30 C
Phnom Penh

កម្មករដួលសន្លប់ទៀត​ហើយ​នៅ​រោងចក្រកាត់ដេរ សេនហ្ស៊ូ ក្នុងខណ្ឌពោធិ៍សែនជ័យ រាជធានីភ្នំពេ

ដោយ ឌឹ ខេមបូឌា ដេលី

បទវិភាគ

កម្មករ​ជាង១០០នាក់​នៅឯរោងចក្រ កាត់​ដេរ សេនហ្ស៊ូ ក្នុងរាជធានីភ្នំពេញ​បាន​ដួល​សន្លប់​កាល​ពីម្សិលមិញ ​មួយ​ថ្ងៃ​បន្ទាប់​ពី​មាន​ការ​ដួល​សន្លប់​យ៉ាង​ច្រើន​ដូច​គ្នា​នេះដែរ ​នៅ​ឯ​រោងចក្រ​ដដែល​នេះ​។

កម្មការិនីដំបូងបានដួលសន្លប់នៅម៉ោង​ប្រហែល​៨ព្រឹក ជាហេតុនាំឲ្យកម្មករ​​ទាំង​អស់​​ រត់​​ចេញ​​ពី​រោង​ចក្រ​​ក្នុង​សភាព​ភិតភ័យ​។  មជ្ឈម​ណ្ឌល​អប់រំច្បាប់​សម្រាប់​សហគមន៍​ ​ដែលជា​អង្គការ​​សិទ្ធិ​មនុស្ស​​បា​ន​ឲ្យដឹងថា កម្មករ​សរុប​​​១១៨​​នាក់​​ត្រូវ​បាន​បញ្ជូន​ទៅ​សម្រាក​នៅ​មន្ទីរ​​ពេទ្យ​។

កម្មការិនី ធី ធឿន ដែល​បាន​ដួលសន្លប់​កាល​ពីថ្ងៃ​ពុធ​និង​បា​ន​វិល​ត្រឡប់​ទៅធ្វើការ​វិញ​កាល​ពីម្សិលមិញ និង​គ្រាន់តែ​បាន​គ្រា​បងប្អូ​នស្រី​ឈឺរបស់ខ្លួនចេញពីរោងចក្រ​ប៉ុណ្ណោះ​​បា​ន​ឲ្យដឹងថា “កម្មករ​បានចាប់​ផ្តើមឈឺទ្រូង ​និងឈឺពោះ​ ហើយ​ក្រោយ​មក​​​ពេល​​ដែល​អ្នក​ទាំងនោះ​​ចាប់ផ្តើម​ដួល​សន្លប់​ យើងទាំ​ង​អស់​គ្នា​បាន​រត់ចេញក្រៅ​ ពី​ព្រោះ​​យើង​ខ្លាចខ្យល់ពុលណាស់”។​

កាល​ពីថ្ងៃ​ពុធ កម្មករ​ចំនួន​៦១នាក់​​​បាន​ដួល​សន្លប់​នៅ​រោងចក្រ សេនហ្ស៊ូ ស្ថិត​នៅ​​សួន​ឧស្សាហកម្ម​ វឌ្ឍនៈ ក្នុងខណ្ឌ​ពោធិ៍​សែន​ជ័យ​។ កម្មការិនីរូបនេះ​បាន​និយាយបន្ត​ទៀត​ថា “​គ្មាន​កង្ហា និងគ្មានម៉ាស៊ីនត្រជាក់នៅ​ខាង​ក្នុង​​ទេ។ ​​ក្តៅណាស់ ហើយវាធ្វើឲ្យ​រាងកាយ​របស់​យើង​ប្លែកហើយធ្ងន់”។

វេជ្ជបណ្ឌិត គិលានុបដ្ឋាយិកា ​បុគ្គលិក​រោងចក្រ និង​លោកអភិបាលខណ្ឌ​ទាំងអស់​គ្នា​បាន​ពន្យល់ខុសៗគ្នា​អំពី​ហេតុ​ការណ៍​​កម្ម​ការិនីដួលសន្លប់​នៅតាម​ផ្លូវវេងស្រេង។​ ទោះ​ជាយ៉ាងណា ​អ្នក​ទាំង​អស់​គ្នា​យល់​ស្រប​ថា កម្ម​ការិនី​​​ទាំង​នោះ​រងគ្រោះ​ថ្នាក់​ដោយ​សារ​តែមិនសូវមានពន្លឺ​ និង​ការមាន​​ខ្យល់មិន​គ្រប់​គ្រាន់សម្រាប់ដកដង្ហើម។​

លោកវេជ្ជបណ្ឌិត សែន ​ឌីណេ បាន​ឲ្យ​ដឹង​​ថា មិនអាច​ប្រាប់ឲ្យបានច្បាស់​ពីអ្វី​​ដែល​បណ្តាលឲ្យ​ស្ត្រី​ទាំងនេះដួលសន្លប់​បាន​ទេ​ ​ប៉ុន្តែលោក​បានលើកឡើង​​ថា របប​អាហារ​​ទ្រទ្រង់​ជាកត្តា​​ច្បាស់​លាស់​មួយ។ គួរ​បញ្ជាក់​ ថា គ្លីនិក​ឈ្មោះ​ថា ឯករាជ្យ របស់វេជ្ជ​បណ្ឌិត​រូប​នេះ​​​​ពេញដោយ​អ្នក​ដួលសន្លប់ចំនួន​៥០​នាក់​កាល​​ពី​​​ថ្ងៃ​​ពុធ​ និង​កាល​ពីម្សិលមិញ។

លោក​វេជ្ជបណ្ឌិត ឌីណេ បានបន្ត​​ទៀត​ថា  “ស្ត្រីខ្លះកំពុង​​ខ្សោះ​ទឹក។ ខ្លះវិលមុខ ហើយ​ខ្លះ​ទៀតក្អួតចង្អោរ​”។  លោក បាន​មានប្រ​សាសន៍បន្ត​ថា​ “ភាគ​ច្រើនក្នុងចំ​ណោម​​ពួកគេ​ យើងបានព្យាបាល​ដោយព្យួរសេរ៉ូម និងដាក់ខ្សល់​អុកស៊ីសែន ហើយ​រយៈពេល​​បួ​នម៉ោង​ក្រោយមក​ ពួក​គេ​​បានធូរស្រាលឡើងវិញ។​អ្នក​ខ្លះដែល​យើង​បានពិនិត្យជាតិស្ករ ហើយ​បានរក​ឃើញ​​ ថា ពួកគេខ្វះ​​ជាតិស្ករ”។

លោក ខឹម ស៊ុន សូដា អភិបាល​ខណ្ឌមាន​​ជ័យ​បានមាន​ប្រសាសន៍ថា​ ស្ថានភាព​នៅ​ក្នុង​រោងចក្រ​​​របស់​ចិន​ជារឿង​ត្រូវ​ស្តីបន្ទោស។​កាលពីថ្ងៃ​​ពុធ​ ថ្នាក់ដឹកនាំ​​របស់​លោក​​បាន​បន្ទោស​ការ​ដួលសន្លប់នេះទៅលើកម្មករ​ផឹក​ច្រើន​ជ្រុលហួសក្នុងពិធីជប់លៀង​មួយ​នៅ​យប់មុននោះ។

លោកបា​នឲ្យដឹងថា “ បេឡាជាតិរបប​សន្តិសុខ​សង្គម ​​បា​ន​ប្រាប់​រោងចក្រ​នេះថាពួកគេ ចាំបាច់ត្រូវរៀបចំស្ថាន ភាព ធ្វើយ៉ាងណា​កុំឲ្យក្តៅសម្រាប់កម្មករ​។ វេជ្ជបណ្ឌិត​មិន​ដឹង​​ពីមូល​ហេតុពួកគេ​ដួលសន្លប់នោះ​ទេ ប៉ុន្តែ​ បេឡាជាតិរបប​សន្តិសុខ​សង្គមបានស្នើ​ឲ្យកម្មការិនីស្ថិតនៅឆ្ងាយពី​រោងចក្រ រហូត​ដល់ថ្ងៃច័ន្ទ”។

ក្រុមអ្នកតំណាង​របស់​រោងចក្រ​មិនអាច​ទាក់ទង​តាមទូរស័ព្ទ ដើម្បី​ធ្វើ​អត្ថាធិប្បាយ​បាន​ទេ​​​កាលពីម្សិលមិញ។ អ្នកចាត់ការ​​​នៅ​រោង​ចក្រនេះ​បាន​​បដិ​សេធ​​មិនធ្វើអត្ថា​ធិប្បា​យ​​អំពី​រឿង​នេះ​ទេ។

រោងចក្រកាត់ដេរ សេនហ្ស៊ូ ដែលតាម​សេចក្តីរាយការណ៍ថា ​ផ្គត់ផ្គង់សម្លៀក​បំពាក់​កីឡាសកល ម៉ាក អាឌីដាស (Adidas) គឺជា​​រោងចក្រយ៉ាងហោច​​ទី៣ ដែលធ្លាប់មាន​ការ​​ដួលសន្លប់​យ៉ាងច្រើន​ក្នុងឆ្នាំ​២០១៤។ នៅ​ក្នុងរោងចក្របី ការដួលសន្លប់បាន​កើត​ឡើង​​រយៈ​ពេល​​ពីរថ្ងៃជាប់គ្នា។

កាលពីឆ្នាំមុន ​កម្មករចំនួន​៨២៣នាក់​​បាន​ដួលសន្លប់​នៅរោងចក្រ​ចំនួន១៥ដាច់​ដោយ​ឡែកពីគ្នា ចំណែកឯ​ក្នុងឆ្នាំ​២០១២ កម្មករ​ចំនួន​១.៦៨៦នាក់​​​បា​ន​ដួលសន្លប់​នៅរោង​ចក្រចំនួន២៤កន្លែង។

លទ្ធផល​ស្រាវជ្រាវអំពី​ហេតុ​ការណ៍​ដួល​សន្លប់នេះបញ្ជាក់​​ថា ជំងឺផ្លូវ​ចិត្ត​យ៉ាង​ច្រើន​​​អាចនៅពីក្រោយ​​ឧបទ្ទវហេតុ​ជា​ច្រើន​ក្នុងចំណោ​មឧបទ្ទវទាំង​នេះ។​លទ្ធផល​ស្រាវ​ជ្រាវបង្ហាញថា  ជំងឺផ្លូវចិត្ត​យ៉ាងច្រើន​ ​ដែល​គេ​ស្កាល់​​ដែរថាជា រោគសសៃ​ប្រសាទ​ មាន​ផលប៉ះ​​ពាល់​ដោយវិសមាមាត្រដល់​ក្មេង​ស្រី​ក្រីក្រ​។ ​វា​ភាគច្រើនកើត​ឡើងក្នុង​បរិយា​កាស​ជុំវិញ​ ជាទី​ដែលមាន​ទំ​នាក់​ទំនង​សង្គម​ខ្លាំង។

វេជ្ជបណ្ឌិត ​​ជៀន លាប​ ដែលបានព្យា​បាល​កម្មកររោងចក្រ សេនហ្ស៊ូ ចំនួន១៨​នាក់​នៅ​មន្ទីរពេទ្យបង្អែក​​ពោធិ៍ចិនតុងកាល​​ពីម្សិល​មិញ​​បានមាន​ប្រសាសន៍ថា ទិដ្ឋភាព​អ្នកដែល​ដួលសន្លប់ ​អាចបណ្តាលមកពី​មាន​ផល​ប៉ះ​ពាល់​ដូចគ្នានឹង​ហេតុការណ៍ដែលបាន​កើត​ឡើងកាលពី​ម្សិលមិញ​ និងនៅក្នុង​ទិដ្ឋភាព​ពីរ​លើកកន្លង​មកក្នុងឆ្នាំ​២០១៤។

នៅពេលសាកសួរពីអ្វីដែលបណ្តាល​ឲ្យ​កម្មការិនីធ្លាក់ខ្លួនឈឺនោះ វេជ្ជបណ្ឌិត លាប ឲ្យដឹងថា “យើងហៅថា ការ​មួហ្មង​ទូ​ទៅ​។ យើងមិនដឹងច្បាស់ពីមូលហេតុ​ដែល​បណ្តាល​ឲ្យកម្មការិនី​ទីដំបូងដួលសន្លប់ទេ វា​អាច​ជា​រឿង​អ្វីមួយ ប៉ុន្តែ​នៅពេល​មនុស្ស​ធ្វើការ​ក្នុង​ស្ថាន​ភាព​​បែបនេះ ហើយ​មនុស្ស​ម្នាក់​ដួល​សន្លប់ នៅពេលគេឃើញដូច្នោះ ​ពួកគេ​ក៏​ចាប់ផ្តើម​ដួលសន្លប់ដែរ​”៕ ប៊ុននី​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស