36 C
Phnom Penh

រដ្ឋសភា​បើក​កិច្ច​ប្រជុំ​ពេញ​អង្គ​លើក​ទី​២​​ដើម្បី​ពិភាក្សា​អំពី​ច្បាប់​ចរាចរណ៍​ផ្លូវ​គោក​ថ្មី​

ដោយ ឌឹ ខេមបូឌា ដេលី

បទវិភាគ

រដ្ឋ​សភា​ដែល​មាន​តែ​សមាជិក​មក​ពី​គណ​បក្សប្រជាជន​កម្ពុជាបាន​ពិភាក្សា​គ្នា​ក្នុង​ថ្ងៃ​ទី​២​នៃ​កិច្ច​ប្រជុំ​ពេញ​អង្គ​លើក​ទី​២​ បើ​គិត​តាំង​ពី​ពេល​បោះ​ឆ្នោតជ្រើស​តាំង​តំណាង​រាស្ត្រ​ដ៏​ចម្រូង​ចម្រាស​កាលពី​ឆ្នាំ​មុន​មក។ ដោយ​មិន​មាន​សមាជិក​ជា​ច្រើន​អ្នក​ទៀត​ចូល​រួម​​សមាជិក​គណបក្ស​ប្រជាជន​នៅ​ក្នុង​រដ្ឋ​សភា បាន​ពិភាក្សា​គ្នា​អំពី​ច្បាប់​ចរាចរណ៍​ផ្លូវ​គោក​ថ្មី​​។

ក្នុង​ចំណោម​សមាជិក​ទាំង​៦៨​រូប​របស់​គណបក្ស​ប្រជាជន​កម្ពុជា​ មាន​៦៤​រូប​បាន​ចូល​រួម​ដែល​ជា​ចំនួន​បាន​ត្រឹម​តែ​លើ​៦២​ ចាំ​បាច់​សម្រាប់​សំឡេង​ភាគ​ច្រើន​នៅ​ក្នុង​រដ្ឋ​សភា​។ អាសនៈ​៥៥​ទុក​សម្រាប់​សមាជិក​សភា​មក​ពី​គណបក្ស​សង្គ្រោះ​ជាតិ​នៅ​តែ​គ្មាន​អ្នក​អង្គុយ​​ដដែល​ ដោយ​សារ​តែ​គណបក្ស​ប្រឆាំង​ដ៏​ធំ​នៅ​ក្នុង​ប្រទេស​កម្ពុជា​នេះ​បាន​ធ្វើ​ពហិការ​មិន​ទទួល​យក​អាសនៈ​ទាំង​នេះ។

លោកស្រី​ នីន សាភ័ណ ប្រធាន​គណៈ​កម្មា​ធិ​ការសាធារណការ​ ដឹក​ជញ្ជូន និង​ទូរគមនា​គមន៍​​នៃ​រដ្ឋ​សភា​ បាន​ពន្យល់​ថា ច្បាប់​ចរា​ចរណ៍​ផ្លូវ​គោក​ថ្មី​នេះ​នឹង​ជួយ​ធានាឲ្យ​មាន​​លទ្ធភាព​ប្រើ​ប្រាស់​​រយៈពេល​វែង​លើ​ផ្លូវ​នានា​ដែល​រង​ការ​​ខូច​ខាត​ និង​ជួស​ជុល​ឡើង​វិញ​ជា​រៀង​រាល់​ឆ្នាំក្នុង​ប្រទេស​កម្ពុជា​ ប្រសិន​បើ​ត្រូវ​បាន​អនុម័ត​ដោយ​សមាជិក​សភា​របស់​គណបក្ស​កាន់​អំណាច​។

​លោក​ស្រី​បាន​មាន​ប្រសាសន៍​ថា “គោល​បំណង​នៃ​ច្បាប់​នេះ​គឺ​ដើម្បី​បង្ការ​បទ​ល្មើស​ដែល​កើត​ឡើង​នៅ​លើ​ហេដ្ឋា​រចនា​សម្ព័ន្ធ​ផ្លូវ​ថ្នល់​របស់​យើង​ និង​ដើម្បី​ចាត់​វិធានការ​ផ្លូវ​ច្បាប់​ ចំពោះ​បទ​ល្មើស​ទាំង​នោះ។ បទ​ល្មើស​ទាំង​នោះ​មាន​ដូច​ជា​ការ​ដឹក​ទំនិញ​លើស​ទម្ងន់​កំណត់​ និង​គុណភាព​សាង​សង់ក្រោម​ស្តង់​ដារ​ជា​ដើម​”។

កិច្ច​ពិភាក្សាអំ​ពី​សេចក្តី​ព្រាង​ច្បាប់​នេះ​ដំណើរ​​ការ​ទៅ​អស់​រយៈពេល​ពេញ​មួយ​ព្រឹក​ និង​ផ្តោត​សំខាន់​ទៅ​លើ​បញ្ហាផ្លូវ​ខូច​។

លោក ជាម យៀប សមាជិក​សភា​ និងជា​អ្នក​នាំ​ពាក្យ​គណបក្ស​ប្រជាជន​កម្ពុជា​បាន​យក​ឱកាស​ពិភាក្សា​អំពី​សេចក្តី​ព្រាង​ច្បាប់​ថ្មី​នេះ​សម្រាប់​ស្នើ​ឲ្យ​លោក ត្រាំ អីុវតឹក រដ្ឋមន្ត្រី​ក្រសួង​សាធារណការ​ និង​ដឹក​ជញ្ជូន​ ធានា​ថា ផ្លូវ​ថ្នល់ទាំង​ឡាយ​មាន​ទ្រង់​ទ្រាយល្អ​។

លោក ជាម យៀប បាន​មាន​ប្រសាសន៍​ថា “យើង​ប្រឈម​នឹង​ឧបសគ្គ និង​គ្រោះ​ថ្នាក់​ជាច្រើន​ ដូច្នេះ​អ្វី​ដែល​សំខាន់​គឺ​ថា យើង​​​សូម​ស្នើ​ឲ្យ​ឯក​ឧត្តម​រដ្ឋមន្ត្រី​​ក្នុង​នាម​ជា​តំណាង​​​របស់​រដ្ឋាភិបាល​ពិនិត្យ​ឡើង​វិញ​នូវ​គុណភាព​ផ្លូវនីមួយៗ​”។

មាត្រា​ ៤៦ នៃ​សេចក្ដីព្រាង​ច្បាប់​នេះ​​ចែង​​​ថា មន្ត្រី​ដឹកជញ្ជូន​នឹង​មាន​ភារកិច្ច​ត្រួត​ពិនិត្យ​ផ្លូវ​ថ្នល់​ជា​ប្រចាំ​ ដើម្បី​រក​កន្លែង​ខូច​ខាត​។ មន្ត្រីទាំង​នោះក៏នឹង​មាន​អំណាច​ទាម​ទារ​ឯកសារ​ពី​ក្រុម​ហ៊ុននានា​ ដែល​ផ្គត់​ផ្គង់​គ្រឿង​បរិក្ខា​ស្ថាប​នា​ផ្លូវ​ផង​ដែរ​។

សេចក្ដីព្រាង​ច្បាប់​នេះ​ចែង​ថា ក្រុ​ម​មន្ត្រី​ក៏​នឹង​មាន​អំណាច​ដក​អាជ្ញាប័ណ្ណ​ពីក្រុម​ហ៊ុន​ឯក​ជន​ដែល​ត្រូវ​បានរក​ឃើញ​ថា កំពុង​តែ​ប្រើ​ឧប​ករណ៍​មិន​ស្រប​តាម​ស្ដង​ដារ​។

លោក ឈាង វុន សមាជិក​សភា​ជាន់​ខ្ពស់​របស់​គណបក្ស​កាន់​អំណាច​បានលើកឡើង​​ថា វិធានការ​ថ្មីនេះ​នឹង​គ្មាន​ន័យ​ទេ​ ប្រសិន​បើ​មន្ត្រីទាំង​នេះ​ត្រូវ​បាន​ចោទ​ប្រកាន់​ពី​បទ​សមគំនិត​ជាមួយ​ក្រុមហ៊ុន​ផ្គត់​ផ្គង់ និង​ក្រុម​ហ៊ុន​សាងសង់​ផ្លូវ​ធំៗ។

សំដៅដល់​អំពើ​ពុក​រលួយ ​​លោក​បាន​មាន​ប្រសាសន៍​ថា “កន្លង​មក​មាន​ការ​អនុ​វត្ត​បែប​នេះ​ ហើយ​ផ្លូវ​ថ្នល់​បាន​ខូច​ខាតដោយសារ​អំពើនេះ​។ តើ​យើង​អាច​ដោះស្រាយ​បញ្ហា​នេះដោយរបៀបណា​? តើ​​មក​ទល់​ពេល​នេះ​ក្រសួង​បាន​ធ្វើ​អ្វីខ្លះ ​​ដើម្បី​ដោះស្រាយ​បញ្ហា​នេះ?”។

លោក អុីវតឹក ​លើកឡើងថា  លោក​ដឹង​អំពី​បញ្ហា​​នៅ​ក្នុង​ក្រសួង​របស់​លោក។ ក៏​ប៉ុន្តែ​លោក​បាន​លើកឡើង​បន្ត​​ថា ពេល​នេះ​ មន្ត្រី​របស់​លោក​ដឹង​ពីអំណាចដាក់ទោស​​​របស់​អង្គ​ភាព​ប្រឆាំង​អំពើ​ពុក​រលួយ​​។ ប៉ុន្តែ​ចាប់​តាំងពី​​ត្រូវ​បាន​បង្កើត​ឡើង​ក្នុង​ឆ្នាំ​២០១០​មក ​អង្គភាព​នេះ​ចាត់​ការ​ករណី​បាន​តែ​មួយ​ក្ដាប់​តូច​ប៉ុណ្ណោះ​។ លោកមាន​ប្រសាសន៍​ថា “ខ្ញុំ​បាន​ណែ​នាំ​ពួកគេ​ថា ​អង្គភាព​ប្រឆាំង​អំពើ​ពុក​រលួយ​នឹង​ដាក់​ទោស​យើង ប្រសិន​បើ​យើង​មាន​កំហុស​ ដូច្នេះ​ត្រូវ​តែ​ធ្វើ​អ្វីៗ​តាម​គោល​ការណ៍​​ដែល​​រដ្ឋបាន​កំណត់​ច្បាស់​”៕ ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស