មន្ត្រីម្នាក់បាននិយាយថា កាលពីម្សិលមិញសាលាដំបូងខេត្តសៀមរាបបានចោទប្រកាន់ ទាហានបួននាក់ពីបទកាប់ឈើប្រណីតខុសច្បាប់ ហើយយកទៅឃុំខ្លួនបណ្ដោះអាសន្ន។
លោក ហុក ពៅ ចៅក្រមស៊ើបសួរនៅតុលាការនេះបានមានប្រសាសន៍ថា “យើងបានចោទប្រកាន់ពួកគេតាមមាត្រា ៩៦ នៃច្បាប់ព្រៃឈើ”។
ទាហានទាំងបួននាក់នេះត្រូវបានចាប់ខ្លួនបន្ទាប់ពីមានការបើករថយន្តដេញតាមរយៈពេលពីរម៉ោងឆ្លងកាត់ខេត្តព្រះវិហារកាលពីថ្ងៃអង្គារ។
លោក ហុង តារាវុធ ប្រធានមន្ទីរបរិស្ថានខេត្តសៀមរាបបានមានប្រសាសន៍កាលពីម្សិលមិញថា “យើងបានចាប់ខ្លួនទាហានទាំងបួននាក់ដែលបានរត់ពន្ធឈើប្រណីតចំនួន១០៥ដុំតាមរថយន្តតូយ៉ូតាធុនដ្រា”។
លោក សឿន តូ ជាជំនួយការរបស់លោកមានប្រសាសន៍ថា ទាហានទាំងបួននាក់នេះ ឈ្មោះ តិល វិសុទ្ធ អាយុ៣៥ឆ្នាំ សៅ វ៉ាន អាយុ២៩ឆ្នាំ លី វណ្ណថុន អាយុ២៨ឆ្នាំ និង ហេង ធី អាយុ២៧ឆ្នាំ ស្លៀកពាក់ឯកសណ្ឋានជាទាហាន ហើយប្រើស្លាកលេខរថយន្តខេមរភូមិន្ទ។
លោក សឿន តូ បានមានប្រសាសន៍រៀបរាប់ពីការដេញតាមយ៉ាងស្វិតស្វាញកាត់ភូមិសាស្ត្រព្រៃក្រាស់ថា “យើងបានដេញតាមរថយន្តរបស់ពួកគេនៅពេលពាក់កណ្ដាលយប់រហូតដល់ម៉ៅង២រំលងអធ្រាត្រ”។ លោកមានប្រសាសន៍ថា “នេះជាលើកទី១ហើយដែលមន្ទីររបស់យើងចាប់ខ្លួនទាហានរត់ពន្ធឈើប្រណីតចំនួន១០៥ដុំ”៕ សារុន