដោយសារតែកម្មករទទួលទានអាហារនិងផឹកស្រាច្រើនពេកនៅក្នុងពិធីជប់លៀងមួយដែលពួកគេបានចូលរួមកាលពីយប់មុនថ្ងៃកើតហេតុ។
លោកបានមានប្រសាសន៍ថា “ពួកគេបានដួលសន្លប់ព្រោះ ពួកគេផឹកស្រាបៀរនិងរាំរហូតដល់យប់ជ្រៅ”។ លោកបានបន្ថែមថា រាល់ការចំណាយលើថ្លៃព្យាបាលរបស់ពួកគេ ត្រូវមូលនិធិបេឡារបបសន្តិសុខសង្គមជាអ្នករា៉ប់រង៕ ស៊ុយឈាង