ស្ត្រីជនជាតិតៃវ៉ាន់ម្នាក់និងសហការីចំនួនប្រាំនាក់ទៀត ដែលត្រូវបានចោទប្រកាន់ពីបទជួញដូរជនជាតិខ្មែរទៅធ្វើការក្នុងស្ថានភាពជាទាសករលើទូកនេសាទក្នុងសមុទ្រអាហ្វ្រិក ត្រូវបានបើកសវនាការជំនុំជម្រះរឿងក្តីរបស់ពួកគេដោយសាលាដំបូងរាជធានីភ្នំពេញ។
ឈ្មោះ លិន យូស៊ិន អាយុ៥៤ឆ្នាំ ជាម្ចាស់ក្រុមហ៊ុន Giant Ocean International Fishing Co. ដែលពេលនេះឈប់ដំណើរការ ត្រូវបានចាប់ខ្លួនកាលពីក្នុងខែឧសភាឆ្នាំមុន បន្ទាប់ពីមានពាក្យបណ្តឹងជាបន្តបន្ទាប់ពីអ្នកនេសាទដែលត្រូវបានបោកប្រាស់ ដែលត្រឡប់មកពីអាហ្វ្រិកមកកម្ពុជា។
ជនជាតិតៃវ៉ាន់ទាំងប្រាំនាក់នេះ ដែលគេចោទថាបានជួយអ្នកស្រី យូស៊ិន ក្នុងការដឹកជញ្ជូនពលករទៅកាន់ទ្វីបអាហ្វ្រិកតាមរយៈទីភ្នាក់ងារជ្រើសរើសពលករ ដែលចុះឈ្មោះនៅប្រទេសកម្ពុជា មានឈ្មោះ ហុង ជុនហ្វា សៀ ហ៊ីស៊ូ លូ ធានតេ ចេន ជុននំ និងឈ្មោះ វូ ហ្វុតសាង។
លោកចៅក្រម កោ វណ្ឌី បានប្រាប់តុលាការថា “ជនសង្ស័យប្រាំមួយនាក់ត្រូវបានចោទប្រកាន់ពីបទជួញដូរមនុស្ស”។
អ្នកស្រី យូស៊ិន បានប្រាប់តុលាការថា អ្នកស្រីគ្រាន់តែជាអ្នកបកប្រែឲ្យក្រុមហ៊ុន Giant Ocean ប៉ុណ្ណោះ ហើយថា សហការីប្រាំនាក់នេះគឺជាមេកើយរបស់ខ្លួន។
អ្នកស្រី យូស៊ិន បានឲ្យដឹងថា “យើងបានជ្រើសរើសកម្មករនៅក្នុងរាជធានីភ្នំពេញ ហើយបញ្ជូនពួកគេទៅប្រទេសម៉ាឡេស៊ី។ ខ្ញុំមិនដឹងថា ពួកគេត្រូវបានបញ្ជូនទៅអាហ្វ្រិកនោះទេ”។
អតីតអ្នកដែលត្រូវបានជ្រើសរើសដោយក្រុមហ៊ុន Giant Ocean និងគ្រួសាររបស់ពួកគេបានចូលរួមការបើកសវនាការជំនុំជម្រះនេះកាលពីម្សិលមិញ ហើយបាននិយាយនៅខាងក្រៅតុលាការអំពីរបៀបដែលពួកគេត្រូវបានបោកប្រាស់ ដោយធ្វើការជួញដូរដោយក្រុមហ៊ុន Giant Ocean ដែលត្រូវបានចុះបញ្ជីនៅសមាគមទីភ្នាក់ងារជ្រើសរើសពលករខ្មែរ។
ចាប់ផ្ដើមក្នុងឆ្នាំ២០០៩ក្រុមហ៊ុន Giant Ocean តាមដឹងថា បានបញ្ចុះបញ្ចូលជនជាតិខ្មែរ ដោយសន្យាស្វែងរកការងារនៅតាមទូកនេសាទជប៉ុន និងទទួលបានប្រាក់ឈ្នួល២៥០ដុល្លារក្នុងមួយខែ ក៏ប៉ុន្តែបានបញ្ជូនពួកគេតាមក្រុងសេអ៊ូលទៅអាហ្វ្រិក ជាទីដែលពួកគេត្រូវបានលក់ជាទាសករបំណុល។
អង្គការក្រៅរដ្ឋាភិបាលបានប៉ាន់ប្រមាណថា ក្រុមហ៊ុន Giant Ocean បានជួញដូរជនជាតិខ្មែរជាង១.០០០នាក់មុនពេលក្រសួងការងារបិទក្នុងឆ្នាំ២០១២។
លោក គង់ រិទ្ធ អាយុ៣០ឆ្នាំបានឲ្យដឹងថា គាត់ត្រូវបានធ្វើទារុណកម្ម ខណៈដែលធ្វើការ២០ម៉ោងក្នុងមួយថ្ងៃ។ លោក រិទ្ធ បានបន្តទៀតថា “ជនជាតិខ្មែរប្រាំនាក់ ហើយនិងខ្ញុំត្រូវបានបញ្ជូនតាមទូកទៅសមុទ្រអាហ្វ្រិក ជាទីដែលយើងជាប់នៅទីនោះរយៈពេលមួយឆ្នាំកន្លះដោយគ្មានប្រាក់ខែ។ ខ្ញុំទាមទារប្រាក់ខែរបស់ខ្ញុំរយៈពេលមួយឆ្នាំកន្លះ និង៥.០០០ដុល្លារ”។
លោក ជឿន សុផល អាយុ២៨ឆ្នាំរស់នៅខេត្តកំពង់ឆ្នាំង បានរៀបរាប់រឿងរា៉វប្រហាក់ប្រហែលគ្នានេះ។
លោក សុផល បានឲ្យដឹងថា “ថ្ងៃខ្លះយើងធ្វើការ២៤ម៉ោង ក៏ប៉ុន្តែពួកគេប្រាប់ខ្ញុំថា ពួកគេកំពុងតែផ្ញើប្រាក់ទៅឲ្យគ្រួសាររបស់ខ្ញុំនៅឯរាជធានីភ្នំពេញ ដូច្នេះគ្មានបញ្ហា”។ លោកបានបន្ថែមទៀតថា “ប៉ុន្តែក្រោយមកខ្ញុំដឹងថា គ្រួសាររបស់ខ្ញុំទទួលបាន១០០ដុល្លារសម្រាប់ខែដំបូង ៥០ដុល្លារសម្រាប់ខែទី២ ហើយក្រោយមកអត់” ដោយលោកបន្ថែមថា លោកធ្វើការនៅសមុទ្ររយៈពេល១ឆ្នាំ។ សាលក្រមក្នុងរឿងក្ដីនេះនឹងត្រូវប្រកាសនៅថ្ងៃទី២៩ ខែមេសា៕ ប៊ុននី