26 C
Phnom Penh

ប្រតិបត្តិការ​ស៊ើប​អង្កេត​ករណី​ពលកម្ម​កុមារ​នៅ​ចម្ការ​អំពៅ​​ក្រុម​ហ៊ុន​ចិន​កំពុង​ដំណើរការ​ទៅ​មុខ​

ដោយ ឌឹ ខេមបូឌា ដេលី

បទវិភាគ

នគរបាល​នៅ​ខេត្ត​ព្រះ​វិហារ​​បាន​ឲ្យ​ដឹង​ថា ខ្លួន​បាន​បង្ហាញ​ភ័ស្តុតាង​បន្ថែម​ទាក់​ទង​នឹង​ពលកម្ម​កុមារ​នៅ​ចម្ការ​អំពៅ​របស់​ជន​ជាតិ​ចិន​ ហើយ​នឹង​បញ្ជូន​សំណុំ​រឿង​នេះ​ទៅ​តុលា​ការ​ ប្រសិន​បើ​ប្រតិបត្តិការ​ស៊ើប​អង្កេត​បន្ថែម​ បញ្ជាក់​ពី​លទ្ធផល​បឋម​របស់​នគរបាល​។

អតីត​កម្មករ​ចម្ការ​ ឡាន ហ្វេង (Lan Feng) បាន​ដាក់ពាក្យ​បណ្តឹង​កាលពី​ខែ​មុន ដើម្បី​ប្តឹង​ក្រុម​ហ៊ុន​ វ៉ាយ ហេង​ (Y Heng) ដែល​ជា​អ្នក​គ្រប់​គ្រង​ចម្ការ​ដែល​ស្ថិត​នៅ​ភាគ​ខាង​ជើង​នៃ​ប្រទេស​កម្ពុជា​នេះ។

លោក ប្រាំង ធីតា ប្រធាន​ផ្នែក​ប្រឆាំង​ការ​ជួញ​ដូរ​មនុស្ស​ និង​ការពារ​អនី​តិជន​នៅ​ស្នង​ការ​នគរបាល​ខេត្ត​ បាន​ឲ្យ​ដឹង​ថា កាលពី​ពេល​ថ្មី​ៗនេះ​ លោក​បាន​ទទួល​បញ្ជី​ឈ្មោះ​កម្មករ​ពី​ក្រុម​ហ៊ុន​ វ៉ាយ ហេង ហើយ​ក្រុម​ហ៊ុន​នោះ​បាន​​បញ្ជាក់​ថា ២០នាក់​ក្នុង​ចំណោម​កម្មករ​​​៥៥នាក់​របស់​ខ្លួន​មាន​អាយុ​ពី​១៣​ទៅ​១៧ឆ្នាំ​។

លោក​បាន​មាន​ប្រសាសន៍​ថា​ “យើង​នឹង​ចុះ​ទៅ​ដល់​ក្រុម​ហ៊ុន​នោះ​នៅ​សប្តាហ៍​ក្រោយ​ ដើម្បី​ស៊ើប​អង្កេត​លម្អិត​បន្ថែម​ទៀត​ ដោយ​យក​បញ្ជី​ឈ្មោះ​នេះ​​ធ្វើ​ជា​មូល​ដ្ឋាន​។ ប្រសិន​បើ​កុមារ​ទាំង​នោះ​ពិត​ជា​ខុស​ច្បាប់​មែន​ ហើយ​ក្រុម​ហ៊ុន​នេះ​អនុញ្ញា​ត​ឲ្យ​ពួកគេ​ធ្វើការ ​យើង​នឹង​រៀប​ចំ​ឯក​សារ​ដើម្បី​បញ្ជូន​សំណុំ​រឿង​នេះ​ទៅ​តុលាការ​”។

លោក ឡោ ចាន់ អ្នកសម្រប​សម្រួល​អង្គ​ការ​សិទ្ធិ​មនុស្ស​អាដហុក​ ប្រចាំ​ខេត្ត​ព្រះ​វិហារ​បាន​ឲ្យ​ដឹង​ថា លោក​និង​បុគ្គលិក​របស់​លោក​​បាន​ឃើញ​កុមារ​ពីរ​បី​នាក់​ធ្វើការ​នៅ​ចម្ការ​នោះ​ អំឡុង​ពេលកំពុង​បើក​រថយន្ត​ពិនិត្យ​មើល​​​ជុំ​វិញចម្ការ​នោះ​កាលពី​សប្តាហ៍​មុន។

លោក​បាន​មាន​ប្រសាសន៍​ថា “ យើង​នៅ​តែ​កំពុង​ស៊ើប​អង្កេត​រឿង​ក្តី​នេះ ពី​ព្រោះ​ក្រុម​​ហ៊ុន​នេះ​កំពុង​តែបំពាន​ដោយ​ខុស​ច្បាប់​លើ​កុមារ​ និង​កេង​ប្រវ័ញ្ច​ពល​កម្ម​កុមារ​”។

