កាលពីសុក្រ កម្ពុជាបានស្នើឲ្យប្រទេសថៃផ្ដល់សំណងដល់គ្រួសាររបស់កម្មករខ្មែរប្រាំនាក់ ដែលបានសម្លាប់នៅពេលដែលគ្រាប់បែកសម័យសង្គ្រាមលោកលើកទី២ បានផ្ទុះនៅក្នុងហាងដែកអេតចាយមួយកន្លែងក្នុងទីក្រុងបាងកក។
ការផ្ទុះគ្រាប់កាលពីថ្ងៃពុធ នេះបានសម្លាប់មនុស្សប្រាំពីរនាក់ រងរបួស២០នាក់និងបំផ្លាញឬធ្វើឲ្យខូចខាតអគារ១០ខ្នង។ លោក កុយ គួង អ្នកនាំពាក្យក្រសួងការបរទេសបានមានប្រសាសន៍ថា “ប្រជាពលរដ្ឋរបស់យើងបានស្លាប់ ហើយយើងស្នើឲ្យម្ចាស់ហាងអេតចាយនោះឬអាជ្ញាធរថៃផ្ដល់សំណងដល់ជនរងគ្រោះទាំងអស់”។
ពីឆ្នាំ១៩៤១ ដល់ឆ្នាំ១៩៤៥ យន្តហោះចម្បាំងបានវាយប្រហារផ្លូវអាកាសជាច្រើនលើកទៅលើទីក្រុងបាងកក ដើម្បីបំផ្លាញមូលដ្ឋានយោធារបស់ជប៉ុន។
នៅសប្ដាហ៍នេះកម្មករសំណង់ដែលកំពុងជីកគ្រឹះអគារបានប្រទះឃើញវត្ថុដែកកប់ដីមួយ ហើយបានលក់វាទៅឲ្យក្រុមហ៊ុនអេតចាយ។ដោយចង់បានដែក ឈ្មួញអេតចាយនោះបានបង្គាប់ឲ្យកម្មកររបស់ខ្លួនប្រើភ្លើងផ្លុំកាត់គ្រាប់បែកនោះ ហើយវាបានផ្ទុះឡើងតែម្តង៕ គឹមហឿន