ដោយប្រឈមនឹងសម្ពាធជាសាធារណៈពីក្រុមហ៊ុនយីហោសម្លៀកបំពាក់ធំៗ និងសហជីពកម្មករនោះ ក្រសួងការងារនិងអង្គការពលកម្មអន្តរជាតិក្នុងរយៈពេលប៉ុន្មានខែខាងមុខនេះនឹងសហការគ្នាកែទម្រង់ប្រព័ន្ធកំណត់ប្រាក់ខែគោលបច្្ចុប្បន្នក្នុងវិស័យកាត់ដេរ។
យោងតាមលោក ទុន សុភ័ណ អ្នកសម្របសម្រួលថ្នាក់ជាតិរបស់អង្គការពលកម្មអន្តរជាតិបានឲ្យដឹងថា ដំណើរការកែទម្រង់នេះនឹងចាប់ផ្តើមជាមួយនឹងផែនការរៀបចំសិក្ខាសាលាជាសាធារណៈនៅថ្ងៃទី២៤ និង២៥ ខែមេសា ដែលនឹងបង្ហាញឲ្យឃើញពីជំនួបត្រីភាគីលើកដំបូងរវាងរដ្ឋាភិបាល ថៅកែរោងចក្រ និងមេដឹកនាំសហជីពចាប់តាំងពីការតវ៉ារបស់កម្មករត្រូវបានបង្ក្រាបដោយហិង្សាកាលពីដើមខែមករាមក។
លោក សុភ័ណ ថ្លែងថា “គោលបំណងនៃជំនួបនៅថ្ងៃទី២៤និង២៥ គឺដើម្បីឲ្យភាគីទាំងអស់ពិភាក្សាគ្នាអំពីគោលការណ៍កំណត់ពីប្រាក់ខែគោល ជាជាងនិយាយតែពីតួលេខ។ គោលបំណងនៃជំនួបនោះគឺដើម្បីឲ្យ [ភាគីទាំងបី] បង្កើតរូបមន្តសម្រាប់ប្រើក្នុងការកំណត់ប្រាក់ខែគោល ឬការកែសម្រួលប្រាក់ខែគោល”។ ក្រសួងការងារបានចេញផ្សាយសេចក្តីថ្លែងការណ៍មួយកាលពីម្សិលមិញដោយប្រកាសពីការធ្វើសិក្ខាសាលា និងការអញ្ជើញឲ្យសាធារណជនចូលរួម។
សេចក្តីថ្លែងការណ៍ដដែលនេះឲ្យដឹងថា “សិក្ខាសាលានោះនឹងបង្ហាញនូវហានិភ័យនៃការកំណត់ប្រាក់ខែគោលទាបបំផុត ឬខ្ពស់បំផុត ហើយធ្វើការវាយតម្លៃចំពោះការកំណត់ប្រាក់ខែគោលនោះ”។
សេចក្តីថ្លែងការណ៍នេះបន្តថា “ក្រសួងការងារនឹងជំរុញឲ្យមានការសិក្សាដើម្បីកំណត់ពីប្រាក់ខែគោលឲ្យបានឆាប់តាមដែលអាចធ្វើទៅបាន និងសូមស្វាគមន៍ចំពោះការចូលរួម និងការផ្តល់យោបល់ពីមជ្ឈដ្ឋានខាងក្រៅ”។
បើទោះជាមានការគំរាមធ្វើកូដកម្មទូទាំងប្រទេសទាមទារដំឡើងប្រាក់ខែគោលដល់១៦០ដុល្លារបន្ទាប់ពីបុណ្យចូលឆ្នាំខ្មែរក៏ដោយ ក៏ក្រសួងការងារបានបដិសេធម្តងហើយម្តងទៀតមិនព្រមចាប់ផ្តើមការចរចាជាថ្មីអំពីប្រាក់ខែគោលនេះដែរ។
លោក ហេង សួ អ្នកនាំពាក្យក្រសួងការងារបានមានប្រសាសន៍ថា ក្រសួងបានយល់ព្រមធ្វើការងារជាមួយអង្គការពលកម្មអន្តរជាតិដើម្បីកែទម្រង់ប្រព័ន្ធកំណត់ប្រាក់ខែគោលប៉ុន្តែមិនទាន់ពិចារណាពីការកែសម្រួលប្រាក់ឈ្នួលប្រចាំខែភ្លាមៗនៅឡើយទេ។
លោក ហេង សួ មានប្រសាសន៍ថា “ យើងត្រូវកំណត់មូលដ្ឋានច្បាស់លាស់សម្រាប់ការពិភាក្សាអំពីប្រាក់ខែគោលនេះ។ យើងនឹងផោ្តតលើផលលំបាកនៃការដំឡើងប្រាក់ខែគោលនេះ”។កាលពីខែមុន ក្រុមហ៊ុនយីហោសម្លៀកបំពាក់អន្តរជាតិចំនួន៣០បានសរសេរលិខិតផ្ញើជូនលោកឧបនាយករដ្ឋមន្ត្រី គាត ឈន់ ដែលរួមមានការអំពាវនាវឲ្យមានដំណើរការកំណត់ប្រាក់ខែគោលនេះឲ្យបានហ្មត់ចត់ថែមទៀត។
គណៈកម្មាធិការប្រឹក្សាការងារ ជាស្ថាប័នត្រីភាគីដែលមានកាតព្វកិច្ចកំណត់ពីប្រាក់ខែគោលនេះនោះ បានរងការរិះគន់យ៉ាងខ្លាំងពីសហជីពចំពោះការតំណាងឲ្យកម្មករមិនត្រឹមត្រូវ។ បច្ចុប្បន្ននេះ មានមេដឹកនាំសហជីពចំនួនពីរដែលមិនមានទំនាក់ទំនងជាមួយរដ្ឋាភិបាលនៅក្នុងគណៈកម្មាធិការប្រឹក្សាការងារដែលមានសមាជិក២៧រូប នេះ ដែលនាំឲ្យមានការបោះឆ្នោតគាំទ្រសំណើរបស់រដ្ឋាភិបាលដ៏លើសលប់ ហើយជារឿយៗលម្អៀងទៅរកថៅកែរោងចក្រ។
ទោះជាមានការសិក្សាដែលគាំទ្រដោយរដ្ឋាភិបាលបានធ្វើឡើងកាលពីឆ្នាំមុនបានប៉ាន់ប្រមាណថា ប្រាក់ខែល្មមរស់បានសម្រាប់កម្មកររោងចក្រគឺជាង១៥៥ដុល្លារក៏ដោយ ក៏កាលពីថ្ងៃទី២៤ខែធ្នូ គណៈកម្មាធិការប្រឹក្សាការងារបានកំណត់ប្រាក់ខែគោលត្រឹមតែ៩៥ដុល្លារ។ ដោយមានការតវ៉ាជំទាស់នឹងសេចក្តីសម្រេចនេះ ក្រសួងការងារបានសម្រេចដំឡើងប្រាក់ខែគោលជាឯកតោភាគីកាលពីថ្ងៃទី៣១ ខែធ្នូដល់១០០ដុល្លា។
កាលពីថ្ងៃទី២ និងទី៣ ខែមករា កងរាជអាវុធហត្ថបានបាញ់កម្មកររោងចក្រកាត់ដេរប្រាំនាក់ស្លាប់ និងចាប់ដាក់ពន្ធនាគារ២៣នាក់ក្នុងកិច្ចខិតខំប្រឹងប្រែងដើម្បីបញ្ចប់ភាពចលាចលនៅក្នុងឧស្សាហកម្មកាត់ដេរនេះ រួមទាំងមហាបាតុកម្មដែលបានកើតឡើងស្របពេលនឹងការតវ៉ាដែលដឹកនាំដោយគណបក្សសង្គ្រោះជាតិ៕សារុន