មេដឹកនាំសហជីពដែលមានផែនការធ្វើកូដកម្មស្នាក់នៅផ្ទះ ដើម្បីទាមទារប្រាក់ឈ្នួលអប្បបរមាខ្ពស់ជាងមុន សម្រាប់កម្មកររោងចក្រកាត់ដេរនៅប្រទេសកម្ពុជា បានឲ្យដឹងថា ខ្លួននឹងអំពាវនាវឲ្យមានការចូលរួមធ្វើកូដកម្មក្រោយពិធីបុណ្យចូលឆ្នាំប្រពៃណីជាតិខ្មែរ ទោះបីជាមានការគំរាមចាប់ខ្លួនអ្នកចែកខិតប័ណ្ណផ្សព្វផ្សាយពីផែនការរបស់ខ្លួនក៏ដោយ។
កាលពីថ្ងៃអាទិត្យ សមាជិកសហជីពមួយរូបត្រូវបាននគរបាលឃាត់ខ្លួននៅខេត្តស្វាយរៀង និងបានចែកខិតប័ណ្ណផ្សព្វផ្សាយពីផែនការធ្វើកូដកម្មក្នុងខែនេះ។
លោក កែវ សុខន អធិការរងនគរបាលក្រុងបាវិតបានបញ្ជាក់ច្បាស់ពីការឃាត់ខ្លួនបុរសរូបនោះកាលពីថ្ងៃអាទិត្យ ក៏ប៉ុន្តែ បានបដិសេធមិនធ្វើសេចក្តីអត្ថាធិប្បាយលម្អិត។
កាលពីម្សិលមិញ លោក កែវ គង់ អធិការនគរបាលក្រុងបាវិត បានឲ្យដឹងថា លោកមិនដឹងពីរឿងឃុំខ្លួនបុរសចែកខិតប័ណ្ណនេះទេ ក៏ប៉ុន្តែ លោកបានព្រមានចាប់ខ្លួនជនដែលព្យាយាមធ្វើដូច្នេះ។ លោកមានប្រសាសន៍ថា “ប្រសិនបើមានអ្នកចែកខិតប័ណ្ណ យើងនឹងចាប់ខ្លួនពួកគេ” ។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានលើកឡើងដូចគ្នានេះដែរ។
លោក ឡុង ឌីម៉ង់ បានមានប្រសាសន៍ថា “យើងមិនអនុញ្ញាតឲ្យពួកគេចែកខិតប័ណ្ណនៅទីសាធារណៈទេ ប្រសិនបើពួកគេមិនស្នើសុំសេចក្តីអនុញ្ញាតទេនោះ”។
ក៏ប៉ុន្តែ ទាំងលោក គង់ និងលោក ឌីម៉ង់ មិនបានពន្យល់អំពីច្បាប់ណាមួយដែលផ្តល់សិទ្ធិឲ្យពួកលោកចាប់ខ្លួនអ្នកចែកខិតប័ណ្ណ ក្នុងគោលបំណងជំរុញឲ្យកម្មកររោងចក្រកាត់ដេរឲ្យធ្វើកូដកម្មទេ។ សហជីពនៅពីក្រោយកូដកម្មនេះបានលើកឡើងថា មិនមានមូលដ្ឋានច្បាប់សម្រាប់គាំទ្រការគំរាមនេះទេ។
លោក ប៉ាវ ស៊ីណា ប្រធានសម័្ពន្ធសហជីពចលនាកម្មករ បានមានប្រសាសន៍ថា “ពួកគេព្យាយាមបិទសិទ្ធិរបស់យើង ប៉ុន្តែ យើងមិនអាចទទួលយកបានទេ ព្រោះការធ្វើបែបនេះរំលោភសិទ្ធិរបស់យើង និងច្បាប់រដ្ឋធម្មនុញ្ញ”។
អ្នកដែលត្រូវបានឃាត់ខ្លួននៅក្រុងបាវិត កាលពីថ្ងៃអាទិត្យ ខណៈដែលកំពុងធ្វើដំណើរតាមផ្លូវសំដៅទៅការិយាល័យមូលដ្ឋានរបស់សហជីពដោយមានខិតប័ណ្ណប្រហែលជា៥.០០០សន្លឹកនោះ គឺជាសមាជិកសហជីពរបស់លោក ស៊ីណា។
លោក ស៊ីណា បានឲ្យដឹងថា សហជីពរបស់លោកបានចែកខិតប័ណ្ណអស់១៥.០០០ច្បាប់ហើយ ហើយថែមទាំងមានផែនការប្តូរយុទ្ធសាស្ត្រក្នុងការចែកខិតប័ណ្ណដែលនៅសល់ទៀតផង។ ក៏ប៉ុន្តែ បានបដិសេធមិននិយាយលម្អិតជាងនេះ ដើម្បីកុំឲ្យអាជ្ញាធរដឹង។
លោកបានមានប្រសាសន៍ថា “ដោយសារតែរដ្ឋាភិបាលប្រើគ្រប់វិធីដើម្បីទប់់ស្កាត់កម្មករមិនឲ្យចូលរួមធ្វើកូដកម្ម យើងត្រូវតែប្រើយុទ្ធសាស្ត្រផ្សេងៗទៀត ដើម្បីវាយបកដោយសន្តិវិធី ដោយមិនប្រឈមនឹងអាជ្ញាធរទេ”។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានឲ្យដឹងផងដែរថា សហជីពរបស់លោកក៏កំពុងផ្សព្វផ្សាយអំពីផែនការធ្វើកូដកម្មតាមវិទ្យុផងដែរ។
អ្នកស្រី យ៉ង សុខភ័ណ ប្រធានសម័្ពន្ធសហជីពកម្ពុជា បានមានប្រសាសន៍ថា “ យើងកំពុងផ្សព្វផ្សាយផែនការធ្វើកូដកម្មស្នាក់នៅផ្ទះរបស់យើងពីថ្ងៃទី១៧ ដល់ថ្ងៃទី២២ ទោះបីជា GMAC [សមាគមរោងចក្រកាត់ដេរនៅកម្ពុជា] និងក្រសួងការងារ និងបណ្តុះបណ្តាលវិជ្ជាជីវៈបដិសេធមិនឲ្យយើងធ្វើក៏ដោយ”។
សហជីពនានាបានផ្ញើលិខិតមួយច្បាប់ជូនសមាគម GMAC កាលពីសប្តាហ៍មុន ដើម្បីស្នើសុំសេចក្តីអនុញ្ញាតប្រើប្រាស់ថ្ងៃឈប់សម្រាកមួយចំនួនក្នុងចំណោមថ្ងៃឈប់សម្រាកប្រចាំឆ្នាំទាំង១៨ថ្ងៃដែលកម្មករមានស្របច្បាប់ សម្រាប់ធ្វើកូដកម្ម ប៉ុន្តែ លោកស្រី សុភ័ណ បានឲ្យដឹងថា សហជីពមិនទាន់ទទួលបានចម្លើយតបវិញនៅឡើយទេ។
លោក កែន លូ អគ្គលេខាធិការសមាគម GMAC បានឲ្យដឹងថា សហជីពត្រូវបានផ្ញើឲ្យនូវលិខិតឆ្លើយតបមួយ ដែលមានការព្រមានថា នឹងមានវិធានការវិន័យចំពោះអ្នកដែលចូលរួមធ្វើកូដកម្ម។ លោកបានមានប្រសាសន៍ថា “ពួកគេនឹងរងចំណាត់ការវិន័យទៅតាមបទបញ្ជាផ្ទៃក្នុង” របស់រោងចក្រនីមួយ។
សហជីពចង់ឲ្យមានការធានាថា កូដករនឹងមិនបាត់បង់ប្រាក់ឈ្នួល ឬក៏ប្រាក់រង្វាន់ប្រចាំខែរបស់ពួកគេទេ ក៏ប៉ុន្តែ លោក កែន លូ បានលើកឡើងថា យ៉ាងហោចណាស់ក៏មានការ ដាក់ចេញនូវចំណាត់ការបែបនេះដែរ។ លោកបានមានប្រសាសន៍ថា “នោះអាចជាចំណាត់ការតិចបំផុតហើយ”។ លោកបានលើកឡើងបន្ថែមទៀតថា កម្មករអាចប្រឈមនឹងការបញ្ឈប់ពីការងារ។
សមាគម GMAC បានអះអាងថា ច្បាប់ការងារមិនអនុញ្ញាតឲ្យកម្មករប្រើថ្ងៃឈប់សម្រាកប្រចាំឆ្នាំរបស់ខ្លួន ដូចដែលសហជីពបានស្នើឡើងឡើយ៕ សុធា
(រាយការណ៍បន្ថែមដោយ Zsombor Peter)