ច្បាប់​ការងារ​ចែង​ថា កម្មករ​ត្រូវ​មាន​អាយុ​យ៉ាង​តិច​១៥​ឆ្នាំ​ទើប​អាច​ធ្វើការ​បាន​។ ក៏​ប៉ុន្តែ ច្បាប់​នេះ​អនុញ្ញាត​ឲ្យ​កុមារ​ដែល​មាន​អាយុ​១២​ឆ្នាំ​ធ្វើការ​ងារ​ស្រាល​ៗ​ដែល​មិន​បង្ក​គ្រោះ​ថ្នាក់​ ប្រសិន​បើ​ការងារ​នោះ​មិន​ប៉ះ​ពាល់​ដល់​ការសិក្សា​របស់​ពួកគេ​។

នៅ​ក្នុងករណី​ពាក់​ព័ន្ធ​មួយ​ អ្នក​ភូមិ​ជន​ជាតិ​ដើម​ភាគ​តិច​គួយ​ប្រហែល​២០០នាក់​ដែល​ជាប់​ពាក់​ព័ន្ធ​ក្នុង​វិវាទ​ដី​ធ្លី​ជាមួយ​ក្រុម​ហ​៊ុន​ចម្ការអំពៅ ឡាន ហ្វេង បាន​តវ៉ា​នៅ​មុខ​ទីស្នាក់​ការ​ស្នង​ការ​នគរបាល​ខេត្ត​កាលពី​ម្សិលមិញ ដើម្បី​ប្រឆាំង​នឹង​ការ​សាក​សួរ​អ្នក​ភូមិ​របស់​ខ្លួន​ចំនួន​បី​នាក់​ ពី​សំណាក់​នគរបាល​។

លោក កែវ ចម្រើន​ ស្នង​ការ​រង​នគរបាល​ខេត្ត​ព្រះ​វិហារ​បាន​ឲ្យ​ដឹង​ថា អ្នក​ភូមិ​ទាំង​បី​នាក់​នោះ​ត្រូវ​បាន​កោះ​ហៅ​កាលពី​ម្សិលមិញ​ឲ្យ​ចូល​រួម​ការ​សាក​សួរ​ ដោយ​សារ​​​ក្រុ​ម​ហ៊ុន​​ចម្ការ​អំពៅ​ ឡាន ហ្វេង ​បាន​ដាក់​ពាក្យ​ប្តឹង​ពួក​គាត់កាលពី​ថ្ងៃ​អង្គារ​ ពី​បទ​ដកដើម​អំពៅ​​កាល​ពីប៉ុន្មាន​ថ្ងៃ​មុន​នេះ។

លោក​បាន​ឲ្យ​ដឹង​បន្ថែម​ទៀត​ថា ការ​សាក​សួរ​នេះ​ត្រូវ​បាន​លុប​ចោល​វិញ ពី​ព្រោះ​អ្នក​តវ៉ា​បាន​ទទូច​ថា ការ​សាក​សួរ​នេះ​អាច​ដំណើរ​ការ​ទៅ​បាន​លុះ​ត្រា​តែ​ពួកគាត់​ទាំង​២០០នាក់​ត្រូវ​បាន​អនុញ្ញាត​ឲ្យ​ចូល​រួម​ដែរ។

លោក ចម្រើន បាន​មាន​ប្រសាសន៍​ថា “ខ្ញុំ​មិន​ដឹង​ថា ដី​នោះ​ជា​របស់​អ្នក​ណា​ទេ ក៏​ប៉ុន្តែ មាន​សកម្មភាព​ដាំ​អំពៅ​នៅ​លើ​ដី​នោះ​ ហើយ​​​ប្រជាជន​បាន​បំផ្លាញ​ដី​របស់​ក្រុម​ហ៊ុន​”។ អ្នក​ភូមិ​បាន​លើក​ឡើងថា ដី​ដែល​ពួកគាត់​​ដក​ដើម​អំពៅនោះ​ជា​របស់​ពួកគាត់​។

លោក កែវ និល មេការ​ចម្ការ​អំពៅ ឡាន ហ្វេង បាន​លើក​ឡើង​ថា លោក​មិន​ដឹង​​ពី​រឿង​​វិវាទ​ដី​ធ្លី​ ឬក៏​ករណី​ចោទ​ប្រកាន់​ថា​ មាន​ពល​កម្ម​កុមារ​ទេ​ ហើយ​បាន​បដិសេធ​មិន​ធ្វើ​អត្ថា​ធិប្បាយ​។ តំណាង​ក្រុម​ហ៊ុន​វ៉ាយ ហេងមិន​​អាច​ទំនាក់​ទំនង​សុំ​អត្ថាធិប្បាយ​បាន​ទេ​៕ សុធា​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស