32 C
Phnom Penh

លោក សម រង្សុី សរសេរ​លិខិត​ថ្វាយ​ព្រះ​មហាក្សត្រ​ ពាក់​ព័ន្ធ ​នឹង​ព្រះ​រាជ​សារ​ផ្ញើ​ជូន​រដ្ឋសភា​

ដោយ ឌឹ ខេមបូឌា ដេលី

បទវិភាគ

លោក​ សម រង្ស៊ី ប្រធាន​គណបក្ស​ប្រឆាំង​បាន​សរសេរ​លិខិត​ថ្វាយ​ព្រះ​មហាក្សត្រ​ នរោត្តម​ សីហមុនី ​ជា​ការ​ឆ្លើយ​តប​និងទំនង​ជា​​ការ​ស្តី​បន្ទោស​ចំពោះ​ព្រះ​រាជ​សា​រ​របស់​ព្រះ​មហាក្សត្រ​ដែល​គេ​យក​ទៅ​អានឮៗ​នៅ​រដ្ឋ​សភា​កាល​ពីដើមស​ប្តាហ៍នេះ។

កាល​ពីថ្ងៃ​អង្គារ រដ្ឋសភា​បាន​បើក​សម័យ​ប្រជុំ​ពេញ​អង្គ​លើក​ទី​២​របស់​ខ្លួន​ បន្ទាប់​ពី​ឈប់​សម្រាករយៈ​ពេល​បីខែ​ដោយ​លោក​ ហេង​ សំរិន​ ប្រធាន​រដ្ឋសភា​របស់​គណបក្ស​ប្រជាជនកម្ពុជា​ បាន​អាន​ព្រះរាជ​សារ​របស់​ព្រះ​មហាក្សត្រ​ នរោត្តម​ សីហមុនី​។

នៅក្នុង​ព្រះរាជ​សារ​នោះ​ ព្រះ​មហា​ក្សត្រ​ឡាយ​ថា ព្រះ​អង្គ​សង្ឃឹម​ថា រដ្ឋសភា​ “ដ៏​ឧត្តុងឧត្តម​ដែល​ជា​តំណាងប្រជា​ពល​រដ្ឋ​ខ្មែរ​ទាំង​មូល​នឹង​បន្ត​ដោះស្រាយ​​បញ្ហា​​ប្រឈម​នានាជា​មួយ​នឹង​ការ​ប្រកាន់​ខ្ជាប់​យ៉ាង​មឺុង​ម៉ាត់​នូវ​គោល​ការណ៍​លទ្ធិ​ប្រជា​ធិ​ប​តេយ្យ​ សេរី​ពហុបក្ស​”។ នៅក្នុង​លិខិត​ឆ្លើយ​តប​​កាលពី​ថ្ងៃ​ពុធ ​លោក​ សម​ រង្ស៊ី ទំនង​ជា​មិន​យល់​ស្រប​នឹង​ការ​វាយ​តម្លៃ​របស់​ព្រះ​មហាក្សត្រ​​ទេ​។

លោក​ សម រង្ស៊ី បានមាន​ប្រសាសន៍​ថា “ក្នុង​ឋានៈទូល​ព្រះ​បង្គំ​ជា​ប្រធាន​គណបក្ស​សង្គ្រោះ​ជាតិ​​ដែល​តំណាង​ឲ្យ​ប្រជា​ពល​រដ្ឋ​យ៉ាង​តិច​៣​លាន​នាក់​ ទូល​ព្រះ​បង្គំ​សូម​​ព្រះ​បរមរាជានុញ្ញាត​ទូល​ថ្វាយ​ព្រះករុណា​ជា​អម្ចាស់​ទ្រង់​ព្រះមេត្តា​ជ្រាប​ថា  រដ្ឋសភា​បច្ចុប្បន្ន​ដែល​ត្រូវ​បាន​បង្កើ​ត​ឡើង​កាល​ពី​ថ្ងៃ​ទី២៣​ ខែ​កញ្ញា​ ឆ្នាំ​២០១៣​គឺ​ជា​សភា​ឯកបក្ស​ដែល​មាន​តែ​តំណាង​គណបក្ស​ប្រជាជន​កម្ពុជា​តែ​មួយ​ប៉ុណ្ណោះ​ មិន​មែន​តំណាង​ឲ្យ​ប្រជា​ពល​រដ្ឋ​ខ្មែ​រទាំង​មូល​នោះ​ទេ”។

ព្រះ​មហាក្សត្រ​ សីហមុនី ដែល​មិន​ធ្វើ​​តាម​សំណើជា​លាយ​លក្ខ​ណ៍​អក្សរ​របស់​លោក​ សម រង្ស៊ី​ និង​គណបក្ស​សង្គ្រោះ​ជាតិ​​សុំ​មិន​ឲ្យកោះ​ប្រជុំ​សភា​នោះ​បាន​ធ្វើ​ជា​ព្រះ​រាជា​អធិបតីកាល​ពីខែ​កញ្ញា​នៅក្នុង​ពិធី​ស្បថ​ចូល​កាន់​តំណែង​របស់​សមាជិក​សភា​៦៨​រូប​នៃ​គណបក្ស​កាន់​អំណាច​ដែល​​ទទួល​បាន​អាសនៈ​នៅ​ក្នុង​ការ​បោះឆ្នោត​ជាតិ​កាល​ពីថ្ងៃទី​២៨​ខែ​កក្កដា។

យោង​តាម​លទ្ធ​ផល​ផ្លូ​វការ​ សមាជិក​គណ​បក្ស​សង្គ្រោះជាតិ​៥៥​រូប​ដែល​​​មាន​​​អាសនៈ​នៅ​ក្នុង​​រដ្ឋ​សភា​បាន​ធ្វើ​ពហិការ​មិនទទួល​យក​អាសនៈ​របស់​ខ្លួន​ដោយ​អះអាង​ពីការ​លួច​បន្លំ​សន្លឹក​ឆ្នោត​ជាច្រើន​។

លោក សម រង្ស៊ី ក៏បាន​លើក​ឡើង​នៅ​ក្នុង​លិខិត​របស់​លោក​នៅ​សប្តាហ៍​នេះដែរ​ថា រដ្ឋ​សភា​នេះ​ជា​រដ្ឋ​សភា​ខុស​ច្បាប់​ ដោយ​អះ​អាង​ថា មាត្រ​៧៦​នៃ​រដ្ឋ​ធម្មនុញ្ញ​តម្រូវ​ឲ្យ​​​មាន​សមាជិកសភា​១២០​រូប​​ស្បថ​ចូល​កាន់​តំណែង​​ដើម្បី ចាប់​ផ្តើម​​នីតិកាល​​ថ្មី ។

ប្រធាន​គណបក្ស​ប្រឆាំង​រូប​នេះ​បញ្ជាក់​ថា អតីត​ព្រះ​មហាក្សត្រនរោត្តម សីហនុ បាន​បដិសេធ​មិន​យាង​ធ្វើ​ជា​ព្រះរាជាធិបតី​នៅ​​ក្នុង​ការ​បើក​សម័យ​ប្រជុំ​​សភា​លើក​ដំបូង​អំឡុង​ពេល​មាន​ភាព​ទាល់​ច្រក​ផ្នែក​នយោ​បាយ​​ដ៏យូរ​​ក្រោយ​ការ​បោះឆ្នោត​ជាតិ​ឆ្នាំ​២០១៣​​នោះ​ទេ​។

លោក សម រង្ស៊ី  បាន​សរសេរ​លិខិត​ថ្វាយ ​ព្រះ​មហាក្សត្រ​ សីហមុនី ថា “​ ក្នុង​ស្ថាន​ភាព​ដូចគ្នា​នេះដែរ​ អតីត​ព្រះ​មហាក្សត្រ​ ព្រះ​ករុណា​ ព្រះបាទ​សម្តេច​ ព្រះ​នរោត្តម សីហនុ​ ព្រះ​បរម​រតន​កោដ្ឋ​ទ្រង់​បាន​មាន​ព្រះ​រាជ​តម្រិះ​ និង​សម្រេច​ព្រះទ័យ​មិន​យាង​ចូល​រួ​ម​ជា​ព្រះរាជាធិបតី ក្នុង​សម័យ​ប្រជុំ​ដំបូង​នៃ​រដ្ឋ​សភា​នីតិកាល​ទី​៣​ក្នុង​ឆ្នាំ​២០០៣ ​ដោយ​ហេតុ​ថា ពុំ​មាន​តំណាង​រាស្ត្រ​មក​ពី​គ្រប់​គណ​បក្ស​ដែល​ប្រជា​ពល​រដ្ឋ​បោះឆ្នោត​ជូន​​ ចូល​រួម​បង្កើត​រដ្ឋ​សភា​នីតិកាល​ថ្មី ដែល​តំណាង​ឲ្យ​ប្រជា​ពល​រដ្ឋ​ខ្មែរ​ទាំង​មូល​”។

កាល​ពីដើមឆ្នាំ​២០០៤ ព្រះ​មហាក្សត្រ​ នរោត្តម​ សីហនុ បាន​យាង​ទៅ​ទីក្រុង​ប៉េកាំង​ និង​បាន​មាន​ព្រះរាជ​បន្ទូល​ថា ព្រះ​អង្គ​នឹង​មិន​យាង​មក​កោះ​ប្រជុំ​រដ្ឋ​សភា​ទេ​រហូត​ដល់​​គណបក្ស​ប្រជាជន​កម្ពុជា​ គណបក្ស​ហ្វុ៊ន​ស៊ិន​បិុច​ និង​គណបក្ស​សម រង្ស៊ី​ ដោះស្រាយ​ជម្លោះ​​ បោះឆ្នោត​នោះ​រួ​ចហើយ​សិន​។

ព្រះ​មហាក្សត្រ​ នរោត្តម​ សីហនុ មិន​ព្រម​​​​យាង​ត្រឡប់​មក​វិញ​ទេ​នៅពេល​ដែល​​គណបក្ស​ប្រជាជន និង​គណបក្ស​ហ្វុ៊ន​ស៊ិន​បិុច ព្រម​ព្រៀង​បង្កើត​រដ្ឋាភិបាល​ចម្រុះ​ដែល​ជាប់ ពាក់​ព័ន្ធ​នឹង​ការ​ធ្វើ​វិសោធនកម្ម​រដ្ឋ​ធម្មនុញ្ញ។

ការ​ធ្វើ​វិសោធនកម្ម​រដ្ឋ​ធម្មនុញ្ញ​នេះ​ កើ​ត​មាន​ឡើង​បន្ទាប់​ពី​តំណាង​រាស្ត្រ​​៩៦​រូប​ដែល​មិន​មាន​ការ​ចូល​រួ​ម​ពី​តំណាង​រាស្ត្រ​គណបក្ស​សម រង្ស៊ី ដែល​ធ្វើ​ពហិការ​ទាំង​២៤​រូប​ បាន​បោះឆ្នោត​ជា​កញ្ចប់​ដើម្បី តែង​តាំង​រដ្ឋ​មន្ត្រី​ទាំង​អស់​។ ព្រះ​មហា​ក្សត្រ នរោត្តម សីហនុ បាន​មាន​ព្រះ​រាជ​បន្ទូល​ថា ការ​ព្រម​ព្រៀង​នេះ​​ធ្វើ​ឲ្យ​ប៉ះពាល់​ទាំង​រដ្ឋ​ធម្មនុញ្ញ​ និង​លទ្ធិ​ប្រជាធិប​តេយ្យ​សេរីពហុបក្ស​នៅកម្ពុជា​។

ព្រះ​មហាក្សត្រ​ នរោត្តម សីហនុ បាន​ដាក់ ​រាជ​្យ​​​កាល​ពីខែ​តុលា ឆ្នាំ​២០០៤​។ មិន​ដូច​ព្រះ​បិតា​របស់​ព្រះ​អង្គ​ទេ ព្រះមហា​ក្សត្រ​ សីហមុនី បាន​បង្ហាញ​នូវការ​មិន​ចូល​ចិត្ត​នយោបាយ​ចាប់​តាំង​ពី​បាន​ឡើង​គ្រង​រាជ​្យ។ កាល​ពីខែ​មករា​ខុទ្ទ​កាល័​យ​ព្រះ​បរម​រាជ​រាំង​បាន​ទាម​ទារ​ឲ្យ​ទុក​​ព្រះ​នាម​ព្រះ​មហាក្សត្រ​ សីហមុនី និង​សម្តេចមែ៉​ នរោត្តម មុនីនាថ​នៅ​ក្រៅ​ឆាក​នយោបាយទាំង​ស្រុង​។

ព្រះ​អង្គម្ចាស់ នរោត្តម រណប្ញទ្ធិ​ ជា​ព្រះ​រាម​​មាន​​មាតា​ទីទៃ​របស់​ព្រះ​មហាក្សត្រ​ សីហមុនី ដែល​បាន​ចូល​ប្រឡូកនៅ​​​​​ក្នុង​ឆាក​នយោបាយ​វិញ​នាពេលថ្មី​ៗនេះ​​ដោយ​ការ​​បង្កើត​គណបក្ស​​ថ្មី​គឺ​គណបក្ស​ សង្គម​ រាស្ត្រ រាជាធិបតេយ្យ​ បាន​​ឲ្យ​ដឹង​កាល​ពីខែ​មុន​ថា គណបក្ស​សង្គ្រោះ​ជាតិ​ ប្រសិន​បើ​ជាប់​ឆ្នោត​បាន​កាន់​អំណាច ​គឺ​ជា​ការ​គំរាម​កំហែង​ដល់​រាជានិយម​ ពីព្រោះ​គណបក្ស​ប្រឆាំង​នេះ​មិនដែល​គាំទ្រ​ព្រះ​មហា​ក្សត្រ​ទេ​។

លោក អ៊ុំ​ តារាវុធ​ ប្រធាន​ខុទ្ទ​កាល័យ​ព្រះ​បរ​ម​រាជ​វាំង​បានមាន​ប្រសាសន៍​កាល​ពី​ម្សិលមិញថា ការ​សម្រេច​​ព្រះ​ទ័យ​របស់​ព្រះ​មហាក្សត្រ​បច្ចុ​ប្បន្ន​ដើម្បីកោះ​ប្រជុំ​រដ្ឋ​សភា​កាល​ពីខែ​កញ្ញា​ គឺ​ត្រឹម​ត្រូវ​តាម​រដ្ឋ​ធម្មនុញ្ញ។

លោក អ៊ុំ តារាវុធ បានមាន​ប្រសាសន៍​ថា “តាម​រដ្ឋ​ធម្មនុញ្ញ​មិន​តម្រូវ​ឲ្យ​មាន​សមាជិក​សភា​ទាំង​១២០​រូប​ចូល​រួម​សម័យ​ប្រជុំ​លើក​ដំបូង​នោះទេ​។ ខ្ញុំ​យល់​ថា រដ្ឋ​សភា​នេះមាន​តែ​មួយ​បក្ស​មែន​ ប៉ុន្តែ​នៅពេល​ដែល​រដ្ឋ​សភា​បើ​ក​សម័យ​ប្រជុំ លើ​ក​ដំបូង​ ព្រះ​មហា​ក្សត្រ​បាន​កោះ​ហៅ​​គណបក្ស​ទាំង​ពីរ​ដែល​មាន​អាសនៈ​ក្នុង​រដ្ឋ​សភា​។​​គណបក្ស​សង្គ្រោះ​ជាតិ​មិន​បាន​ចូល​រួម​ទេ​”។

លោក​ អ៊ុំ តារាវុធ​ ក៏​បាន​លើក​ឡើង​ដែរ​ថា លោក សម រង្ស៊ី ​ដែល​ត្រូ​វបាន​រារាំង​មិន​ឲ្យឈរ​ឈ្មោះ​នៅក្នុងការ​បោះឆ្នោត​ជាតិ​កាល​ពីខែ​កក្កដា​ដោយ​សារ​មាន​ទោស​ព្រហ្ម​ទណ្ឌ​ដែល​មាន​​ព្រះ​មហាក្សត្រ​ សីហមុនី បាន​​ប្រទាន​ការ​​​លើកលែង​ទោស​នៅប៉ុន្មាន​សប្តាហ៍​នៅមុន​ការ​បោះឆ្នោត​នោះ អាច​មាន​ឥទ្ធិពល​ច្រើន​ជាងនេះ​ប្រសិន​បើ​គាត់​​ដឹក​នាំ​តំណាង​រាស្ត្រ​ទាំង​៥៥​រូប​របស់​គាត់​ចូល​រដ្ឋ​សភា​។

លោក​បានមាន​ប្រសាសន៍​ថា “ខ្ញុំ​សោក​ស្តាយ​ដែល​​គាត់​មិន​បាន​ចូល​រួម​​សម័យ​ប្រជុំ​សភា​​។​ប្រសិន​បើ​លោក សម រង្ស៊ី ​ ចូល​​ប្រជុំ​ គាត់​អាច​ប្រឆាំង​រដ្ឋាភិបាល​នៅ​ក្នុង​រដ្ឋ​សភា​ និង​កែ​ទម្រង់​បញ្ហា​ជា​ច្រើន​នៅក្នុង​សង្គម​​ដូច​នៅក្នុង​ប្រទេស​អ៊ុយ​ក្រែន​ សមាជិក​សភា​របស់​គេ​អាច​បោះឆ្នោត​​ទម្លាក់​ប្រធានា​ធិបតីរបស់​ខ្លួន​បាន​”៕​គឹមហឿន

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស